Yu Mas Bilip Tru Long Jehova

“Yumi mas bilip tru long [Jehova], na mekim gutpela pasin. . . . Yu mas amamas long [Jehova].”−SAM 37:​3, 4.

LONG taim bilong ol aposel, ol hetman bilong lotu Juda i tok ol i save lotu long God. Tasol ol i no bilip tru long God. Ol i kalapim ol lo bilong Em na mekim nogut long lain bilong Em. (Matyu 15:3; Jon 15:20) Olsem na God i sakim ol na ‘ples bilong ol i stap nating.’ (Matyu 23:38) Long yia 70 C.E. ol ami bilong Rom i bagarapim Jerusalem na haus lotu bilong en, na planti hetman bilong lotu wantaim lain bilong ol i bagarap. Tasol ol man i bin bilip tru long Jehova, ol i no bagarap, long wanem ol i bihainim toksave em lain bilong Jehova i givim long ol na ol i ranawe pinis na i stap gut.−Matyu 24:​15-22; Luk 21:​20-24.

₂ Nau long las taim bilong dispela pasin nogut, ol lotu bilong dispela graun i bilip tru long trupela God, Jehova, o nogat? Ol i bihainim ol lo bilong em na mekim laik bilong em, o ol i bihainim pasin bilong ol hetman bilong lotu long taim bilong ol aposel, em God i sakim ol? Wanem lotu long nau i “bilip tru long [Jehova], na mekim gutpela pasin,” na Jehova bai lukautim ol na ol i no ken bagarap?−Sam 37:⁠3.

Olsem Wanem long Pasin Bilong Laikim Tru Ol Brata?

₃ Long dispela taim Pop John Paul Namba 2 i bin mekim toksave, olsem: ‘Kain kain samting i laik bagarapim olgeta man.’ Em i tok strong olsem ‘olgeta lotu i mas wok wantaim bambai ol dispela samting i no ken bagarapim ol man.’ Em i tok, ‘ol bikpela man bilong lotu i mas wok wantaim bilong kamapim gutaim na pasin wanbel. Dispela em i laik bilong God.’ Ating yu ting olsem, ‘Em gutpela tok,’ tasol askim skin bilong yu yet: Sapos God i laik bai olgeta lotu i mas wok wantaim long kamapim gutaim, bilong wanem em i no blesim ol wok ol i bin mekim inap planti handet yia pinis bilong kamapim gutaim? Em i no blesim wok bilong ol, long wanem ol i no bihainim rot em i makim bilong kamapim gutaim na pasin wanbel, em Kingdom bilong em long heven. (Matyu 6:​9, 10) Ol i insait long ol wok politik bilong dispela graun na ol i bin helpim ol pait i kamap long graun na ol i bin kapsaitim blut bilong planti man. Long ol pait i bin kamap long taim bilong yumi, Katolik i kilim i dai Katolik, na Talatala i kilim i dai Talatala, na Muslim i kilim i dai Muslim, na ol narapela lotu tu i bin mekim olsem. Tasol ol wanlotu i mas i stap brata brata, a? Tru, tasol ol dispela brata wanlotu i bin mekim wanem? Ol i tok ol i mekim wok bilong God na ol i kilim i dai brata bilong ol!

₄ Jisas i makim stretpela pasin ol man i lotu tru long God ol i mas bihainim. Em i tokim ol disaipel bilong em: “Mi givim nupela lo long yupela: Yupela i mas laikim tru ol brata. Mi bin laikim yupela tru. Olsem tasol yupela i mas laikim tru ol brata. Sapos yupela i laikim tru ol brata, orait bambai olgeta man i save, yupela i disaipel bilong mi.” (Jon 13:​34, 35) Olsem na ol man i bihainim lotu i tru, ol i mas laikim tru ol brata. Jisas i tok, dispela pasin sori i mas i stap namel long ol Kristen tru em i olsem “nupela lo.” Wanem samting i mekim na dispela pasin bilong laikim tru ol brata em i nupela o i narapela kain? Jisas i tok: “Mi bin laikim yupela tru. Olsem tasol yupela i mas laikim tru ol brata.” Jisas i laikim tru ol brata wanlotu bilong em, olsem na em i lusim laip bilong em bilong helpim ol. Ol tu i mas redi long mekim olsem. Ol i no ken kilim i dai ol brata bilong ol. Nogat. Ol i mas redi long lusim laip bilong ol yet bilong helpim ol brata. Olsem na dispela lo em i nupela lo, long wanem lo bilong Moses i no tok ol i mas mekim olsem.

₅ Baibel i tok: “Sapos wanpela man i tok, ‘Mi givim bel bilong mi long God,’ na sapos em i bel nogut long brata, orait dispela man em i giaman. I no gat wanpela man i bin lukim God. Man i lukim brata bilong en na i no save laikim em, dispela man em i no inap laikim God. Dispela lo yumi kisim long Krais, em i olsem: Man i save laikim tru God, em i mas laikim tru brata bilong en tu.” (1 Jon 4:​20, 21) Ol manmeri i bilip tru long God, ol i save laikim tru ol brata, olsem na maski ol i bilong narapela narapela lain, tasol ol i stap wanbel tru. Long 1 Korin 1:10 aposel Pol i tok: “Yupela olgeta i mas mekim wankain tok tasol. Yupela no ken bruk lain nabaut. Yupela mas i stap wankain tru long wankain tingting na wankain laik.”−Lukim tu 1 Jon 3:​10-12.

₆ Wanpela buk (The World Book Encyclopedia) i tok, inap olsem 55 milion manmeri i bin i dai long Namba Tu Pait Bilong Olgeta Hap. Ol manmeri bilong olgeta bikpela lotu ol i bin kilim i dai ol dispela manmeri. Tasol i no gat wanpela Witnes Bilong Jehova i bin kilim wanpela i dai. Nogat tru. Bilong wanem? Long wanem ol Witnes Bilong Jehova i bihainim lo i tok ol i mas laikim tru ol brata. Ol i no save insait long pait bilong ol lain man, olsem na ol man i bin putim ol long ol kalabus nogut na planti ol i dai. Tasol ol inap mekim tok wankain olsem Pol long Aposel sapta 20 ves 26, em i tok: “Sapos wanpela namel long yupela em i lus, dispela em i no asua bilong mi.”−Aposel 20:⁠26.

₇ Long dispela taim, wanpela pris Katolik i bin i stap pasto bilong ol boskru bilong balus i tromoi bom nuklia long Japan long yia 1945, em i tok: “Inap 1,700 yia pinis misin i wok long kirapim ol man long ting olsem i no gat rong long pait. Ol i kirapim ol man long ting olsem, sapos ol i insait long pait ol i mekim gutpela wok Kristen. Tasol dispela pasin i no stret. Ol i paulim tingting bilong yumi. . . . Ol i tok i gat Stretpela Pait, tasol Jisas i no lainim ol man olsem. . . . I no gat wanpela samting Jisas i bin mekim o wanpela tok em i bin mekim em inap kirapim yumi long ting olsem i no stret long kukim ol man long bom nuklia, tasol i no gat rong long tromoi paia-bom long ol. Nogat tru.”

₈ Sampela mun bipo wanpela nius bilong lotu Katolik (Catholic Herald bilong London) i tok: “Ol Kristen bilong pastaim . . . i bilipim tru tok bilong Jisas na ol i no save insait long ami bilong Rom, maski ol i mas i dai. Sapos ol lotu i bin holimpas dispela bilip long pastaim, ating ol samting i no ken kirap olsem i kamap pinis? . . . Sapos ol lotu long nau i bung wantaim na tokaut olsem pait i no stret . . . orait, olgeta manmeri bilong ol dispela lotu ol i mas mekim olsem ol Kristen bilong pastaim i bin mekim−ol i mas bihainim maus bilong bel na ol i no ken insait long pait. Sapos ol i mekim olsem, ating bai gutaim i kamap. Tasol yumi save ol i no inap mekim olsem.”

₉ Olsem na ol lotu bilong dispela graun ol i no bihainim lo bilong God. Ol i wankain olsem ol Farisi bilong bipo−ol i man bilong tupela “maus” na ol i no bilip tru long God. “Long maus ol i save tok olsem: ‘Mi save long God.’ Tasol long wokabaut bilong ol ol i save givim baksait long God. God i no laik tru long ol. Ol i man bilong sakim tok, na ol i no inap tru long mekim wanpela gutpela pasin.” (Taitas 1:16) Ol i no mekim wok bilong God, olsem na God i sakim ol pinis, olsem em i bin sakim lotu Juda long taim bilong ol aposel.−Mt. 15:​9, 14.

Yumi Mas Bilip long Jehova Bambai Yumi No Ken Bagarap

₁₀ Olsem na yu no ken bilip long ol bikpela man bilong dispela graun o ol bikpela man bilong ol lotu bilong dispela graun. Yu mas bilip tru long dispela Man em tasol inap truim ol tok promis bilong em. (Josua 23:14) Tingim ol samting i bin kamap inap olsem 750 yia paslain long taim bilong Krais, olsem long taim bilong King Hesekaia bilong Juda. Baibel i stori long King Hesekaia na i tok: “Em i save mekim pasin i stret long ai bilong Jehova” (2 King 18:​3, NW ) Long taim bilong Hesekaia, bikpela gavman bilong Asiria i laik pait long Jerusalem. Ol i salim draipela ami i go. King bilong Asiria, em Senakerip, em i salim wanpela man i go tokim Hesekaia em i no ken bekim pait; em i mas givim Jerusalem long ol. Dispela man i tok: “King i tok olsem: ‘Yupela i no ken larim Hesekaia i giamanim yupela; em i no inap helpim yupela long abrusim bagarap long han bilong mi. Sapos Hesekaia i tok, “Jehova bai helpim yumi na king bilong Asiria i no ken kisim dispela taun,” orait yupela i no ken bihainim tok bilong em na bilip na wet long Jehova.’ ”−2 King 18:​29, 30, NW.

₁₁ Bikpela lain ami i kam na i laik kirapim pait long ol. Orait, Hesekaia i mekim wanem? Baibel i tok: “Hesekaia i kirap long beten long Jehova na em i tok: ‘O Jehova, yu God bilong Isrel, yu stap antap long ol ensel, yu wanpela tasol yu God tru bilong olgeta kingdom bilong graun. Yu yet yu bin wokim ples antap na dispela graun. O Jehova, plis, putim yau. O Jehova, plis, opim ai bilong yu na lukim, na putim yau long tok Senakerip i salim bilong tok bilas long God i gat laip. . . . O Jehova, God bilong mipela, plis, kisim bek mipela long han bilong em, bambai olgeta kingdom bilong graun ol i ken save, yu Jehova, yu wanpela tasol yu God tru.’ ”−2 King 19:​15-19, NW.

₁₂ Jehova i harim dispela beten na em i salim profet Aisaia i go long Hesekaia na Aisaia i tokim em: “Jehova i tok long king bilong Asiria, olsem: ‘Em i no ken i kam insait long dispela taun, na em i no ken sutim wanpela spia i kam o holim plang o hipim graun klostu long banis bilong taun bai ol i ken pait long taun.’ ” Olsem wanem? Hesekaia i mas kisim ami i go pait wantaim lain bilong Asiria? Nogat. Em i mas bilip long Jehova na wetim Jehova i helpim em. Hesekaia i mekim olsem na wanem samting i bin kamap? “Long dispela nait ensel bilong Jehova i go na em i kilim i dai 185,000 long kem bilong Asiria.” Na Senakerip tu i kisim nogut long tok bilas em i bin sutim long Jehova na long ol wokboi bilong Jehova−bihain tupela pikinini man bilong em yet i kilim em i dai. Olsem na ol Asiria i no sutim wanpela spia samting i go. Olgeta samting i kamap stret tru olsem Jehova i tok pinis.−2 King 19:​32-37, NW.

₁₃ Long taim bilong yumi wankain samting bai kamap. Tok bilas bilong ol man bilong dispela graun i no ken pundaunim ol manmeri i bilip tru long Jehova, na ol bai abrusim bagarap long pinis bilong dispela taim nau. “God, yu no save givim baksait long ol manmeri i go long yu. Olsem na ol man i save long yu bai ol i bilip tru long yu.” (Sam 9:10) Tasol taim Jehova i no givim strafe yet long ol man nogut, em i singautim ol man i gat gutpela bel ol i kam long em bambai em i ken lukautim ol. Ol dispela man em ol i ‘bikpela lain’ na ol i bilong olgeta hap. Ol dispela manmeri bai winim taim bilong “bikpela hevi.” Bai ol i abrusim bagarap, long wanem ol i bilip tru long Jehova, na ‘ol i lotu long em long san na long nait.’−Revelesen 7:​9-15.

₁₄ Ol dispela manmeri i bihainim wanpela singaut i kamap strong long olgeta hap long dispela taim, olsem Aisaia 2:​2, 3 (NW ) i tok: “Long taim bilong bihain tru maunten bilong haus bilong Jehova bai kamap strong . . . Na planti lain man bai go na ol bai tok: ‘Yupela ol man yupela kam, na yumi go antap long maunten bilong Jehova, . . . na bai em i lainim yumi long pasin bilong em, na bai yumi wokabaut long rot bilong em.’ ” Ves 4 i tok, ol man i mekim olsem, “ol i mas wokim ol bainat bilong ol i kamap samting bilong wokim gaden, na ol i mas wokim ol spia bilong ol i kamap sisis bilong katim han bilong diwai. Narapela lain i no ken holim bainat bilong pait long narapela lain, na ol i no ken lain moa long pait.”

₁₅ Long taim bilong yumi, husat ol i bin wokim ol bainat bilong ol i kamap samting bilong wokim gaden? Husat ol i no lain moa long pait? Husat i laikim tumas ol brata sista wanlotu bilong ol i stap long olgeta hap na ol i stap wanbel tru? Husat ol i save bilip tru long Jehova na singautim ol narapela man long mekim olsem? Em ol Witnes Bilong Jehova tasol, ol i bihainim pasin bilong Hesekaia na ol i givim bel olgeta long Jehova na bihainim tok bilong em.

Gutpela Taim Bai Kamap Bihain

₁₆ Jehova i tok promis long givim planti gutpela samting long man i bilip tru long em. Em bai mekim olsem taim em i pinisim pasin nogut nau i stap long graun na em i kamapim nupela taim long graun. Long dispela nupela taim, bai ol man i no ken pren moa o tingting nogut long ol narapela man na ting olsem ol i laik nogutim ol. Bai i no gat sampela man i stap rabis. Bai i no gat pasin i no stret o pasin nogut. Ol man i no ken putim gan aninit long pilo bilong ol taim ol i slip long nait. Ol bikpela pait bilong graun, na pasin bilong rausim bel, ol dispela samting i no ken kamap moa na kilim i dai ol man. Revelesen 21:4 i tok promis olsem God bai “mekim drai olgeta wara i stap long ai bilong ol. Bai ol man i no i dai moa, na ol i no bel hevi moa, na ol i no krai na kisim pen gen. Dispela samting bilong bipo em i pinis olgeta.”

₁₇ Dispela graun bai kamap gutpela ples paradais, olsem Jisas i tok promis pinis long Luk 23:43. Baibel i tok, sik na i dai bai pinis, olsem na ol manmeri i bilip tru long Jehova bai ol inap i stap oltaim long paradais long graun. Olgeta samting Maika sapta 4 ves 4 i tok long en bai kamap tru olgeta, i tok: “Olgeta man bai sindaun aninit long rop wain na diwai fik bilong ol, na i no gat man bai mekim pretim ol.” Sapos yu stap namel long ol man na yu inap bilip tru long olgeta wan wan, bai yu amamas, a? Long nupela taim bihain bai i olsem, long wanem Aisaia 54:​13, NW, i tok: “Jehova bai skulim olgeta pikinini bilong yu, na ol dispela pikinini bilong yu bai stap bel isi tru.”

₁₈ Long nau tu, long olgeta de, ol milion milion Witnes Bilong Jehova i kisim gutpela pe, long wanem ol i bilip long Jehova. Ol i abrusim planti hevi i save painim ol man i no bilip tru long Jehova. Olsem: Ol i bihainim ol lo bilong Jehova na dispela i helpim ol long abrusim sik kensa bilong wetlewa i kisim ol man i save smok. Ol i no mekim pasin pamuk o pasin bilong sodom, olsem na ol i abrusim ol sik bilong pamuk, olsem dispela sik nogut AIDS. Ol i no smok spakbrus o kisim ol narapela drak, olsem na ol i abrusim sik bilong skin na tingting i save painim ol man i kisim ol dispela drak, na ol i no kisim sik AIDS long rot bilong kisim drak olsem sut. Ol i no save kisim blut long haus sik, olsem na ol i abrusim ol sik ol man i kisim long dispela rot. Wanpela sik olsem em sik hepataitas. Long hap bilong Amerika dispela sik i save kilim i dai o bagarapim skin bilong 10,000 sikman long olgeta yia, em ol i kisim dispela sik long rot bilong blut ol dokta i givim long ol long haus sik.

₁₉ Ol man i bilip tru long Jehova, maski ol i go lapun o sik i kisim ol o bagarap i painim ol na ol i dai, tasol bai Jehova i kisim bek ol. Bai em i kirapim bek ol. Olsem na aposel Pol i kirapim yumi long bilip long “strong bilong God, em i save kirapim bek ol daiman.”−2 Korin 1:⁠9.

Jehova i Lukautim Ol Wokboi Bilong Em

₂₀ Tasol yumi no ken lusim tingting long tok bilong Baibel: “Seten i stap het bilong olgeta man bilong graun.” (1 Jon 5:19) Olsem na sapos yu bilip long God, Seten na ol lain bilong em bai birua long yu. Ol i laik bagarapim bilip bilong yu, olsem na bai ol i tok bilas long yu o mekim nogut long yu, olsem ol i bin mekim long Jisas. Taim ol i nilim Jisas pinis long diwai, “ol manmeri i kam i go, ol i tok bilas long em. Ol i tantanim het na i tok, ‘. . . Sapos yu Pikinini Bilong God, orait yu lusim diwai [pos] na yu kam daun!’ Ol bikpris wantaim ol saveman bilong lo na ol hetman tu ol i tok bilas, i spik, ‘Em i bin helpim ol arapela man, tasol em i no inap helpim em yet. . . . Em i bilip long God . . . Orait, sapos God i laikim em, em i ken helpim em nau.’ ”−Matyu 27:​39-43.

₂₁ Tasol God i helpim Jisas. Tripela de bihain em i kirapim bek Jisas long matmat. Tasol ol man bilong dispela taim bipo, em ol i bin tok bilas, ol i bagarap−ol ami bilong Rom i kilim ol i dai o kisim ol i go wok kalabus. Na tu, Krais em i King bilong Kingdom bilong God long heven, na em yet bai bosim wok bilong kirapim bek ol man i dai pinis. Olsem na sapos sampela bilong ol dispela man bilong tok bilas ol i kirap bek long taim bilong kirapim bek ol daiman, orait ol i mas daun long dispela Man ol i bin tok bilas long em 2,000 yia bipo! Tru tumas, Jehova i save lukautim olgeta wokboi bilong em! Ol i save long dispela samting na ol i tok: “Mi save bilip long God, olsem na mi no ken pret long wanpela samting. Bai ol man inap mekim wanem samting long mi? Nogat.”−Sam 56:⁠11.

₂₂ Jehova i givim tok long ol wokboi bilong em olsem: “Sapos man i bilip na wet long Jehova, na em i tingim Jehova inap helpim em, dispela man bai kisim blesing. Na em bai kamap olsem wanpela diwai ol i bin planim long arere bilong wara, na diwai i putim rop i go daun na rop i bihainim wara i go; na taim bikpela san i holim dispela diwai em i no ken pilim, na ol lip bilong en i kamap planti moa na i gutpela tru. Na long taim bilong bikpela san na i no gat ren i kam daun, em i no ken tingting planti, na em i no ken lus long karim kaikai.” Tasol Jehova i tok moa: “Sapos wanpela man i ting ol man bilong graun inap helpim em na em i ting ol man i gat strong inap long helpim em, na em i givim baksait long Jehova yet, orait dispela man bai kisim nogut. Em bai kamap olsem wanpela diwai em wanpela i sanap i stap long ples wesan nating, na sapos gutaim i kamap, dispela man bai no inap save.”−Jeremaia 17:​5-8, NW.

₂₃ Olsem na long dispela taim nogut bilong pret, mipela laik kirapim yupela long “bilip tru long God, na mekim gutpela pasin. Yu mekim olsem na bai yu stap gut oltaim long graun bilong yu, na i no gat wanpela samting i ken bagarapim yu. Yu mas amamas long Bikpela, na em bai i givim yu ol samting yu laikim tru.” (Sam 37:​3, 4) Yu mas bilip long God na bai yu inap kisim samting yu laikim tru, em laip i stap oltaim long nupela stretpela pasin, em dispela God yumi bilip tru long em i tok promis pinis long kamapim!

Sampela Askim Bilong Kamapim Gen Ol Bikpela Tok

◻ Ol man i bilip long Jehova ol i mas bihainim wanem lo?

◻ Ol lotu bilong dispela graun ol i save tokim lain bilong ol long bilip long Jehova?

◻ King Hesekaia i bilip long Jehova, olsem na Jehova i helpim em olsem wanem?

◻ Long taim bilong yumi, olsem wanem ol samting Aisaia 2:​2-4 i kolim ol i kamap tru olgeta?

◻ Ol man i bilip long Jehova ol bai kisim wanem ol gutpela samting long bihain?

[Askim Bilong Stadi]

l, 2. (a) Long taim bilong ol aposel, wanem samting i painim ol man ol i no bilip long Jehova? Olsem wanem long ol man i bilip long Jehova? (b) I gat wanem ol askim long ol lotu bilong nau?

3. Ol lotu i wok strong long kamapim pasin wanbel na pinisim pait, tasol bilong wanem wok bilong ol i lus nating?

4. Jisas i kolim wanem lotu ol man i lotu tru long God ol i mas bihainim? Bilong wanem em i tok, dispela em i “nupela lo”?

5. Baibel i tok wanem na yumi save, ol man i lotu tru long God ol i mas i stap wanbel na narapela i laikim tru narapela?

6. Olsem wanem ol Witnes Bilong Jehova inap tok, ol i no gat asua long blut bilong ol man?

7, 8. Sampela pris bilong lotu ol i tok wanem long ol i gat asua long blut bilong man?

9. Olsem wanem mipela inap tok Jehova i sakim pinis ol lotu bilong dispela graun?

10, 11. Taim ol Asiria i singaut long ol Juda i mas givim Jerusalem long ol, King Hesekaia i mekim wanem? Man bilong givim tok long Senakerip long ol em i tok bilas long husat tru?

12. Jehova i harim beten bilong Hesekaia na em i mekim wanem?

13, 14. Ol manmeri bilong olgeta lain ol i mekim wanem na bai ol i abrusim bagarap long pinis bilong dispela taim nogut bilong nau?

15. Long nau husat ol i truim tok profet bilong Aisaia 2:​2-4? Ol i mekim wanem?

16, 17. Bihain bai Jehova i givim wanem ol gutpela samting long ol man i bilip long em?

18. Long nau tu, wanem gutpela pe ol man i bilip long Jehova ol i save kisim?

19. Sapos man i mekim wok bilong Jehova long nau, na em i dai, bai Jehova i kisim em bek olsem wanem?

20, 21. (a) Yumi mas save, wanem pasin birua bai painim yumi olsem em i bin painim Jisas? (b) Jehova i mekim wanem long helpim lain bilong em, olsem em i bin mekim long Jisas?

22. Jehova i givim wanem tok long ol man i bilip long em? Em i givim wanem tok long ol man i no bilip long em?

23. Sapos yumi laik kisim laip i stap oltaim oltaim, yumi mas mekim wanem?

[Piksa long pes 17]

King bilong Asiria i salim wanpela man i go tok bilas long Jehova na tokim Hesekaia long givim Jerusalem long ol

[Piksa long pes 18]

Long nupela taim ol man i bilip tru long Jehova bai ol i stap bel isi tru na i gat gutpela sindaun