Insait Bilong Ol Tok i Kam Long Olgeta Hap
Gutpela Pasin Bilong Bihainim
Long dispela taim wanpela man i raitim pas long wanpela nius (New Haven Register bilong Konektikat) na em i stori long ol kibung bilong ol Witnes Bilong Jehova. Pas i tok: “Wanpela taim long olgeta yia ol Witnes Bilong Jehova i save mekim bikpela kibung na nau tasol ol i mekim hia long stediam Kolisiam. Planti lain i save bung long dispela stediam, tasol ol man i save amamas moa yet long dispela lain. Taim ol i no bung yet long stediam ol i save klinim gut tru, na taim ol i laik lusim ol i save klinim gut tru. Kirap long taim ol i bung long stediam long yia i go pinis na i kam inap long taim ol i bung long dispela yia, stediam i no i stap klin tru olsem.”
Man bilong raitim dispela pas em i stori long wanpela kibung ol Witnes i bin mekim sampela yia bipo na em i tok: “Inap olsem 75,000 Witnes i bung insait long Yanki Stediam, na 20,000 moa ol i sindaun ausait na harim ol tok long rot bilong ol masin bilong bikmaus long wanpela bung bilong lotu ol manmeri bilong Nu Yok i kirap nogut long en. Long namba wan de inap olsem 200 plisman i stap. Ol i save putim planti plisman olsem bilong lukautim bikpela lain olsem. Tasol long ol narapela de bilong kibung ol i putim tupela plisman tasol bilong stiaim ol. Kaunsil bilong biktaun Nu Yok i salim ol lain bilong helt, na ol lain bilong redim kaikai bilong planti man, na ol plisman, na ol paiaman i go lukim dispela kibung i wok gut tru bambai ol i ken kisim save na lain long mekim gut ol wok olsem. Ol Witnes i redim kaikai na tilim long lain bilong ol, tasol taim ol i lusim dispela ples i no gat wanpela liklik hap pipia kaikai o pipia pepa samting i stap. Maski yu gat narapela lotu o yu sakim olgeta lotu, . . . yu mas litimapim nem bilong dispela lain, long wanem ol i givim bel tru long God, na ol i kirapim ol man long i stap klin long skin na long pasin bilong ol, na ol i makim stretpela pasin olgeta man i mas bihainim, na ol i bihainim gutpela pasin bilong lukautim skin bilong ol. Gutpela sapos yumi olgeta i bihainim gutpela pasin bilong dispela lain ol i gat pasin daun na ol i givim bel tru long God.”
Planti man i save litimapim nem bilong ol Witnes Bilong Jehova na tok, ol i save bihainim gutpela pasin tru, winim bilong ol narapela man, tasol ol Witnes yet i save ol Kristen tru i mas bihainim pasin “Holi Spirit i save kamapim,” na ol i mas “wokabaut tu long pasin bilong Spirit.” Spirit bilong God i kamapim gutpela pasin long ol, olsem: “Pasin bilong sori, na amamas, na bel isi, na pasin bilong larim ol i rongim yumi, na pasin bilong helpim ol man na mekim gutpela pasin long ol, na wokabaut stret oltaim, na pasin bilong isi isi, na daunim laik bilong olpela bel.” Tru tumas, ol dispela pasin i gutpela pasin bilong bihainim.−Galesia 5:22, 23, 25.
Hat King Bilong Sutim Lek
Long Malaga, long Spen, i gat wanpela piksa bilong Maria i stap em planti man i save laikim, na tupela yia bipo ol i kirapim ol man long givim mani samting bilong wokim wanpela hat king gol bilong dispela piksa bilong Maria. Ol i tok, ‘Givim liklik hap gol bilong Maria.’ Planti handet man na meri i stap long Malaga ol i bin givim ol bilas bilong yau, na ol bis, na ol ring bilong marit, na tit gol. Ol dispela samting ol i wokim long gol ol i bin putim long paia na ol i kisim bikpela hap gol, hevi bilong en long skel em inap olsem 1.5 kilogram. Em inap long ol i wokim hat king gol bilong dispela piksa bilong Maria.
Wokim pinis na nau ol i putim bikpela bung bilong lotu bilong putim dispela hat king long dispela piksa. Ol i bung long Jun 1988 na tokman bilong pop long Spen wantaim sampela narapela bikpela bisop ol i bosim dispela bung. Tasol sampela Katolik, ol i bikpela lain liklik, ol i tingting planti long dispela samting. Wanpela nius bilong Spen (El Pais) i putim wanpela pas bilong ol man i ken kaunim na i tok, inap olsem 20 man i lain long kamap pris ol i tok, ‘Yumi mekim yet ol pasin bilong lotu i no gat as bilong en na yumi stap yet olsem ston bilong sutim lek bilong ol man i bilip na ol man i no bilip.’ Na sampela lain Katolik i tingim wanpela pas nau tasol pop i kamapim na i tok ol bilipman i mas ‘givim ol gutpela samting bilong ol bilong helpim ol man i stap rabis.’ Olsem na ol dispela Katolik i tokaut olsem bel bilong ol i gat tok long dispela bikpela bung na dispela hat king i gat bikpela pe bilong en.
Yumi no ken kirap nogut long ol man i gat gutpela bel ol i gat tok long pasin bilong bilasim wanpela piksa nating i no gat laip. God yet i gat wankain tingting. Planti handet yia bipo em i krosim ol Isrel, long wanem ol i mekim dispela pasin. Long maus bilong profet Esikiel God Jehova i tok: “Ol i save hambak long gutpela bilas bilong ol, em ol i wokim ol piksa nogut na ol god giaman long en.” (Esikiel 7:20, NW) Olsem na ol man i laikim tumas tok i tru ol i bihainim gutpela tingting na ol i bihainim toksave bilong Baibel, olsem: “Yupela i mas lusim pasin bilong god giaman na givim baksait long en.”−1 Korin 10:14.