“Autim Tok Bilong Holi Spirit” Long ol Man Tingting na Bel Bilong Ol i Hevi Tumas

SAMPELA gutpela wokboi bilong Jehova tu i kisim dispela kain sik, olsem tingting na bel bilong ol i hevi tumas. Sampela brata o sista i gat kain hevi olsem, ating ol i mas i go lukim dokta, tasol kongrigesen Kristen tu inap helpim ol na strongim bel bilong ol. Wanpela taim gutpela Kristen Epafrodaitas i gat bikpela belhevi, na Pol i raitim pas long ol brata Kristen long Filipai na kirapim ol long tingim Epafrodaitas na helpim em. Pol i tok, “Yupela i mas amamas tru long kisim em long nem bilong Bikpela. Yupela i mas litimapim nem bilong kain man olsem.”−Filipai 2:​25-29.

Ol Witnes Bilong Jehova long nau tu i gat wok long “givim gutpela tok long ol brata na strongim bel bilong ol,” na ol i mas “helpim ol man i no strong.” (1 Tesalonaika 5:​11, 14) Ol elda Kristen i mas i go pas long mekim dispela wok.−Aisaia 32:⁠2.

Tasol planti elda i no dokta, olsem na ol i no ken mekim ol tok olsem dokta, o kamapim tingting olsem bilong ol dokta bilong stretim tingting, o kolim sampela tok olsem ol dispela kain dokta i kolim. Sapos ol i mekim olsem, ating ol i no gat pasin daun, na ating dispela kain tok na tingting i no inap helpim brata o sista em tingting na bel bilong em i hevi tumas na i stap nogut. (Provep 11:⁠2) Ol elda i mas bihainim pasin bilong Pol. Ol i mas ‘tokaut, tasol i no long tok ol i bin kisim long save bilong man. Nogat. Holi Spirit yet i bin skulim ol, na ol i mas mekim dispela tok.’ Ol i mas “autim tok bilong Holi Spirit.” (1 Korin 2:13) Ol dispela “tok bilong Holi Spirit” i olsem ol tok na tingting na lo i stap long Baibel. Sapos ol elda i kamapim ol tok bilong Baibel i stret long hevi bilong brata o sista, dispela inap mekim gut bel bilong em na strongim em.−2 Timoti 3:⁠16.

“Redi Kwiktaim long Harim Tok”

Tasol ol elda i mas “redi kwiktaim long harim tok,” na ol i “no ken hariap long mekim toktok.” (Jems 1:19) Sapos ol i no “putim gut yau pastaim” ating ol tok i givim long brata o sista i no inap helpim em. (Provep 18:13) Wanpela brata i gat dispela kain sik, olsem tingting na bel bilong em i hevi tumas, tasol ol elda i no pilim as tru bilong belhevi bilong em na ol i ting olsem em i no strong long spirit. Olsem na ol i tokim em, ‘Yu mas wok strong moa long beten.’ Tasol i hatwok long brata i bihainim dispela tok, long wanem tingting bilong em i olsem i gat sik.

Olsem na man i gat dispela kain hevi, ol elda i mas larim em i toktok pastaim. Ol i mas putim gut yau long olgeta tok em i kamapim, na bihain bai ol inap givim sampela gutpela tok bilong em. Ating em i sot tasol long man bilong putim yau long ol tok bilong em. Olsem na sapos ol elda i bihainim gutpela tingting na ol i no les kwik, bai ol inap kirapim em long kamapim tingting i stap long bel bilong em, olsem ‘pulim i kam antap.’ (Provep 20:⁠5) Sapos em i hatwok long kamapim tingting bilong em, orait ol i ken bihainim gutpela pasin bilong Elkana. Taim tingting na bel bilong meri bilong Elkana i hevi tumas, long gutpela pasin isi Elkana i givim sampela askim long em. Em i tok: “Hana, bilong wanem yu krai? Bilong wanem yu no laik kaikai? Na bilong wanem yu bel hevi oltaim?” (1 Samuel 1:⁠8) Kain gutpela askim olsem inap helpim brata o sista long pilim as tru bilong “wari” bilong em. (Provep 12:25) Olsem: Wanpela brata i gat hevi long marit bilong em na dispela samting i mekim na bel bilong em i hevi tumas.

Helpim Ol na No Ken “Tok Kros”

Ol man em tingting na bel bilong ol i hevi tumas, planti taim ol i no save long as bilong belhevi bilong ol. Wanpela i tok, ‘Taim mi kisim sik tingting, mi no save long as bilong dispela na sampela taim mi putim asua i go long Jehova.’ Ol man i gat kain sik o hevi olsem, sampela taim ol i sutim tok nating long kongrigesen na tok kongrigesen i mekim nogut long ol o givim baksait long ol. Sapos kain samting olsem i kamap, orait ol elda i mas mekim wanem?

Jehova i makim gutpela pasin ol i ken bihainim. Em i save “givim planti samting long olgeta man, na em i no save tok kros.” (Jems 1:⁠5) Sapos tingting na bel bilong man i hevi tumas, nogut tok bilong ol elda i mekim em i pilim olsem i no gat as bilong belhevi bilong em na bai em i sem. Tru ating i no gat as bilong belhevi bilong em, tasol maski−bel bilong em i hevi tumas. Olsem na ol elda i mas “sori” long em na ol i no ken tok kros long em. (1 Pita 3:⁠8) Na ol elda i mas was gut na ol i no ken sutim tok long em na tok, ating em i bin mekim wanpela rong na dispela samting i as bilong bikpela belhevi bilong em. Sapos ol i mekim olsem, bai belhevi bilong em i go bikpela moa. Stretpela man Jop i bel hevi tru na em i tok: “Mi no laik i stap laip moa.” (Jop 10:​1, NW ) Tasol tripela poroman bilong em i no mekim gut bel bilong em. Wanpela i tok: “Pasin bilong yu i nogut tru. Wanem taim bai yu pinis long mekim rong?”−Jop 22:​5, NW.

Tasol sampela taim man i bin mekim rong na dispela i mekim em i bel hevi o i mekim bel na tingting bilong em i bagarap moa yet. Devit i tok: “Taim mi no autim sin bilong mi yet, mi krai nogut long san na long nait. Olsem na bodi bilong mi i slek olgeta.” (Sam 32:⁠3) Olsem tasol tingting na bel bilong wanpela brata i bagarap olgeta na em i no inap wok moa. Wanem as bilong dispela bikpela belhevi bilong em? Em i bin mekim pasin pamuk na bagarapim marit na em i haitim rong bilong em. Olsem na sapos ol elda i pilim olsem brata o sista i bin mekim rong na dispela samting i bagarapim bel na tingting bilong em, orait ol i ken givim sampela askim long em bambai ol i ken save tru em i bin mekim rong o nogut. Tasol ol i mas mekim long gutpela pasin sori; ol i no ken sutim tok long em na tok kros.

Tok Bilong Man i Gat Gutpela Tingting i Olsem Gutpela Marasin

Pastaim ol elda i mas wok long kisim save long as bilong belhevi bilong man na bihain ol i mas bihainim tok bilong Provep 12:​18, em i tok: “Tok bilong man i gat gutpela tingting i save helpim man olsem gutpela marasin.” Ol elda i no inap oraitim sik bilong tingting, tasol ating ol inap helpim man em tingting na bel bilong em i hevi tumas, na bai em i no tingting planti tumas o bel hevi nating. Ating ol elda i ken lukim sampela tok long Wastaua o Kirap! i stori long kain hevi olsem. Ol i ken toktok wantaim brata o sista long ol dispela tok bambai em i ken save wanem samting i mekim na em i tingting planti na bel hevi. Taim ol i save skin na tingting bilong ol i no gutpela olgeta na dispela samting i as bilong sik bilong ol na i no olsem Jehova i kros long ol, dispela samting i save mekim gut bel bilong ol.

Sampela taim i hatwok long toktok gut wantaim man o meri i gat sik long tingting. Ol i save kros kwik. Olsem na elda i gat gutpela tingting em i save em i mas “bekim tok isi long [man i belhat long em], na bai belhat bilong en i dai.” (Provep 15:⁠1) Kain elda olsem em i save was gut long ol tok em i mekim na oltaim em i save mekim gutpela switpela tok i no ken skrapim bel bilong man. (Kolosi 4:⁠6) Olsem: Brata i gat sik long tingting, ating em i strong long tok olsem em i save harim nek bilong sampela man i toktok long em.a Wanpela dokta (E. Fuller Torrey) i tok, ‘Sapos yu tok pait wantaim kain man olsem na yu tok, em i no harim tru ol dispela nek, yu no inap helpim em. Bai em i no bilipim tok bilong yu, na ating bai em i belhat. No ken tok pait wantaim em; tokim em, em i no harim tru nek bilong sampela man. Givim dispela liklik tok tasol long em na no ken mekim sampela tok moa.’ I olsem: Long pasin isi ol elda i ken stori gut long dispela brata olsem, tru em i ting olsem em i harim nek bilong sampela man, tasol tingting bilong em i giamanim em na em i no harim tru.

Sapos ol elda i mekim gutpela wok long Baibel tu bai ol inap helpim gut kain man olsem. (Hibru 4:12) Sapos wanpela man i gat sik long tingting na em i pret nating na em i tok, God i lusim em pinis, orait ol elda i ken putim yau long tok bilong em na sori long em, tasol ol i ken tokim em, pe Jisas i bin givim bilong baim bek yumi em i gat bikpela strong. Ol i ken kamapim sampela tok bilong Baibel olsem Sam 103:​8-14 na 1 Jon 2:​1, 2. Ating tok bilong 1 Pita 5:​6, 7 na Rom 8:​26, 27 inap helpim em long save, God i tingim em, na God i save harim beten bilong em maski maus bilong em i hevi na em i no inap kamapim gut tingting bilong em. Na bihain ol elda i ken bihainim tok bilong Jems 5:14 na ol i ken beten wantaim em.

Tasol olsem wanem sapos ol liklik liklik samting i save skrapim bel bilong kain man olsem? Orait ol elda i ken tokim em long gutpela tok bilong Baibel olsem: “Yu no ken ting yu stretpela man tumas, winim ol narapela.” (Eklisiastis 7:​16, NW ) O sapos kain man olsem i hatwok long sakim ol tingting nogut inap kirapim em long mekim pasin pamuk, orait ating tok bilong Filipai 4:8 inap helpim em. Sapos kain man olsem i ting em inap mekim yet bikpela wok Kristen, tasol sik bilong em i pasim em long mekim, ating bai em i bel hevi. Orait, ol elda i ken tokim em long lukim Matyu 13:23 na Luk 21:​1-4 bilong helpim em long save, maski wanem samting i painim yumi na nau yumi no inap mekim bikpela wok olsem long bipo, tasol Jehova i save pilim tru ol wok yumi inap mekim.

Tru tumas, ol elda i lainim gut ol tok bilong Baibel maus bilong ol inap helpim tru ol brata em tingting bilong ol i bagarap o i gat sik. Gutpela tok bilong Baibel ol i givim long ol dispela brata inap strongim bel na tingting bilong ol. Wanpela sista i bin kisim sik long tingting, em i tok: “Mi pilim tru gutpela tok Aisaia 32:2 i mekim long ol elda long kongrigesen. Taim mi gat hevi, oltaim ol redi long helpim mi na ol i givim ol gutpela tok long mi bilong soim rot long mi.”

Ol Miting na Wok Autim Tok

Maski tingting bilong man i hevi o i gat sik, tasol em i mas kisim yet ol samting bilong spirit. (Matyu 5:⁠3) Sapos ol i stap strong long spirit, dispela inap helpim ol long i stap laip. Wanpela meri, nem bilong em Airin (Irene), em i gat sik long tingting na em i karim hevi long dispela inap 30 yia. Airin i stori olsem “Sampela taim tingting bilong mi i paul. Tasol tok i tru bilong Baibel i stap long tingting na bel bilong mi na i strong olsem simen. Dispela samting i helpim mi na mi no kilim i dai skin bilong mi!”

Olsem na sapos brata o sista i gat kain sik o hevi olsem, gutpela sapos yumi kirapim em long go long ol miting na mekim wok autim tok inap long strong bilong em. Nogut em i “stap wanpis.” (Provep 18:⁠1) Wanpela sista i kisim sik long tingting na dispela sik i paulim tingting bilong em. Em i stori olsem: “Mi ting olsem mi bin mekim bikpela rong tru long God bilong yumi Jehova na dispela rong i no inap tekewe. Taim mi go long ol miting, mi kisim kranki ol tok na mi ting ol dispela tok i sutim mi na mi pilim olsem mi gat bikpela rong.’ Tasol em i no lusim ol miting na bihain em i harim wanpela tok i helpim em long lusim dispela tingting kranki bilong em olsem God i givim baksait long em.

Tasol olsem wanem sapos wanpela brata o sista i gat bikpela sik long tingting na em i kirap mekim nabaut na em i bagarapim miting o wok autim tok? Ating em i no tingting long mekim pasin nogut, tasol tingting bilong em i paul na em i mekim. Tasol pasin em i mekim inap putim hevi long olgeta. Sapos em i mekim liklik tasol na wan wan taim tasol, ating kongrigesen bai isi long em. (Kolosi 3:​12, 13) Sapos nogat, ating ol i mas tokim em, long taim bilong miting gutpela sapos em i sindaun long wanpela hap bai em i no bagarapim tumas miting. Na bilong helpim em long autim tok, ol i ken mekim pasin sori long em na makim strongpela pablisa i gat gutpela tingting long wok wantaim em long autim tok, o ol i ken kisim em i go wantaim ol long sampela Baibel-stadi ol i save long sik bilong em na ol i no save les long em.

Tasol sampela taim kain man olsem i mekim narapela kain pasin tru na ol man i kirap nogut long en, o pasin bilong em i bagarapim nem bilong kongrigesen, o em i mekim nabaut na em inap bagarapim narapela man. Ating dispela sikman i no kisim moa marasin dokta i tok em i mas kisim, na ol i mas wok strong long kirapim em long kisim gen dispela marasin. Tasol sapos em i no harim o em i mekim yet pasin i bagarapim tru ol miting samting, orait ating ol i mas pasim em long kam long ol miting na long autim tok bambai ol samting i wok stret insait long kongrigesen. (1 Korin 14:40) Long pasin isi ol elda i ken tokim dispela sikman i no olsem em i gat rong na em i no ken mekim wok. Nogat. Tasol em i gat sik na dispela i pasim em long mekim wok. Ol i ken tokim em, ‘God em i no man nogut na bai em i lusim tingting long olgeta wok em i bin mekim.’ Nogat. God i save em i gat sik na em i no inap mekim bikpela wok olsem bipo. (Hibru 6:10) Na ol i mas i go lukim em long olgeta taim bilong strongim em, na bai em i stap strong long spirit inap long taim sik bilong em i pinis na tingting bilong em i kamap gutpela gen.

Helpim Famili Bilong Ol

Sapos wanpela long famili i kisim sik long tingting, dispela inap putim bikpela hevi long famili. Wanpela brata i gat pikinini man em i bikpela pinis na dispela pikinini i gat bikpela sik long tingting. Brata i tok:“Dispela samting i bagarapim tru mipela.” Na meri bilong em i tok: ‘Dispela samting i nogutim marit bilong mitupela na sampela taim mitupela i save kros na tok pait.’ Na sapos poroman marit bilong brata o sista i kisim sik long tingting, brata o sista bai karim bikpela hevi. Wanpela brata i tok: “Ol dokta i tok meri bilong mi i gat bikpela sik tru long tingting. Em i save harim nek bilong sampela man i toktok long em, na em i no laik kisim marasin samting. Em i tok, ol dispela marasin i marasin nogut, olsem i gat gip, na bai i kilim em i dai. Em i no bilip olsem mi man bilong em na em i no laik i go autim tok o i go long ol miting.” Yumi ken mekim wanem bilong helpim famili bilong ol kain sikman olsem?

Pol i tok: “Strongim bel bilong ol man i save [bel hevi].” (1 Tesalonaika 5:14) Sapos yumi givim baksait long ol brata Kristen i gat bikpela wok long lukautim wanpela famili bilong ol em i gat sik long tingting, i olsem yumi mekim nogut tru long ol. Pol i tok, yumi mas “kisim ol brata” o amamas long lukim ol. (Rom 15:⁠7) Long ol miting Kristen yumi ken mekim olsem. Yumi ken i go sekanim ol na tokim ol, yumi amamas long lukim ol. Na yumi ken tokim ol, yumi pilim tru bikpela wok bilong ol ‘bilong mekim pasin God i laikim na lukautim gut famili bilong ol’−1 Timoti 5:⁠4.

Taim ol elda i go lukim ol dispela brata sista bilong strongim ol, ol elda i ken kirapim ol long mekim yet famili-stadi, na go long ol miting, na mekim yet wok bilong autim tok bilong Kingdom. Na kongrigesen i mas helpim ol long ol samting bilong skin tu sapos ol i sot. Ol i no ken tok tasol: “Yu go putim laplap bilong hatim skin bilong yu, na yu go kisim kaikai na pulapim bel bilong yu.” (Jems 2:16) Ating famili i no gat rot bilong i kam long ol miting na sampela brata sista i ken helpim ol. O ating sampela brata sista inap helpim ol long liklik mani, long wanem ol i mas tromoi bikpela mani bilong baim dokta samting. (1 Jon 3:​17, 18) Ol brata sista i gat hevi olsem, ol i pilim tru gutpela pasin ol brata i mekim bilong helpim ol! Wanpela sista i gat sik long tingting na man bilong em i tok: “Kongrigesen i save long hevi bilong mipela, na ol i kamapim long ples klia olsem ol i sori long mipela na tingim mipela.”

Holimpas Ol Lo Bilong God

Pol i tok: “Olgeta samting God i bin wokim, dispela olgeta i pilim pen olsem meri i laik karim pikinini. Na olgeta i krai nogut i stap.” (Rom 8:22) Sik na hevi bilong tingting em wanpela kain pen sin i kamapim long skin bilong yumi. Ol dokta inap helpim sampela man liklik. Tasol sampela ol i go lukim dokta na dispela i no helpim ol. Kain samting olsem i bin painim wanpela meri long taim bilong Jisas: “Planti dokta i bin givim planti pen long em, na dispela meri i bin lusim olgeta mani bilong en long ol. Tasol sik bilong en i no orait liklik. Nogat.”−Mak 5:⁠26.

Olsem na planti ol i mas lain long karim dispela hevi na wetim nupela taim God bai kamapim na bai olgeta belhevi bilong ol i pinis. (Revelesen 21:​3, 4) Man bilong raitim sam em i singaut na i tok: “Mi mas litimapim nem bilong Bikpela. . . . em i save mekim orait olgeta sik bilong mi.” (Sam 103:​2, 3) Yumi no ken wok strong long mekim ol samting bambai skin na tingting bilong yumi i stap gutpela olgeta. Bikpela samting yumi mas tingim em olsem: Yumi mas wok strong long holimpas ol lo bilong God. (Sam 26:11; lukim tu 1 Korin 7:​29-31.) Sapos tingting i no wok gut o yu gat sik long tingting bai yu hatwok long mekim olsem. Tasol planti wokboi bilong God, olsem Pol, ol i gat “wanpela samting olsem nil bilong sutim skin” bilong ol, tasol ol i bin i stap gut long wok bilong God. (2 Korin 12:⁠7) Wanpela brata i gat sik long tingting em i tok: “Nau mi save, i no gat wanpela dokta o wanpela brata em inap oraitim sik bilong mi. Mi lain long givim bel long Jehova. Mi bilip long em na wetim em i helpim mi.” Ol man i gat sik long tingting, o bel bilong ol i hevi tumas, ol i ken bilip tu long ol gutpela brata sista i sori long ol na ol i save “autim tok bilong Holi Spirit” long ol bilong strongim bel bilong ol na helpim ol.

[Footnote]

[Picture on page 23]

“Tok bilong Holi Spirit” ol elda i autim long pasin sori, dispela inap helpim gut ol man em tingting na bel bilong ol i hevi tumas