Skin Tasol i Naispela?
IV EM i namba wan meri God i bin wokim, na God i no wokim narapela meri. Em i gat gutpela skin tru, na ating em i winim olgeta narapela meri i bin kamap long graun. Tasol em wantaim man bilong em, em Adam, ol i bikhet long Jehova, na nau Iv i no stap gut moa long Jehova, na ol hevi i bin painim ol man em hap asua bilong Iv. Tru taim em i mekim pinis pasin bikhet skin bilong em i gutpela yet, tasol em i gutpela long skin tasol.
Gutpela skin em wanpela presen God i givim long yumi. Skin bilong sampela i winim bilong ol narapela. Sampela i laik bai ol i gat gutpela skin, na planti ol i lusim taim na mani long mekim gut skin bilong ol. Tasol sapos yumi tingim Iv yumi ken save, sapos yumi gat gutpela skin tasol na yumi no gat ol gutpela pasin tu, orait gutpela skin em i samting nating tasol. Yumi mas i gat wanem ol gutpela pasin? Bilong save long dispela samting yumi ken stori long sampela samting i bin kamap long taim bilong King Solomon.
Samting i Winim Gutpela Skin
Song bilong Solomon long Baibel i stori long wanpela yangpela meri em i gat gutpela skin tru na em i bilong ples Sunem, na em i save laikim wanpela yangpela wasman bilong sipsip. King i aigris long dispela yangpela meri na em i kisim em i go long Jerusalem; em i gat tingting long maritim dispela yangpela meri; sapos olsem, meri bai gat planti samting bilong skin na gutpela sindaun. Gutpela skin bilong em bai givim rot long em na bai em i ken kisim biknem na mani kago na bikpela namba. Tasol em i sakim ol tok gris bilong king, na em i givim baksait long ol bilas na kago samting bilong skin long taun Jerusalem na em i stap gut na tingim dispela yangpela wasman bilong sipsip. Meri hia i gat gutpela pasin−i no gutpela skin tasol. Em i no tingim ol amamas bilong graun na em i no mangal long ol samting. Em i gat gutpela tingting na bel, tasol tumbuna bilong em Iv nogat.−Song Bilong Solomon 1:15; 4:1; 8:4, 6, 10.
Gutpela Skin Inap Pundaunim Yumi
Tru, yumi laik bai yumi gat gutpela skin, tasol gutpela skin inap kamapim hevi. Tasol gutpela bel na tingting i no save kamapim ol dispela kain hevi. Klostu 4,000 yia bipo Jekop i gat wanpela pikinini meri, em Daina, na ating Daina i gat gutpela skin tru. Tasol em i no bihainim gutpela tingting na em i bung wantaim ol meri bilong ples, na wanpela yangpela man, nem bilong em Sekem, em i aigris long Daina na em i pamuk wantaim em.−Jenesis 34:1, 2.
Sapos man i gat gutpela skin na em i no gat gutpela tingting o bel, dispela inap kirapim em na bai em i ting em i winim ol narapela man. King Devit i gat wanpela pikinini man, em Apsalom. Baibel i tok: “I no gat wanpela man long Isrel i luk nais olsem Apsalom, olsem na ol Isrel i save amamas moa yet long lukim em.” (2 Samuel 14:25) Tasol Apsalom i no gat gutpela tingting na bel. Em i hambak long gutpela skin bilong em na em i laik kisim wok king, na em i mekim nogut long ol man i laik pasim em. Gutpela skin bilong em i helpim em long pulim ol man na em i kamapim wanpela lain na ol i birua long papa bilong Apsalom, em King Devit, na pait i kamap, em Apsalom i as bilong en. Bihain ol i kilim em i dai.
Gutpela Skin Bilong Man
Baibel i stori long sampela meri i gat gutpela skin, na sampela man tu, olsem Apsalom. Josep tu, em liklik susa bilong Daina, em i gat gutpela skin, tasol em i no larim gutpela skin bilong em i pundaunim em. (Jenesis 30:20-24) Taim Josep i yangpela ol brata bilong em i bel nogut long em na ol i baim em i go long ol man na ol i karim em i go long Isip. Potifa i bikman bilong ami na em i baim Josep long ol dispela man na Josep i wok boi long Potifa. Em i bihainim stretpela pasin, olsem na Potifa i makim em i bosboi long haus bilong Potifa. Baibel i tok, “bodi bilong Josep i gutpela tru na em i luk nais tumas.”−Jenesis 39:6.
Meri bilong Potifa i aigris long gutpela skin bilong Josep na em i laik pulim Josep long mekim maritpasin wantaim em, tasol gutpela tingting na pasin na bel bilong Josep i strongim em na em i sakim dispela meri. Em i no laik mekim pasin i no stret long bos bilong em, em Potifa, olsem na em i ranawe lusim dispela meri. Ol i kalabusim Josep, long wanem, nau dispela meri i bel nogut long em na em i tok giaman na i kotim Josep−meri i tok, Josep i laik mekim pasin pamuk wantaim em! Dispela samting i putim bikpela hevi tru long Josep, tasol em i no senisim gutpela tingting bilong em. Em i karim dispela hevi na em i bihainim pasin i stret, na stori bilong em long Baibel i helpim ol man i gat gutpela bel bambai ol i mas holimpas stretpela pasin olsem Josep i bin mekim.
Yumi tingim ol dispela manmeri yumi bin stori long ol na yumi save, gutpela pasin bilong man i winim gutpela skin. Sapos man i bilip long God na em i bihainim gutpela pasin, dispela i bikpela samting, tasol skin bilong man i gutpela o nogat, dispela i no bikpela samting. Sapos sampela yangpela i tingting long marit, ol i mas tingim dispela samting. Na ol bos i laik painim sampela wokman ol tu i mas tingim. Na yumi olgeta i mas save, maski yumi gat gutpela skin o nogat, yumi inap kisim gutpela tingting na bel. Dispela em i bikpela samting tru. Yumi inap kisim gutpela tingting na gutpela bel olsem wanem? Orait, nau yumi ken stori long dispela.