Gutpela Bel−Yu Inap Kisim
BAIBEL i givim tok long ol man na ol meri tu long ol samting bilong gutpela skin. Em i tokim ol man olsem: “Ol Yangpela man i gat strong, na dispela i mekim ol manmeri i amamas long ol.” (Provep 20:29) Tru, yumi lukim yangpela man i gat strongpela skin, na i gutpela. Tasol olsem wanem taim em i go lapun? Baibel i tok: “Ol man i lukim waitpela gras bilong ol lapun, na [sapos] ol lapun i bin bihainim stretpela pasin . . . ol i givim biknem long ol.” (Provep 16:31) Sapos man i bihainim stretpela pasin dispela i makim olsem em i gat gutpela bel. Sapos yangpela man i wok long bihainim gutpela pasin, orait taim em i kamap lapun ol man bai laikim yet em, maski skin bilong em i no gat strong moa.
Na Baibel i toktok long ol meri olsem: “Wanpela meri inap givim switpela tok long yumi, tasol pasin bilong en i narakain. Na maski meri i luk nais tru, em i no inap i stap olsem oltaim. Mobeta yumi litimapim nem bilong meri i save aninit long Bikpela.” (Provep 31:30) Yumi amamas long toktok wantaim yangpela meri i gat gutpela skin na em i mekim gutpela pasin. Tasol sapos em i meri bilong tupela maus, na em i tingim tumas skin bilong em yet, yumi save, long skin tasol em i gutpela meri; tasol bel bilong em i nogut. Taim em i go lapun, long dispela taim em i gat wanem gutpela samting? Nogat. Tasol sapos em i gat gutpela skin na gutpela pasin wantaim, na em i ‘pret long Jehova’ tu, em gutpela!
Bihainim Nupela Pasin
Olsem wanem? Yumi inap kisim gutpela tingting na bel? Yumi inap. Ol Kristen i mas mekim olsem. God i ting gutpela pasin tru na gutpela bel tru em i bikpela samting. Baibel i tok: “God i wokim olgeta samting i naispela long taim bilong en.” (Eklisiastis 3:11, NW ) God i no orait long man i lotuim em na em i bihainim pasin nogut na bel bilong em i nogut.
Aposel Pol i bin givim tok long kongrigesen bilong Kolosi na dispela tok i makim olsem yumi mas wok long kisim gutpela tingting na gutpela bel. Em i tok: “Yupela i mas rausim olgeta pasin olsem: Pasin bilong kros na belhat na bel nogut, na pasin bilong tok bilas na toktok doti. Yupela i no ken giamanim ol brata. Long wanem long bel bilong yupela, yupela i rausim pinis olgeta pasin bilong olpela man.” Tru tumas, sapos man i mekim ol kain pasin olsem, God i nolaik tru long dispela man−na ol stretpela man tu i no ken laikim em. Na Pol i tok moa olsem: “Yupela i kamap nupela man pinis. God i bin wokim dispela nupela man. Na oltaim em i givim save long yupela, na em i mekim yupela i kamap nupela na i stap wankain olsem God yet.” (Kolosi 3:8-10) Yumi mas bihainim tingting i stret wantaim laik bilong God. Dispela “nupela man” em i gat wanem kain pasin?
Ol Pasin Kristen
Baibel i kolim planti gutpela pasin i makim man i kamap olsem “nupela man.” Na Jisas i kolim as bilong ol gutpela pasin bilong “nupela man.” Em i tok: “ ‘[Jehova] em i God bilong yu. Na yu mas laikim em long bel bilong yu olgeta na long [laip] bilong yu olgeta na long tingting bilong yu olgeta.’ Dispela lo em i bikpela, na em i namba wan tru. Na namba tu em i wankain long dispela. Em i olsem: ‘Yu mas laikim ol arapela man olsem yu laikim yu yet.’ ” (Matyu 22:37-39) Sapos yumi laikim tumas God, dispela bai kirapim yumi long mekim ol pasin God i save amamas long en, na bai yumi tokim ol man long ol samting bilong em, na helpim ol man na bai ol i ken save long dispela Bikpela Man i bin wokim ol.−Aisaia 52:7.
Na aposel Pol i kolim sampela pasin moa yumi mas kisim na bai yumi ken kamap olsem “nupela man,” em “pasin bilong sori, na amamas, na bel isi, na pasin bilong larim ol i rongim yumi, na pasin bilong helpim ol man na mekim gutpela pasin long ol, na wokabaut stret oltaim, na pasin bilong isi isi, na daunim laik bilong olpela bel. I no gat wanpela lo i tambuim ol dispela kain pasin.”−Galesia 5:22, 23.
Na Baibel i givim tok long ol man marit olsem: “Man em i het bilong meri bilong en, olsem Krais em i het bilong [kongrigesen]. . . . Yupela man, yupela i mas sori long ol meri bilong yupela, olsem Krais i sori long [kongrigesen] na i lusim laip bilong em yet bilong helpim [kongrigesen].” (Efesas 5:23, 25) Na Baibel i givim tok long ol meri marit olsem: “Yupela meri, yupela i mas bihainim tok bilong ol man bilong yupela, olsem yupela i save bihainim tok bilong Bikpela. . . . Na meri i mas litimapim nem bilong man bilong en.” (Efesas 5:22, 33) Sapos man i mekim stret ol wok bilong em long gutpela pasin bilong sori, na em i no tingim laik bilong em yet tasol, na em i no les kwik long ol narapela bilong famili, bai famili i stap amamas! Na sapos meri i kamapim gutpela bel bilong em na long pasin sori em i bihainim laik bilong man bilong em na em i no traim bosim ol samting o toktok planti o toknogutim wok bilong man, orait man i no ken hatwok long mekim wok bilong em. Sapos tupela i mekim olsem, tupela wantaim ol pikinini bilong ol bai stap amamas tru.
Stori i stap paslain long dispela em i bin stori long sampela manmeri i bihainim ol dispela gutpela pasin. Meri bilong Sunem i givim baksait long ol bilas bilong skin em Solomon i laik grisim em long en, na dispela i kamapim bel bilong meri, em i laikim tumas yangpela wasman bilong sipsip na em i no laik lusim dispela man. Na yumi ken tingim Josep tu, em i strong long sakim pasin pamuk−em i no laik mekim wanpela rong long bos bilong em, em Potifa; dispela i kamapim gutpela bel bilong em, em i laik bihainim stretpela pasin tasol. Em i bosim gut skin bilong em na taim meri bilong Potifa i laik pulim em long mekim pasin pamuk em i ranawe lusim dispela meri. Planti ol narapela traim na hevi i bin painim Josep, tasol em i no larim ol dispela samting i pundaunim em o mekim em i bel nogut o kros samting; em i stap bel isi na em i no les; em i karim tasol ol dispela hevi.
Gutpela Pasin Namel long Ol Pasin Nogut
Olsem wanem? Inap yumi ken bihainim gutpela pasin nau long dispela taim nogut? Planti man i tok, nogat. Long nau ol man i save tingim ol yet tasol na ol i laik inapim laik bilong ol, maski long narapela man. Ol i bihainim hatpela pasin na ol i resis long kisim ol samting, maski ol i rongim narapela man o putim hevi long em.
Tasol Baibel i tok: “Yupela i no ken tingting long yupela yet tasol, na yupela i no ken hambak nabaut. Nogat. Yupela i mas aninit long ol arapela man, na i no tingting yupela i antap long ol. Yupela i no ken lukautim ol samting bilong yupela tasol. Nogat. Yupela i mas lukautim ol samting bilong ol arapela man tu.” (Filipai 2:3, 4) Ol man i no bihainim dispela gutpela tok, olsem na pasin bilong graun i wok long i go nogut tru.
Long nau ol man i ting sapos man i gat bikpela mani na planti samting bilong skin na biknem, em i painim pinis gutpela samting. Tasol samting i gutpela tru em yumi olgeta i ken kisim, maski yumi maniman o rabisman. Mani na kago inap giamanim yumi tu na pundaunim yumi. Baibel i toksave olsem: “Ol man i ting long kisim planti kago, ol bai i pundaun long traim, olsem long hul bilong kisim abus. Na bel bilong ol bai i kirap long planti samting nogut i save mekim ol i longlong. Na bai ol i lus na bagarap tru.” Na nau Baibel i tok: “Pasin bilong laikim tumas mani em i as bilong olgeta pasin nogut.”−1 Timoti 6:9, 10.
Tru, ol dispela man i strong long pulim ol samting bilong skin na ol i holim planti samting bilong graun ol i kisim liklik “amamas” bilong nau. Tasol em i no amamas tru. Ol i bin mekim ol pasin i no stret, na ol man i no laikim ol moa, na marit bilong ol i bagarap, na sik i painim ol, na planti bel hevi tu. God i bin wokim man i gat sampela pasin i wankain olsem bilong God yet, tasol sapos man i sakim ol gutpela pasin God i bin putim long tingting na bel bilong em, em i no inap i stap amamas.−Jenesis 1:27.
Lain long Bihainim Gutpela Pasin
Orait, olsem wanem yumi ken sakim ol pasin nogut bilong graun na yumi ken lain long bihainim ol gutpela pasin wankain olsem ol pasin bilong God? Pol i kolim ol gutpela pasin, olsem “pasin bilong sori, na amamas, na bel isi, na pasin bilong larim ol i rongim yumi, na pasin bilong helpim ol man na mekim gutpela pasin long ol, na wokabaut stret oltaim,” na Pol i tok, spirit holi i save kamapim ol dispela gutpela pasin. (Galesia 5:22, 23) Olsem na yumi mas i gat spirit bilong God na bai yumi ken lain long bihainim ol dispela gutpela pasin.
Olsem wanem yumi ken lain long bihainim ol dispela gutpela pasin? Yumi mas lainim ol tok bilong Baibel, long wanem spirit bilong God i bin kamapim ol dispela tok. Sapos yumi mekim olsem, bai yumi ken save long ol dispela gutpela pasin na dispela bai kirapim yumi long bihainim. (2 Timoti 3:16) Ol Witnes Bilong Jehova bai amamas long helpim yu long lainim tok bilong Baibel, em wanpela wok bilong ol. Sapos yumi skelim ol tok bilong Baibel wantaim pasin bilong yumi bai yumi ken save wanem pasin bilong yumi i no stret, na nau yumi ken beten askim God long helpim yumi long rot bilong spirit bilong em bambai yumi ken stretim ol pasin bilong yumi. Na sapos yumi bung wantaim ol man i lotuim God tru ol bai strongim yumi, em narapela rot bilong spirit bilong God i ken helpim yumi. Long wanem, Jisas i tok, “sapos tupela o tripela man i ting long nem bilong mi na i bung long wanpela ples, orait mi stap namel long ol.”−Matyu 18:20.
Bihain Bai Gutpela Pasin Tru i Stap long Graun
Tru yumi olgeta i no inap bihainim gutpela pasin i stret olgeta, tasol sapos yumi wok strong long mekim, God bai helpim yumi, na bihain em bai givim gutpela samting long yumi, olsem prais. Baibel i stori long laik bilong God em i laik kamapim nupela pasin long graun, em bai narapela kain tru long pasin bilong nau. Long dispela nupela taim “ol stretpela man bai i kisim graun God i givim ol, na bai ol i stap oltaim long en.” (Sam 37:29) Na Jisas yet i tok: “Ol man i no save hambak na bikhet, em ol i ken amamas. Bai God i givim olgeta graun long ol.”−Matyu 5:5.
Long dispela taim bihain, ol man i no ken resis long kisim ol samting bilong ol yet; nogat; narapela bai tingim narapela, na gutpela pasin bai stap, na ol man bai sindaun gut na i stap bel isi tasol. “Ol i no ken mekim nogut o bagarapim wanpela samting long maunten holi bilong mi; long wanem save i kam long Jehova em bai pulap long olgeta hap bilong graun, olsem wara i pulap long solwara.” (Aisaia 11:9, NW ) Tru tumas, God yet bai “mekim drai olgeta wara i stap long ai bilong ol. Bai ol man i no i dai moa, na ol i no bel hevi moa, na ol i no krai na kisim pen gen. Dispela samting bilong bipo em i pinis olgeta.”−Revelesen 21:4.
Olsem wanem? Yu laik bai dispela kain pasin i kamap long graun? Ol dispela gutpela samting inap kamap, long wanem, long dispela taim bihain ol man bai gat gutpela tingting na bel, na as bilong dispela, em ol bai laikim tumas God na ol narapela man. Na God i tok promis pinis olsem: Sapos long nau ol man i mekim wok bilong God, na ol i wok long kamap “nupela man” na ol i givim bel long bihainim ol pasin na lo bilong God, ol bai stap long dispela nupela taim bilong bihain. Olsem na yumi mas wok long kisim ol gutpela pasin, na bihainim long olgeta taim, na holimpas gutpela tingting na bel; ol man i gat stretpela tingting i save laikim tru dispela kain pasin, na God tu i laikim tru!
[Piksa long pes 6]
Man o meri i gat gutpela skin em i no ken tingim laik bilong em yet na i wok long antap long ol narapela man; nogat. Em i mas bihainim gutpela pasin em God i save laikim