‘Yumi Save Ol Bai Kirap Bek’

GOD i gat olgeta strong em i bin givim laip long ol man, na em inap givim bek laip long ol man i dai pinis. Em yet i givim save long yumi long laip na i dai. Em i givim dispela save long yumi long rot bilong Baibel. Ol tok bilong Baibel i tru na i tok, klostu olgeta man i dai pinis ol inap long kirap bek, na planti tru bai ol i kirap bek.​—⁠Jon 5:​28, 29.

Orait, yumi ken tingim stori bilong Lasaras bilong Betani, em i wanpela man i bin i stap tru long bipo na Krais Jisas i save gut long em. Sik i painim Lasaras na em i dai. Bihain Jisas i tokim susa bilong Lasaras, em Mata: “Bambai susa bilong yu i kirap bek.” Mata i tokim em: “Mi save, bai em i kirap bek long las de, long dispela taim olgeta manmeri bai i kirap bek.” (Jon 11:​23, 24) Tru tumas, Mata i save long dispela samting. Em i save long sampela samting tru i bin kamap na em i bilip tru olsem susa bilong em, Lasaras, em i laikim tumas em, bihain bai em i kirap bek “long las de.”

Sapos yu kaunim stori bilong Lasaras long Jon sapta 11, bai yu inap save long ol samting i bin painim Lasaras. Jisas i kirapim bek Lasaras, maski dispela man i dai na em i stap long matmat inap 4-pela de pinis. Taim Lasaras i kirap bek, dispela i kamapim long ples klia olsem God inap truim tok promis bilong em long kirapim bek “long las de” ol man i dai pinis. Tasol Mata i ting Lasaras bai kirap bek na i stap we? Na ol arapela bilipman long lain Juda, ol i ting ol man i kirap bek “long las de” bai ol i stap we?

Ating Ol ‘i No Inap Kam Bek’?

God i givim graun long ol man, olsem ples bilong ol. Man bilong raitim Sam em i tok: “Heven em i ples bilong God tasol, na em i givim graun long yumi manmeri.” (Sam 115:16) Baibel i tok, sapos Adam tupela Iv i stap gut long God bai ol inap i stap oltaim long graun; i no gat sampela tok long Baibel i makim ol bai inap kisim laip oltaim long narapela hap. Nogat. Long graun tasol. Na “diwai bilong givim laip” em i bin i stap long graun, a? Em i stap long Paradais long graun, long dispela gutpela ples Adam tupela Iv i bin i stap long en taim tupela i no bikhet yet. (Jenesis 2:9; 3:22) God i no bin tok long man bai stap long narapela hap, olsem na ol gutpela wokboi bilong God i stap ausait long Iden (kirap long Ebel, em i man bilong daun long God) ol i bilip olsem taim man i kirap bek em i mas i stap long graun tasol. Ol i tingim dispela ples tasol em i ples bilong ol man.

Tasol sampela man i save long sampela hap tok bilong Baibel ating bai ol i tok, ‘Dispela tok i no stret, long wanem long Jop sapta 16 ves 22, Jop i tok, “Liklik taim na bai mi go long rot mi no ken kam bek long en.” Na long Jop 7:9 em i tok: “Man i go daun long matmat em i no ken kam bek gen.” Na long ves 10 Jop i tok: “Em i no ken kam bek gen long haus bilong em, na long ples bilong em bai ol i no save moa long em.” ’

Orait, olsem wanem long tok bilong sampela saveman? Ol i tok, ating ol dispela tok na sampela tok moa bilong Jop i makim olsem Jop i ting taim em i dai bai em i no inap kam bek na i stap laip gen. Tok bilong ol dispela man i stret o olsem wanem? Yu ting ol dispela tok bilong Jop i makim em i no bilip olsem ol man i dai pinis bai ol i kirap bek? Bilong save long bekim bilong dispela askim, yumi mas tingim ol samting i bin painim Jop na nau em i mekim dispela tok, na yumi mas skelim ol dispela tok wantaim sampela tok moa Jop i bin mekim.

Jop i no save long as bilong pen na hevi em i karim. Na inap liklik taim em i kisim tingting kranki na em i ting olsem God i as bilong en. (Jop 6:4; 7:​17-20; 16:​11-13) Em i bel hevi na em i laik bai em i dai. Em i ting, sapos em i dai na i stap long matmat bai em i no pilim pen moa. (Jop 7:21; 17:1; lukim tu 3:​11-13.) Sapos em i dai na em i stap long matmat, long ai bilong ol wanlain bilong em bai i olsem ol i no inap lukim em moa, na em i no inap kam bek long haus bilong em, na ol i no save moa long em, na bai em i no inap kam bek o em i no gat rot bilong kam bek paslain long taim God i makim pinis. Jop na ol narapela man bilong lain bilong Adam, taim ol i dai, sapos God i no helpim ol, ol i no inap kirap bek long matmat long strong bilong ol yet.a​—⁠Jop 7:​9, 10; 10:21; 14:⁠12.

Bilip long Kirap Bek

Tru, Jop i no save long as bilong ol hevi i painim em na em i bel hevi na tok em i laik bai em i dai, tasol yumi no ken ting em i no bilip olsem ol man i dai pinis bai ol i kirap bek. Nogat. Sapos yumi kaunim tok bilong Jop 14:​13-15 yumi ken save, Jop i bilip tru olsem ol man i dai pinis bai ol i kirap bek. Long ol dispela ves Jop i tok, em i laik bai God i ‘haitim em long matmat’ na bihain God i ken ‘tingim em.’ Na long Jop 19:​25-27 (NW ) dispela bilipman i stap gut long God em i tok, em i save i gat “man bilong baim bek” em na bihain bai em i lukim God.’ Tru tumas, Jop i bilip olsem ol man i dai pinis bai ol i kirap bek. Em i bilip olsem God inap kirapim bek em na bai God i mekim tru dispela samting na bai em i stap laip gen. Ebraham i stap paslain long Jop na em tu i bilip olsem God em inap ‘kirapim bek man i dai pinis.’​—⁠Hibru 11:​10, 16, 19, 35.

Na i kam inap long taim bilong yumi long nau, ol Juda i bilip olsem ol man i dai pinis bihain bai ol i kirap bek na i stap laip gen hia long graun. Wanpela bikpela buk bilong ol Juda (Encyclopaedia Judaica, 1971) i tok: ‘Wanpela bikpela as bilip bilong lotu Juda i olsem: Ol man i dai pinis, bihain bai ol i kirap bek long bodi bilong ol na bai ol i stap laip gen hia long graun.’ Dispela bikpela buk i tok moa olsem: ‘Ol Juda i bilip tru long dispela samting na ol i ting bai ol i kirap bek long bodi tru bilong ol, olsem na ol i tingting strong long taim ol i dai ol man i mas pasim wanem kain klos long skin bilong ol bilong planim ol, na ol i laik bai bodi bilong ol i mas i gat olgeta hap bilong en i stap taim ol i planim ol, na ol i laik bai ol i planim ol long Isrel.’

Tasol Baibel i no tok, God bai kisim olgeta liklik liklik hap bilong skin i tanim i kamap graun pinis na bungim gen wantaim na kirapim bek man i dai pinis. Nogat. Ating ol dispela liklik hap das bilong graun i go nabaut pinis na gras o diwai i pulim pinis gris bilong en na ol animal o man i kaikai dispela samting, na bihain ol dispela man i go lapun na ol i dai. Olsem na yumi save, God i no inap kisim ol dispela liklik hap bilong skin i tanim i kamap graun gen na kirapim bek man i dai pinis. Nogat. Taim God i kirapim bek man i dai pinis, em bai givim skin i stret long em, na bai i no gat hap i lus o i bagarap olsem long taim em i dai. God bai givim skin long man long laik bilong Em.​—⁠Lukim 1 Korin 15:​35-38.

Ol dispela man i kirap bek, bai ol gutpela pren na ol wanblut bilong ol, em ol tu i kirap bek, inap luksave long ol o nogat? I stret yumi ken ting bai ol inap luksave long ol. Long wanem sapos yumi no inap luksave long ol man i kirap bek, olsem wanem yumi inap save ol man yumi laikim tumas ol, ol i bin kirap bek o nogat? Tingim Lasaras. Em i dai pinis na em i stap 4-pela de long matmat na skin bilong em i kirap long sting, tasol taim Jisas i kirapim bek Lasaras, ol wanblut na ol pren bilong em ol i luksave long em. Olsem tasol, yumi ken bilip olsem God Jehova bai mekim pasin sori na taim em i kirapim bek ol man i dai pinis bai yumi lukim ol na bai narapela i save long narapela.

Liklik Lain Bai Kisim Laip long Heven

Olsem yumi stori pinis, graun em i ples bilong ol man. God i bin givim graun long yumi ol manmeri. Tasol Krais Jisas i givim save long ol man olsem God bai makim sampela namel long ol manmeri bilong graun na bai ol i kirap bek olsem spirit, na bai ol i kisim laip i stap oltaim long heven na ol i no inap i dai moa. (2 Timoti 1:10) Jisas i opim “dispela nupela rot i gat laip” long heven, na inap sampela yia God i singautim olgeta Kristen bilong kisim dispela laip. (Hibru 9:24; 10:​19, 20) Hamas olgeta bai kisim dispela prais, olsem laip long heven? Tok bilong Revelesen, em ‘dispela tok i stap hait na God i bin soim long Jisas bilong em i ken soim ol wokboi bilong em ol samting i mas kamap kwiktaim,’ dispela tok i makim olsem i gat 144,000 tasol em “God i bin baim bek ol namel long olgeta man bilong graun.”​—⁠Revelesen 1:1; 7:​4-8; 14:​1, 3.

Bilong wanem God i baim liklik lain tasol “namel long olgeta man bilong graun” bilong kisim laip long heven? Hap bilong Revelesen i kolim as bilong dispela samting. Sapta 20 ves 5 na 6 i tok: “Dispela em i namba wan taim ol man i kirap bek long matmat. Ol man i kirap bek long dispela namba wan taim, ol i ken amamas na i stap holi. Namba tu dai i no gat strong bilong daunim ol dispela man. Nogat. Bai ol i stap pris bilong God na bilong Krais. Na bai ol i stap king wantaim Krais long dispela 1,000 yia.”​—⁠Lukim tu Revelesen 5:​9, 10.

Ol Man i Kisim Laip long Graun na Dispela King i Bosim Ol

Yumi save, i no olgeta man ol bai mekim wok king na wok pris, long wanem sapos olgeta i mekim, orait bai ol i “stap king” bilong husat? Bai ol i bosim husat? Olsem na yumi save, dispela liklik lain em God i makim ol na ol gutpela aposel bilong Jisas i olsem as bilong dispela lain, bai ol i bosim ‘bikpela lain manmeri’ ol i stap long graun, em Revelesen sapta 7 ves 9 i go inap 17 i stori long ol. Sampela milion bilong dispela lain ol i wetim “bikpela de bilong God I Gat Olgeta Strong” i kamap klostu nau, na bai i pinisim olgeta pasin nogut i stap long graun. Long marimari bilong God bai ol inap abrusim bagarap long dispela taim na kisim laip i stap oltaim.​—⁠Revelesen 16:14; 21:14; Provep 2:​21, 22.

Tasol ating yu bai tok, ‘Olsem wanem long ol manmeri i dai pinis, olsem ol manmeri mi bin laikim tumas ol?’ Jisas yet i bin tokim Mata, ‘sampela man, bipo ol i dai, tasol bai ol i stap laip.’ (Jon 11:25) Ol dispela man bai kirap bek na i stap long graun. Taim Krais wantaim ol 144,000 wanwok bilong em i stap king na pris long heven na ol i bosim graun, planti milion manmeri i dai pinis na God i tingim ol, bai ol i kirap bek, na bai ol i gat rot bilong kisim save long pasin tru bilong lotu long God. Sapos ol i stap gut long God, bai ol inap i stap oltaim long paradais long graun. Dispela samting bai kamap long “las de,” em Mata i tok long en taim em i wanbel wantaim Jisas na tok, susa bilong em bai kirap bek.​—⁠Jon 5:​28, 29; 11:24; Luk 23:⁠43.

I Gat As Bilong Dispela Bilip

Baibel i stori long sampela man i bin kirap bek na dispela i olsem piksa na i makim olsem i gat as tru na Baibel i tok ol man i dai pinis bai ol i kirap bek. Baibel i stori long profet Ilaija na profet Ilaisa i bin kirapim bek man i dai pinis paslain long taim bilong ol Kristen. Na Baibel i stori long Pikinini bilong God i bin kirapim bek sampela man i dai pinis (olsem Lasaras), na aposel Pita na Pol i bin mekim, na God Jehova yet i bin kirapim bek Pikinini bilong em. Yu ken kaunim ol dispela stori long Baibel long 1 King 17:​17-24; 2 King 4:​32-37; Matyu 28:​1-10; Luk 7:​11-17; 8:​40-56; Jon 11:​38-44; Aposel 9:​36-42; 10:​38-42; 20:​7-12.b

Em nau, i gat as na ol man i ken bilip olsem ol man i dai pinis bai ol i kirap bek, olsem na Pol i tokim ol man bilong Atens: “God . . . i makim pinis wanpela de bilong kot. Na long dispela kot bai em i skelim pasin bilong olgeta manmeri. Na kot bilong em bai i go stret olgeta. Na em i bin makim wanpela man bilong bosim dispela kot. Dispela man i bin dai na God i kirapim em long matmat. Olsem na yumi ken bilip tru long em.​—⁠Aposel 17:​30, 31. Tru tumas, God i bin kirapim bek Jisas, olsem na i gat as tru na yumi ken bilip olsem ol man i dai pinis bai ol i kirap bek. Na i gat as tru na yumi ken bilip long strong na pasin sori bilong God Jehova. Yumi ken bilip tru na mekim tok olsem Mata i bin mekim, yumi ken tok, ‘Yumi save ol man i dai pinis bai ol i kirap bek long las de.’

Pol i autim tok long ol man long Ariopogas long “man i kirap long matmat” na nau ol dispela man i bruk na i kamap olsem tripela lain: “Sampela i tok bilas. Na sampela i tok, ‘Bambai mipela i harim tok bilong yu gen long dispela samting.’ . . . Tasol sampela man ol i bihainim em na ol i bilip.”​—⁠Aposel 17:​32-34.

Taim yu harim tok olsem ol man i dai pinis bai ol i kirap bek, yu bilip o olsem wanem? Bai Jehova i truim tok promis bilong em na kirapim bek planti milion, o planti bilion, manmeri long matmat. Yu bai stap long dispela taim na lukim ol gen na ol i lukim yu o nogat, em samting bilong ol wok na pasin yu mekim long nau. Olsem wanem? Yu laik kisim save long ol samting God i tok yu mas mekim long nau bambai yu inap kisim laip i stap oltaim? Na yu laik bihainim ol dispela lo bilong God? Ol Witnes Bilong Jehova i laik tru long helpim yu long kisim sampela save moa long dispela tok promis olsem ol man i dai pinis bai ol i kirap bek, na long ol samting yu mas mekim bambai yu inap abrusim bagarap taim dispela pasin bilong nau i pinis.​—⁠Jon 17:⁠3.

[Ol Futnot]