Pasin Bilong Wok Strong Inap Mekim Yu i Amamas?
WANPELA bikpela bisnisman bilong Japan, nem bilong em Bunpei Otsuki, i tok, “Wok em i nambawan bikpela samting bilong ol man.” Olsem na em i tok em i no laik kisim malolo. Ol tok bilong dispela man i kamapim tingting bilong ol man bilong Japan, em ol i bin kirapim gen ol wok bisnis samting bilong kantri bilong ol bihain long ol hevi bilong bikpela pait. Pastaim ol man i no save tumas long pasin bilong ol Japan, tasol bihain Kepten Perry bilong Amerika i opim rot na nau ol man i save, ol Japan ol i man bilong wok strong.
Tasol nau ol man i tok bilas long ol Japan, long wanem ol i givim bel tumas long wok na ol i save lusim planti aua long wok, winim ol man long ol narapela kantri i gat planti wok bisnis long en. Gavman bilong Japan i laik bai ol Japan i senisim dispela pasin bilong ol, na bai ol man bilong ol narapela kantri i no ken tok bilas moa long ol. Wanpela nius i tok, “Dipatmen Bilong Leba i tok, ‘No Ken Wok Strong Tumas.’ ” Na long tokaut bilong malolo long yia 1987, Dipatmen i tok moa olsem, “Sapos yu kisim malolo, dispela i makim olsem yu save mekim gut wok bilong yu.” I olsem gavman i laik tokim ol manmeri ol i no ken wok strong tumas.
Tasol i no olsem olgeta manmeri long Japan ol i man o meri bilong wok strong. Wanpela lain (Productivity Center) ol i bin skelim ol wokman long Japan na ol i tok, insait long ol 7,000 nupela wokman, liklik hap lain tasol (inap 7 pesen) i save lusim bikpela hap taim moa long mekim wok mani bilong ol, winim hap taim ol i lusim long mekim ol wok bilong ol yet. Dispela kain pasin i save kamap long ol narapela kantri tu. Wanpela lain long Jemani (Allensbacher Institut für Demoskopie) i kisim save olsem 19 pesen bilong ol yangpela manmeri long Jemani, krismas bilong ol 18 i go 29, ol tasol i save givim bel long mekim wok bilong ol maski ol i kisim bikpela pe o nogat.
Ol yangpela long Japan i no givim bel tumas long mekim wok bilong ol, tasol ol man bilong ol narapela hap, em ol i kam wok long Japan, ol i save givim bel tru long mekim wok bilong ol na ol i wok strong tru. Wanpela bos long Japan i stori long wanpela wokman bilong em i bilong kantri Aljiria na dispela bos i tok, “Ol manmeri bilong Japan i no laik kisim dispela kain wok, na sapos ol i kisim, ol bai lusim kwiktaim!” Taim mama i karim ol manmeri bilong Japan i no olsem ol i manmeri bilong wok strong tru. Sampela strongpela tingting i mas kirapim ol, na bai ol i givim bel long mekim wok na ol i wok strong tru.
Sampela Samting i Kirapim Ol long Wok Strong
Wanpela nius bilong Jemani (Der Spiegel) i tok, ‘Ol Jeman i laik kisim mani, na gutpela sindaun, na planti kago, na biknem, na dispela i kirapim ol long wok strong.’ Ol i wok strong long kisim ol dispela samting. Tru tumas, planti man ol i save wok strong long kisim bikpela mani kago bambai ol inap kisim gutpela sindaun. Na sampela ol i wok strong long kisim bikpela wok moa na kisim biknem. Ol skul i kirapim planti long wok strong bambai ol i ken winim ol narapela na kisim ol dispela samting, tasol sori tru—hatwok bilong ol i lus nating.
Tasol i gat ol narapela samting tu i kirapim ol man long wok strong, i no mani na biknem tasol. Sampela i save wok strong, long wanem ol i tingim wok em i nambawan bikpela samting. Na sampela i save amamas long wok bilong ol na ol i givim bel long mekim. Wanpela man, nem bilong em Haruo, em i tok, ‘Mi save mekim wok saiens—mi mas skelim ol samting na wok long kisim save long en. Mi save laikim tru dispela wok na mi givim bel long en, olsem na mi no gat taim bilong tingim ol samting bilong spirit na mekim wok bilong God.’
Na i gat sampela man ol i wok strong long mekim ol wok bilong helpim na lukautim ol narapela manmeri. Olsem ol paiaman—long olgeta de ol i save wok strong long lukautim ol masin samting bilong mekim i dai paia bambai i wok gut na ol inap mekim gut wok bilong ol.
Tasol ol dispela samting i kirapim ol man long wok strong, olgeta i gutpela as bilong wok strong? Ol dispela wok inap mekim yu i amamas? Orait, wanem wok inap mekim yu i amamas?