Yu Gat Laik Long Kisim Wok Insait Long Kongrigesen?
“Sapos man i laik i stap wasman bilong [kongrigesen], em i laikim gutpela wok.”—1 TIMOTI 3:1.
1. Ol Witnes Bilong Jehova i gat bikpela tingting long mekim wanem wok?
OL WITNES BILONG JEHOVA i gat sampela gutpela wok bilong God ol i laik mekim, na bilong inapim ol dispela wok, ol i save bihainim rot God i makim na ol i bihainim pasin bilong God. I stret ol i mekim olsem, long wanem, God bilong ol i gat sampela gutpela wok em i laik mekim, na em i save inapim tru olgeta wok em i tingting long mekim. (Aisaia 55:8-11) Ol wokboi bilong Jehova i no ken i stap nating olsem sampela man, em ol i no tingting long mekim wanpela gutpela wok bilong helpim ol narapela man—ol i mekim wok bilong helpim ol yet tasol. Nambawan bikpela wok bilong ol witnes bilong God em wok bilong autim tok bilong Kingdom na helpim ol narapela man bambai ol i ken save long ol tok bilong God long Baibel em inap givim laip long ol.—Buk Song 119:105; Mak 13:10; Jon 17:3.
2. Long 1 Timoti 3:1, Pol i kolim wanem gutpela wok ol man Kristen i ken tingting long kisim?
2 Long oganaisesen bilong Jehova i gat ol narapela gutpela wok tu. Aposel Pol i kolim wanpela, em i tok: “Dispela tok em i tru olgeta. Sapos man i laik i stap wasman bilong [kongrigesen], em i laikim gutpela wok.” Kain man olsem em i laik mekim wok bilong helpim ol narapela. Em i laik kisim “gutpela wok”; em i no laik kisim gutpela sindaun na biknem. Narapela Baibel i tanim dispela tok olsem: “I stret yumi ken tok, man i gat laik long kamap wasman em i gat gutpela laik tru.”—1 Timoti 3:1, Baibel Phillips.
Sampela Samting Ol Elda i Mas Was Gut long En
3, 4. Man i laik i stap wasman, bilong wanem em i mas was gut long tingting bilong em?
3 Man i laik kamap wasman Kristen, olsem wanem em i gat “gutpela laik”? Em i gat strongpela laik long kisim wanpela wok. Tru, sampela man i gat gutpela tingting na ol i laik kisim wanpela wok, tasol sampela nogat. Tasol sapos wanpela man i gat pasin daun na em i laik kisim wok wasman bambai em i ken helpim ol narapela man, orait dispela laik bilong em long mekim wok i gutpela, na wok bilong em inap helpim ol narapela man long kisim ol blesing bilong spirit. Tasol em i mas was gut long tingting bilong em.—Sindaun 4:23.
4 Sampela man i laik kisim wanpela wok bambai ol i ken kisim biknem. Sampela i laik kisim strong bilong bosim ol narapela man. Pasin bilong mangal long kisim biknem o bikpela strong bilong bosim ol man, dispela pasin i kain olsem rop bilong wanpela diwai, em rop i nogut pinis; long ai i olsem diwai i sanap strong, tasol em bai pundaun na bagarap. (Sindaun 16:18) Aposel Jon i tok: “Mi raitim pinis sampela tok long ol manmeri bilong [kongrigesen]. Tasol Diotrefes em i laik i stap namba wan bilong ol, na em i no save harim tok bilong mipela. Olsem na sapos mi kam long yupela, mi bai tokaut long dispela pasin em i mekim. Em i save toktok nabaut long mipela long ol kain kain tok nogut. Na em i no mekim dispela tasol. Nogat. Em i no save kisim ol brata i go long haus bilong en. Na taim ol arapela man i laik bringim ol i go long haus bilong ol, em i save pasim ol, na em i rausim ol long [kongrigesen].” (3 Jon 9, 10) Diotrefes i laik i stap namba wan na dispela laik bilong em i no gutpela laik Kristen. Ol disaipel tru bilong Jisas i no ken hambak na wok long kisim strong bilong bosim ol narapela.—Sindaun 21:4.
5. Ol wasman i mas i gat wanem kain tingting na ol i mekim wok?
5 Sapos wasman Kristen i gat stretpela tingting na em i mekim wok, bai em i no tingting long litimapim nem bilong em yet. Bai em i tingim dispela gutpela wok wasman em i holim long lain Kristen i olsem wanpela gutpela wok God i bin givim long em, na bai em i lukautim gut ol sipsip bilong God. Em i mas “amamas long mekim dispela wok, . . . Nogut [em] i bihainim laik bilong ol arapela tasol na mekim. Na [em] i no ken mekim dispela wok bilong kisim pe tasol. Nogat. [Em] i mas i gat laik tru long mekim dispela wok. [Em] i no ken i stap olsem . . . bikman na daunim dispela ol manmeri God i bin putim long han bilong [em]. Nogat. [Em] i mas mekim gutpela pasin tasol, bai ol i ken lukim na bihainim.” (1 Pita 5:2, 3) Tru tumas, ol wasman bilong kongrigesen i mas was gut long tingting bilong ol, nogut ol i kisim pasin bilong hambak, na nogut ol i mekim nabaut long strong ol i kisim bilong bosim ol man.
6. Bilong wanem elda i no ken mekim pasin antap na daunim ol manmeri bilong God?
6 Elda i no ken i stap olsem bikman na daunim ol narapela Kristen. Nogat. Long wanem, em i wanwok bilong ol; em i no ‘bosim bilip bilong ol.’ (2 Korin 1:24) Taim sampela aposel i laik i stap namba wan, Jisas i tokim ol: “Yupela i save, ol king bilong ol arapela lain i save bosim tru ol lain bilong ol. Na ol bikman bilong ol i save strong tumas long ol manmeri i mas bihainim tok bilong ol. Tasol dispela pasin i no ken i stap namel long yupela. Nogat. Man i laik i stap bikman namel long yupela, em i mas i stap wokman bilong yupela. Na man i laik i stap namba wan bilong yupela, em i mas i stap olsem wokboi nating bilong yupela. Olsem tasol Pikinini Bilong Man i no bin i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em bilong baim bek planti manmeri.” (Matyu 20:20-28) Elda em i no Namba Wan Wasman bilong ol sipsip. Nogat. Em i wanpela namba 2 wasman. Sapos em i laik i stap bikman na daunim ol sipsip, em i gat pasin antap na em i hambak. Na sapos em i grisim sampela bambai ol i helpim em long kamap bikman olsem, orait ol samting nogut tasol bai kamap. Baibel i tok: “Bikpela i no laikim tru ol man i save hambak na litimapim nem bilong ol yet. Yumi ken save olsem, Bikpela i no inap larim ol i go nating. Nogat. Bai em i mekim save long ol.”—Sindaun 16:5.
7, 8. (a) Bilong wanem elda Kristen i mas i gat pasin daun? (b) Stori long wanpela gutpela elda em i gat pasin daun.
7 Olsem na ol elda Kristen i mas ‘daunim laik bilong ol yet na stap aninit long strongpela han bilong God.’ Sapos ol i gat pasin antap na ol i hambak, bai ol i no inap mekim ol gutpela wok bilong spirit. Man i mas i gat pasin daun na bai tingting na bel bilong em i stret na em inap bihainim laik bilong God. “God i save daunim ol man i apim nem bilong ol yet, tasol em i save marimari na mekim gut long ol man i daunim ol yet.” (1 Pita 5:5, 6) Tru tumas, Jehova i save mekim gut long ol man i gat pasin daun. Namel long ol dispela kain man i gat ol man ol inap long mekim wok wasman, na lain Kristen i save makim ol dispela man bilong kamap ol elda Kristen.
8 Long stori bilong ol Witnes Bilong Jehova long nau i gat stori bilong planti gutpela man bilong God ol i bin mekim wok long pasin daun. Wanpela em W. J. Thorn, bipo em i mekim wok olsem wanpela wasman sekit na em i wok longtaim long Betel. Em i man bilong pasin isi. Wanpela Kristen i stori long em na i tok: “Mi no ken tru lusim tingting long wanpela tok Brata Thorn i bin mekim, em dispela tok i bin helpim mi i kam inap long nau. Em i bin tok, ‘Taim mi kirap long tingting tumas olsem mi yet mi bikman, nau mi save lusim ol narapela man i go long kona bilong wanpela rum na mi tokim skin bilong mi yet olsem: “Yu olsem wanpela liklik hap das nating. Yu gat wanem samting yu ken hambak long en?” ’ ” Ol elda na ol narapela i ken bihainim gutpela pasin daun bilong dispela brata! Yu mas tingim tok bilong Baibel i tok: “Sapos yu daunim yu yet na yu stap aninit long Bikpela, bai yu gat planti mani samting na biknem, na bai yu stap gut.”—Sindaun 22:4.
God i Kirapim Laik Bilong Mekim Wok
9. Laik bilong kisim wok wasman, bilong wanem yumi ken tok God i kirapim dispela laik long bel bilong man?
9 Laik bilong mekim wok wasman, God i kirapim dispela laik long bel bilong man o olsem wanem? Yumi ken tok God i kirapim, long wanem, spirit bilong God i save kirapim tingting bilong yumi na strongim bel bilong yumi na givim strong long yumi bilong mekim wok bilong Em. Olsem: Ol man i mekim nogut long ol disaipel bilong Jisas na ol disaipel i beten askim God long helpim ol bambai ol i no ken pret long autim tok. Orait, wanem samting i bin kamap? Baibel i tok: “Ol i beten pinis, na dispela haus ol i bung long en em i guria. Na Holi Spirit i pulap long ol, na ol i autim tok bilong God. Ol i tokaut strong na ol i no pret.” (Aposel 4:27-31) Spirit holi i kamapim dispela strongpela wok, olsem na yumi save, em inap kirapim laik long bel bilong man na bai man i gat laik long mekim wok wasman.
10. (a) Wanem wanpela samting inap mekim na bai man Kristen i no gat laik long kisim wok wasman? (b) Sapos God i givim wanpela wok long yumi, orait yumi ken save tru long wanem samting?
10 Ating wanem samting inap mekim na bai strongpela Kristen i no gat laik long kamap wasman? Em i man bilong tingim gut ol samting bilong spirit, tasol ating em i pilim olsem em i no inap long mekim dispela wok. (1 Korin 2:14, 15) Tru, yumi mas i gat pasin daun na yumi mas save, i gat sampela wok yumi no inap mekim. (Maika 6:8) Yumi no ken hambak na ting yumi tasol inap mekim wanpela wok na ol narapela i no inap mekim. Nogat. Yumi mas tingim tok bilong Baibel i tok: “Ol man i gat gutpela tingting i save daunim ol yet.” (Sindaun 11:2) Tasol yumi mas save, sapos God i givim wanpela wok long yumi, em bai givim strong tu long yumi bambai yumi inap long mekim dispela wok. Olsem Pol i tok: “[God] i save strongim mi, na long strong bilong em mi inap mekim olgeta samting.”—Filipai 4:13.
11. Sapos Kristen i pilim olsem em i sot long gutpela tingting bilong givim long narapela man na em i no laik kisim wok wasman, orait em i ken mekim wanem?
11 O ating man Kristen i no gat laik long kamap wasman, long wanem, em i pilim olsem em i sot long ol gutpela tingting bilong givim long ol narapela man. Orait, gutpela sapos em i wok strong moa long lainim ol tok bilong God long Baibel, na em i ken beten askim God long givim gutpela tingting long em. Jems i tok: “Sapos wanpela man namel long yupela em i sot long gutpela tingting, orait em i mas beten long God i givim tingting long em, na bai God i givim em. God i save givim planti samting long olgeta man, na em i no save tok kros long man i askim em. Tasol dispela man i mas bilip tru na i beten long God. Em i no ken lusim bilip liklik na i ting olsem, ‘Ating God bai i givim dispela long mi, o nogat?’ Long wanem, man i gat tupela tingting, em i olsem solwara win i sakim na i kirap nabaut. Kain man olsem i no ken ting Bikpela bai i givim wanpela samting long em. Nogat. Tingting bilong dispela man em i bruk nabaut, na long olgeta pasin em i mekim, em i no save bihainim wanpela rot tasol.” (Jems 1:5-8) Solomon i beten askim God long givim gutpela save na tingting long em, na God i givim “planti gutpela tingting na save” long Solomon, na em inap save wanem pasin i gutpela na wanem pasin i nogut, na nau em inap mekim stretpela kot. (1 King 3:9-14) Tru, ol samting God i bin mekim long Solomon, em i no save mekim long ol narapela man. Tasol ol man i holim wok wasman long kongrigesen, God i save helpim ol na sapos ol i stadi gut long Baibel bai ol inap givim stretpela tingting long ol narapela man. Baibel i tok: “Bikpela yet em i as bilong gutpela tingting. Na em i save givim gutpela tingting na save long yumi.”—Sindaun 2:6.
12. Sapos wanpela man i tingting planti na em i no laik kamap wasman, orait wanem samting inap helpim em?
12 Na sapos man i tingting planti, long wanem, wok elda i bikpela wok, ating bai em i pret liklik long kisim dispela wok. Pol yet i bin pilim hevi bilong wok elda, em i tok: “Long olgeta de mi save tingting planti long pasin bilong lukautim gut olgeta [kongrigesen].” (2 Korin 11:28) Tasol Pol i save long ol samting em i mas mekim bilong helpim em taim em i tingting planti; em i tok: “Yupela i no ken wari long wanpela samting. Nogat. Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.” (Filipai 4:6, 7) Tru tumas, sapos man i beten long God na em i bilip na wetim God i helpim em, bai em inap i stap bel isi na em i no ken tingting planti.
13. Sapos wanpela man i tingting planti long kisim wok wasman, orait em i ken mekim wanem kain beten?
13 Sapos man i save beten, tasol em i tingting planti yet long kisim wok wasman, orait ating em i ken mekim beten wankain olsem Devit, em Devit i bin beten long God na i tok: “God, skelim mi gut na bai yu save long olgeta tingting i stap long bel bilong mi. Traim mi, na bai yu save gut long olgeta tingting bilong mi. Skelim mi gut, nogut sampela tok giaman i stap long tingting bilong mi. Na yu mas bringim mi long rot bilong kisim laip bilong i stap gut oltaim oltaim.” (Buk Song 139:23, 24) Maski wanem kain “tok giaman” i stap long tingting bilong yumi na yumi tingting planti, God inap helpim yumi long stretim dispela tingting bambai yumi ken kamap strong long spirit. Narapela hap bilong Buk Song i mekim wankain tok bilong strongim bel bilong yumi, olsem: “Mi tingting olsem, ‘Lek bilong mi i wel. Bai mi pundaun nau.’ Tasol nogat. Bikpela, yu sori tumas long mi na yu holim mi na mi no pundaun long sin. Na taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi amamas.”—Buk Song 94:18, 19.
Bihainim Laik Bilong Jehova na Amamas long Mekim Wok
14. Man i no gat laik long kisim wok wasman, bilong wanem em i mas beten askim God long givim spirit holi long em?
14 Sapos wanpela man Kristen i tingting planti long mekim wok wasman, o em i ting em i no inap long mekim dispela wok, o em i no gat laik long mekim, i stret em i mas beten askim God long givim spirit holi long em bilong helpim em. Jisas i tok: “Yupela papa i save mekim planti pasin nogut, tasol yupela i save tumas long givim ol gutpela samting long ol pikinini bilong yupela. Olsem na yupela i ken save tru, Papa bilong yupela i stap long heven em bai i amamas long givim Holi Spirit long ol man i askim em.” (Luk 11:13) Spirit holi i save kirapim yumi long mekim ol gutpela pasin olsem pasin bilong i stap bel isi na pasin bilong daunim laik bilong olpela bel. Olsem na spirit holi inap helpim yumi long lusim pasin bilong tingting planti na pasin bilong ting olsem yumi no inap long mekim wok.—Galesia 5:22, 23.
15. Wanem kain beten inap helpim ol man i no gat laik long mekim wok na bai ol i amamas long mekim?
15 Orait, olsem wanem sapos man i no gat laik long kisim wok wasman? Yumi olgeta Kristen i baptais pinis, yumi mas beten askim God long helpim yumi long mekim ol pasin em i laikim. Devit i krai long God na em i tok: “God, yu mas skulim mi long gutpela pasin bilong yu, . . . Lainim mi long bihainim tok tru bilong yu.” (Buk Song 25:4, 5) Sapos yumi mekim kain beten olsem, dispela bai helpim yumi long abrusim rot nogut, na yumi ken mekim kain beten olsem sapos yumi no gat laik long kisim wok. Yumi ken beten askim Jehova long helpim yumi bambai yumi gat laik long kisim ol wok insait long kongrigesen. Sapos yumi beten askim God long givim spirit bilong em long yumi na yumi larim spirit bilong em i stiaim tingting bilong yumi, orait taim lain bilong God i laik givim wanpela wok long yumi, bai yumi amamas long kisim. Yumi ol wokboi bilong God i no laik sakim spirit bilong God o givim bel hevi long en, a?—Efesus 4:30.
16. Wanem kain tingting inap kirapim strongpela laik long bel bilong man long mekim wok insait long kongrigesen?
16 “Tingting bilong Krais i stap long yumi,” olsem na yumi save amamas long bihainim laik bilong God. (1 Korin 2:16) Jisas i gat wankain tingting olsem bilong wanpela man bilong raitim tok long Buk Song, em i tok: “God bilong mi, mi laikim tumas long bihainim laik bilong yu. Lo bilong yu i stap insait long bel bilong mi.” (Buk Song 40:8) Krais i tok: “Mi kam pinis bilong bihainim laik bilong yu,” na em i bihainim laik bilong God i go inap long em i dai long pos pen. (Hibru 10:9, 10) Sapos yumi gat laik long givim bel olgeta long mekim wok bilong Jehova, bai yumi gat strongpela laik long bel long kisim wok insait long kongrigesen.
Tingting long Bihain
17. (a) Ol brata ol i no inap mekim bikpela wok olsem bipo ol i mekim, bilong wanem ol i no ken bel hevi? (b) Wanem wok em i nambawan gutpela wok?
17 Sampela brata, bipo ol i holim wok insait long kongrigesen, ol i gat sik o narapela hevi na nau ol i no holim dispela wok. Tasol ol i no ken bel hevi. Yumi save, planti gutpela brata ol i no inap mekim bikpela wok olsem bipo ol i bin mekim, ol i sanap strong yet na holimpas ol lo bilong God. (Buk Song 25:21) Tru tumas, ol brata i gat pasin daun na inap longtaim ol i bin mekim wok elda, ol i gat save pinis na gutpela save bilong ol inap helpim yet ol brata sapos ol i holim yet wok long lain elda. Maski ol i go lapun o skin bilong ol i no gat strong moa, ol i no ken lusim wok elda. Na yumi olgeta wan wan Witnes Bilong Jehova, yumi no ken lusim nambawan gutpela wok, em wok bilong ‘tokaut long biknem bilong God em i bosim olgeta hap’ na litimapim nem holi bilong em.—Buk Song 145:10-13.
18. (a) Sapos ol i bin pinisim wanpela brata long wok elda o long mekim wok olsem wokman bilong kongrigesen, ating em i mas mekim wanem? (b) Wanpela brata ol i bin pinisim em long wok elda, em i gat wanem gutpela tingting?
18 Sapos bipo yu wanpela elda o wanpela wokman bilong kongrigesen na nau yu no holim dispela wok, yu ken save God i no lusim tingting long yu, na ating bihain bai em i givim sampela gutpela wok long yu em yu no ting long kisim. (1 Pita 5:6, 7) Sapos i gat sampela pasin o tingting bilong yu em yu mas stretim, orait yu no ken giamanim bel bilong yu na ting yu no gat wok long mekim; yu mas larim God i helpim yu na yu mas wok long stretim. Sapos ol i bin pinisim yu long wok elda, yu no ken kisim tingting kranki olsem sampela brata i kisim taim ol i pinisim ol long wok elda, na yu no ken lusim wok bilong autim tok na lusim lain bilong Jehova olsem sampela i bin mekim. Yu mas bihainim pasin bilong ol brata i gat gutpela tingting, na bai yu bihainim savepasin! Wanpela brata long Sentral Amerika i bin mekim wok elda inap planti yia, tasol bihain ol i pinisim em long dispela wok, na em i tok: “Mi gat asua na nau mi mas lusim dispela gutpela wok mi bin amamas long mekim inap planti yia, olsem na mi bel hevi. Tasol mi tingting long wok strong long mekim olgeta wok ol brata i laik givim long mi bambai mi inap kisim bek dispela wok bilong mi.” Bihain dispela brata i kisim gen wok elda.
19. I gat wanem gutpela tok bilong helpim wanpela brata ol i bin pinisim em long wok elda o long mekim wok olsem wokman bilong kongrigesen?
19 Sapos ol i bin pinisim yu long wok elda o long mekim wok olsem wanpela wokman bilong kongrigesen, bihainim pasin daun. Yu no ken bel nogut na bai yu no inap kisim sampela wok long bihain. Bihainim gutpela pasin bilong God na bai ol man i lukim pasin bilong yu i gutpela. Yu no ken bel hevi; yu mas tingim ol gutpela samting Jehova i kamapim long rot bilong wok autim tok yu mekim, na ol blesing bilong Jehova i painim lain bilong yu. Wok long strongim meri pikinini bilong yu long ol samting bilong spirit, na go lukim ol sikman long kongrigesen, na wok long strongim ol brata i no strong. Na bikpela samting tru em olsem: Yu wanpela Witnes Bilong Jehova na yu no ken lusim wok bilong litimapim nem bilong God na autim gutpela tok bilong Kingdom.—Buk Song 145:1, 2; Aisaia 43:10-12.
20. Lain elda inap mekim wanem bilong helpim brata bipo em i stap elda o wokman bilong kongrigesen?
20 Lain elda i mas save, sapos ol i pinisim wanpela elda o wanpela wokman bilong kongrigesen long wok, long wanem em i bin mekim pasin kranki o em yet i laik lusim wok, ating bai em i bel hevi. Sapos ol i no bin rausim em long kongrigesen na ol i lukim em i stap bel hevi, orait ol i mas wok long helpim em na strongim em long spirit. (1 Tesalonaika 5:14) Ol i mas helpim em long save i gat planti wok em i ken mekim bilong helpim kongrigesen. Na sapos ol i bin givim sampela tok long em bilong stretim em, orait sapos em i gat pasin daun na em i bihainim gutpela tok ol i givim long em, ating i no longtaim na bai em inap kisim gen sampela wok insait long kongrigesen.
21. Husat ol i bin wet longtaim long kisim sampela wok bilong God? Orait, ol brata i wet long kisim kain wok olsem long nau, ol i ken mekim wanem?
21 Sapos yu laik kisim wok, ating yu no inap kisim kwik—yu mas wet pastaim. Tasol yu no ken les. Moses i bin wet inap 40 yia bilong kisim wok God i laik givim long em, em wok bilong bringim ol Israel i go lusim wok kalabus long Isip. (Aposel 7:23-36) Josua i stap wokman bilong Moses inap planti yia na bihain em i kisim wok olsem senis bilong Moses. (Kisim Bek 33:11; Namba 27:15-23) Devit i wet longtaim na bihain em i kisim wok king long Israel. (2 Samuel 2:7; 5:3) Pita na Jon Mak i bin popaia na i mas i gat hap taim bilong ol i stretim pasin pastaim. (Matyu 26:69-75; Jon 21:15-19; Aposel 13:13; 15:36-41; Kolosi 4:10) Olsem na sapos nau yu no holim sampela wok insait long kongrigesen, ating Jehova i larim hap taim bilong lainim yu bambai yu kisim save long mekim wok. Maski i gat wanem as na nau yu no holim wok, yu mas laik long kisim wok. Yu mas larim God i helpim yu, na bai em i blesim yu na givim sampela wok moa long yu. Yu mas wok strong bambai yu inap kisim wok insait long kongrigesen, na yu mas i gat wankain laik olsem Devit, em i tok: “Bai mi litimapim nem bilong Bikpela oltaim. Na yupela olgeta samting em i bin wokim, yupela tu i mas litimapim nem bilong en oltaim oltaim.”—Buk Song 145:21.
Bai Yu Bekim Wanem Tok?
◻ Ol elda Kristen i mas was gut long wanem ol samting?
◻ Wanem ol samting inap helpim ol brata i tingting planti long mekim wok wasman o ol i pilim olsem ol i no inap long mekim?
◻ Wanem samting inap kirapim laik long bel bilong man long kisim wok insait long kongrigesen?
◻ Ol brata bipo ol i stap elda o wokman bilong kongrigesen ol i mas i gat wanem tingting long bihain?
[Piksa long pes 11]
W. J. Thorn em wanpela elda i gat pasin daun na em i stap olsem gutpela piksa bilong ol narapela elda
[Piksa long pes 13]
Olsem Jisas i bin mekim, yu tu yu laik givim bel olgeta long mekim wok bilong Jehova?