Yu Inap Kisim Gutpela Samting i Winim Gol!
OL TOK i tru i stap long Baibel i olsem gol na silva o narapela gutpela samting i hait insait long graun. Ating yu no bin wok long painim gol tru o silva tru, tasol sapos yu bin mekim, ating bai yu save, man i mekim em i mas wok strong long painim painim, na i hatwok long kisim. Na planti taim man i wok long painim gol o silva, em i no kisim na em i bel hevi.
Tasol taim yu wok long painim gutpela samting i stap insait long Baibel, yu no ken bel hevi. Yu inap kisim. Tingim dispela tok promis i strongim bel bilong yumi: “Yu mas wok hat long painim gutpela tingting, olsem man i wok long painim silva ol i bin haitim insait long graun na olsem man i wok long painim mani samting ol i bin haitim. Sapos yu mekim ol dispela samting, orait bai yu save tru long pasin bilong stap aninit long Bikpela, na bai yu save gut long God.” (Sindaun 2:4, 5) Yu inap kisim, tasol yu mas wok long painim.
‘Ritim Gut Ol Tok na Yu Ken Save’
Sampela Farisi bilong lain Juda long taim bilong ol aposel i tokim Nikodemus, em tu wanpela Farisi, olsem: “Ritim gut ol tok i stap long buk bilong God, na bai yu tu yu ken save olsem, i no gat wanpela profet bai i kamap long Galili.” Ol i givim gutpela tok long em. Sapos yumi kaunim gut ol tok i stap long buk bilong God, yumi inap kisim save long ol tok i tru—em gutpela samting i winim gol.
Tasol ol man i tokim Nikodemus, ‘ritim gut ol tok na yu ken save,’ ol yet i no bihainim dispela tok. Olsem wanem na ol i no bihainim dispela tok?
Ol bikpris na ol Farisi i bin salim ol plisman i kam bilong holimpas Krais Jisas. Ol plisman i kirap nogut tru long pasin bilong Jisas long lainim ol man, olsem na ol i no holim em. Olsem na ol Farisi i askim ol: “Em i trikim yupela tu, a?” Tasol Nikodemus i tok: “Ating lo bilong yumi em i tok long yumi ken kotim nating wanpela man? Nogat. Yumi mas harim tok bilong en pastaim, na bai yumi ken save gut long samting em i bin mekim.” Em i tok olsem na dispela i kirapim ol long tokim em, ‘ritim gut ol tok na yu ken save.’—Jon 7:32, 45-52.
Orait, olsem wanem ol pris na lain Farisi i no bihainim dispela tok? Ol i no save o ol i no laik tokaut klia olsem maski Jisas i kamap bikpela long Galili, mama i bin karim em long Betlehem. Profet Maika i tok profet olsem: “Wanpela man bilong yu [Betlehem] bai i kamap hetman na em bai i bosim ol Israel.” (Maika 5:2) Ol pris na Farisi ol i no kaunim gut ol tok i stap long buk bilong God, olsem na ol i no save Jisas i gat namba olsem wanpela profet na em i mas kamap hetman bilong bosim Israel. Dispela i kamapim bikpela hevi, na i lainim yumi olsem: I bikpela samting yumi mas wok long painim na kisim save long tok i tru. Tasol ol man i save ting olsem wanem long tok i tru?
Ol i Paulim Tok i Tru
Wanpela man bilong yia 1850 samting i raitim buk na em i tok: “Tok i tru i olsem gol tru—ol man i no laik mekim wok long en. Ol i no laik stretim pasin bilong ol, olsem mekim i kamap klin, olsem na ol i senisim o paulim tok i tru.” Dispela tok i sutim stret ol lotu bilong dispela graun. Satan em i “papa tru bilong pasin bilong tok giaman” na em i kirapim ol man long senisim o paulim tok i tru. (Jon 8:44; Kamapim Tok Hait 12:9) Long rot bilong ol lotu giaman em i paulim tok i tru bilong sampela bikpela askim olsem: God em i husat? Jisas em bikpela olsem God, o nogat? Wanem samting bai painim dispela graun na ol man i stap long graun?
Sapos ol pris na ol Farisi i bin wok long painim save long tok i tru, ol inap kisim dispela save. Ol inap kisim dispela gutpela save i winim gol. Ol inap save gut long Jisas, sapos ol i bin ‘harim tok bilong em, na kisim save long ol samting em i bin mekim,’ olsem Nikodemus i tok. Sapos ol i laik tru long kisim dispela save, Jisas bai kamapim gut ol tok i tru long ol, olsem em i mekim long ol disaipel bilong em. (Mak 4:34) Tasol yumi ken painim we tok i tru olgeta long nau? Tru yumi inap kisim save long olgeta tok i tru o nogat?
[Piksa long pes 4]
Ol hetman bilong lotu inap save gut long stori tru bilong Jisas sapos ol i ‘harim tok bilong em’