Holimpas Bilip long God na Krais
Sampela Bikpela Tok Bilong Kolosi
YUMI mas bilip long God Jehova na Krais Jisas bambai God i ken kisim bek yumi. Tasol i hatwok liklik long holimpas dispela bilip. I hatwok long ol Kristen ol i bin i stap long taun Kolosi long bipo, em dispela taun long provins Esia i stap klostu long taun Efesus long hap bilong sankamap. Bilong wanem i hatwok long ol dispela Kristen i holimpas bilip? Long wanem i gat ol tisa giaman long dispela taun, em ol i gat tingting kranki. Ol i tok, ol Kristen i mas katim skin na bihainim sampela lo bilong kaikai na bilong ol bikpela de bilong lotu samting bambai God i kisim bek ol.
Olsem na aposel Pol i wari long ol dispela Kristen long Kolosi na em i laik helpim ol long i stap strong long spirit, na em i laik tru bai ol i ken holimpas bilip bilong ol long God na Krais. Klostu long pinis bilong namba wan taim (yia 60-61) Pol i kalabus long Rom em i raitim pas long ol Kristen long Kolosi long stretim ol dispela tingting kranki na bilong strongim bilip bilong ol. Orait, nau yumi ken skelim sampela gutpela tok Pol i bin raitim long ol, na yumi ken save olsem wanem ol dispela tok inap long helpim yumi tu.
Tingim Gut Wok Bilong Krais
Long kirap bilong dispela pas, Pol i kirapim ol long tingim gut wok bilong Krais. (1:1–2:12) Em i amamas long ol Kolosi i bilip tru long Krais, na ol i givim bel tru long ol manmeri bilong God. Pol i tok, Krais i gat biknem tru long wanem, God i bin wokim olgeta samting long han bilong em, na em i Het bilong kongrigesen, na em i namba wan man i bin kirap bek long matmat. God i laik mekim olgeta samting i kamap wanbel wantaim em long rot bilong Krais, em olgeta kain gutpela save na tingting i pulap long em. Krais i gat ol dispela bikpela wok, olsem na ol Kristen i mas wokabaut wantaim em na ol i mas was gut, nogut ol kain save na toktok nating bilong ol man bilong graun i giamanim ol na ol i kirap long bihainim.
Long rot bilong Krais, God i bin rausim Lo bilong Moses. (2:13-23) I olsem em i bin nilim long diwai ol i bin nilim Jisas long en. Ol dispela lo i olsem “ol piksa nating bilong ol samting i laik kamap bihain. Tasol Krais em i samting tru.” Sapos ol i holimpas Krais, bai i no gat wanpela man inap daunim ol, na bai ol inap kisim prais bilong i stap oltaim long heven.
Tingim Gut God na Krais
Nau Pol i kirapim ol Kolosi long kamap olsem nupela man na daun long Krais. (3:1-17) Sapos ol i tingting long ol samting bilong antap, bai ol i tingim ol samting bilong God i nambawan bikpela samting. Olsem na ol i mas lusim tingting kranki na tok kranki. Sapos ol i kisim pasin bilong isi long ol man, na pasin daun, na pasin bilong sori tru long ol narapela, bai God i mekim gut long ol! Sapos ol i mekim olgeta samting long nem bilong Jisas, na long nem bilong em ol i tenkyu long God, bel isi Krais i save givim long ol man bai i bosim bel bilong ol.
Sapos ol Kristen i tingim gut God na Krais Jisas, dispela bai helpim ol long sindaun gut wantaim ol narapela man. (3:18–4:18) Ol meri marit, na man marit, na pikinini, na wokboi, na bosman, ol i mas pret long God na daun long Krais na mekim gut ol wok bilong ol. Na i bikpela samting ol i mas beten long olgeta taim na bihainim gutpela tingting na mekim ol stretpela pasin!
Ol tok bilong pas Pol i raitim long ol Kolosi inap helpim yumi long sakim ol tok giaman ol inap pundaunim yumi na bai yumi lus long kisim prais bilong laip i stap oltaim. Pol i kamapim klia olsem yumi mas daun long Jehova na long Pikinini bilong em, na sapos yumi mekim olsem, dispela bai helpim yumi long mekim gutpela pasin long ol narapela man. Na sapos yumi holimpas bilip bilong yumi long God na Krais, bai yumi kisim planti blesing.
[Blok/Piksa long pes 22]
Pas bilong ol Laodisia: Long pas bilong ol Kolosi, Pol i raitim tok olsem: “Taim yupela i ritim pinis dispela pas, orait yupela i mas salim i go long [kongrigesen] bilong Laodisia, bai ol tu i ken ritim. Na pas mi salim i go long ol Laodisia, em yupela tu i mas ritim.” (Kolosi 4:16) I gat planti wok bisnis long biktaun Laodisia long hap bilong san i go daun long provins Esia, na ol man i stap long dispela biktaun i gat gutpela sindaun. I gat ol rot i lusim biktaun Laodisia na i go long ol narapela biktaun, olsem Filadelfia na Efesus. Ating wok bilong Pol long Efesus i bin helpim ol Laodisia, tasol em i no bin i go autim tok long dispela taun. Em i bin raitim pas i go long ol Kristen long Laodisia, tasol sampela saveman i ting em i wankain pas olsem em i bin salim long ol Efesus. Dispela pas bilong ol Laodisia i no i stap long Baibel. Ating as bilong dispela i olsem: I no gat wok long em bilong helpim yumi ol Kristen long nau, o ol tok bilong en i wankain tasol olsem i stap long sampela pas moa Pol i bin raitim na nau ol i stap long Baibel.
[Piksa]
Ol pipia ston bilong taun Laodisia bilong bipo