Strongim Bel Bilong Ol Brata Taim De Bilong God i Kam Klostu
“Yupela i save, De bilong [God] em i kam klostu. Olsem na yumi wan wan i mas wok strong moa long strongim bel bilong ol arapela.”—HIBRU 10:25.
OL MANMERI long nau ol i insait long wok bilong tokim ol man, ‘Yu kam kisim wara bilong laip,’ ol i no save lusim ol narapela man na i stap ol yet tasol. Nogat. Bikpela de bilong Jehova long winim pait i wok long i kam klostu na ol i bihainim tok bilong Baibel, em i tok: “Yumi wan wan i mas tingting tu long ol arapela manmeri bilong God, na painim rot bilong kirapim ol long laikim ol arapela na mekim ol gutpela pasin long ol. Na yumi ol manmeri bilong God i no ken lusim pasin bilong bung wantaim, olsem sampela man i save mekim. Nogat. Yupela i save, De bilong [God] em i kam klostu. Olsem na yumi wan wan i mas wok strong moa long strongim bel bilong ol arapela.”—Hibru 10:24, 25.
2 Baibel i mekim ol tok profet long dispela “De” na i tok, em i “De bilong Bikpela” Jehova. (2 Pita 3:10) Jehova em i God Antap Tru, em i God i gat olgeta strong, olsem na i no gat wanpela de inap winim dispela de bilong em. (Aposel 2:20) Long dispela de bai Jehova i stretim bek nem bilong em, em i God tru na em i bos tru bilong olgeta samting long heven na long graun. Dispela bikpela de tru i kam klostu.
3 Aposel Pol i bin tokim ol Kristen long taim bilong em olsem de bilong Jehova i kam klostu. Ol i wetim dispela de bilong Jehova i kamap, tasol em i mas kamap inap olsem 1,900 yia bihain long taim bilong ol. (2 Tesalonaika 2:1-3) Tasol maski, ol i ken strongim bel, long wanem, dispela de i mas kamap, na sapos ol Kristen i holimpas dispela bilip, bai ol inap i stap long dispela gutpela de. (2 Timoti 4:8) Long taim bilong ol aposel, ol Kristen i tingim dispela de i kam klostu. Olsem na nau long taim bilong yumi, de bilong Jehova i kam klostu tru. Olgeta samting i wok long kamap olsem Baibel i tok profet long en na dispela i kamapim klia olsem dispela de i kam klostu, na yumi amamas long dispela. Liklik taim tasol na bai God Jehova i stretim bek nem bilong em, na bai nem bilong em i stap holi inap oltaim oltaim.—Luk 11:2.
Nem Bilong God i Strongim Bel
4 Olgeta manmeri i mas tingim nem bilong God. Wanpela Baibel i tok: “Yumi litimapim nem bilong God! Long wanem, Bikpela, em God bilong yumi i Gat Olgeta Strong, em i kamap king!” (Kamapim Tok Hait 19:6, Baibel Today’s English Version) Dispela Baibel i tok, God em i Bikpela na em i God i gat olgeta strong, tasol dispela Baibel na planti narapela Baibel ol i wokim long nau ol i no raitim nem bilong dispela God em i kamap King. Tasol sampela Baibel (olsem Revised Standard Version na New International Version na Baibel bilong Moffat) i raitim wanpela tok long Kamapim Tok Hait 19:6 em nem bilong God i insait long en. Long dispela ves ol i no raitim tok olsem “Yumi litimapim nem bilong God!” Ol i raitim tok olsem “Haleluya!”a (Em i olsem “Litimapim nem bilong Ya,” o “Litimapim nem bilong Jehova.”) Long taim bilong yumi ol i bin haitim nem bilong God na ol i no raitim long ol Baibel ol i wokim. Tasol nau bai yumi save, dispela nem i bin strongim tru bel bilong ol manmeri bilong God long bipo na long nau tu.
5 Taim ol Israel i wok kalabus long kantri Isip na God Antap Tru i salim Moses i go long ol, ol Israel i laik save husat dispela God em i bin salim Moses i kam. Moses i save ol dispela Israel i karim hevi bai ol i laik save long nem bilong dispela God i bin salim em i kam, olsem na em i askim God long dispela samting, na Kisim Bek 3:15 (NW) i tok: “Na God i tok moa long Moses olsem, ‘Yu mas tokim ol manmeri bilong Israel, “Jehova, em God bilong ol tumbuna bilong yupela, Abraham na Aisak na Jekop, em i bin salim mi i kam long yupela.” ’ Dispela em i nem bilong mi oltaim oltaim, na ol lain tumbuna i kamap bihain i mas kolim mi olsem.”b
6 Taim Moses i givim dispela tok long ol Israel na tokaut strong long ol long nem bilong God, dispela i mas strongim bel bilong ol. Nau ol i save ol bai stap gutpela, long wanem God Jehova, em wanpela tasol em i God tru, em i laik kisim bek ol long han bilong ol Isip. Na nau ol inap kisim save long God taim em i kirap mekim ol samting em i tok long mekim, olsem nem bilong em i makim, na dispela samting tu i mas strongim bel bilong ol. Em i no mekim pasin antap na i laik i stap longwe long ol. Nogat. Em i givim rot long ol bambai ol i ken save long em.—Kisim Bek 3:13; 4:29-31.
7 Nem bilong God, em Jehova, na ol samting dispela nem i makim, i bin strongim bel bilong ol disaipel bilong Bikpela Krais Jisas. (Jon 17:6, 26) Taim Jisas i mekim wok bilong em long graun, em i no bin daunim nem bilong God, na em i no wok long litimapim nem bilong em yet, em Jisas. Tasol taim sampela Kristen i kirap long lusim bilip Kristen tru, olsem ol tok profet i tok ol bai mekim, nau ol i wok long daunim nem bilong God, na ol i no kolim moa taim ol i toktok wantaim. (Aposel 20:29, 30) Taim ol i kirap long putim nem bilong Pikinini bilong God i go antap na ol i daunim nem bilong Papa, nau ol dispela man i tok ol i Kristen ol i no save gut long Papa na ol i lotu nating long em. Ol i no pas gut long Papa, na dispela i no strongim bel bilong ol.
8 Ol Intenesenel Baibel Studen i wok wantaim Sosaiti Was Taua na taim ol i kisim nem olsem ol Witnes Bilong Jehova long yia 1931, ol i amamas nogut tru. Dispela nem ol i kisim i mekim ol i belgut na i strongim tru bel bilong ol, na narapela inap strongim narapela.—Lukim tu Aisaia 43:12.
9 Olsem na ol Kristen tru long nau i save i stret ol i mas tokim ol man long nem bilong dispela God em Baibel i tok ol bai stap Witnes bilong em. Ol i save kamapim dispela nem olsem Gopas bilong ol, em Krais Jisas, i bin mekim taim em i stap long graun. (Kamapim Tok Hait 1:1, 2) Tru tumas, ol i save tokaut olsem dispela God, nem bilong em Jehova, em wanpela tasol em i God tru.—Buk Song 83:18.
Amamas na Spirit Holi i Pulap long Ol
10 Taim Krais Jisas i laik lusim ol aposel, em i tokim ol: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela. Harim. Mi save stap wantaim yupela olgeta de, i go inap long dispela taim i pinis.”—Matyu 28:19, 20.
11 Baibel i tok, ol nupela Kristen i lain na kisim save, ol i mas baptais long nem bilong spirit holi. Dispela spirit holi i no wanpela man; em i strong bilong God Jehova na Jehova i mekim wok long en long rot bilong Krais Jisas. Long de Pentikos, long rot bilong Krais Jisas, God Jehova i bin kapsaitim dispela strong long ol disaipel bilong Krais Jisas i dediket pinis. (Aposel 2:33) Spirit holi i pulap long ol, na wanpela gutpela pasin em spirit holi i save kamapim long ol man em pasin bilong amamas. (Galesia 5:22, 23; Efesus 5:18-20) Amamas i save kirapim bel bilong ol man. Amamas bilong spirit holi i mas pulap long ol disaipel. Tok aposel Pol i mekim long beten em i stret, em i tok: “God i bin promis long givim yumi ol dispela gutpela samting yumi wet long kisim. Yupela i save bilip long em, na em i ken mekim bikpela amamas na bel isi i kamap na i pulap long yupela. Na long strong bilong Holi Spirit, pasin bilong wetim taim God bai i givim ol dispela gutpela samting long yumi, em i ken pulap tru long yupela.”—Rom 15:13.
12 Dispela spirit i save kirapim bel bilong ol man na mekim ol i amamas, em i pulap long ol Witnes Bilong Jehova long nau. Olsem na olgeta Witnes Bilong Jehova, em ol manmeri bilong ‘bikpela lain’ tu, ol i laik tru long strongim bel bilong ol narapela. Yes, bel bilong ol i kirapim ol long mekim olsem nau long dispela taim bilong ol man i no save pren gut wantaim. Olsem na aposel Pol i tok, bilip bilong narapela i ken strongim bilip bilong narapela, “na dispela i ken strongim bel bilong yumi olgeta wantaim.”—Kamapim Tok Hait 7:9, 10; Rom 1:12; 14:17.
I Gat Planti Samting Bilong Strongim Bel Bilong Yumi
13 Ol Kristen i stap long dispela graun, em bos bilong en na god bilong en i birua long olgeta pasin i stret, olsem na ol i laik strongim bel bilong ol brata bilong ol long olgeta hap bilong graun, em spirit holi bilong God Jehova i pulap long dispela lain. (Hibru 10:24, 25; Aposel 20:28) I gat planti samting bilong strongim bel bilong yumi. Tru tumas, yumi mas tenkyu long God Jehova long yumi kisim pinis stretpela save long em na Pikinini bilong em na dispela strong tupela i save mekim wok long en, em spirit holi! Na yumi tenkyu tru long gutpela samting ol i tok yumi ken wetim i kamap! Olsem na yumi save amamas tru na yumi lotu long God. Aposel Pol i tokim ol dispela Kristen em i raitim pas long ol olsem narapela i mas strongim narapela, na ol i mas kirapim ol brata long holim strong bilip. Na ol i mas wok strong moa long mekim olsem ‘taim ol i lukim (olsem save) dispela de i kam klostu.’ Na long taim ol gavman bilong dispela graun i pinisim olgeta lotu ol i kolim Kristen na olgeta narapela lotu giaman tu wantaim, orait bai yumi gat bikpela wok moa long strongim bel bilong ol brata bilong yumi.
14 Ol elda i save go pas long strongim bel bilong ol sipsip long kongrigesen bilong ol, tasol olgeta Kristen i gat wok bilong strongim bel bilong ol brata, olsem Hibru 10:25 i tok ol i mas mekim. Dispela wok em i wanpela wok ol Kristen i mas mekim. Olsem wanem? Yu wanpela brata o sista insait long kongrigesen? Orait, yu save wok long strongim bel bilong ol brata bilong yu? Ating yu tingting olsem: ‘Olsem wanem mi ken mekim? Mi mas mekim wanem samting bilong strongim bel bilong ol?’ Namba wan samting em olsem: Yu mas i go long ol miting, na helpim dispela wok bilong kongrigesen. Taim ol narapela brata sista i lukim yu i kam oltaim long ol miting, dispela i save strongim bel bilong ol, a? Na taim yu lukim ol i kam oltaim long ol miting, dispela i save strongim bel bilong yu, a? Na sapos ol i lukim yu i sanap strong na karim hevi, dispela tu i strongim bel bilong ol. Sapos yu wokabaut strong long rot Kristen, na maski i gat ol hatwok o hevi yu no les na lusim wok, bai yu strongim tru bel bilong ol brata bilong yu.
Daunim Bel Hevi Satan i Kamapim
15 Yumi save, de bilong Jehova i kam klostu, na Satan tu i save long dispela samting. Kamapim Tok Hait 12:12 i tokim yumi, i gat ol hevi i kamap long graun long nau, long wanem “Satan i go daun pinis long yupela, na em i belhat nogut tru. Em i save, em i gat sotpela taim tasol bilong i stap.” Na Kamapim Tok Hait 12:17 i makim olsem, em i belhat stret long ol manmeri “i save bihainim ol lo bilong God, na ol i save autim tok bilong Jisas na bihainim em.” Tru tumas, Satan i laik mekim na bai yumi bel hevi na lusim wok! Na em i save tru long rot bilong mekim. Em i save long ol samting yumi no strong long en na long ol hevi bilong yumi, na em i mekim wok long ol dispela samting.
16 Bilong wanem Satan i wok long mekim yumi i bel hevi? Long wanem planti taim long dispela rot em inap pundaunim man, na bai man i lusim wok. Sampela brata i bin karim bikpela hevi long han bilong ol man i birua long ol na mekim nogut long ol na ol i sanap strong, tasol bihain ol i bel hevi long wanpela samting na dispela i pundaunim ol na ol i no strong moa long bilip. Satan i laik sutim tok bilas long God Jehova na soim olsem em inap pulim ol man na bai ol i lusim wok bilong Jehova. (Sindaun 27:11; lukim tu Jop 2:4, 5; Kamapim Tok Hait 12:10.) Sapos em inap mekim yu i bel hevi, ating long dispela rot bai em inap mekim na bai yu slek long wok bilong God; na ating em inap mekim na bai yu lusim wok na yu no wok moa long autim gutpela tok bilong Kingdom.—2 Korin 2:10, 11; Efesus 6:11; 1 Pita 5:8.
17 Samting nogut i save kamap long rot bilong bel hevi. Tingim ol samting i bin painim ol Israel long Isip long bipo. Moses i go toktok wantaim king bilong Isip, na bihain dispela hatpela king i putim bikpela hevi moa long ol Israel. God i tokim Moses long tokaut long ol Israel olsem God bai kisim bek ol long han bilong ol Isip, em bai mekim tru, na bai ol i kamap lain manmeri bilong em stret. Bai em i helpim ol long ranawe, na bai em i bringim ol i go long dispela graun em i bin tok promis long givim long ol. Moses i givim dispela tok long ol Israel. Tasol Kisim Bek 6:9 i tok: “Ol i no harim tok bilong en. Long wanem, dispela hatwok ol i mekim [long Isip] em i mekim tingting bilong ol i nogut tru.” Dispela pasin bilong ol Israel i mekim tingting bilong Moses tu i nogut, na em i bel hevi. Em i no laik i go toktok wantaim king olsem God i bin tokim em long mekim. Olsem na God Jehova i wok long strongim bel na tingting bilong Moses na nau Moses i go mekim.—Kisim Bek 6:10-13.
18 Satan i save, sapos wokboi bilong God i bel hevi, dispela inap mekim na bai em i surik na lusim wok. I olsem Sindaun 24:10 i tok: “Sapos taim nogut i painim yu na bun bilong yu i slek, orait yu no gat strong tru.” Las de i klostu pinis, olsem na yumi mas i stap strong tru long ol samting bilong spirit. Yumi gat bikpela hatwok long sakim ol laik na tingting nogut em sin i kamapim long yumi, na long daunim ol pasin kranki bilong yumi; tasol taim Satan i wok long rot bilong ol dispela samting bilong pundaunim yumi, yumi gat bikpela hatwok moa long sanap strong, na i mas i gat samting bilong helpim yumi.
Bilip Tru long Ofa Bilong Krais
19 Gutpela samting bilong helpim yumi long sanap strong, em ol samting Jehova i bin mekim long rot bilong Krais Jisas bilong baim bek yumi. Sapos yumi bilip tru long ofa bilong Krais, dispela inap helpim tru yumi, na bai yumi inap winim ol hevi na sanap strong. Nogut yumi ting dispela i samting nating. Tru, yumi stap sinman yet na yumi save popaia na mekim rong. Tasol yumi no ken bel hevi na ting olsem yumi no gat rot na yumi lusim wok. Nogut Satan i giamanim yumi. Yumi gat rot. Yumi gat gutpela samting bilong helpim yumi—em ofa bilong tekewe sin bilong yumi. Ofa bilong Krais inap tekewe sin. Sapos yumi bilong ‘bikpela lain manmeri,’ yumi mas bilip tru olsem yumi inap wasim laplap bilong yumi long blut bilong Pikinini Sipsip na mekim i kamap klin.—Kamapim Tok Hait 7:9, 14.
20 Long Kamapim Tok Hait 12:10, Baibel i tok Satan em i “man bilong kotim ol brata bilong yumi, em i bin kotim ol long ai bilong God bilong yumi long san na long nait.” Olsem wanem yumi ken winim pait na daunim dispela man nogut tru em i wok long kotim yumi na em i laik mekim yumi i bel hevi? Kamapim Tok Hait 12:11 i bekim dispela askim, olsem: “Ol i bin kisim strong long blut bilong Pikinini Sipsip na ol i strong long autim tok bilong em, maski ol birua i kilim ol i dai. Na long dispela pasin ol i winim pait na daunim dispela birua.” Olsem na ol manmeri bilong Jehova i mas holim strong bilip bilong ol long ofa bilong Krais, em blut bilong Pikinini Sipsip. Wok strong long autim tok, long wanem dispela inap helpim yu long sanap strong. Wok long autim gutpela tok bilong Kingdom bilong God long olgeta taim na long olgeta manmeri.
21 Sampela taim yumi no tingting long mekim, tasol yumi inap helpim wok bilong Satan na mekim ol brata bilong yumi i bel hevi. Yumi inap mekim olsem wanem? Olsem: Sapos yumi gat tok long olgeta liklik pasin kranki bilong ol, o yumi pul tumas long ol, o yumi strong tumas long bihainim stretpela pasin. (Saveman 7:16) Yumi olgeta i sot long sampela gutpela pasin na yumi gat ol liklik pasin kranki bilong yumi. Tasol yumi no ken tingim tumas ol liklik pasin kranki bilong ol brata na mekim ol i bel hevi olsem Satan i mekim. Yumi no ken stori long ol pasin kranki bilong ol brata; yumi mas mekim ol gutpela tok long pasin bilong ol wan wan na long lain o oganaisesen bilong Jehova olgeta. Oltaim yumi mas wok long strongim bel bilong ol brata, na long dispela rot bai yumi no mekim ol i bel hevi.
Dispela De i Kam Klostu na Yumi Mas Strongim Bel Bilong Ol
22 De bilong God i kam klostu, olsem na yumi mas tingting strong long wok oltaim long strongim bel bilong ol brata. Stap strong long bilip na long wok, na mekim ol gutpela tok long ol brata, na bai pasin na tok bilong yu i strongim bel bilong ol. Yu mas bihainim pasin bilong Jehova wantaim Krais Jisas. Yu no ken ting em wok bilong ol elda tasol long strongim bel bilong ol brata. Nogat. Yumi tu i mas wok long strongim bel bilong ol. Na yumi mas wok long strongim bel bilong ol elda tu. Ol tu i gat ol liklik pasin kranki bilong ol, na i gat sampela samting ol i no strong long en wankain olsem ol narapela long kongrigesen, na ol tu i gat hevi na hatwok long lukautim famili bilong ol nau long dispela taim nogut. Na tu, olsem Pol i tok, ol i save tingting planti long lukautim gut kongrigesen. (2 Korin 11:28, 29) Ol i gat bikpela wok tru, olsem na yumi mas strongim bel bilong ol.
23 Sapos yu wok gut wantaim ol elda bilong kongrigesen, dispela bai strongim tru bel bilong ol. Sapos yu wok gut wantaim ol bai yu bihainim tok bilong Hibru 13:17, olsem: “Ol [elda] bilong yupela ol i laik helpim yupela, na ol i save was long yupela oltaim. Na bihain bai ol i mas tokim God long olgeta wok ol i bin mekim. Olsem na yupela i mas bihainim tok bilong ol na i stap aninit long ol. Sapos yupela i mekim olsem, orait ol bai i amamas na mekim wok bilong ol, na ol bai i no inap bel hevi. Sapos ol i bel hevi long lukautim yupela, dispela bai i no helpim yupela.”
24 Yumi stap long taim bilong planti hevi na ol man i tingting planti. Tru tumas, bel bilong ol man i bagarap tru na ol i pret long ol samting i laik kamap long graun, olsem Jisas i tok. (Luk 21:25, 26) Ol dispela planti planti hevi i save mekim na yumi tingting planti na bel hevi. Olsem na “yumi wan wan i mas wok strong moa long strongim bel bilong ol arapela,” long wanem de bilong God i kam klostu. Yumi mas bihainim tok bilong aposel Pol long 1 Tesalonaika 5:11, em i tok: “Yupela wan wan i mas givim gutpela tok long ol arapela manmeri bilong God na strongim bel bilong ol, olsem nau yupela i save mekim.”
[Ol Futnot]
a Lukim liklik tok daunbilo long Kamapim Tok Hait 19:1 long Baibel Pisin.
b Lukim Kisim Bek 3:15 long Baibel Pisin na liklik tok daunbilo.
Bai Yu Bekim Olsem Wanem?
◻ Bilong wanem ol Kristen i mas wok long strongim bel bilong ol brata na ol i mas mekim moa yet long nau?
◻ Ol manmeri bilong Jehova i save long nem bilong God, na dispela i bin strongim bel bilong ol olsem wanem?
◻ Long wanem ol rot yumi wan wan inap strongim bel bilong ol narapela?
◻ Bilong wanem yumi mas was gut, nogut yumi helpim wok bilong Satan long mekim ol brata i bel hevi?
[Askim Bilong Stadi]
1, 2. Wanem de i kam klostu? Ol manmeri bilong Jehova i mas ting olsem wanem long dispela de?
3. Olsem wanem de bilong Jehova i kam klostu long taim bilong ol aposel? Na olsem wanem long yumi long nau?
4. Husat i kamap king, olsem Kamapim Tok Hait 19:6 i tok? Olsem wanem yumi ken save long nem bilong em long dispela ves?
5, 6. (a) Bilong wanem Moses i mas save long nem bilong dispela God i salim em i go? (b) Taim Moses i tokaut strong long ol Israel long nem bilong God, dispela i mekim wanem long ol?
7. (a) Olsem wanem yumi save, ol disaipel bilong Jisas i save long nem bilong God? (b) Olsem wanem ol man i bin daunim nem bilong God?
8. Ol manmeri bilong God i kisim nem olsem ol Witnes Bilong Jehova na dispela samting i wok yet long mekim wanem long ol?
9. Ol Kristen tru i ting olsem wanem long dispela God ol i stap Witnes bilong em?
10-12. (a) Spirit holi i mekim wanem long ol man i bihainim Jisas? (b) Amamas em spirit holi i save kamapim em i pulap long ol Witnes Bilong Jehova, olsem na ol i laik mekim wanem kain pasin long ol brata bilong ol?
13. I gat wanem ol samting bilong strongim bel bilong yumi na bilong kirapim yumi long strongim bel bilong ol brata?
14. Husat i gat wok long strongim bel bilong ol brata? Ol i ken mekim olsem wanem?
15. Bilong wanem Satan “i belhat nogut tru”? Em i belhat long husat?
16. Bilong wanem Satan i laik mekim na bai yu bel hevi?
17. Samting nogut i save kamap long rot bilong bel hevi, olsem wanem dispela i kamap ples klia long taim bilong Moses?
18. Bilong wanem ol manmeri bilong God i mas wok strong long sakim pasin bilong bel hevi em Satan i kamapim?
19. Wanem samting inap helpim yumi long sakim pasin bilong bel hevi? Olsem wanem dispela inap helpim yumi?
20. Olsem wanem yumi ken winim pait na daunim Satan, olsem Kamapim Tok Hait 12:11 i tok?
21. Tru yumi no laik mekim, tasol olsem wanem yumi inap helpim wok bilong Satan na mekim ol brata i bel hevi?
22, 23. (a) Bilong wanem yumi no ken ting em wok bilong ol elda tasol long strongim bel bilong ol brata? (b) Olsem wanem yumi ken strongim ol elda bilong kongrigesen?
24. Long dispela taim bilong planti hevi, yumi mas mekim wanem? Bilong wanem yumi mas mekim olsem?
[Piksa long pes 18]
Ol elda i save go pas long strongim ol sipsip long kongrigesen bilong ol