Taim Yumi Bel Hevi Yumi Ken Mekim Wanem Long En?

YUMI ken mekim wanem bilong daunim bel hevi? Ol i givim dispela askim long sampela wasman bilong raun, em ol i save go lukim ol kongrigesen bilong ol Witnes Bilong Jehova. Bekim bilong ol dispela wasman inap helpim yumi long skelim sampela as bilong bel hevi na ol samting yumi inap mekim bilong daunim dispela samting em inap painim olgeta Kristen.

Tru, sapos yumi skelim as bilong bel hevi, dispela tasol i no inap daunim. Tasol i gat sampela samting inap kamapim long ples klia bel hevi bilong man, olsem em i no gat laik long beten, o long stadi, o em i save lusim sampela miting, o em i no givim bel tumas, o em i no amamas tumas long ol poroman Kristen. Tasol i gat wanpela mak i kamapim long ples klia dispela kain bel hevi, olsem: Em i no wok strong moa long autim tok. Orait nau yumi ken skelim ol dispela samting i olsem mak, na yumi ken toktok long sampela samting bilong stretim.

Bel Hevi Long Wok Bilong Autim Tok

Jisas Krais i save pinis long ol hevi i save kamap long wok bilong ol Kristen long kamapim ol disaipel. (Matyu 28:​19, 20) Em i bin salim lain bilong em i go olsem “ol sipsip i go namel long ol weldok.” Em i save, taim ol i mekim wok bilong ol long autim tok, ol man bai mekim nogut long ol. (Matyu 10:​16-​23) Tasol dispela i no as na ol i ken bel hevi long mekim dispela wok. Planti wokman bilong God em ol i bin beten na wetim em i helpim ol, ol i lukim olsem taim ol man i mekim nogut long ol, dispela i strongim ol.​—⁠Aposel 4:​29-​31; 5:​41, 42.

Na maski ol man i no bin mekim nogut long ol disaipel bilong Krais, sampela taim ol man i no amamas long ol i kam autim tok long ol. (Matyu 10:​11-​15) Na i wankain tu long wok bilong ol Witnes Bilong Jehova long autim tok long nau​—⁠sampela taim ol i gat hatwok long mekim dispela wok.a Planti man i no laik toktok wantaim narapela long bilip bilong ol long God​—⁠ol i ting dispela em i samting bilong ol yet. Na sampela ol i nolaik tru long harim tok bilong wanpela lain bilong lotu em ol i gat sampela tingting nogut long en. Tru tumas, taim ol man i les long harim tok yumi autim, o i no gat wanpela gutpela samting i kamap long wok bilong yumi, o i gat sampela hevi moa i painim yumi, dispela inap mekim na yumi bel hevi. Orait olsem wanem yumi inap daunim ol dispela samting i save givim hevi long yumi?

Wok i Kamapim Gutpela Samting

Yumi save kisim amamas long wok bilong yumi long autim tok taim yumi lukim ol gutpela samting i kamap long en. Orait yumi ken mekim wanem na bai wok bilong yumi i karim gutpela kaikai? Yumi olsem man bilong kisim pis, tasol yumi save “kisim ol manmeri.” (Mak 1:​16-​18) Long Israel long bipo, ol man bilong kisim pis ol i save go painim pis long nait, long wanem, ol inap kisim planti pis long dispela taim. Yumi tu i mas skelim gut ol hap yumi save autim tok long en na bai yumi ken i go painim “pis” long taim i gat planti man i stap long haus na ol inap putim yau long tok yumi autim long ol. Ating long apinun em i gutpela taim bilong mekim, o long Sarere Sande, o long narapela taim. Wanpela wasman bilong raun i tok, dispela em i gutpela taim bilong go autim tok long hap ol manmeri i save go long wok na ol i pinis long apinun. Em i lukim olsem, taim ol i go autim tok long ol haus long apinun, gutpela samting i save kamap long dispela wok. Na sapos yumi autim tok long rot bilong telefon, o long kain kain taim na ples, dispela i save helpim yumi long autim tok long planti man moa.

Taim yumi stap gut long wok bilong autim tok na yumi no les, dispela i save kamapim gutpela samting. Long Isten Yurop na long sampela kantri long Afrika, wok bilong autim tok bilong Kingdom i wok long kamap gutpela, olsem na lain bilong autim tok i go bikpela. Na olsem tasol, planti nupela kongrigesen i bin kamap long ol hap yumi bin ting ol man i no laik harim tok bilong Kingdom, o long ol hap yumi save autim tok planti taim long en. Tasol olsem wanem sapos ol hap yu save autim tok long en i no kamapim gutpela samting olsem?

Holim Stretpela Tingting

Sapos yumi tingim gut mak Jisas i laik bai ol disaipel i winim, dispela bai helpim yumi na yumi no bel hevi taim ol man i les long harim tok yumi autim long ol. Krais i laik bai ol disaipel i wok strong long painim ol man i gat gutpela bel na ol inap kisim dispela tok​—⁠Krais i no tok long yumi mas kirapim olgeta man long tanim bel, nogat. Sampela taim em i bin tokaut olsem planti man bai i no inap bilip long gutnius, olsem planti Israel ol i no bin harim tok bilong ol profet bilong bipo.​—⁠Esekiel 9:4; Matyu 10:​11-​15; Mak 4:​14-​20.

Ol manmeri i save olsem ol i sot long ol samting bilong spirit, ol i amamas long kisim dispela “gutnius bilong Kingdom.” (Matyu 5:3; 24:14) Ol i laik mekim wok bilong God long pasin em yet i makim. Olsem na wok bilong yumi i karim kaikai o nogat, em samting bilong bel bilong ol man yet, na i no olsem yumi save gut long autim tok o nogat. Tru, yumi laik autim gut tok na bai ol man i ken amamas long harim gutnius. Tasol gutpela samting i kamap long wok bilong yumi o nogat, dispela em i samting bilong God yet, long wanem, Jisas i tok: “Papa i bin salim mi na mi kam. Na i no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.”​—⁠Jon 6:​44.

Wok bilong yumi long autim tok i mekim na ol man inap save long nem bilong Jehova. Maski ol man i harim o nogat, dispela wok bilong yumi long autim tok i save helpim wok bilong mekim nem bilong Jehova i stap holi. Na tu, long rot bilong dispela wok bilong yumi long autim tok, yumi kamapim long ples klia olsem yumi disaipel bilong Krais, na yumi insait long nambawan bikpela wok i kamap long taim bilong yumi, i winim olgeta narapela wok.​—⁠Matyu 6:⁠9; Jon 15:⁠8.

Ol Man i Mekim na Yumi Bel Hevi

Sampela taim, i gat sampela insait long famili o long kongrigesen ol i mekim na yumi bel hevi. Yumi inap ting olsem ol i no pilim gut tingting bilong yumi. Na tu, ol liklik pasin kranki bilong ol wanbilip inap mekim na yumi bel hevi. Long dispela kain hevi tu, Baibel inap helpim gut yumi.

“Ol arapela manmeri bilong God” i stap long olgeta hap ol i olsem wanpela bikpela famili spirit. (1 Pita 2:​17) Tasol taim sampela pasin bilong narapela i skrapim bel bilong yumi o liklik kros samting i kamap namel long yumi, yumi no tingting moa olsem yumi stap insait long wanpela lain i stap wanbel. Yumi save, dispela kain hevi i bin painim ol Kristen long taim bilong ol aposel tu. Planti taim aposel Pol i mas tokim ol long sindaun wantaim long pasin wanbel. Em i bin tokim tupela meri Kristen, em Yuodia na Sintike, long stretim hevi i stap namel long tupela.​—⁠1 Korin 1:⁠10; Efesus 4:​1-3; Filipai 4:​2, 3.

Sapos yumi gat dispela kain hevi, yumi ken mekim wanem bilong kirap gen long laikim tru ol brata sista bilong yumi? Yumi ken tingting long Krais, em i bin dai bilong helpim ol, na ol tu i save bilip long ofa bilong em bilong baim bek ol man. Na yumi ken tingting tu olsem planti brata bilong yumi ol i redi long i dai bilong helpim yumi olsem Jisas Krais i bin mekim.

Inap sampela yia i go pinis, long Paris, long hap bilong Frans, wanpela man i bin putim wanpela switkes ausait long dua bilong Haus Kingdom, na switkes i gat bom insait long en. Kwiktaim wanpela yangpela Witnes i kisim dispela switkes na em i ran i go daun long 3-pela lata bilong haus na em i ran i go ausait na tromoi switkes i go long wanpela liklik raunwara ol i bin simenim, na nau bom i pairap. Sampela i askim em, wanem samting i bin kirapim em na em i redi long kisim bagarap taim em i mekim olsem. Em i tok: ‘Mi save mipela inap kisim bagarap. Olsem na mi ting, nogut mipela olgeta i dai​—⁠mi wanpela mi ken i dai na ol narapela i ken i stap laip.’b Man! Em gutpela samting tru long yumi gat ol kain poroman olsem, em ol i redi long bihainim stret pasin bilong Jisas!

Na tu, yumi ken tingim gutpela pasin i bin stap namel long ol Witnes Bilong Jehova em ol i stap long ol banis kalabus nogut long taim bilong Namba Tu Pait na narapela i save helpim gut narapela.c Na i no planti yia i go pinis, ol brata sista long Malawi ol tu i bin sanap strong na stap gut long God olsem Kristen tru. Na yumi ken ting, ol brata sista long kongrigesen bilong yumi tu bai mekim wankain pasin long taim nogut bilong birua, na dispela i mas kirapim yumi long lusim tingting long ol liklik hevi i save kamap namel long yumi, o yumi ken ting em i liklik samting tasol, a? Sapos yumi wok long kisim tingting bilong Krais, orait i stap bilong yumi wantaim ol wanlotu bai i givim nupela strong long yumi, na i no mekim yumi i bel hevi.

Sampela Tingting Bilong Yumi Yet

Baibel i tok: “Sapos man i ting long kisim wanpela samting na i wet nating longpela taim, bai em i bel hevi moa yet. Tasol sapos em i kisim dispela samting, orait em bai i ting laip bilong en i gutpela tru na em i amamas moa yet.” (Sindaun 13:12) Long tingting bilong sampela wokman bilong Jehova, pinis bilong dispela pasin bilong graun i no kamap hariap olsem ol i laikim. Ol Kristen i pilim tru olsem dispela taim yumi stap long en em i taim bilong “planti hevi nogut tru,” na planti man i no bilip ol tu i ting olsem.​—⁠2 Timoti 3:​1-5.

Tasol ol Kristen i narapela kain​—⁠ol i mas amamas long lukim olsem dispela taim nogut bilong planti hevi em i olsem “mak” bilong soim olsem Jisas i kam i stap pinis, na dispela i makim olsem liklik taim nau na Kingdom bilong God bai pinisim dispela pasin nogut i stap long graun. (Matyu 24:​3-​14) Na maski ol hevi bilong dispela graun bai i go bikpela moa​—⁠na yumi save em bai mekim olsem long taim bilong “bikpela hevi tru”​—⁠yumi amamas long lukim ol dispela samting i kamap, long wanem, ol i makim olsem klostu nau na God bai kamapim nupela taim long graun.​—⁠Matyu 24:21; 2 Pita 3:​13.

Sapos Kristen i wok long tingting olsem Kingdom i no ken kirap hariap long pinisim ol hevi bilong graun, dispela inap mekim na em bai lusim bikpela taim long painim ol samting bilong skin. Sapos em i larim ol samting olsem wok mani na amamas i pulim bikpela hap taim na strong bilong em, bai em i hatwok long mekim stret ol wok em Baibel i tok em i mas mekim. (Matyu 6:​24, 33, 34) Kain tingting olsem em inap kirapim Kristen long tingting planti, na em bai bel hevi. Wanpela wasman bilong raun i tok: “Em i pasin kranki tru sapos yumi wok strong long kisim gutpela sindaun long nau i wankain olsem gutpela sindaun bilong nupela taim.”

Samting Bilong Stretim Bel Hevi

Orait taim man i skelim pinis as bilong bel hevi bilong em, em i ken mekim wanem bilong stretim? Stadi em i wanpela gutpela samting tru bilong stretim dispela bel hevi. Olsem wanem em inap mekim olsem? Wanpela wasman bilong raun i tok: “Dispela i save kirapim yumi long tingim gen as na yumi mas mekim ol samting yumi save mekim.” Na narapela wasman gen i tok: “Sapos yumi ting wok bilong autim tok em i wanpela wok yumi mas mekim, na long dispela as tasol yumi mekim, orait bihain dispela wok bai kamap olsem wanpela hevi yumi mas karim.” Tasol taim yumi wok strong long stadi, dispela i save helpim yumi long kisim stretpela tingting long wok bilong yumi nau long taim yumi wok long kamap klostu moa long pinis bilong dispela pasin bilong nau. Na tu, planti taim Baibel i kirapim tingting bilong yumi olsem yumi mas kisim ol kaikai bilong spirit bambai yumi ken amamas tru long mekim laik bilong God.​—⁠Song 1:​1-3; 19:​7-​10; 119:​1, 2.

Ol Kristen i stap bel hevi, ol elda i ken i go lukim ol bilong strongim bel bilong ol, na long dispela rot ol inap helpim ol long daunim dispela bel hevi. Taim ol elda i go lukim ol long haus bilong ol, ol inap soim ol olsem yumi olgeta wan wan i gutpela samting tru long ai bilong ol narapela brata, na yumi olsem bikpela samting insait long lain bilong Jehova. (1 Korin 12:​20-​26) Wanpela elda i stori long ol wanlain Kristen na em i tok: ‘Bilong soim ol olsem ol i gutpela samting tru, mi save kirapim ol long tingim gen bikpela wok ol i bin mekim bipo. Mi save tokim ol olsem ol i gutpela samting tru long ai bilong Jehova na em i bin givim blut bilong Pikinini bilong em bilong helpim ol. Ol i save amamas long dispela tok mi givim long ol. Orait taim mi kamapim sampela tok bilong Baibel bilong strongim dispela tok, ol man i stap bel hevi ol inap putim sampela nupela mak ol i laik winim, olsem beten wantaim famili, na stadi, na kaunim Baibel.’​—⁠Hibru 6:​10.

Taim elda i go lukim ol, em i mas was gut, nogut em i mekim olsem i no gat wanpela samting yumi mekim em God i ken amamas long en. Ol wanlotu i stap bel hevi, ol elda i ken helpim ol long save, samting Jisas i givim long ol disaipel long karim, em i no hevi. Olsem na wok Kristen bilong yumi em wanpela samting i givim amamas long yumi.​—⁠Matyu 11:​28-​30.

Pait Strong Long Daunim Bel Hevi

Maski i gat wanem as bilong bel hevi, em wanpela samting i save nogutim yumi na yumi mas pait strong long daunim. Tasol yumi mas save, yumi no stap wanpis long mekim dispela pait. Sapos yumi stap bel hevi, yumi mas larim ol elda na ol narapela poroman Kristen i helpim yumi. Taim yumi mekim olsem, ating yumi inap daunim bel hevi liklik.

Na bikpela samting tru, yumi mas singaut long God bambai em i ken helpim yumi long daunim bel hevi bilong yumi. Sapos oltaim yumi beten na wetim Jehova, ating em bai helpim yumi long winim dispela pait na daunim bel hevi olgeta. (Song 55:22; Filipai 4:​6, 7) Tasol maski yumi inap daunim olgeta o nogat, yumi ol lain bilong Jehova yumi inap mekim wankain tok olsem man bilong raitim Song, em i tok: “Ol manmeri i save mekim song na lotu long yu, na i save wokabaut long marimari bilong yu olsem ol i wokabaut long lait, ol i ken amamas. Ol i save tingting long gutpela pasin yu bin mekim long ol, na olgeta de long san na long nait ol i save amamas na litimapim nem bilong yu. Yu tasol yu strong bilong mipela na mipela i amamas moa long yu. Yu save marimari long mipela na helpim mipela i winim pait.”​—⁠Song 89:​15-​17.

[Ol Futnot]

[Piksa long pes 31]

Taim ol elda i go lukim ol Kristen na givim sampela tok long ol bilong strongim ol, dispela inap helpim ol long daunim bel hevi