Samting Yu Ken Mekim Bilong Daunim Bel Hevi

1. Bel hevi inap mekim wanem long yumi?

LONG olgeta wan wan de, yumi save bungim ol hevi na yumi wok strong long winim ol dispela hevi. Tasol ating yu bai wanbel olsem yumi inap karim wanpela hevi sapos yumi no bel hevi, a? So yumi mas tingim bel hevi olsem wanpela samting inap bagarapim yumi na em inap pinisim strong bilong yumi na pasin bilong yumi long stap amamas. Provep 24:10 i tok: “Sapos yu bel hevi long taim pen na hevi i painim yu, strong bilong yu bai pinis.” Tru tumas, bel hevi inap pinisim strong bilong yumi long karim na winim wanpela hevi i painim yumi.

2. (a) Wanem samting inap mekim yumi bel hevi? (b) Yumi bai stori long wanem samting long dispela atikol?

² I gat planti samting inap mekim yumi bel hevi—sampela em ol samting long bel na tingting bilong yumi, na sampela em samting i kamap long i stap bilong yumi. Sampela bilong ol dispela samting em ol popaia bilong yumi, ol pasin kranki bilong yumi, na sampela sik yumi gat. Narapela samting inap mekim yumi bel hevi em ating yumi no kisim wanpela asainmen yumi laikim tru long wok bilong Jehova, o yumi autim tok long hap we i no gat planti man i putim yau long tok bilong yumi. Long dispela atikol, yumi bai stori long sampela samting yumi ken mekim bilong daunim bel hevi.

TAIM YUMI MEKIM OL POPAIA NA OL PASIN KRANKI

3. Wanem samting i ken helpim yumi long holim stretpela tingting long ol popaia bilong yumi yet?

³ Em isi long yumi pilim nogut long ol popaia na ol pasin kranki bilong yumi yet. Dispela inap mekim na yumi holim tingting olsem Jehova i no inap larim yumi go insait long nupela taim. Kain tingting olsem inap nogutim yumi. Yumi mas i gat wanem tingting long ol popaia bilong yumi? Baibel i tok, “olgeta man i bin mekim sin”—wanpela man tasol husat i no gat sin em Jisas Krais. (Rom 3:23) Na Man i bin kamapim ol tok bilong Baibel, em i no save painim popaia long yumi o ting yumi mas gutpela olgeta, nogat. Em wanpela Papa i gat pasin laikim na em i gat laik long helpim yumi. Na tu, em i no save les kwik. Em i luksave long hatwok bilong yumi olgeta long daunim ol pasin kranki bilong yumi na holim stretpela tingting long yumi yet, na em i redi long helpim yumi.—Rom 7:18, 19.

4-5. Olsem 1 Jon 3:19, 20 i kamapim, bilong wanem tupela sista i no larim bel hevi i daunim ol?

⁴ Tingim stori bilong Deborah na Maria.b Taim Deborah i liklik yet, ol i mekim pasin long em we i mekim em i pilim nogut tru. Na tu, ol i no save tok amamas long em. Olsem na taim em i kamap bikpela meri pinis, em i holim tingting kranki long em yet. Taim em i mekim ol liklik popaia, em i pilim olsem em i no inap tru long mekim wanpela gutpela samting. Maria i gat wankain hevi. Ol wanblut bilong em i save daunim em tru. Dispela i mekim na em i pilim olsem em i samting nating. Bihain long em i kisim baptais na kamap wanpela sista, em i pilim olsem em i no gutpela inap long holim nem olsem wanpela Witnes Bilong Jehova.

⁵ Maski i olsem, dispela tupela sista i no lusim wok bilong Jehova. Bilong wanem? Long wanem, ol i beten long Jehova na tokim em long samting ol i pilim. (Sng. 55:22) Ol i holim stretpela tingting olsem Papa bilong yumi long heven i save long ol samting i bin painim yumi long bipo, na ol tingting kranki bilong yumi i mekim na sampela taim yumi pilim nogut long yumi yet. Tasol em i lukim tu ol gutpela samting long bel bilong yumi—em ol samting yumi yet i no inap lukim.—Ritim 1 Jon 3:19, 20.

6. Wanpela Kristen inap mekim wanem sapos em i pundaun na mekim gen wankain rong em i bin mekim bipo?

⁶ Sapos wanpela brata o sista i wok strong long lusim wanpela rong em i bin mekim bipo, sampela taim em bai pundaun na mekim gen wankain rong, na ating em inap bel hevi tru long dispela. Tru, em nomol long pilim bel hevi taim yumi mekim sin. (2 Kor. 7:10) Tasol yumi no ken larim bel i kotim yumi inap long mak we yumi kisim tingting olsem: ‘Mi samting nating. Jehova i no inap tru long fogivim mi.’ Kain tingting kranki olsem i no tru na em inap pasim yumi long mekim wok bilong Jehova. Tingim tok bilong Provep 24:10 olsem, taim yumi bel hevi, strong bilong yumi bai pinis. I gutpela long “stretim tok” namel long yu na Jehova long rot bilong beten na toktok wantaim em na askim em long marimari long yu. (Ais. 1:18) Taim Jehova i lukim olsem yu tanim bel tru, Em bai fogivim yu. Na tu, yu ken go lukim ol elda. Ol bai amamas long helpim yu long kamap strong gen long bilip.—Jems 5:14, 15.

7. Bilong wanem yumi no ken bel hevi sapos yumi hatwok long daunim wanpela pasin kranki bilong yumi?

⁷ Jean-Luc, em wanpela elda long Frans i tok long ol lain i hatwok long daunim ol pasin kranki bilong ol, olsem: “Wanpela stretpela man long ai bilong Jehova, em i no man husat i no save mekim ol popaia, nogat, em man husat i save mekim popaia na em i save sori long rong bilong em na tanim bel.” (Rom 7:21-25) Olsem na no ken ting yu samting nating taim yu hatwok long daunim sampela pasin kranki bilong yu. Tingim olsem i no gat wanpela bilong yumi i stretpela olgeta long ai bilong God. Yumi olgeta i mas kisim helpim long gutpela pasin laikim bilong God long rot bilong ofa bilong Jisas.—Efe. 1:7; 1 Jon 4:10.

8. Taim yumi bel hevi, yumi ken kisim helpim long husat?

⁸ Ol bratasista bilong yumi long kongrigesen inap strongim bel bilong yumi! Ol i redi long putim yau long yumi taim yumi laik toktok, na ol bai givim ol gutpela tok bilong strongim bel bilong yumi. (Prov. 12:25; 1 Tes. 5:14) Joy em wanpela sista long Naijiria, husat i bin karim hevi bilong bel hevi, em i tok: “Mi bai stap we sapos i no gat ol bratasista i stap? Ol gutpela tok bilong strongim mi i kam long ol bratasista bilong mi i soim olsem Jehova i save bekim ol beten bilong mi. Mi kisim skul long ol long hau mi ken strongim bel bilong ol bratasista em ol i bel hevi.” Maski i olsem, i gutpela yumi tingim olsem planti taim ol bratasista bilong yumi i no inap save sapos yumi nidim ol tok bilong strongim yumi. So em gutpela long yumi yet i go pas long lukim wanpela Kristen i gat strongpela bilip na stori long em long ol helpim yumi nidim.

TAIM YUMI SIK

9. Olsem wanem tok bilong Buk Song 41:3 na 94:19 i strongim bel bilong yumi?

⁹ Kisim helpim long Jehova. Taim yumi pilim sik na moa yet long taim yumi gat wanpela sik i stap longpela taim, ating bai yumi pilim hatwok long holim stretpela tingting. Jehova i no inap wokim mirakel bilong oraitim sik bilong yumi long nau, tasol em i save mekim gut bel bilong yumi na givim yumi strong yumi nidim long karim hevi. (Ritim Buk Song 41:3; 94:19.) Olsem, em inap kirapim ol wanbilip Kristen long kam helpim yumi taim yumi nidim helpim long mekim ol wok bilong haus o go baim kaikai samting. Em inap kirapim ol wanbilip bilong yumi long beten wantaim yumi. O em inap helpim yumi long tingim gen ol gutpela tok bilong em long Baibel, kain olsem bilip bilong kisim laip oltaim long nupela taim we i no gat sik na pen long en.—Rom 15:4.

10. Bihain long Isang i bin insait long wanpela eksiden, bilong wanem em i no bel hevi i stap?

¹⁰ Isang, em i save stap long Naijiria na em i bin insait long wanpela eksiden na dispela i mekim bodi bilong em paralais. Dokta i tokim em olsem em i no inap wokabaut gen. Isang i tok: “Bel bilong mi i bagarap olgeta na mi bin bel hevi tru.” Tasol yu ting em i bel hevi i stap? Nogat! Wanem samting i helpim em? Em i tok: “Oltaim mitupela meri bilong mi i save beten long Jehova na stadi long Tok bilong em. Mipela i tingting strong long amamas long ol gutpela samting mipela i gat, olsem bilip bilong mipela long laip oltaim long nupela taim God bai kamapim.”

11. Olsem wanem Cindy i stap amamas maski em i gat bikpela sik?

¹¹ Cindy, em i save stap long Meksiko na em i gat wanpela bikpela sik we inap kilim em i dai. Hau em i karim hevi bilong sik? Taim em i wok long kisim tritmen, em i putim mak olsem em bai autim tok long olgeta de. Em i tok: “Taim mi mekim olsem, mi putim tingting long ol narapela na i no long operesen bilong mi, pen mi pilim, na sik i stap long mi. Mi save mekim olsem: Taim mi toktok wantaim ol dokta o ol nes, mi askim long famili bilong ol. Bihain mi askim ol long wai na ol i laik mekim kain wok i gat hatwok long en. Taim mi mekim olsem, em isi long mi luksave long wanem tok em ol inap pilim tru. Planti bilong ol i tok olsem planti taim ol sikman i no save askim ol olsem; ‘Yu orait?’ Na planti i tenkyu long mi olsem mi tingim ol tru. Sampela i givim atres na fon namba bilong ol long mi. So long dispela haptaim long laip bilong mi we i gat bikpela hatwok tru, Jehova i givim mi bikpela amamas tru na em samting mi kirap nogut long en!”—Prov. 15:15.

12-13. Sampela bratasista i gat sik o ol i lapun ol inap autim tok long wanem rot, na wanem gutpela samting i kamap?

¹² Ol bratasista i gat sik o ol i lapun, sampela taim ol bai bel hevi bikos ol i no inap mekim wok autim tok olsem ol i save mekim long bipo. Maski i olsem, planti i bin painim rot bilong autim tok. Sista Laurel long Amerika i bin stap laip long wanpela masin bilong wetlewa inap 37 yia! Em i karim hevi bilong sik kensa, planti bikpela operesen, na sampela kain sua samting long skin. Maski em i karim ol dispela hevi, dispela i no pasim em long autim tok. Em i autim tok long ol nes na ol narapela wokman i kam long haus bilong em. Wanem samting i kamap long dispela? Em i helpim 17 manmeri long kisim stretpela save long Baibel!c

¹³ Richard, em wanpela elda long Frans, em i kamapim wanpela gutpela tingting bilong helpim ol lain i stap tasol long haus o stap long nesing hom. Em i tok: “Mi ting em gutpela long ol i gat wanpela tebol bilong putim ol literesa bilong tilim. Tebol bilong literesa i save pulim ai bilong ol man i wokabaut na ol bai askim long en. Dispela bai helpim ol bratasista husat i no inap go long ol haus long autim tok.” Ol lain em ol i stap tasol long haus, ol i ken autim tok long rot bilong raitim pas o long rot bilong telefon.

TAIM YUMI NO KISIM ASAINMEN YUMI LAIKIM

14. King Devit i stap gutpela piksa long mekim wanem?

¹⁴ Ating krismas bilong yumi, helt bilong yumi, o sampela narapela samting i mekim na yumi no winim mak bilong kisim wanpela asainmen insait long kongrigesen o long sekit bilong yumi. Sapos kain samting i painim yumi, orait yumi ken kisim skul long eksampel bilong King Devit. God i no makim Devit long wokim tempel bilong em—em samting Devit i gat laik tru long mekim, tasol Devit i sapotim man em God i makim bilong mekim dispela asainmen. Devit i givim planti samting bilong sapotim dispela wok. Em i stap olsem gutpela piksa em yumi ken bihainim pasin bilong em!—2 Sml. 7:12, 13; 1 Sto. 29:1, 3-5.

15. Long wanem rot Hugues i daunim bel hevi bilong em?

¹⁵ Hugues, em wanpela brata long Frans, em i gat hevi long sait bilong helt, olsem na em i lusim wok elda bilong em na em i hatwok long mekim ol liklik wok long haus. Em i tok: “Pastaim mi pilim olsem mi samting nating na mi bel hevi tru. Tasol bihain, mi luksave olsem mi mas holim stretpela tingting long helt bilong mi, na mi amamas long mekim wok bilong Jehova inap tasol long skel bilong mi. Mi tingting strong olsem mi no inap givap. Olsem Gideon na 300 man—olgeta i bin taiet tru—mi bai wok strong yet!”—Het. 8:4.

16. Yumi inap kisim wanem skul long eksampel bilong ol ensel?

¹⁶ Ol ensel i stap gut long God, ol i stap olsem gutpela eksampel long yumi. Long taim bilong King Ahap, Jehova i askim ol ensel long tingting bilong ol long hau ol i ken trikim wanpela king nogut. Planti ensel i kamapim tingting bilong ol. Tasol God i makim wanpela ensel na tokim em olsem tingting em i kamapim bai wok gut. (1 Kin. 22:19-22) Yu ting ol narapela ensel i bel hevi na kisim tingting olsem, ‘Wai na mi westim taim bilong mi long kamapim tingting bilong mi?’ Nogat, ol i no mekim olsem. Ol ensel i gat pasin daun tru na ol i laik bai olgeta ona i go long Jehova.—Het. 13:16-18; Rev. 19:10.

17. Yumi mas mekim wanem taim yumi bel hevi olsem yumi no kisim asainmen em yumi laikim tru?

¹⁷ Tingim gutpela samting yumi holim em long stap Witnes Bilong Jehova na tokaut long Kingdom bilong em. Yumi inap kisim o lusim wanpela asainmen, tasol asainmen i no mekim yumi dia tumas long God, nogat. Taim yumi gat pasin daun tru, dispela i mekim yumi dia tumas long God na long ol bratasista bilong yumi. So beten na askim Jehova long helpim yu long kisim pasin daun. Kisim skul long planti eksampel bilong ol manmeri i gat pasin daun em stori bilong ol i stap long Baibel. Redi long mekim ol wok bilong helpim ol bratasista bilong yu long wanem ol rot yu inap mekim.—Sng. 138:6; 1 Pita 5:5.

TAIM OL MAN I NO LAIK HARIM GUTNIUS

18-19. Hau yu ken holimpas yet amamas bilong yu taim ol man long hap bilong yu i no laik harim tok yu autim?

¹⁸ Olsem wanem? Sampela taim yu bel hevi bikos ol man long hap bilong yu i no laik harim tok yu autim o i no gat planti man i stap long haus taim yu autim tok? Long kain taim olsem, yumi inap mekim wanem bilong holimpas yet amamas bilong yumi? Sampela gutpela samting yu inap mekim i stap long blok “Kisim Amamas Long Wok Autim Tok.” Em i bikpela samting long yu mas holim stretpela tingting long wok autim tok. Wanem insait bilong dispela tok?

¹⁹ Putim tingting long wok bilong tokaut long nem bilong God na Kingdom bilong em. Jisas i tokaut klia olsem liklik lain tasol bai bihainim rot i go long laip. (Mat. 7:13, 14) Taim yumi autim tok, yumi ken amamas olsem yumi wok wantaim Jehova, Jisas, na ol ensel. (Mat. 28:19, 20; 1 Kor. 3:9; Rev. 14:6, 7) Jehova i save kirapim ol man i gat gutpela bel long kam long Em. (Jon 6:44) So sapos wanpela man i no putim yau long tok yumi autim long nau, ating em bai putim yau long narapela taim yumi bungim em.

20. Tok bilong Jeremaia 20:8, 9 i givim wanem skul long yumi long pasin bilong daunim bel hevi?

²⁰ Yumi inap kisim sampela skul long profet Jeremaia. Ol man em i autim tok long ol, ol i no save putim yau long tok bilong em. Ol i save semim em na tok bilas long em “long olgeta taim.” (Ritim Jeremaia 20:8, 9.) Jeremaia i bel hevi tru na em i pilim olsem em i laik givap. Tasol em i no givap. Wai? Bikos “tok bilong Jehova” i olsem paia i lait insait long ol bun bilong Jeremaia na em i hatwok long pasim! Yumi inap pilim olsem tu sapos yumi pulapim bel na tingting bilong yumi wantaim Tok Bilong God. Em as na yumi mas stadi long Baibel long olgeta de na tingim tingim ol tok bilong en long bel. Taim yumi mekim olsem, yumi bai amamas moa long autim tok na wok autim tok bilong yumi bai kamapim gutpela samting.—Jer. 15:16.

21. Olsem wanem yumi ken daunim pasin bilong bel hevi?

²¹ Deborah em yumi stori pinis long em i tok: “Pasin bilong bel hevi em wanpela strongpela tul Satan i save yusim bilong pait long yumi.” Tasol God Jehova i gat bikpela strong moa winim Satan na ol tul bilong em. So sapos i gat sampela samting i mekim na yu bel hevi, orait beten na tokim Jehova long olgeta samting yu pilim na em bai sambai long yu. Em bai helpim yu long karim ol bel hevi i save kamap long ol popaia na ol pasin kranki bilong yu. Em bai strongim yu taim yu gat sik. Em bai helpim yu long holim stretpela tingting long ol asainmen. Na em bai helpim yu long holimpas amamas long wok autim bilong yu. Na bikpela samting moa, beten na kamapim olgeta tingting bilong yu long Papa bilong yu long heven. Em bai helpim yu na yu ken daunim pasin bilong bel hevi.