Skin i Les, Tasol Strong i Stap Yet
“[Bikpela] i mekim kamap olgeta samting long olgeta hap bilong graun. . . . [Em] i save strongim ol man i no gat strong, na taim bun bilong ol i slek pinis, em i save mekim ol i stap strong.”—AISAIA 40:28, 29.
1, 2. (a) Wanem gutpela singaut i go long olgeta man i laik insait long lotu i tru? (b) Wanem tingting inap givim bikpela hevi long yumi long samting bilong spirit?
YUMI ol disaipel bilong Jisas i save long gutpela singaut bilong em: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. . . . Dispela plang mi putim long nek bilong yupela, em i isi long karim.” (Matyu 11:28-30) Na tu, ol Kristen inap kisim “nupela strong” i kam long Jehova. (Aposel 3:20) Ating yu yet i bin pilim dispela nupela strong em bilong man i lainim tok i tru bilong Baibel, kisim pasin bilong bilip na wet long ol gutpela samting bilong bihain, na bihainim ol stiatok bilong Jehova.
2 Tasol sampela man i lotuim Jehova i save pilim olsem bel bilong ol i no gat strong. Sampela taim ol inap bel hevi olsem inap sotpela taim, na sampela taim dispela pasin bilong les inap stap longpela taim. Isi isi sampela inap pilim olsem ol wok Kristen i olsem hevipela samting i no givim malolo long ol olsem Jisas i tok promis long en. Kain tingting olsem inap kamapim bikpela hevi long pasin bilong Kristen long pas gut wantaim Jehova.
3. Bilong wanem Jisas i bin mekim tok i stap long Jon 14:1?
3 Paslain liklik long ol man i holim na kilim i dai Jisas, em i tokim ol disaipel: “Yupela i no ken bel hevi na tingting planti. Yupela i bilip long God. Yupela i mas bilip long mi tu.” (Jon 14:1) Jisas i bin mekim dispela tok paslain liklik long ol aposel i bungim ol bikpela hevi. Bihain long dispela ol man bai kirap mekim nogut long ol. Jisas i save olsem pasin bilong stap bel hevi inap mekim na ol aposel bilong em i lusim bilip. (Jon 16:1) Sapos ol i no bosim gut, dispela bel hevi inap daunim strong bilong ol long ol samting bilong spirit na bagarapim pasin bilong ol long trastim Jehova. Wankain samting inap painim ol Kristen long nau. Pasin bilong stap bel hevi longpela taim inap givim bikpela pen long yumi na daunim tru yumi. (Jeremaia 8:18) Bai yumi pilim olsem yumi no gat strong. Dispela inap daunim yumi tru long tingting na bel na long samting bilong spirit, na laik bilong yumi long lotuim Jehova inap lus.
4. Wanem samting inap helpim tingting na bel bilong yumi long stap strong?
4 Tok bilong Baibel i stret tru: “Gutpela tingting bilong stiaim laip bilong yu, em i save kamap long tingting bilong yu . . . Olsem na olgeta taim yu mas was gut tru long tingting bilong yu.” (Sindaun 4:23) Baibel i kamapim ol gutpela tok i helpim yumi long was gut long tingting na bel bilong yumi na bai yumi no bel hevi na pilim hatwok long mekim ol samting bilong spirit. Tasol pastaim yumi mas luksave long wanem samting i mekim na yumi pilim hatwok olsem.
Wok Kristen i No Putim Hevi
5. Wanem tupela tok long wok Kristen em man inap ting ol i pait wantaim?
5 Tru, bilong stap wanpela Kristen, man i mas taitim bun na wok strong. (Luk 13:24) Jisas yet i tok: “Man i no karim diwai kros [“pos,” NW ] bilong en na bihainim mi, em i no inap i stap disaipel bilong mi.” (Luk 14:27) Man inap ting dispela tok i pait wantaim tok bilong Jisas olsem plang em i putim em i isi long karim, tasol i no olsem.
6, 7. Bilong wanem yumi ken tok, lotu bilong yumi i no mekim man i pilim olsem skin i les?
6 Tru pasin bilong taitim bun na wok strong inap mekim skin i les, tasol em inap mekim man i belgut na pilim nupela strong taim em i mekim olsem bilong inapim wanpela gutpela wok. (Saveman 3:13, 22) Na wanpela gutpela wok tru em bilong autim tok long ol man long ol tok i tru bilong Baibel, a? Na tu, hatwok yumi mekim bilong bihainim ol lo bilong God i olsem liklik samting taim yumi tingim ol gutpela helpim yumi kisim long dispela rot. (Sindaun 2:10-20) Maski ol man i mekim nogut long yumi, yumi amamas long karim pen na hevi bilong helpim wok bilong Kingdom Bilong God.—1 Pita 4:14.
7 Tru tumas plang Jisas i putim long man long karim i givim nupela strong long yumi, moa yet taim yumi tingim tudak bilong spirit bilong ol man i stap aninit yet long lotu giaman. God i laikim yumi tru na em i no tokim yumi long mekim ol samting yumi no inap mekim. Ol lo bilong Jehova “i no givim hevi” long yumi. (1 Jon 5:3) Trupela bilip Kristen olsem Baibel i kamapim, em i no putim hevi long yumi. Em nau, lotu bilong yumi i no mekim man i pilim skin i les na bel hevi.
“Lusim Olgeta Kain Samting i Mekim Yumi i No Inap Ran Strong”
8. Planti taim wanem samting i mekim na yumi pilim hatwok long mekim ol samting bilong spirit?
8 Sapos yumi pilim hatwok long mekim ol wok bilong spirit, planti taim i olsem, long wanem, dispela taim nogut bilong nau i putim hevi moa long yumi. Dispela “graun olgeta em i stap aninit long strong bilong Satan,” olsem na isi isi tingting nogut bilong dispela graun inap daunim yumi na bagarapim gutpela tingting Kristen bilong yumi. (1 Jon 5:19) Ol wok samting i no olsem yumi mas mekim, ol inap paulim o bagarapim sediul bilong wok Kristen bilong yumi. Ol dispela wok inap putim bikpela hevi tumas long yumi o daunim yumi olgeta. Olsem na Baibel i tokim yumi long “lusim olgeta kain samting i mekim yumi i no inap ran strong.”—Hibru 12:1-3.
9. Olsem wanem wok bilong kisim ol samting bilong skin inap putim hevi long yumi?
9 Olsem: Ol man bilong graun i tingting tumas long kisim biknem, mani, amamas, raun long ol narapela hap, na ol arapela samting bilong skin, na dispela pasin bilong ol inap pulim tingting bilong yumi. (1 Jon 2:15-17) Sampela Kristen long taim bilong ol aposel i bin traim kamap maniman na dispela i putim bikpela hevi long ol. Aposel Pol i tok: “Ol man i laikim tumas long kisim planti mani samting, ol traim bai i kamap na holimpas ol olsem umben i holimpas wanpela abus. Bel bilong ol bai i kirap long mekim planti samting nogut na dispela bai i paulim ol tru. Na long dispela pasin ol bai i bagarap olgeta. Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, na dispela pasin i pulim ol na ol i lusim bilip pinis, na ol i karim bikpela hevi moa.”—1 Timoti 6:9, 10.
10. Tok piksa bilong Jisas long man i tromoi pikinini wit i lainim yumi long wanem samting long sait bilong mani?
10 Taim yumi skin dai na bel hevi long mekim wok bilong God, yu ting dispela i kamap, long wanem, wok bilong kisim ol samting bilong skin i mekim na yumi no tingim tumas ol samting bilong spirit? Tok piksa bilong Jisas long man i tromoi pikinini wit i soim olsem dispela samting inap kamap. Jisas i tok pasin bilong ‘tingting planti long ol samting bilong graun na wari long bungim planti mani na mangal long kain kain samting’ i olsem ol gras i gat nil i “karamapim” tok bilong God i stap long bel bilong yumi. (Mak 4:18, 19) Long dispela as Baibel i tokim yumi: “Yupela i no ken bihainim pasin bilong mangal long mani. Yupela i mas ting olsem, samting yupela i holim pinis, em inap long yupela. God i tokim yumi pinis olsem, ‘Bai mi no lusim yu. Bai mi no larim yu i stap nating. Nogat tru.’ ”—Hibru 13:5.
11. Yumi ken mekim wanem bilong lusim ol samting em inap putim hevi long yumi?
11 Sampela taim i no wok bilong kisim ol samting i givim hevi long yumi, tasol em ol samting yumi holim pinis i mekim na yumi gat hevi. Sampela i pilim olsem bel i no gat strong, long wanem, sik i givim hevi long ol, o wanfamili i dai, o sampela arapela hevi i painim ol. Ol i luksave olsem i gutpela long mekim sampela senis long sampela taim. Olsem: Tupela marit i bin pasim tok long lusim sampela samting ol i mekim bilong amamas na sampela arapela liklik wok i no olsem ol i mas mekim. Tupela i bin skelim olgeta samting bilong ol, na ol samting bilong ol dispela wok ol i putim long wanpela bokis na lusim i stap. I gutpela sapos sampela taim yumi olgeta i skelim ol samting yumi save mekim na ol samting yumi holim pinis, yumi laik rausim olgeta wok samting i no olsem yumi mas mekim, na long dispela rot yumi no ken pilim olsem skin i les na strong i laik pinis.
Yumi Mas i Gat Pasin Bilong Isi Long Man na Stretpela Save Long Mak Bilong Strong
12. Ol popaia bilong yumi yet inap mekim wanem long yumi?
12 Ol popaia bilong yumi yet, ol liklik popaia tu, isi isi ol inap givim hatwok long yumi. Tok bilong Devit i stret tru, em i tok: “Ol rong bilong mi i karamapim mi pinis, na ol dispela rong i olsem kago mi karim na i hevi tumas.” (Song 38:4) Planti taim sampela liklik senis inap daunim sampela hevi yumi karim.
13. Olsem wanem pasin bilong isi long man inap helpim yumi long kisim stretpela tingting long wok bilong yumi long autim tok?
13 Baibel i kirapim yumi long kisim “gutpela tingting na save.” (Sindaun 3:21, 22) Baibel i tok: “Gutpela tingting na save i kam long God . . . i save isi long [man].” (Jems 3:17) Sampela i pilim hevi, long wanem, ol i ting ol i mas mekim wankain wok ol arapela i mekim long wok Kristen bilong autim tok. Tasol Baibel i tok: “Olgeta man i mas skelim wok bilong ol yet, em i gutpela o nogat. Man i mekim olsem, em i ken amamas long pasin em yet i mekim na em i no mas skelim pasin bilong en wantaim pasin bilong narapela man, long wanem, olgeta man wan wan bai i karim hevi bilong pasin ol yet i mekim.” (Galesia 6:4, 5) Tru, gutpela wok ol wanbilip Kristen i mekim inap kirapim yumi long givim bel long wok bilong Jehova, tasol savetingting na pasin bilong isi long man bai helpim yumi long putim ol mak bilong winim i stret wantaim sindaun bilong yumi yet.
14, 15. Olsem wanem yumi inap kamapim savetingting long wok bilong lukautim skin na bel bilong yumi?
14 Pasin bilong yumi long bihainim stretpela tingting long ol samting i luk olsem i no bikpela samting tumas inap daunim pasin bilong skin i les. Tingim samting tupela marit i wok long wanpela brens ofis bilong ol Witnes Bilong Jehova i mekim. Ol i luksave olsem em i savetingting long mekim ol samting na bai skin i no ken les. Meri i tok: “Maski mipela i gat planti wok o nogat, mipela i save slip klostu long wankain taim long olgeta nait. Mipela i save eksasais tu. Dispela i helpim mipela tru. Mipela i save pinis long mak bilong strong bilong mipela, na mipela i mekim ol samting i stret long dispela mak. Mipela i traim long no ken skelim ol samting mipela inap mekim wantaim ol samting ol arapela husat i luk olsem ol i gat planti strong inap mekim.” Olsem wanem? Oltaim yumi wok long kisim inap slip na gutpela kaikai? Taim yumi tingim gut helt bilong yumi, dispela inap helpim yumi na bai strong bilong bel na tingting i no ken pinis olgeta na yumi no pilim hatwok long mekim ol samting bilong spirit.
15 Samting sampela bilong yumi i mas i gat bilong helpim yumi i narapela kain liklik. Olsem: Wanpela sista Kristen i bin autim tok fultaim long sampela ol hap i gat hatwok long en. Sampela bikpela sik i bin painim em, wanpela em sik kensa. Wanem samting i helpim em long karim ol hevi i painim em? Em i tok: “Em i bikpela samting long mi mas i gat haptaim we mi inap stap wanpis na long ples i no gat nois. Taim mi pilim olsem ol hevi i wok long daunim mi na skin i les, mi mas i gat haptaim bilong stap mi yet na bai mi inap rit na malolo.” Pasin bilong wokim gut tingting na savetingting i helpim yumi long luksave long ol samting yumi mas mekim na bai yumi no pilim hatwok long mekim ol samting bilong spirit.
God Jehova i Save Strongim Yumi
16, 17. (a) Bilong wanem em i bikpela samting long lukautim helt bilong yumi long ol samting bilong spirit? (b) Yumi mas mekim wanem long olgeta de?
16 Em i bikpela samting tru long lukautim helt bilong yumi long ol samting bilong spirit. Taim yumi pas gut tru wantaim God Jehova, sampela taim skin inap les, tasol bai yumi no les long lotuim em. Jehova i “save strongim ol man i no gat strong, na taim bun bilong ol i slek pinis, em i save mekim ol i stap strong.” (Aisaia 40:28, 29) Samting i painim aposel Pol i bin helpim em long save dispela tok i tru, em i tok: “Mipela i no save slek long mekim wok bilong God. Tru, bodi bilong mipela i laik bagarap. Tasol bel bilong mipela i save kamap nupela gen long olgeta de.”—2 Korin 4:16.
17 Skripsa hia i tok “long olgeta de.” Dispela i makim olsem long olgeta de yumi mas kisim ol samting Jehova i givim. Wanpela misineri i bin mekim wok inap 43 yia pinis i bin pilim skin i les na bel hevi long sampela taim. Tasol strong bilong em i no bin pinis olgeta. Em i tok: “Mi save kirap long bikmoning na bai mi inap lusim haptaim long beten long Jehova na ritim Tok bilong em paslain long mi kirap mekim wok. Dispela pasin bilong mekim olsem long olgeta de i helpim mi long sanap strong i kam inap long nau.” Yumi inap bilip tru long strong bilong Jehova long helpim yumi sapos oltaim, o “long olgeta de” yumi beten long em na skelim long bel ol gutpela pasin bilong em na ol tok promis bilong em.
18. Olsem wanem Baibel i mekim gut bel bilong ol man i stap gut long God em ol i gat bikpela krismas o sampela sik?
18 Dispela i helpim tru ol lain i bel hevi long krismas bilong ol i wok long go bikpela o ol i gat ol sik. Ating ol lain olsem i no save skelim ol yet wantaim ol arapela na bel hevi, nogat, tasol ol i bel hevi taim ol i skelim ol samting ol inap mekim long nau wantaim ol samting ol i bin i gat strong long mekim long bipo. Yumi amamas long save olsem Jehova i givim biknem long ol lapun! Baibel i tok: “Ol man i lukim waitpela gras bilong ol lapun, na ol i save, ol lapun i bin bihainim stretpela pasin na ol i stap longpela taim long graun. Olsem na ol i givim biknem long ol.” (Sindaun 16:31) Jehova i save long mak bilong strong bilong yumi na em i tingim tru ol samting yumi mekim bilong givim bel long em maski yumi no gat bikpela strong. Na ol gutpela wok yumi bin mekim, ol i stap pinis long tingting bilong God. Baibel i tok: “God em i no man nogut, na bai em i lusim tingting long ol gutpela wok yupela i bin mekim. Nogat. Yupela i bin givim bel bilong yupela long God, na dispela i bin kirapim yupela long helpim ol manmeri bilong em. Na yupela i save mekim olsem yet.” (Hibru 6:10) Yumi olgeta i amamas yumi gat ol lain i stap wantaim yumi em ol i bin stap gut long Jehova inap planti yia tru!
No Ken Givap
19. Pasin bilong givim bel long mekim ol gutpela wok i helpim yumi olsem wanem?
19 Planti i ting wok bilong eksasais strong oltaim inap daunim pasin bilong skin i les. Olsem tasol pasin bilong mekim ol wok bilong spirit oltaim inap strongim bel na daunim pasin bilong skin dai long ol samting bilong spirit. Baibel i tok: “Yumi no ken les long mekim gutpela pasin. Sapos yumi no slek long mekim wok, orait long taim bilong kisim kaikai yumi bai kisim gutpela kaikai tru. Olsem na wanem taim yumi inap mekim gutpela pasin long ol arapela, yumi mas mekim. Na yumi mas strong tru long mekim gutpela pasin long ol arapela manmeri i bilip long Bikpela.” (Galesia 6:9, 10) Lukim, ves i tok “mekim gutpela pasin.” Dispela i soim olsem yumi mas mekim sampela samting. Taim yumi mekim ol samting bilong helpim ol arapela, dispela inap tru long helpim yumi na strong bilong yumi long mekim ol wok bilong Jehova i no pinis.
20. Bilong sakim bel hevi, yumi mas abrusim husat?
20 Tasol pasin bilong poromanim na mekim ol samting wantaim ol man i sakim ol lo bilong God, dispela inap mekim skin i les. Baibel i tok: “Longlong pasin bilong man i no gat gutpela tingting, em i save givim bikpela hevi long yumi, na dispela hevi i winim hevi bilong bikpela ston na hip wesan.” (Sindaun 27:3) Bilong sakim pasin bilong bel hevi na skin i les, yumi no ken poroman wantaim ol lain husat i save toktok planti na wok oltaim long painim asua o sutim tok long ol arapela.
21. Olsem wanem yumi ken strongim ol arapela long ol miting Kristen?
21 Ol miting Kristen i olsem samting Jehova i givim na bai yumi inap kisim strong long samting bilong spirit. Long miting yumi gat gutpela rot tru long narapela i strongim narapela long rot bilong ol tok i givim nupela strong na pasin bilong poroman gut wantaim. (Hibru 10:25) Olgeta long kongrigesen i mas kamapim ol tok i strongim ol arapela long taim ol i bekim tok o ol i sanap long pletfom na mekim tok. Ol man i go pas na mekim wok tisa, ol i gat bikpela wok moa long strongim ol arapela. (Aisaia 32:1, 2) Na long taim i gat wok long stretim wanpela, ol i mekim tok kaunsel long pasin i givim strong long man. (Galesia 6:1, 2) Pasin bilong yumi long laikim tru ol arapela bai helpim yumi long mekim wok bilong Jehova na no ken lusim.—Song 133:1; Jon 13:35.
22. Maski yumi gat hevi long sin, wanem samting inap strongim yumi?
22 Bilong lotuim Jehova long dispela taim em pinis i kam klostu, man i mas mekim wok. Na ol Kristen tu i save karim hevi long tingting i les, pen na wari, na long ol samting i kamap i givim hatwok long ol. Yumi ol man i gat sin, olsem na yumi no strong tumas, yumi kain olsem sospen graun. Tasol Baibel i tok: ‘Dispela gutpela samting tru i stap long mipela olsem em i stap insait long ol samting nating i no gat strong, olsem ol gutpela mani samting i stap insait long ol sospen graun. Em bilong olgeta man i ken save, dispela bikpela strong ol i lukim em i strong bilong God. Em i no strong bilong mipela.’ (2 Korin 4:7) Yes, sampela taim bai skin i les, tasol strong i stap yet na yumi no ken givap. Nogat, yumi mas ‘strongim bel na tok: “Bikpela i save helpim mi.” ’—Hibru 13:6.
Stori Gen
• Ating yumi inap lusim wanem sampela samting i putim hevi long yumi?
• Olsem wanem yumi inap “mekim gutpela pasin” long ol wanbilip Kristen?
• Jehova i strongim yumi olsem wanem long taim skin i les o yumi bel hevi?
[Piksa long pes 23]
Jisas i save olsem pasin bilong stap bel hevi inap givim hatwok long ol aposel
[Piksa long pes 24]
Sampela i bin lusim sampela samting ol i mekim bilong amamas na sampela arapela liklik wok i no olsem ol i mas mekim
[Piksa long pes 26]
Maski yumi no gat bikpela strong, Jehova i save tingim tru ol samting yumi mekim bilong givim bel long em