Wanpela Lain i Stap Amamas
WANPELA lain i amamas! Yu ting i gat wanpela lain man long nau em ol i stap amamas? Yu ting i gat wanpela lain ol inap amamas na tok ol i pinisim tru pasin bilong pait na pasin raskol, na i no gat wanpela man i sot long ol samting, na ol i bin pinisim pasin bilong bagarapim graun na win na wara na ol sik samting i save bagarapim skin bilong man, na ol gavman nogut na pasin birua i stap namel long ol lotu? Yu ting i gat wanpela lain i stap, em ol inap tok ol i save pinis long rot bilong stretim ol dispela hevi? Nogat tru!
Olsem wanem long ol samting i kamap long olgeta hap bilong graun? Long Julai 16, 1990, presiden bilong Rasia, em Mikhail Gorbachev, em i tok: ‘Bipo ol lain man i stap birua birua, tasol nau nupela taim i laik kamap na mi ting ol bai sindaun gut wantaim, na dispela gutaim bai stap strong na i stap longtaim.’ Tasol long dispela de stret wanpela nius (Time) i tok, Amerika i gat 120 roket-bom bilong nuklia i redi i stap na i makim biktaun Mosko, long Rasia, na sapos ol i sutim wanpela tasol i go long Mosko em inap bagarapim taun olgeta. Na ating ol Rasia tu i redi pinis long mekim pait olsem long Amerika. Na long nau sampela lain insait long Yunaitet Nesen ol i gat save long wokim ol bom nuklia, na taim yumi tingting long wanem lain bai pairapim bom bilong ol pastaim, yumi no save amamas, a?
Wanpela Lain i Stap Amamas Tru
Wanpela taim bipo—inap olsem 3,500 yia bipo—i gat wanpela lain i stap em ol i amamas tru. Em lain Israel. Taim God i helpim ol long lusim wok kalabus long Isip, ol yet wantaim Moses i mekim wanpela singsing bilong amamas long God i bin winim pait na kisim bek ol. Na bihain, taim ol i bihainim tok bilong God, em Man bilong kisim bek ol, ol i stap amamas.—Kisim Bek 15:1-21; Lo 28:1, 2, 15, 47.
Taim Solomon i stap king, “ol manmeri bilong Juda na Israel i bikpela lain tumas, inap olsem wesan bilong nambis. Ol i sindaun gut na ol i gat kaikai na dring na ol i amamas.” Em taim bilong bikpela amamas, na ol i amamas moa yet taim ol i sanapim pinis haus lotu bilong Jehova long Jerusalem, em dispela haus i gutpela haus tru, winim olgeta narapela haus ol man i bin wokim long bipo na i kam inap long nau.—1 King 4:20; 6:11-14.
Wanpela Lain i Stap Amamas long Nau
Lain Israel bilong bipo i makim wanpela lain long nau. Tasol em i makim wanem lain? Ating em i makim lain Israel bilong Midel-Is i gat gavman politik i bosim? Stori bilong ol nius i makim olsem dispela lain i no i stap amamas. Olsem wanem? Yunaitet Nesen i bin helpim ol lain bilong en long i stap amamas tru? Nogat. I no gat wanpela lain long nau ol i stap amamas tru. Pasin mangal na pasin giaman i pulap long olgeta hap, na long planti kantri ol man nating i hatwok long kisim ol samting ol i mas kisim bilong i stap laip, na ol i no stap amamas.—Sindaun 28:15; 29:2.
Tasol i gat wanpela lain long nau ol i narapela kain—ol i stap amamas tru. Dispela lain i no gat gavman politik i bosim, long wanem, Krais Jisas em i bosim dispela lain. Em i tok, ol manmeri bilong dispela lain ol “i no man bilong dispela graun.” (Jon 15:19) Ol lain bilong Yunaitet Nesen ol i no i stap wanbel, tasol ol manmeri bilong dispela lain i stap amamas tru ol i laikim tumas pasin bilong i stap wanbel wantaim na “ol i bilong olgeta lain man na bilong olgeta kantri na bilong olgeta kain skin na bilong olgeta tok ples.” (Kamapim Tok Hait 7:4, 9) Nau dispela lain i go bikpela, winim 4 milion. Dispela 4 milion manmeri i gat 200 samting tok ples, tasol olgeta i stap wanbel na mekim dispela wanpela ‘gutpela tok ples.’—Sefanaia 3:9.
Tasol olsem wanem ol dispela manmeri bilong planti lain ol i save mekim wanpela tok ples tasol? Yumi no ken kirap nogut long dispela samting, long wanem, tok bilong Kingdom bilong God i insait long dispela gutpela tok ples i bungim ol i stap wanlain tru. Dispela lain i stap amamas ol i kam “longwe tru long arere tru bilong graun,” na ol man i save dispela lain em ‘ol Witnes Bilong Jehova.’ (Aisaia 43:5-7, 10; Sekaraia 8:23) Maski yu go long wanem wanem hap bilong graun, yu inap lukim ol Witnes i stap.
Long Aisaia 2:2-4, profet bilong God i stori long wanpela bikpela lain, em ol i bilong olgeta lain, na em i tok: “Kam, yumi go long maunten Saion, em maunten bilong Bikpela. Yumi go long haus bilong God bilong Israel, bilong em i ken skulim yumi long ol pasin em i laik yumi mekim, na bai yumi ken wokabaut long rot em yet i makim.” Ol dispela manmeri i givim bel long singautim ol narapela i kam kisim save long Jehova long rot bilong Tok bilong em, em Baibel, bambai ol tu inap lain long ol pasin Em i laik ol i mekim. Dispela wanpela lain i save bihainim rot tru bilong i stap wanbel wantaim, long wanem ol manmeri bilong dispela lain ol i ‘paitim pinis bainat bilong ol i kamap olsem ol ain bilong brukim graun, na ol i paitim pinis ol spia bilong ol i kamap olsem ol naip, na ol i no lain moa long pait.’ Dispela lain i stap amamas tru!
Yu tu inap kisim dispela amamas. Yu inap kisim save long dispela de i wok long i kam klostu hariap, em de o taim bilong King Krais Jisas bai rausim ol man na ol gavman i bagarapim dispela graun na kamapim bek Paradais long graun. (Daniel 2:44; Matyu 6:9, 10) Lain Witnes Bilong Jehova ol i stap wanbel tru, na long nau ol i save amamas tru long mekim ol wok bilong redi long dispela gutaim tru i laik kamap na stori i kamap bihain long dispela bai stori long dispela amamas bilong ol.