Yumi Mas Belgut na Mekim Wok Bilong Jehova
“Yupela mas belgut long Bikpela na lotu long em. Yupela singim song bilong amamas na go klostu long em.”—Sam 100:2.
1, 2. Tingting bilong dispela man na meri long i stap bilong ol i narapela narapela kain olsem wanem?
“MI BAGARAPIM tru laip bilong mi, na nau mi no inap senisim … Taim mi wanpela mi wokabaut mi save tingim ol samting mi bin mekim, na mi no amamas.” Wanpela meri em i lapun liklik na em i bin kisim biknem long wokim ol pilai em i tok olsem. I gat planti samting inap mekim em i stap belgut na amamas. Tasol nogat. Em i no amamas.
2 Tasol nau yumi ken tingim wanpela man inap 37 yia em i karim bikpela hevi, long wanem olgeta bun bilong em i dai. Ating em i no ken amamas, a? Tasol harim tok bilong em: Em i tok long amamas na em i tok, ‘Mi painim pinis rot bilong i stap amamas tru.’
3. (a) Wanem ol samting i save painim yumi na ating bai yumi ting i no gat wanpela man inap i stap amamas tru? (b) Amamas i olsem wanem?
3 Yumi planti manmeri, ating yumi no karim bikpela hevi olsem dispela man. Na ating yumi no kisim biknem long wokim ol pilai samting. Ating yumi ol man nating tasol i save karim ol hevi bilong olgeta de. Samting i painim yumi i olsem Baibel i tok: “Man, em meri i bin karim em, em i save stap liklik taim tasol na planti hevi i save painim em.” Na ating yumi wanbel wantaim dispela tok olsem: “Olgeta samting God i bin wokim, dispela olgeta i pilim pen … Na olgeta i krai nogut i stap, i kam inap long nau.” (Jop 14:1, NW; Rom 8:22) Olsem na ating yumi pilim olsem i no gat wanpela man inap i stap amamas tru—olsem “pilim bikpela amamas long bel long wanem wanpela gutpela samting i painim em.” Yu ting olsem wanem? Yu ting yumi inap i stap amamas tru?
Yu Inap i Stap Amamas?
4. Husat sampela bilong ol dispela planti milion ol i stap amamas tru?
4 Planti milion ol i stap amamas. Ol stretpela ensel long heven ol i amamas long ‘bihainim tok bilong God.’ (Sam 103:20) Oltaim ol i save amamas tru long mekim wok bilong God Jehova. Taim God i wokim graun, ol dispela “sta bilong moningtaim i amamas tru na ol i singaut wantaim”! (Jop 38:4-7, NW) Dispela gutpela ensel em i bin tokaut long mama i karim Jisas, em i kisim bikpela amamas tru long dispela wok em i mekim. Em i autim gutpela tok “bilong mekim olgeta manmeri i amamas tru.”—Luk 2:8-14.
5. Olsem wanem long dispela wanpela Pikinini Bilong God na pasin bilong amamas?
5 Na olsem wanem long “dispela wanpela Pikinini Bilong God”? (Jon 3:18) Taim em i no kam daun yet long graun na kamap man Krais Jisas, em i stap wantaim Jehova long heven. Em i mekim wok bilong Jehova. Jehova i makim em olsem “saveman i bosim wok.” Yu ting em i amamas long mekim dispela wok? Tru tumas, em i amam5as! Baibel i tok: “Olgeta de mi bin mekim em [Jehova] i amamas, long wanem, mi bin amamas tumas long lukim ol samting em i bin wokim … mi bin amamas i stap oltaim long ai bilong Bikpela.” (Provep 8:22-31) Taim Jisas i stap man long graun em i laikim tumas long bihainim laik bilong God. (Sam 40:6-8; Hibru 10:5-10) Na em i tingting long “amamas em i laik kisim bihain na em i stap strong, na em i karim pen na i dai … Na nau em i sindaun long han sut bilong sia bilong God.” (Hibru 12:2) Nau em i stap olsem “King bilong ol king, na Bikpela bilong ol bikpela,” na em i stap amamas. Liklik taim bai em i kamapim strafe bilong God hia long graun. Tru tumas, Krais Jisas i belgut na mekim wok bilong Jehova. Em i amamas long mekim wok bilong God.—1 Timoti 6:13-16; 2 Tesalonaika 1:6-10.
6. Olsem wanem yu inap i stap amamas long nau?
6 Orait, olsem wanem long yu? Yu inap i stap amamas long nau? Tru tumas yu inap i stap amamas, na dispela man i gat bikpela sik em pastaim yumi stori long em, em i makim rot bilong i stap amamas. Em i tok: “Mi painim bikpela amamas long mekim wok bilong God. Sapos yumi mekim wok bilong God yumi stap belgut na amamas, na i stap bilong yumi i gat as tru bilong en. Maski mi gat bikpela sik, tasol dispela samting i no pasim mi long mekim wok bilong God, na mi kisim ol gutpela blesing long dispela rot.” Ol manmeri i givim bel tru long mekim wok bilong God Jehova, ol i stap amamas tru. Ol i mas amamas, long wanem ol i autim “gutnius” i kam long dispela God em i “as bilong amamas.” Dispela tok ol i autim i mekim gut bel bilong ol man, long wanem em i tok long rot bilong kisim laip i stap oltaim na kisim ol gutpela samting aninit long “kingdom bilong heven.” (Matyu 24:14; 1 Timoti 1:11; Matyu 5:3) Olsem na ol i ‘belgut na lotu long Jehova.’ Ol i “singim song bilong amamas na go klostu long em.”—Sam 100:2.
7, 8. (a) Ol manmeri i givim bel long Jehova ol i save stap amamas, tasol olsem wanem na ol i no amamas long olgeta taim? (b) Tasol ol hevi i save painim ol, olsem wanem na ol dispela hevi i no save daunim ol olgeta?
7 Tasol man i givim bel long God i no olsem em i save amamas long olgeta taim. Nogat. Ol manmeri bilong Jehova ol tu i save bel hevi long sampela taim. (Rom 5:12) Olsem Aisak na Rebeka long bipo. Tupela i lotu long Jehova, tasol pikinini man bilong tupela, Iso, em i maritim ol meri haiden bilong lain Het na tupela i bel hevi. “Aisak na Rebeka i bel pen” long dispela samting. (Jenesis 26:34, 35) Na Seten i save kirapim ol man long mekim nogut long ol Kristen, na em i save mekim sampela “pasin hait” bilong bagarapim ol bambai ol i no i stap gut moa long ai bilong Jehova. (Efesas 6:11) Olsem na ol man i laikim tumas God ol i mas save, i gat sampela hevi bai painim ol. Tasol ol dispela hevi i no save daunim ol olgeta. Ol tok bilong Baibel i save “strongim bel” bilong ol, na ol i save beten askim God long givim spirit bilong em long ol na helpim ol long kamapim dispela gutpela pasin spirit holi i as bilong en, em pasin bilong amamas. (Rom 15:4; Luk 11:13; Galesia 5:22, 23) Maski hevi na traim i save painim ol Kristen, tasol “Holi Spirit i kirapim ol na ol i amamas.’ (1 Tesalonaika 1:6) Na blesing bilong Jehova i save mekim ol i stap belgut na amamas.
8 Olgeta gutpela samting Jehova i mekim i no save givim hevi long yumi. (Provep 10:22) Tasol yu save tingim ol dispela gutpela samting? Yu wanpela Kristen na yu save tingim ol blesing yu kisim long Jehova? Yumi mas “belgut na amamas long olgeta gutpela samting Bikpela i mekim.” (Sam 32:11) Sapos yu tingim sampela samting tasol Jehova i bin mekim bai yu save, i gat as tru na yu mas belgut na mekim wok bilong Jehova.
Ol Gutpela Wok Bilong Amamas
9. Man i save tru long Jehova em i save long wanem ol samting bilong Jehova? Olsem wanem long man i save gut long Jehova na pasin bilong i stap amamas?
9 Yumi save long Jehova na yumi inap mekim wok bilong em—em tupela gutpela blesing yumi kisim. Long maus bilong profet Jeremaia God i tok: “Man i amamas, em i mas amamas long dispela samting: Em i gat gutpela save, em i kisim save long mi, mi Jehova, mi Man bilong mekim pasin marimari, na stretpela kot, na stretpela pasin long graun.” (Jeremaia 9:24, NW) Sapos yumi save tasol long nem bilong God, yumi no save tru long God. Man i save tru long God em i save long ol pasin bilong Jehova, na ol samting Em i bin mekim long ol man, na em i save long ol laik na tingting bilong God Jehova. Na em i save bihainim tok bilong Jehova; em i save Jehova em i Nambawan Bikpela na em i mas daun long Em. (1 Jon 5:3) Man i laik i stap klostu tru long God olsem pikinini i stap klostu long papa, em i mas lainim gut ol tok bilong Baibel, na em mas tingim ol tok bilong Pikinini Bilong God na ol samting dispela Pikinini i bin mekim, long wanem dispela Pikinini i stap wanbel tru wantaim Papa. (Jon 1:18; 14:9-11) Ol manmeri i save gut long Jehova olsem, ol i stap amamas. “Man i stap gut long ai bilong em [Jehova], em i save givim gutpela tingting na save na amamas long dispela man.”—Eklisiastis 2:26, NW.
10. Wanem nambawan gutpela wok yumi ken mekim long nau bambai yumi inap long i stap amamas?
10 Narapela blesing Ol Witnes Bilong Jehova i kisim em olsem: Ol inap “holim wok” bilong Jehova. Em nambawan bikpela wok ol man i mas mekim, na sapos ol i mekim bai ol i stap amamas. Sekaraia (papa bilong Jon Bilong Baptais) em kamapim gut dispela samting, em i litimapim nem bilong Jehova, long wanem “yumi ken holim wok bilong em, na yumi no ken pret. Olgeta taim yumi stap laip, orait yumi ken holim wok bilong em long pasin i holi, na long pasin i stret.”—Luk 1:67-79; skelim Rom 12:1; Revelesen 7:9, 13-15.
11. Wanem wanpela gutpela wok bilong amamas yumi inap mekim bilong lotu long God?
11 Nem bilong Jehova i stap long yumi na yumi gat wok long autim nem bilong Em, olsem ol witnes bilong Em. Em wanpela gutpela wok yumi inap mekim bilong lotu long God. (Aisaia 43:10-12) Dispela wok i save mekim bel bilong yumi i amamas, olsem Jeremaia i tok: “Mi amamas long tok bilong yu na bel bilong mi i amamas; long wanem, O God Jehova bilong bikpela lain, yu putim nem bilong yu long mi.”—Jeremaia 15:16, NW.
12. Sapos yumi bel hevi yumi ken skelim wanem samting na ating bai yumi amamas gen?
12 Sapos yu save mekim wok bilong God, tasol sampela taim yu bel hevi liklik, orait yu mas skelim sampela samting bambai bel bilong yu i ken amamas gen. Olsem: Yu ken skelim ol samting i painim ol ensel nogut wantaim ol samting i painim ol gutpela ensel.Ol ensel nogut i kalabus “long sen i stap oltaim oltaim, na ol i stap long tudak nogut tru.” Strafe bilong God bai painim ol. Tasol ol gutpela ensel i mekim wok bilong Jehova na ol i amamas. Bai ol i kisim gutpela pe. (Jut 6) Na skelim Jisas wantaim Seten. Jisas i kisim gutpela wok na em i amamas i stap. Tasol Seten bai lus olgeta! (Revelesen 20:10, 14) God i save sori long ol manmeri i mekim stretpela pasin na em i blesim ol, olsem na yumi inap lukim “stretpela man i narapela kain long man nogut, na man i mekim wok bilong God i narapela kain long man i no mekim wok bilong God.” (Malakai 3:17, 18, NW) Tasol nau yumi ken skelim sampela samting moa i mekim na yumi ken belgut na mekim wok bilong Jehova.
Ol i Stap Fri na Ol i Stap long Lait
13, 14. Long ol samting bilong lotu, olsem wanem ol wokboi bilong Jehova i stap fri na i stap long lait?
13 Yumi lusim pinis, “Bikpela taun Babilon,” yumi no kalabus moa long ol lotu giaman. Dispela samting tu i mekim yumi stap belgut na amamas. Ol Kristen tru i amamas, long wanem ol i no “poroman wantaim em long sin bilong en,” na ol i no ken “kisim pe nogut bilong sin” wantaim em. (Revelesen 18:2, 4) Na ol wokboi bilong Jehova i no pret moa long ol samting ol manmeri i bihainim lotu giaman ol i pret long en. Ol i no bilip moa long ol stori nating bilong ol lotu giaman. Ol i lusim pinis dispela kalabus na ol i stap fri. Jisas i tok: “Yupela bai i save long tok tru. Na tok tru em bai i mekim yupela i kamap fri.” (Jon 8:32) Taim yumi tingim ol manmeri i kalabus yet long pasin bilong tudak, yumi amamas moa yumi lusim pinis dispela kalabus na yumi stap long lait.
14 Ol manmeri i bihainim lotu giaman ol i save brukim skru na beten long ol god giaman na ol piksa bilong lotu, em ol dispela samting i no inap lukluk o harim o smelim samting o wokabaut. Tasol ol manmeri i lotu long Jehova ol i no save mekim olsem. (Sam 115:4-8) Na ol Kristen i stap fri na ol i kisim pinis save long ol samting bilong spirit na i stap long lait, ol i no pret long ol man i dai pinis olsem planti manmeri bilong dispela graun ol i mekim. Lotu giaman i lainim ol man olsem yumi gat tewel na taim yumi dai, skin tasol i dai na tewel i stap laip yet. Dispela tok giaman i mekim na planti manmeri i pret long ol man i dai pinis. Ol i pret, nogut tewel bilong daiman i kam bek na mekim nogut long ol. Tasol gutpela save o lait God i givim long ol Kristen tru i pinisim dispela pret. Ol Kristen tru i save, ol man i dai pinis ol i dai tru, “ol i no save long wanpela samting.” (Eklisiastis 9:5, 10, NW) Ol i save, ol man i dai pinis, em ol i bin laikim tumas ol, na God i tingim ol, bihain bai ol i kirap bek! (Jon 5:28, 29; Aposel 24:15) O1 manmeri i givim bel long Jehova na ol i save autim tok bilong Em, ol i ken amamas, long wanem dispela Papa ol i save mekim wok bilong Em, long rot bilong spirit holi em i bin soim ol “olgeta tingting na pasin bilong God i hait pinis long yumi.” (1 Korin 2:10) Yes, em i givim gutpela lait bilong spirit na tok i tru long ol na dispela samting i mekim ol i stap belgut na amamas.—Sam 43:3.
Amamas Bilong Helpim Narapela Man
15, 16. (a) Taim “lait” bilong ol disaipel bilong pastaim “i lait long ai bilong ol manmeri,” wanem samting i kamap? (b) Long nau, taim ol Kristen i mekim wok bilong kamapim ol disaipel, ol i kisim wanem samting?
15 Yumi mas bihainim tok i tru na i stap olsem lait na dispela samting tu i olsem wanpela blesing. Jisas i tokim ol disaipel: “Yupela i olsem lait bilong graun. … lait bilong yupela i mas lait long ai bilong ol manmeri, bai ol i lukim ol gutpela pasin yupela i mekim, na bai ol i litimapim nem bilong Papa bilong yupela i stap long heven.” (Matyu 5:14-16) Taim ol dispela disaipel bilong pastaim i autim tok na mekim gutpela pasin na ‘lait bilong ol i lait long ai bilong ol manmeri,’ wanem samting i kamap? Dispela samting i helpim ol narapela man, na ol dispela disaipel bilong Krais yet ol i amamas. (Luk 10:1, 17-20; Aposel 8:4-8) Ol i kamapim ol disaipel na long dispela rot ol i kisim amamas. Ol i belgut na mekim wok bilong Jehova.—Matyu 28:19, 20.
16 Ol Kristen long nau tu, em ol i autim tok bilong Kingdom, ol i save kisim wankain amamas. Taim ol i helpim wanpela man long kisim save long tok i tru bilong God ol i save amamas. Aposel Pol i kisim wankain amamas, long wanem em i tokim ol Filipai em i bin lainim ol, “Mi save amamas long yupela, na yupela i olsem gutpela namba bilong mi.” (Filipai 4:1) Na em i tok long ol manmeri bilong Tesalonaika em i bin helpim ol na em i tok “Bihain bai Bikpela bilong yumi Jisas em kam bek na yumi sanap long pes bilong em. Long dispela taim bai mipela i wanem samting? Bai mipela i belgut long wanem samting? Bai mipela i amamas long wanem prais? Yupela tasol. Yes, yupela yet i olsem biknem na amamas bilong mipela.” (1 Tesalonaika 2:19, 20) Yes, Pol, wankain olsem ol Kristen long nau, em bin kisim bikpela amamas long ol manmeri em i helpim ol long ol samting bilong spirit. Olsem wanem? Yu wok strong long wok bilong Jehova na kisim dispela kain amamas?
17. Long sampela hap, wan wan man tasol i harim tok, tasol olsem wanem long ol Witnes Bilong Jehova i painim amamas long mekim wok bilong kamapim ol disaipel?
17 Long sampela hap long nau, taim Ol Witnes Bilong Jehova i autim tok i no gat planti man i harim, tasol Ol Witnes i amamas, long wanem ol i save ol i litimapim nem bilong God na em i amamas long ol. Maski sampela man i no amamas long lukim Ol Witnes i kam long haus bilong ol, tasol Ol Witnes i no bel hevi long dispela samting. Ol i save wok bilong God em i nambawan gutpela wok yumi inap mekim, olsem na ol i belgut na ol i mekim.
Maski Ol Man i Mekim Nogut long Yumi, Yumi Ken Amamas
18. Maski ol man i mekim nogut long ol Kristen, tasol olsem wanem na ol inap i stap amamas?
18 Maski planti taim ol man i mekim nogut long ol Kristen i mekim wok bilong Jehova, tasol ol i save amamas. Ol i belgut na mekim wok bilong Em. Jisas i tok ol man i kisim hevi long nem bilong em, ol i ken amamas. Na aposel Pita i tok: “Long dispela traim yupela i karim pen wantaim Krais, olsem na yupela i mas amamas. Orait na bihain biknem bilong em bai i kamap ples klia, long dispela taim bai yupela inap amamas moa yet na belgut tru. hevi na sanap strong, orait yu ken save God i amamas long yu na spirit bilong Em i stap long yu, na dispela samting i ken mekim yu i stap amamas. Orait na bihain biknem bilong em bai i kamap ples klia, long dispela taim bai yupela inap amamas moa yet na belgut tru. Yupela i holim nem bilong Krais, na sapos long dispela ol i tok nogut long yupela, orait yupela i ken amamas.” Bilong wanem ol i ken amamas? Pita i tok: “Long wanem Spirit bilong God i gat biknem na strong em i stap long yupela.” (1 Pita 4:13, 14; Matyu 5:11, 12) Taim ol man i mekim nogut long yu, long wanem yu wanpela Kristen, ating bai yu no amamas. Tasol sapos yu karim dispela hevi na sanap strong, orait yu ken save God i amamas long yu na spirit bilong Em i stap long yu, na dispela samting i ken mekim yu i stap amamas.
19. Wanpela man ol Natsi i mekim nogut long em, em i tok wanem?
19 Taim ol man i mekim nogut long ol Kristen, maski ol i mekim nogut tru long ol, tasol ol inap i stap amamas, long wanem spirit bilong God i stap long ol na God i givim strong long ol. (Filipai 4:13) Sampela yia bipo wanpela yangpela Witnes i stap long wanpela banis kalabus nogut bilong ol Natsi long Jemani. Em i no gat asua, tasol kot i tok em i mas i dai. Em i raitim pas long papamama na em i tok: “Biknait pinis, tasol i gat taim yet bilong senisim tingting bilong mi. Tasol sapos mi mekim olsem na mi sakim Bikpela bilong yumi, yu ting bai mi inap i stap amamas gen long dispela graun? Nogat tru! Tasol nau yupela i ken save, mi bai dai, tasol mi stap bel isi na amamas.” Yes, ol Kristen ol man i mekim nogut long ol, ol tu i belgut na amamas long mekim wok bilong Jehova.
Ol Narapela As Bilong Amamas
20. Taim yumi bung wantaim ol wanbilip bilong yumi, olsem wanem long amamas bilong yumi?
20 Maski ol man i mekim nogut long Ol Witnes Bilong Jehova, tasol Ol Witnes i save amamas tru long bung wantaim ol wanbilip bilong ol. Em gutpela blesing tru! Pasin bilong stil na giaman na ol tok giaman na pasin nogut i pulap long dispela graun. Olsem na ol i amamas long bung wantaim ol gutpela manmeri i save wokabaut stret na mekim tok i tru, em ol i “kamap nupela man pinis”! (Kolosi 3:8-11) Na ol i amamas long wanem ol i save, pasin ol yet i mekim i amamasim bel bilong Jehova.—Provep 27:11.
21. Wanem sampela samting yumi ken mekim bilong helpim wok bilong lotu i tru na bai yumi amamas?
21 I gat narapela wok yumi inap amamas na mekim bilong helpim wok bilong lotuim God tru, na dispela wok tu i olsem wanpela gutpela blesing, em olsem: Yumi ken mekim sampela wok bilong wokim nupela haus bung bilong Ol Kristen o bilong lukautim na helpim olpela haus bung. (Eksodas 36:1-7; 2 King 12:4-15) Dispela kain wok inap mekim yu i stap belgut na amamas. Na sapos long olgeta taim yu bung wantaim lain bilong Jehova na wok wantaim ol long mekim wok bilong autim tok em God i bin givim long ol, orait bai yu kisim planti blesing moa yet na bikpela amamas.—Sam 122:1; 1 Korin 3:5-9.
22. Sapos yumi stap gut long wok bilong God bai yumi kisim wanem samting?
22 Sapos yu stap gut long wok bilong God tu bai yu kisim blesing—bai yu inap winim taim bilong bagarap na i stap laip na i stap amamas oltaim long nupela taim God i tok promis long kamapim. (2 Pita 3:11-13) Ol wokboi bilong Jehova ol i gat gutpela samting bilong wetim i kamap! Ol i narapela kain tru long ol manmeri ‘i stap long dispela graun na ol i no gat wanpela gutpela samting bilong wetim i kamap na ol i no gat save long God’! (Efesas 2:11, 12) Tru tumas, lain bilong Jehova long nau ol inap mekim tok wankain olsem Devit i mekim long bipo, olsem: “Tasol mi bilip bai yu marimari long mi oltaim. Na mi amamas long yu bai yu helpim mi.” (Sam 13:5) Tru tumas, m yumi tingim ol dispela gutpela blesing bilong yumi ol Kristen, i gat planti samting na yumi ken belgut na amamas long mekim wok bilong Jehova.
Stap Belgut Yet long Mekim Wok Bilong Jehova
23. Yumi no ken tingim tumas ol hevi bilong nau i wok long i go bikpela, yumi mas mekim wanem?
23 Ol Witnes bilong Jehova i gat planti blesing, tasol ol hevi bilong dispela olpela pasin bilong nau i wok long i go bikpela na dispela samting i putim hevi long ol tu. Long ples wok, long skul, na long ol narapela hap ol dispela hevi na traim i painim ol na ol i mas sanap strong. Ol dispela samting inap mekim ol i bel hevi, tasol yumi no ken tingim ol dispela hevi long olgeta taim na i stap bel hevi. Yumi mas tingim ol gutpela samting na bai yumi bihainim gutpela tingting. Yumi no ken bel hevi, yumi mas “wok strong long mekim olgeta gutpela pasin,” na yumi mas tingim ol blesing yumi kisim long wanem yumi mekim wok bilong Jehova. (Taitas 2:14) Olsem bai yumi inap i stap belgut na amamas, olsem Provep 15:15 i tok: “Man i sot long ol samting, em i stap nogut na i gat bikpela hevi oltaim. Tasol sapos em i man bilong belgut na amamas, orait olgeta de i olsem de bilong pati.” Yumi no sot long ol gutpela samting bilong spirit, olsem na long olgeta de yumi ken amamas.
24. (a) Yu mas mekim wanem na bai i gat gutpela as bilong i stap bilong yu na yu stap amamas? (b) I gat wanem askim nau yumi laik save long en?
24 Tru, planti man ol i no i stap amamas. Tasol sapos yu laikim tumas God na yu save bihainim tok bilong Em, na yu wok strong long mekim wok bilong Em, i stap bilong yu i gat gutpela as bilong en na bai yu kisim gutpela pe. Na bai Jehova i helpim yu long karim ol hevi na traim i painim yu na bai yu inap sanap strong. Olsem na yu ken strongim bel na tingim ol gutpela blesing God i givim long yu taim yu belgut na mekim wok bilong Em. (Sam 100:2) Tasol yumi mas mekim wanem na bai yumi inap amamas oltaim long lotuim Jehova?
Yu tingim ol dispela tok?
□ Olsem wanem na ol hevi i save painim yumi lain bilong Jehova i no daunim yumi olgeta?
□ Man i save tru long Jehova em i save long wanem ol samting? Na olsem wanem long dispela samting na pasin bilong i stap amamas?
□ Olsem wanem long wok bilong kamapim ol disaipel na amamas?
□ Yumi mas mekim wanem na bai yumi belgut na amamas long tokim ol narapela man long lotu bilong Jehova?
[Rait long pes 15]
Ol manmeri i kisim gutpela save o lait long Jehova, ol i no pret long ol man i dai pinis. Ol i wetim ol manmeri em God i tingim ol bai ol i kirap bek
[Rait long pes 18]
“Yu mas salim tok tru na lait bilong yu i kam na soim rot long mi, bai mi go stret long Saion, maunten bilong yu yet, na long tempel yu save stap long en. Olsem bai mi go long alta bilong yu, God. Long wanem, yu save mekim mi belgut na amamas.”—Sam 43:3, 4.