Yumi Amamas Long Jehova na Dispela i Strongim Yumi
“Nau em i de bilong Bikpela yet, olsem na yupela i no ken bel hevi. Nogat. Yupela i mas amamas long Bikpela na bai em i strongim yupela.”—NEHEMIA 8:10.
1, 2. (a) Strongpela banis inap helpim man olsem wanem? (b) Olsem wanem Devit i soim olsem em i tingim Jehova em i ples hait bilong em?
JEHOVA i olsem wanpela strongpela banis tru, em ples bilong hait long en na i stap gut. Devit bilong Israel long bipo em i tingim God i olsem strongpela banis bilong em. Em i bin mekim wanpela singsing long God Antap Tru, ‘long de Bikpela i kisim em bek long han bilong Sol [king bilong Israel] na long han bilong olgeta arapela birua bilong en.’—Song 18, long het-tok antap.
2 Devit i kirapim dispela singsing olsem: “Bikpela, yu save strongim mi na mi laikim yu tumas. Bikpela em i strongpela banis bilong mi. . . . God bilong mi em i olsem bikpela ston mi save go long en na hait long ol birua. . . . Em i gat strong bilong kisim bek mi na lukautim mi.” (Song 18:1, 2) King Sol i birua nating long em na ranim em, tasol dispela stretpela man Devit i ran i go hait long Jehova, olsem man i ran i go hait insait long strongpela banis na bai em i no ken bagarap.
3. I gat wanem as na ol Israel long taim bilong Esra ol i amamas tru?
3 Dispela amamas Jehova i givim long yumi i olsem strongpela banis bilong ol man i wokabaut long rot bilong em na holimpas bilip. (Sindaun 2:6-8; 10:29) Tasol bilong kisim dispela amamas, man i mas mekim laik bilong God. Tingim samting i bin kamap long Jerusalem long yia 468 paslain long Krais. Esra, em kuskus bilong raitim Lo, na sampela moa, ol i kaunim Lo long ol manmeri na autim as bilong en. Nau ol i tokim ol Israel: “Yupela go long haus bilong yupela na mekim bikpela kaikai. Na yupela givim sampela kaikai na wain long ol manmeri i sot long kaikai. Nau em i de bilong Bikpela yet, olsem na yupela i no ken bel hevi. Nogat. Yupela i mas amamas long Bikpela na bai em i strongim yupela.” Taim ol Israel i bihainim ol dispela save ol i bin kisim, “ol i amamas” na mekim bung bilong Ol Bikpela De Bilong I Stap Long Haus Win. (Nehemia 8:1-12) Ol Israel i amamas long Jehova i olsem strongpela banis bilong ol, ol i kisim strong long lotuim em na mekim wok bilong em. Dispela amamas i strongim ol, olsem na yumi save, lain bilong God long nau tu i mas amamas. Orait, long nau i gat wanem as na ol i ken amamas?
“Yupela i Mas Amamas Tru”
4. Wanem wanpela bikpela as na lain bilong Jehova ol i amamas?
4 Wanpela as na ol i ken amamas, em Jehova i wokim rot bambai ol i ken bung wantaim. Ol kibung bilong ol Witnes Bilong Jehova i save givim bikpela amamas long ol, wankain olsem dispela amamas ol Israel i bin kisim taim ol i mekim ol bung bilong ol. Moses i tokim ol Israel: “Em i taim bilong Ol Bikpela De Bilong I Stap Long Haus Win. Na inap long 7-pela de yupela olgeta i mas amamas. . . . Yupela i mas i go long dispela wanpela ples bilong lotu God bai i makim. . . . Bikpela bai i mekim gaden na wok bilong yupela i kamap gutpela, na yupela i mas amamas tru.” (Lo 16:13-15) Tru tumas, God i laik bai ol i “amamas tru.” Na i wankain tu long nau, long wanem, aposel Pol i tokim ol wanbilip: “Oltaim yupela i mas amamas long Bikpela. Mi tok gen, yupela i mas amamas.”—Filipai 4:4.
5. (a) Dispela amamas em i wanem kain amamas? Ol Kristen inap kisim olsem wanem? (b) Olsem wanem yumi ken i stap amamas, maski ol hevi i painim yumi?
5 Jehova i laik bai yumi amamas, olsem na em i givim amamas long yumi, em wanpela pasin spirit holi i kamapim. (Galesia 5:22, 23) Em i wanem kain amamas? Yumi belgut tru taim yumi wetim wanpela gutpela samting o yumi kisim pinis. Dispela amamas em spirit holi i kamapim long yumi, em i save strongim yumi long taim bilong hevi: “Em [Jisas] i tingting long dispela [amamas] na em i stap strong, na em i karim pen na i dai long diwai . . . Jisas i no wari long sem em bai i kisim, na em i dai. Na nau em i sindaun long han sut bilong sia king bilong God.” (Hibru 12:2) Disaipel Jems i tok: “Ol brata bilong mi, sapos ol kain kain traim i kamap long yupela, orait yupela i ken ting olsem, em i samting bilong amamas tasol. Yupela i save, samting i kamap na i traim bilip bilong yupela, em i save kamapim pasin bilong sanap strong na karim hevi.” Tasol olsem wanem sapos wanpela hevi i kamap na yumi no save long rot bilong stretim? Orait, yumi ken beten long kisim gutpela tingting long ol samting yumi mas mekim. Sapos yumi mekim ol samting i stret wantaim gutpela tingting i kam long God, dispela i helpim yumi long stretim o karim hevi, na bai yumi amamas yet long Jehova.—Jems 1:2-8.
6. Olsem wanem long amamas na wok bilong mekim lotu i tru?
6 Dispela amamas Jehova i givim long yumi em i strongim yumi long litimapim lotu i tru. Dispela samting i bin kamap long taim bilong Nehemia na Esra. Long dispela taim, ol Israel i amamas long Jehova ol i kisim strong long helpim wok bilong lotu i tru. Na taim ol i wok long kirapim ol narapela long lotuim Jehova, amamas bilong ol i go bikpela. Na long nau tu i wankain. I gat as na yumi ol manmeri i lotuim Jehova yumi ken amamas tru. Orait nau yumi ken stori long sampela as moa na yumi ken amamas.
Yumi Pas Gut Wantaim God Long Rot Bilong Krais
7. Ol Kristen i stap olsem wanem long Jehova na ol i amamas?
7 Yumi pas gut wantaim Jehova na dispela i mekim na yumi amamas tru, winim ol narapela lain long graun. Taim yumi no kamap Kristen yet, yumi bin insait long lain manmeri nogut bilong graun em ‘save bilong ol i tudak, na ol i stap ausait long laip bilong God.’ (Efesus 4:18) Yumi amamas tru long yumi no stap longwe moa long Jehova! Tasol yumi mas wok strong na bai em i ken orait yet long yumi. Yumi mas ‘holimpas bilip na sanap strong tru. Nogut wanpela samting i pulim yumi, na yumi lusim pasin bilong bilip strong long dispela gutnius.’ (Kolosi 1:21-23) Yumi ken amamas tru long Jehova i bin kisim yumi i go klostu long Pikinini bilong em, olsem Jisas yet i tok: “I no gat wanpela man inap i kam long mi long laik bilong em yet. Nogat. Papa i mas . . . bringim em i kam long mi.” (Jon 6:44) Sapos yumi tenkyu tru long yumi pas gut wantaim Jehova long rot bilong Krais, bai yumi was gut, nogut wanpela samting i mekim na yumi no pas gut moa wantaim Em.
8. Olsem wanem Jisas i helpim yumi long i stap amamas?
8 God i save lusim rong bilong ol man i bilip long ofa bilong Krais, na dispela em i wanpela bikpela as bilong amamas, long wanem, nau yumi inap pas gut wantaim God. Tumbuna bilong yumi, Adam, em i bihainim pasin bilong sin na em i bringim dai i kam long olgeta man. Tasol aposel Pol i tok: “Yumi stap yet olsem ol manmeri bilong mekim sin, na Krais i dai bilong helpim yumi. Long dispela pasin God i bin soim yumi olsem, em i laikim yumi moa yet.” Na Pol i tok: “Wanpela man i bin kalapim lo, na long dispela sin God i kotim yumi olgeta manmeri. Olsem tasol, wanpela man i mekim stretpela pasin, na God i ting long dispela na i kolim yumi olgeta stretpela man, na yumi stap laip. Wanpela man i bin sakim tok, na . . . planti manmeri i kamap manmeri bilong mekim sin. Olsem tasol, wanpela man i bihainim tok, na . . . planti manmeri bai i kamap stretpela manmeri.” (Rom 5:8, 18, 19) Yumi ken amamas tru long Jehova i orait long kisim bek ol pikinini bilong Adam em ol i bilip long gutpela samting Jehova i bin putim bilong helpim ol!
Lusim Lotu Giaman na Kisim Save
9. Long ol samting bilong lotu, olsem wanem yumi stap amamas?
9 Yumi lusim pinis kalabus bilong Bikpela Babilon, em olgeta lotu giaman, na dispela i narapela as na yumi ken amamas. Tok i tru bilong God i bin mekim yumi i kamap fri. (Jon 8:32) Olsem na yumi no insait long ol sin bilong dispela pamukmeri, na yumi no kisim strafe bilong em na bagarap wantaim em. (KTH 18:1-8) Yumi no bel hevi long abrusim ol dispela samting, a?
10. Yumi lain bilong Jehova i kisim wanem save i olsem lait?
10 Taim yumi kisim save na bihainim ol tok bilong Baibel, yumi save amamas tru. Yumi no kalabus moa long ol lotu giaman, olsem na oltaim yumi wok long kisim save long ol samting bilong spirit, em Papa long heven i givim long yumi long rot bilong “wokboi i gat gutpela tingting.” (Matyu 24:45-47) Ol manmeri i givim bel tru long Jehova, ol tasol i kisim spirit holi bilong em na kisim gutpela save long tok bilong em long Baibel na save long laik bilong em. I olsem Pol i tok: “Tok bilong ol dispela samting [em ol samting God i bin redim i stap bilong ol man i save laikim em tru] i bin i stap hait, tasol long wok bilong Spirit bilong em yet, God i bin kamapim long mipela. Holi Spirit i save . . . lukim tu olgeta tingting hait bilong God.” (1 Korin 2:9, 10) Yumi ken tenkyu na amamas tru long yumi wok long kisim gutpela save olsem Sindaun 4:18 i tok: “Rot bilong ol stretpela man i lait olsem san i kamap long moningtaim, na lait i wok long kamap strong moa, inap long belo.”
Wetim Kingdom na Laip Oltaim
11. Olsem wanem yumi bin helpim ol man long save long ol gutpela samting Kingdom bai mekim?
11 Yumi wetim Kingdom na dispela tu i as na yumi amamas. (Matyu 6:9, 10) Inap longtaim pinis yumi ol Witnes Bilong Jehova i bin tokaut olsem Kingdom tasol em i rot bilong pinisim ol hevi bilong graun. Long yia 1931 yumi bin kamapim wanpela bikpela toksave long 51 kibung long olgeta hap, na yumi kisim nem Witnes Bilong Jehova. (Aisaia 43:10-12) Dispela toksave na wanpela bikpela tok long kibung em J. F. Rutherford i mekim (long dispela taim em i presiden bilong Sosaiti Was Taua) i kamap long wanpela buklet (The Kingdom, the Hope of the World). Long dispela buklet ol i putim narapela toksave ol i bin pasim long dispela kibung, em i kamapim rong bilong ol lotu giaman i gat nem Kristen, em ol i givim baksait long Jehova na ol i ting tok bilong em i samting nating tasol. Dispela toksave i tok: “Kingdom bilong God tasol inap stretim ol hevi bilong graun, na i no gat narapela rot.” Insait long sampela mun tasol, ol Witnes i tilim 5 milion bilong dispela buklet long olgeta hap. Inap long nau, planti taim yumi bin tokaut olsem Kingdom tasol inap stretim ol hevi bilong graun.
12. Ol man i mekim wok bilong Jehova ol i amamas long tingim wanem kain laip ol inap kisim long bihain?
12 Yumi amamas tu long tingting long kisim laip i stap oltaim aninit long Kingdom. “Liklik lain” Kristen em God i makim pinis, ol i tingting long kisim laip long heven na ol i amamas. Aposel Pita i tok: “God . . . i gat bikpela sori long yumi, na em i kirapim Jisas Krais long matmat, na long dispela rot God i givim yumi nupela laip. . . . Em i makim yumi pinis bilong kisim gutpela laip bilong heven. Dispela laip em i no inap bagarap. . . . God i redim dispela laip pinis, bilong yupela i kisim long taim yupela i stap wantaim em long heven.” (Luk 12:32; 1 Pita 1:3, 4) Long nau klostu olgeta Witnes Bilong Jehova i tingting long kisim laip i stap oltaim long Paradais aninit long Kingdom. (Luk 23:43, Nupela Testamen bilong 1978; Jon 17:3) I no gat narapela lain long graun i wetim ol gutpela samting olsem yumi wetim. Yumi mas amamas tru long ol dispela gutpela samting!
Wanpela Bikpela Lain Brata
13. Yumi mas ting olsem wanem long bikpela lain brata bilong yumi i stap long olgeta hap?
13 Yumi insait long wanpela bikpela lain brata i stap long olgeta hap na God i orait long ol, na dispela tu i givim bikpela amamas long yumi. Yumi gat ol gutpela lain tru bilong bung wantaim ol. Jehova yet i makim taim bilong yumi na em i tok: “Bai mi seksekim olgeta lain man na bai ol gutpela samting bilong olgeta lain ol i mas i kam insait long haus bilong mi.” (Hagai 2:7, NW) Tru sin i stap long olgeta Kristen. Tasol Jehova i kisim ol i kam long em long rot bilong Krais Jisas. (Jon 14:6) Jehova i bin kisim ol man em i ting ol i gutpela samting, olsem na sapos yumi laikim tru ol olsem brata tru, na givim biknem long ol, na wok gut wantaim ol long wok bilong God, na strongim ol long taim ol i gat hevi, na beten long God i helpim ol, amamas bilong yumi bai go bikpela moa.
14. Wanem tok i stap long 1 Pita 5:5-11 na i strongim bel bilong yumi?
14 Ol dispela samting i helpim yumi long i stap amamas. Tru tumas, yumi amamas long Jehova na dispela i strongim yumi long pas gut wantaim bikpela lain brata bilong yumi i stap long olgeta hap. Tru, ol man i save mekim nogut long yumi olgeta, na ol narapela hevi tu i painim yumi, tasol dispela i mas pasim yumi gut wantaim na yumi stap wanbel insait long dispela wanpela lain tru bilong God long graun em ol i stap amamas. Olsem Pita i tok, yumi mas daunim yumi yet na i stap aninit long strongpela han bilong God, na putim olgeta hevi bilong yumi long han bilong em, long wanem, em i tingim yumi. Yumi mas was gut, long wanem, Satan i laik bagarapim yumi, tasol yumi no stap wanpis long dispela. Pita i tok moa: “Yupela i mas i stap strong long bilip na sakim em. Yupela i save, ol arapela manmeri bilong God . . . ol tu i save karim wankain pen olsem yupela.” Na dispela bikpela lain brata i no inap pundaun, long wanem, Baibel i tok, ‘bai yumi karim pen sotpela taim tasol, na bihain bai God yet i strongim bilip bilong yumi na mekim yumi i sanap strong oltaim.’ (1 Pita 5:5-11) Em nau, dispela bikpela lain brata yumi insait long en, em bai stap oltaim!
Yumi Gat Gutpela Wok
15. Olsem wanem yumi ken tok, ol Witnes Bilong Jehova i gat gutpela wok?
15 Maski hevi i pulap long graun, yumi amamas, long wanem, yumi gat gutpela wok. God i givim wok long yumi long autim tok, na dispela wok i mekim yumi na ol narapela man tu i amamas. (Rom 10:10) Yumi amamas tru long yumi stap wanwok bilong God. Pol i tok: “Apolos em i husat? Mi Pol, mi husat? Mitupela i wokman tasol . . . Mi bin planim pikinini bilong kaikai. Apolos em i bin givim wara long en. Tasol God i bin mekim kaikai i kamap. Olsem na man i planim pikinini kaikai, em i no gat nem. Na man i givim wara, em tu i no gat nem. Nogat. God i save mekim kaikai i kamap, em wanpela tasol i gat nem. Man i planim pikinini kaikai na man i givim wara, tupela wantaim i mekim wok bilong God. Na tupela wan wan bai i kisim pe inap long wok tupela i bin mekim. Mitupela i wanwok bilong God, na yupela i olsem gaden bilong en.”—1 Korin 3:5-9.
16, 17. Kolim stori bilong sampela man na yumi ken save, wok bilong ol i mekim ol i stap amamas.
16 Stori bilong planti manmeri inap helpim yumi long save, taim yumi mekim wok bilong Jehova yumi amamas. Wanpela i tok: ‘Mi lukluk raun long Haus Kingdom em ol manmeri i pulap long en [long de ol i dediketim], na mi lukim 8-pela long famili bilong mi ol i stap, em mi wantaim meri bilong mi, na 3-pela pikinini bilong mipela wantaim poroman marit bilong ol. I stap bilong mitupela meri i gat amamas long en, long wanem, mipela i bin mekim wok bilong God.’
17 Maski man i gat hamas krismas, em inap kirap na mekim wok bilong Jehova na kisim amamas long i stap bilong em. Wanpela meri i bin lainim tok i tru bilong Baibel taim em i stap long wanpela haus bilong ol lapun, na em i kisim baptais na kamap wanpela Witnes Bilong Jehova taim em i gat 102 krismas. Olsem na long pinis bilong laip bilong em, em i kisim amamas long wok bilong em, na em i ‘aninit long God na bihainim ol lo bilong em.’—Saveman 12:13.
Wanpela Strongpela Banis Tru
18. Yumi ken mekim wanem bilong winim bel hevi na mekim amamas bilong yumi i go bikpela?
18 Pasin bilong amamas long Jehova i olsem strongpela banis bilong ol man i stap gut long em. Tasol i no olsem yumi no inap bel hevi long sampela taim. Tingim Jisas taim em i stap long Getsemani. Em i tok: “Bel bilong mi em i hevi tumas, na klostu mi laik i dai.” (Mak 14:32-34) Sapos yumi mekim ol wok bilong helpim yumi yet tasol na dispela i mekim na yumi bel hevi, orait yumi ken senisim dispela pasin. Na sapos yumi holim planti wok bilong spirit na dispela i daunim amamas bilong yumi, orait yumi ken skelim na mekim ol wok inap long skel bilong yumi na bai yumi ken amamas gen. Na sapos yumi laik amamasim Jehova na yumi wok strong long sakim ol laik nogut bilong skin, na pasin nogut bilong dispela graun, na Satan tu, Jehova bai givim amamas long yumi.—Galesia 5:24; 6:14; Jems 4:7.
19. Yumi mas ting olsem wanem long ol wok yumi holim insait long oganaisesen bilong Jehova?
19 Olsem na i gat planti as na yumi gat bikpela amamas. Sapos yumi stap pablisa long kongrigesen, o yumi wok oltaim long wok bilong Jehova, yumi olgeta i gat planti wok bilong Bikpela yumi inap mekim, na dispela bai mekim yumi i amamas. (1 Korin 15:58) Maski wanem wok yumi mekim insait long oganaisesen bilong Jehova, yumi mas tenkyu long en na amamas yet long mekim wok holi bilong God bilong yumi, em i God bilong sori na amamas.—1 Timoti 1:11.
20. Wanem gutpela samting tru yumi holim? Yumi inap bilip tru long wanem samting?
20 Na wanpela bikpela as tru na yumi ken amamas, em yumi holim bikpela nem bilong Jehova olsem ol Witnes bilong em. Tru, yumi sinman na planti hevi i save painim yumi, tasol yumi mas tingim ol gutpela blesing yumi kisim long i stap Witnes Bilong Jehova. Na tingim dispela tu: Gutpela Papa bilong yumi i no inap lusim yumi. Yumi ken bilip tru olsem oltaim bai yumi kisim blesing sapos amamas bilong yumi long Jehova i stap olsem strongpela banis bilong yumi.
Bai Yu Bekim Olsem Wanem?
◻ Olsem wanem yumi ken amamas long Jehova?
◻ Ol Kristen i kisim amamas tru olsem wanem?
◻ Wanem sampela as na ol Witnes Bilong Jehova i amamas?
◻ Pasin bilong amamas long Jehova, olsem wanem dispela i olsem strongpela banis i no inap pundaun?