Kain Beten God i Save Harim
I GAT sampela beten yumi ken save tru, God bai harim. Ol dispela beten i kain beten olsem Krais Jisas i bin lainim ol disaipel long en, em i tok: “Yupela i mas mekim kain [beten] olsem, ‘Papa bilong mipela, yu stap long heven, nem bilong yu i mas i stap holi. Kingdom bilong yu i mas i kam. Mipela i mas bihainim laik bilong yu long graun olsem ol i save bihainim long heven.’ ”—Matyu 6:9-13.
Ol man i bin kolim ol tok bilong dispela beten planti milion taim. Krais i no laik bai ol disaipel tru bilong em i kolim nating dispela kain beten, tasol sapos ol i mekim kain beten olsem ol i ken save, God bai harim. (Matyu 6:7, 8) Orait, olsem wanem nem bilong God i mas i stap holi? Bilong wanem yumi mas beten long Kingdom i kam na laik bilong God i mas kamap?
“Nem Bilong Yu i Mas i Stap Holi”
Jehova, em “God Antap Tru,” em dispela Man em Jisas i kolim olsem “Papa bilong mipela.” (Buk Song 83:18) God i bin kamap olsem ‘papa’ bilong ol Israel, long wanem, em i bin helpim ol long lusim wok kalabus long Isip na em i bin wokim kontrak wantaim ol. (Lo 32:6, 18; Kisim Bek 4:22; Aisaia 63:16) Long nau liklik lain Kristen em God i makim bilong kisim laip long heven, ol i laikim tumas Jehova olsem Papa bilong ol. (Rom 8:15) Na ol poroman bilong ol, em ol i tingting long kisim laip long graun, ol tu i save beten long God Jehova olsem Papa bilong ol.—Jon 10:16; Kamapim Tok Hait 7:1-9.
Tasol bilong wanem yumi mas beten askim God long mekim nem bilong em i stap holi? Long wanem, kirap long taim namba wan man na meri i bikhet long God long Gaden bilong Iden, ol man i bin bagarapim nem bilong God. Em bai harim dispela beten na stretim bek nem bilong em. (Buk Song 135:13) Bilong mekim olsem, em bai pinisim olgeta pasin nogut i stap long graun. Long maus bilong profet Esekiel, God i stori long dispela taim na em i tok: “Bai mi soim olgeta lain manmeri olsem, mi gat bikpela strong na pasin bilong mi i gutpela na stretpela olgeta. Na bai ol i save tru long mi. Na bai ol i save gut olsem, mi yet mi [Jehova].”—Esekiel 38:23.
God Jehova em i holi na stret olgeta. Olsem na em i mas mekim nem bilong em i stap holi. Em bai mekim olsem long ai bilong olgeta lain bilong heven na graun, na long dispela rot bai em i kamapim klia olsem pasin bilong em i holi, olsem stretpela olgeta. (Esekiel 36:23) Ol manmeri i laik bai Jehova i belgut long ol na ol i laik kisim laip i stap oltaim, ol i mas tingim Jehova i gat biknem tru na ol i mas aninit long em na mekim nem bilong em i stap holi, winim olgeta narapela nem. (Wok Pris 22:32; Aisaia 8:13; 29:23) Olsem na Jisas i tokim ol disaipel bilong em long beten olsem: “Nem bilong yu i mas i stap holi.” Yumi ken save, God bai harim dispela hap tok bilong dispela beten na mekim nem bilong em i stap holi.
“Kingdom Bilong Yu i Mas i Kam”
Jisas i tokim ol disaipel ol i mas beten olsem: “Kingdom bilong yu i mas i kam.” Kain beten olsem em God bai harim tru. God Jehova em i nambawan bos bilong olgeta samting na em bai kamapim dispela samting long rot bilong Kingdom bilong em long heven i stap long han bilong Krais Jisas wantaim “ol manmeri bilong God Antap Tru.” (Daniel 7:13, 14, 18, 22, 27; Aisaia 9:6, 7) Inap longtaim pinis ol Witnes Bilong Jehova i bin kamapim ol tok bilong Baibel na soim ol man, God i bin putim Jisas i stap king long heven long yia 1914. Orait, bilong wanem yumi mas beten na tok, Kingdom bilong God i mas “i kam”?
Taim yumi beten olsem, yumi askim God long mekim Kingdom i kam bilong pinisim ol birua bilong wok king bilong Em ol i stap long graun. Klostu nau bai “dispela kingdom [bilong God] . . . i daunim ol [kingdom bilong graun] na bagarapim ol arapela king na kingdom bilong en bai i stap oltaim.” (Daniel 2:44) Taim dispela samting i kamap, dispela tu bai mekim nem bilong Jehova i stap holi.
“Mipela i Mas Bihainim Laik Bilong Yu”
Na Jisas i tok ol disaipel bilong em i mas beten olsem: “Mipela i mas bihainim laik bilong yu long graun olsem ol i save bihainim long heven.” I olsem ol i askim Jehova long mekim ol samting em i tingting pinis long mekim long graun. Dispela tok i wankain olsem tok bilong man bilong raitim song, em i tok: “Bikpela i laik mekim wanem samting long heven na long graun na long solwara na long as bilong solwara, orait em i save mekim. Em i save mekim ol klaut bilong ren i kamap long olgeta hap graun, na em i save mekim lait bilong klaut i kamap wantaim ren, na em i save kirapim win na salim i go nabaut. Long Isip em i bin kilim i dai ol nambawan pikinini bilong ol Isip na bilong ol abus bilong ol. Na long Isip em i wokim olkain mirakel bilong mekim save long king wantaim ol ofisa bilong en. Bikpela i bagarapim planti kantri na kilim i dai ol strongpela king.”—Buk Song 135:6-10.
Taim yumi beten askim Jehova long kamapim laik bilong em long graun, i olsem yumi askim em long mekim ol samting em i tok pinis long mekim hia long graun. Em bai truim tok bilong em na rausim ol birua bilong em olgeta, olsem em i bin mekim liklik long bipo. (Buk Song 83:9-18; Kamapim Tok Hait 19:19-21) Sapos yumi beten askim God long kamapim laik bilong em long graun olsem em i mekim long heven, God bai harim kain beten olsem.
Taim Kingdom i Bosim Graun
Long nau pasin bilong ol man i go nogut na pasin nogut i pulap long graun. Tasol taim Kingdom bilong God i bosim graun na ol man i bihainim laik bilong God, wanem kain pasin bai kamap long graun? Aposel Pita i tok: “God i promis pinis long em bai i wokim nupela skai na nupela graun, na stretpela pasin tasol bai i stap long en.” (2 Pita 3:13) Dispela “nupela skai” em i olsem: Ol stretpela man em ol bai bosim dispela graun—em Krais Jisas na ol 144,000 man ol bai wok king wantaim em long heven. (Rom 8:16, 17; Kamapim Tok Hait 14:1-5; 20:4-6) Dispela “nupela graun” em i no nupela graun tru. Em ol stretpela manmeri ol bai stap long graun.
Taim Kingdom i bosim graun, olgeta hap bilong graun bai kamap gutpela ples paradais. Long dispela taim, olgeta manmeri i bihainim tok bai ol i stap bel isi tru na i gat gutpela sindaun. (Buk Song 72:1-15; Kamapim Tok Hait 21:1-5) Yu tu yu inap i stap wantaim ol dispela planti planti manmeri ol bai i stap amamas. Sapos yu laik i stap wantaim ol, yu mas laik bai Kingdom bilong Krais i bosim dispela graun na ol manmeri i bihainim tok. Ol man i gat kain laik olsem, ol i save beten bai nem bilong Jehova i ken i stap holi, na Kingdom bilong em i ken i kam, na laik bilong em i ken kamap. Sapos ol i beten strong olsem, God bai harim tru dispela kain beten.