Lain Pop—Krais i Kamapim o Olsem Wanem?
WANPELA bruder Katolik, nem bilong em Anthony Foy i raitim tok long wanpela nius Katolik bilong hap bilong saut long Afrika (The Southern Cross) na em i tok: “Kirap long Pita, em namba wan Bisop bilong Rom, na i kam inap long Pop John Paul Namba 2 long taim bilong yumi, winim 260 man i bin holim wok pop.” Dispela bruder i tok moa olsem: “Sapos wanpela man i laik save bilong wanem mipela i bilip olsem Krais Jisas i bin kamapim Lotu Katolik, mipela i save tokim ol long tingim lain pop, kirap long Pita na i kam inap long nau.”
Olsem wanem? I stret ol i ken tok aposel Pita em i namba wan pop? Lotu Katolik i tok, bihain long taim bilong Pita na i kam inap long yia 100 (C.E.) i gat 4-pela pop i bin kamap, em Linus na Anakletus na Klemen Namba I na Evaristus. Tru, Baibel i stori long wanpela Kristen, nem bilong em Linus, em i stap long Rom. (2 Timoti 4:21) Tasol i no gat wanpela tok long Baibel bilong makim olsem Linus o narapela man i bin kamap pop na i olsem senis bilong Pita. Aposel Jon i bin raitim 5-pela liklik buk bilong Baibel long yia 96-98 samting, na em i no stori liklik long ol dispela man em Lotu Katolik i tok ol i senis bilong Pita. Na sapos i gat senis bilong Pita, ating ol i mas makim Jon, a?
Ol i tok Pita em i namba wan bisop bilong Rom, tasol i no gat wanpela samting i makim olsem Pita i bin i go long Rom. Na Pita yet i tok em i stap long Babilon na em i raitim namba wan pas bilong em. (1 Pita 5:13) Ol Katolik i tok, taim Pita i tok long “Babilon,” em i tok bokis long Rom, na em i kolim long nem Babilon. Tasol i no gat as bilong dispela tok. Long taim bilong Pita, taun Babilon tru i stap. Na planti Juda i bin i stap long Babilon. Jisas i givim wok long Pita bilong autim tok long ol Juda, em ol i katim skin, olsem na yumi ken save tru Pita i bin i go long Babilon bilong inapim dispela wok.—Galesia 2:9.
Na Pita i no stori olsem em i gat bikpela namba, winim ol narapela. Nogat. Em i tok tasol em i wanpela aposel bilong Jisas. (2 Pita 1:1) Baibel i no givim nem “Papa Holi” o “Pop” (tok Rom papa) long Pita. Pita i gat pasin daun na em i save bihainim tok bilong Jisas long Matyu 23:9, 10, em Jisas i tok: “Yupela i no ken kolim wanpela man em i papa bilong yupela. Wanpela tasol em i Papa bilong yupela, na em i stap long heven. Na ol i no ken kolim yupela ‘Hetman.’ Yupela i gat wanpela hetman tasol, em man God i makim bilong kisim bek ol manmeri bilong en.” Pita i no laik bai ol man i brukim skru long em. Kornilius, em kepten bilong wanpela lain soldia bilong Rom, em “i brukim skru klostu long lek bilong Pita na i lotu long em. Tasol Pita i kirapim em na i tok olsem, ‘Yu kirap. Mi tu mi man tasol.’ ”—Aposel 10:25, 26.
Na dispela 260 man em Misin i tok ol i bin kamap pop, dispela bruder yet (Foy) i tok long ol olsem: “Sampela bilong ol i bin mekim pasin nogut na i no stret ol i holim dispela bikpela wok na namba long misin.” Wanpela buk Katolik (New Catholic Encyclopedia) i laik makim olsem i no gat rong long dispela na i tok: “Wok bilong pop long bosim ol samting em bikpela samting—pasin bilong pop yet i no bikpela samting. Sampela pop i gutpela man tru, na sampela i gutpela liklik, na sampela i nogut tru.” Tasol yu ting Krais inap makim kain man olsem bilong holim wok olsem maus bilong em long graun?
Ol man i tok Jisas yet i bin kamapim lain pop, tasol i no gat wanpela tok long Baibel i helpim dispela tok. Wanpela buk (Encyclopedia of Religion) i tok, sampela saveman bilong Lotu Katolik long nau ol yet i tok, “i no gat sampela tok long Baibel i makim olsem Jisas i bin kamapim wok pop insait long misin o wanpela lain pop.”