Yu Ting Pop i “Senis Bilong Santu Pita”?

LONG 2002, Pop John Paul Namba 2 i raitim pas i go long bisop bilong Limburg, Jemani, bilong mekim i dai wanpela tok em bisop i bin pasim long pasin bilong rausim bel. Pop i tok em yet i gat wok long “lukautim olgeta wan wan sios na bai ol i stap gutpela na i stap wanbel olsem Jisas Krais i laikim.” Pop i tok em i gat namba long mekim i dai dispela tok bilong bisop, long wanem, em i pop na em i “senis bilong Santu Pita.”

Wanpela buk bilong Misin Katolik i tok, “Krais i bin makim Santu Pita i stap nambawan bilong olgeta aposel.” Misin Katolik i tok moa olsem “Krais i bin putim lo olsem long olgeta taim Pita i mas i gat ol senis bilong em long holim dispela namba; na ol dispela senis em ol bisop bilong Rom.”​—New Catholic Encyclopedia (2003), Volium 11, pes 495-496.

Dispela tok em i bikpela samting. Olsem wanem? Yu yet yu bin skelim dispela tok olsem em i tru o nogat? Tingim bekim bilong 3-pela askim: (1) Yu ting Baibel i strongim dispela tok olsem Pita em i namba wan pop? (2) Ol samting i bin kamap bipo i skulim yumi olsem wanem long as bilong pasin olsem ol pop i gat ol senis bilong ol? (3) Yu ting pasin na bilip bilong ol pop i helpim tok bilong ol olsem ol i senis bilong Pita?

Yu Ting Pita Em i Namba Wan Pop?

Bilong kamapim klia olsem Pita em i as bilong sios, ol Katolik i kamapim tok bilong Jisas long Matyu 16:​18, i tok: “Yu Pita, na long dispela bikpela ston bai mi wokim kongrigesen bilong mi.” Ol i bin raitim dispela tok long tokples Latin aninit long raunpela rup bilong bikpela haus lotu St. Peter’s Basilica long Rom.

Ogastin, em wanpela Tisa Bilong Lotu, pastaim em i tok Pita em i as bilong kongrigesen. Tasol klostu long taim em i dai, em i senisim tingting bilong em long dispela tok bilong Jisas. Long buk Retractations, Ogastin i tok Jisas yet i as bilong sios, olsem kongrigesen Kristen, na Pita, nogat.a

Tru, nem bilong aposel Pita i kamap planti taim long 4-pela Gutnius long Baibel. Jisas i bin makim 3-pela aposel bilong em​—Jon, Jems, na Pita​—bilong i stap wantaim em long taim sampela bikpela samting i kamap. (Mak 5:​37, 38; 9:2; 14:33) Jisas i bin givim “ol ki bilong Kingdom bilong heven” long Pita, na Pita i bin mekim wok long ol dispela ki bilong opim rot i go long Kingdom​—pastaim long ol Juda na ol man i tanim bel na bihainim lotu Juda, bihain long ol Samaria, na las tru long ol manmeri bilong ol narapela lain. (Matyu 16:19; Aposel 2:​5, 41; 8:​14-17; 10:45) Pita em i man bilong toktok, olsem na sampela taim em i stap olsem mausman bilong lain aposel. (Aposel 1:15; 2:14) Tasol yu ting ol dispela samting i makim olsem Pita em i het bilong kongrigesen bilong pastaim?

Tru, aposel Pol i tok Pita i bin kisim strong long “mekim wok aposel long ol lain i bin katim skin.” (Galesia 2:8) Tasol ol tok i stap klostu long dispela ves i soim olsem Pol i no tok olsem Pita i bosim kongrigesen. Pol i toktok long wok bilong Pita long autim tok long ol Juda.

Tru, Pita i kisim bikpela wok tru, tasol i no gat wanpela hap long Baibel we em yet i tokaut olsem em i het bilong kongrigesen na em i gat wok long mekim ol disisen long ol samting ol i mas mekim. Long pas bilong em, em i tok em i “wanpela aposel” na “wanpela hetman”​—em tasol.​—1 Pita 1:1; 5:1.

Bikpela Namba Olsem Pop i Bin Kamap Olsem Wanem?

Olsem na dispela tingting long wok pop i bin kamap long wanem taim, na em i bin kamap olsem wanem? Taim ol aposel i stap laip yet, kain tingting i wok long kamap olsem i orait long wanpela man i ken wokim rot bilong kamap nambawan namel long ol wanbilip bilong em. Ol aposel i ting olsem wanem long dispela kain tingting?

Aposel Pita yet i tokim ol man i go pas insait long kongrigesen olsem ol i no ken “strong long bosim ol manmeri bilong God”; ol i mas mekim pasin daun long ol narapela. (1 Pita 5:​1-5) Aposel Pol i mekim tok lukaut olsem namel long kongrigesen yet sampela man bai kirap na “mekim ol tok kranki bilong pulim ol disaipel i go bihainim ol.” (Aposel 20:30) Klostu long yia 100 C.E., aposel Jon i raitim pas na em i krosim strong wanpela disaipel, nem bilong em Diotrefes. Bilong wanem Jon i krosim em? Wanpela as em olsem: Dispela man i “laik i stap nambawan” insait long kongrigesen. (3 Jon 9) Inap liklik haptaim dispela tok kaunsel bilong ol aposel i bin pasim rot bilong ol man em ol i gat laik long i stap nambawan.​—2 Tesalonaika 2:​3-8.

I no longtaim bihain long laspela aposel i dai pinis, sampela man i kirap long kisim namba insait long kongrigesen. Buk The Cambridge History of Christianity i tok: “Yumi ken ting i no gat wanpela bisop i bosim misin long Rom paslain long yia 150 C.E. samting.” Bihain long yia 200 C.E. samting, bisop bilong Rom i kamap nambawan bos long sampela hap insait long misin.b Bilong strongim dispela tok olsem bisop bilong Rom i gat namba long i stap nambawan bos, sampela i bin raitim lista bilong ol pop i senisim Pita.

Tasol dispela lista i no strongim tok olsem Pita em i namba wan pop na i gat ol senis bilong em. Bilong wanem? Long wanem, ol i no save gut olsem sampela nem long lista i tru o nogat. Na bikpela samting moa, dispela lista i no gat as tru bilong en. Bilong wanem? Long wanem, maski sapos Pita i bin autim tok long Rom olsem sampela buk bilong yia 100 i go 200 C.E. i tok, i no gat wanpela samting i kamapim klia olsem Pita em i het bilong kongrigesen long Rom.

I gat wanpela samting i makim olsem Pita i no het bilong kongrigesen long Rom, olsem: Taim aposel Pol i raitim pas i go long ol Rom, em i raitim longpela lista bilong ol Kristen i stap long dispela hap. Tasol em i no kolim nem bilong Pita. (Rom 16:​1-23) Sapos Pita i het bilong kongrigesen, yu ting Pol i lusim tingting long raitim nem bilong Pita o em i givim baksait long Pita? Nogat, a?

Tingim tu dispela: Long taim Pita i raitim namba wan pas bilong em, Pol i bin raitim namba tu pas i go long Timoti. Long dispela pas, Pol i toktok long Rom. Taim em i stap long Rom em i raitim 6-pela pas, tasol em i no bin kolim nem bilong Pita long ol dispela pas, nogat.

Inap 30 yia samting bihain long taim Pol i raitim ol pas bilong em, aposel Jon i raitim 3-pela pas na Buk Revelesen. Long ol dispela rait Jon i no bin tok olsem kongrigesen long Rom em i nambawan kongrigesen, winim ol narapela, nogat. Na em i no tok long wanpela lida bilong kongrigesen em i stap nambawan na i holim bikpela namba olsem senis bilong Pita, nogat. Baibel na ol samting i bin kamap bipo i no strongim tok olsem Pita i bin kamap namba wan bisop bilong kongrigesen long Rom.

Yu Ting Pasin na Bilip Bilong Ol Pop i Helpim Tok Bilong Ol?

I stret yumi ken ting, sapos man i tok em i “senis bilong Santu Pita” na “Mausman Bilong Krais,” em bai bihainim pasin bilong Pita na Krais na ol tok em tupela i bin skulim ol man long en, a? Olsem: Yu ting Pita i laik bai ol wanbilip i mekim pasin long em olsem man i gat biknem? Nogat. Em i no larim ol i givim bikpela nem long em olsem em i bikpela bilong ol. (Aposel 10:​25, 26) Olsem wanem long Jisas? Em i tok olsem em i kam bilong helpim ol man, na i no bilong ol i mas helpim em. (Matyu 20:28) Tasol ol pop i save mekim wanem? Yu ting ol i save sakim ol bikpela namba, na ol i no orait long kisim olkain biknem, na ol i abrusim olkain bilaspasin i soim olsem ol i gat bikpela mani na strong long bosim ol man?

Pita na Krais ol i man bilong bihainim stretpela pasin na ol i laik helpim ol man long i stap bel isi wantaim. Yumi ken skelim pasin bilong tupela wantaim tok em buk Katolik Lexikon für Theologie und Kirche (Dikseneri Bilong Lotu na Misin) i mekim long Pop Leo Namba 10, i tok: “Leo Namba 10 i insait long ol wok politik na i save helpim ol wanblut long kisim namba long wok politik samting, na em i save tromoi bikpela mani long mekim ol bikpela pati samting bilong kisim amamas, tasol em i no mekim ol wok bilong lotu em i mas mekim.” Karl Amon, wanpela pris Katolik na saveman bilong ol samting em misin i bin mekim bipo, em i tok sampela ripot i stori long Pop Alexander Namba 6 olsem “em i bin mekim olkain pasin nogut bilong giaman na paulim ol samting, na em i mekim wok nogut long namba na strong em i holim, na baim long grismani sampela bikpela namba insait long misin, na mekim pasin pamuk.”

Olsem wanem long ol tok ol pop i skulim ol man long en? Ol i wankain olsem tok em Pita na Krais i bin skulim ol man long en o nogat? Pita i no bilip olsem olgeta gutpela man i save go long heven. Em i bin stori long gutpela King Devit na em i tokaut klia olsem: “Devit i no bin i go long heven.” (Aposel 2:34) Na Pita i no skulim ol man olsem ol liklik pikinini i mas kisim baptais, nogat. Em i skulim ol man olsem, baptais em samting bilipman i save tingim gut long bel na mekim.​—1 Pita 3:21.

Jisas i bin tok olsem wanpela disaipel bilong em i no ken traim long kamap nambawan na winim ol narapela disaipel. Em i tok: “Sapos wanpela man i laik stap fes, em i mas stap las long olgeta arapela na stap wokman bilong olgeta arapela.” (Mak 9:35) Klostu long taim Jisas i dai, em i givim tok i klia tru long ol disaipel bilong em: “Yupela i no ken larim ol man i kolim yupela Rabai, long wanem, yupela i gat wanpela Tisa tasol na yupela olgeta i stap brata brata. Na yupela i no ken kolim wanpela man long graun olsem papa bilong yupela, long wanem, yupela i gat wanpela Papa tasol, em Man i stap long heven. Yupela i no ken larim ol man i kolim yupela lida, long wanem, yupela i gat wanpela Lida tasol, em Krais.” (Matyu 23:​1, 8-10) Yu ting ol pop i bin bihainim ol tok bilong Pita na Krais?

Sampela i tok, dispela pasin olsem ol pop i gat ol senis bilong ol em i no ken pinis, maski ol man bilong holim dispela namba ol i no bihainim pasin Kristen. Orait, yu ting dispela tok i stret? Jisas i tok: “Olgeta gutpela diwai i save karim gutpela kaikai na olgeta diwai nogut i save karim kaikai nogut. Gutpela diwai i no inap karim kaikai nogut, na diwai nogut i no inap karim gutpela kaikai.” Olsem na sapos yu tingim ol samting i bin kamap, yu ting Pita o Krais i laik stap olsem wanlain bilong ol pasin nogut em ol pop i bin kamapim?​—Matyu 7:​17, 18, 21-23.

[Ol Futnot]

[Ol Piksa long pes 25]

Yu ting ol samting i bin kamap i makim olsem ol pop i bihainim pasin bilong Pita?