“Bai Yu Stap Wantaim Mi Long Paradais”
WANPELA man nogut i hangamap long diwai klostu long Jisas. Em i karim bikpela pen na i laik i dai na em i krai long Jisas na i tok: “Jisas, taim yu kamap king, yu ken tingting long mi.” Maski Jisas tu i karim bikpela pen na i laik i dai, em i tokim dispela man: “Mi tok tru long yu nau, Bai yu stap wantaim mi long Paradais.” (Luk 23:42, 43, Baibel New World Translation) Tok bilong Jisas i mekim gut bel bilong dispela man.
Long Baibel New World Translation, taim ol i raitim tok bilong Jisas long Luk 23:43, ol i putim liklik mak koma bihain long dispela tok “nau.” Yu lukim long paragraf antap? Dispela i helpim yumi long save, long de stret bilong Jisas yet i dai, em i tok promis long givim laip long dispela man nogut long Paradais. Tasol long Baibel Pisin ol i putim koma long Luk 23:43 paslain long dispela tok “nau.” Olsem: “Mi tok tru long yu, nau bai yu stap wantaim mi long [Paradais].” I olsem ol i laik tok, long de stret Jisas wantaim dispela man nogut i dai, tupela i go i stap long Paradais. Bilong wanem ol i mekim olsem? Ol i mas putim koma bihain o paslain long dispela tok “nau”?
Ol rait Grik bilong Baibel long pastaim i no gat ol liklik mak olsem koma na fulstop samting. Olsem na taim ol i kirap putim ol dispela mak, ol kuskus na ol man bilong tanim tok bilong Baibel, ol i bihainim bilip bilong ol yet na putim koma samting long ples ol yet i ting i stret bilong kamapim tok tru bilong Baibel. Olsem na yu ting i stret Baibel Pisin na sampela Baibel moa i putim koma paslain long “nau” o nogat? Taim Jisas na dispela man nogut i dai, long dispela de stret tupela i go long Paradais o olsem wanem?
Baibel i no tok olsem. Tupela i go long wanpela ples Baibel i kolim Haʹdes (tok Grik) na Sheʹol (tok Hibru), em dispela tupela tok wantaim i makim matmat, olsem ples bilong ol man i dai pinis. (Luk 18:31-33; 24:46; Aposel 2:31) Baibel i stori long ol manmeri i stap long dispela ples na i tok: “Ol man i dai pinis, ol i no inap save long wanpela samting. . . . bai yu no inap mekim wok o tingting o kisim gutpela tingting na save long ples bilong ol man i dai pinis [tok Hibru, Sheʹol; tok Grik, Haʹdes], dispela ples bai yu go long en.” Matmat i no ples paradais, a?—Saveman 9:5, 10.
Jisas i stap long matmat inap 3-pela de pastaim na bihain God i kirapim bek em. Na insait long 6-pela wik bihain, long wan wan taim em i kamap long ai bilong ol disaipel bilong em long hap bilong Palestain. Wanpela taim em i kamap long Maria na em tokim em: “Mi no i go antap yet long Papa bilong mi.” (Jon 20:17) Olsem na long dispela taim tu em i no kamap yet long wanpela ples paradais.—Kamapim Tok Hait 2:7.
Long yia 250 samting bihain long Krais, taim ol man i wok long bungim tingting bilong ol saveman bilong Grik wantaim lotu ol i kolim Kristen, wanpela man nem bilong em Origen em i kolim dispela tok bilong Jisas long Luk 23:43 olsem: “Nau bai yu stap wantaim mi long Paradais bilong God.” Na long yia 350 samting bihain long Krais, ol man bilong raitim tok bilong lotu i tok i no stret long putim mak olsem koma bihain long dispela tok “nau.” Olsem na yumi save, inap planti yia pinis ol i bin raitim ol tok bilong Luk 23:43 olsem i stap long Baibel Pisin. Tasol yumi save tu olsem long yia 350 (C.E.), sampela man i save pasin bilong raitim dispela tok olsem ol i raitim long Baibel New World Translation em i stret.
Long nau tu, planti man bilong tanim tok bilong Baibel, ol i save bihainim pasin bilong ol lotu na ol i putim mak o koma bihain long dispela tok “nau” long Luk 23:43. Tasol sampela i bihainim pasin olsem i stap long Baibel New World Translation. Olsem: Profesa Wilhelm Michaelis i tanim dispela tok bilong Jisas long tok ples Jeman, na em i raitim olsem: “Tru tumas mi tokim yu long nau: Bai yu (olsem long wanpela taim bihain) stap wantaim mi long Paradais.”
Orait, dispela man nogut i ting olsem wanem long dispela tok bilong Jisas? Ating dispela man i bin harim ol man i tok olsem Jisas em i dispela King ol i bin wetim, na ating em i lukim rait Pailat i bin pasim long diwai antap long het bilong Jisas, em rait i tok: “Dispela man em i King bilong ol Juda.” (Luk 23:35-38) Ol bos bilong lotu i bikhet na givim baksait long Jisas, tasol dispela man nogut i tanim bel na em i bilip long Jisas, na em i tok: “Jisas, taim yu kamap king, yu ken tingting long mi.” Em i no tingting long mekim wok king wantaim Jisas, tasol em i laik bai wok king bilong Jisas i ken helpim em. Maski Jisas i pilim bikpela pen na hevi, tasol em i mekim tok promis long dispela man nogut long em bai stap wantaim em long Paradais.
Wanem Paradais? Baibel i tok namba wan Paradais em gaden Iden, tasol namba wan papamama bilong yumi i bin bikhet na God i rausim ol long dispela gutpela ples Paradais. Baibel i tok, taim Jisas i mekim wok King long Kingdom bilong God, Paradais bai kamap bek long graun. (Buk Song 37:9-11; Maika 4:3, 4) Olsem na Jisas bai stap wantaim dispela man nogut na planti manmeri moa taim em i kirapim bek ol na ol i stap laip long paradais long graun, na bai ol inap kisim save long laik bilong God na kisim laip i stap oltaim.—Jon 5:28, 29; Kamapim Tok Hait 20:11-13; 21:3, 4.