Kepten Bilong Rom Em i Mekim Gutpela Pasin
OL KEPTEN bilong 100 soldia long ami bilong Rom, ol i no gat gutpela nem long mekim gutpela pasin long ol man. Ol i gat wok long bosim 100 soldia i save pinis long pait, olsem na ol i mas bosim ol strong taim ol i skulim ol long pait, na sapos wanpela i brukim lo, kepten i mas givim strafe long em o sampela taim, kilim em i dai. Tasol Baibel i tokim yumi long wanpela kepten bilong ami bilong Rom, nem bilong em Julius, em i bilong lain ami bilong Sisar Ogastus na em i lukautim gut tru aposel Pol na sori long em.
Stori bilong dispela man i stap long Aposel sapta 27. Aposel Pol i laik bai Sisar yet i mas harim kot bilong em long Rom, olsem na ol i putim Pol wantaim ol narapela kalabus long han bilong “wanpela kepten bilong 100 soldia. Nem bilong dispela kepten em Julius.” Ol i kalap long sip long Sisaria, em wanpela biktaun i stap long hap bilong not-wes long Jerusalem na em i hetkota bilong lain ami bilong Rom. Ol i lusim Sisaria i go na Luk i tok: “Long de bihain mipela i go anka long taun Saidon, na Julius i mekim gutpela pasin long Pol. Em i orait long Pol i go lukim ol pren bilong en na kisim kaikai samting long ol.”—Aposel 27:1-3.
Baibel i no tok long wanem samting i kirapim Julius long mekim gutpela pasin olsem. Ating namba wan gavman Festus i bin tokim Julius long lukautim gut Pol, winim ol narapela. O ating Julius i save long ol samting i bin painim Pol taim ol soldia i holim em, na em i pilim tru pasin bilong Pol long sanap strong na stap gut long God. Maski wanem samting i kirapim Julius long mekim dispela gutpela pasin, yumi ken save Julius i pilim olsem Pol i narapela kain long ol narapela kalabus.
Tasol taim ol i laik lusim Gutpela Pasis na Pol i tok ol i no ken lusim, nogut bagarap i painim ol, Julius i no harim tok bilong Pol. Bihain liklik strongpela win i laik sakim sip i go pas long wesan i stap namel long solwara klostu long Afrika. (Aposel 27:8-17) Dispela strongpela win i sakim sip i go na nau Pol i sanap na strongim ol narapela i stap long sip, em ol i pret. Em i tok: “I no gat wanpela man bilong yumi bai i lus. Sip tasol bai i lus.” Tasol sampela ol boskru i laik painim rot bilong lusim sip. Olsem na Pol i tokim Julius: “Sapos ol dispela man i no i stap long sip, orait yupela bai i lus.”—Aposel 27:21, 22, 30, 31.
Nau Julius i harim tok bilong Pol na em i no larim ol dispela boskru i ranawe lusim sip. Olsem Pol i tok long samting bai kamap, sip i go antap long wanpela wesan i stap namel long solwara na i bagarap. Ol soldia i pret, nogut ol i swim i go na i ranawe, olsem na ol soldia i ting long kilim i dai olgeta kalabus. Tasol Julius i tambuim ol soldia long mekim olsem na Pol i abrusim bagarap.—Aposel 27:32, 41-44.
Baibel i no tokim yumi long wanem samting i kamap long dispela gutpela kepten, o em i kamap wanpela Kristen o nogat. Tasol gutpela pasin Julius i mekim long Pol, dispela i kamapim klia wok bilong lo God i bin raitim long bel bilong ol man. (Rom 2:14, 15) Tasol ol Kristen i no bihainim tasol gutpela pasin bilong ol man—ol i bihainim gutpela pasin bilong God, em spirit holi i kirapim ol long bihainim, na ol i mekim gutpela pasin tru long ol narapela. (Galesia 5:22) Tru tumas, sapos wanpela soldia haiden inap mekim gutpela pasin long narapela man, orait ol manmeri bilong God i mas kirap mekim moa yet!