Wok Bilong Bungim Ol Man i Laik Lotuim God
APOSEL Jon i lukim ol samting olsem piksa na em i lukim ol bikpela samting i mas kamap long “de bilong Bikpela.” Em i lukim Bikpela Krais Jisas long heven i kam long waitpela hos bilong mekim stretpela pait, em hos i makim dispela. Jisas “i winim pait na em i wok long winim planti pait moa.” Namba wan pait em i winim, em i rausim bikpela birua bilong God, em Satan, long heven i kam daun long hap bilong graun. Olsem na Satan i kirap mekim nogut long ol manmeri long rot bilong ol bikpela pait i bagarapim planti man, na hangre, na sik—em 3-pela man i sindaun long retpela na blakpela na yelopela hos i piksa bilong dispela. (Kamapim Tok Hait 1:10; 6:1-8; 12:9-12) Ol dispela hevi i kamap bikpela long yia 1914, na bihain ol i kamap bikpela moa. Liklik taim nau na bai “bikpela hevi tru” i kamap, olsem Jisas i stori long en. “Stat long taim graun i nupela yet na i kam inap long nau, kain hevi olsem i no bin kamap bipo. Na bihain tu bai i no gat kain hevi olsem i kamap gen.”—Matyu 24:3-8, 21.
Long dispela taim wanem samting bai painim ol manmeri i lotuim Jehova? Kamapim Tok Hait sapta 7, ves 1 i go long 10, i stori long ol ensel i “holimpas” ol win bilong bagarapim graun bambai ol i ken bungim ol dispela manmeri i laik lotuim God. Kirap long yia 1914 na i kam inap long nau, ol i bin bungim ol laspela manmeri bilong lain 144,000 Israel bilong spirit. Na bihain “planti manmeri tru ol i bung i stap, na i no inap man i kaunim namba bilong ol. Dispela ol manmeri ol i bilong olgeta lain man na bilong olgeta kantri na bilong olgeta kain skin na bilong olgeta tok ples.” Dispela bikpela lain i kamap planti tru long nau, winim sampela milion. Ol i sanap long ai bilong sia king bilong God na God i orait long ol, long wanem, ol i bilip long blut bilong Jisas i olsem ofa bilong baim bek ol. “Ol i singaut strong olsem, ‘God bilong yumi em i save sindaun long sia king bilong en, na Pikinini Sipsip, tupela tasol i save kisim bek yumi na mekim yumi i stap gut.’ ” Ol dispela manmeri i givim bel long lotuim God na ol i wok long tokim ol narapela man, “Yu kam,” na ol dispela man tu i kam bung bambai ol inap abrusim bagarap long taim bilong “bikpela hevi tru.”—Kamapim Tok Hait 7:14-17; 22:17.
“Long Olgeta Hap Bilong Graun”
Yumi ken tok, “Ol manmeri long olgeta hap bilong graun i harim pinis nek” bilong ol dispela manmeri i givim bel long lotuim God. “Tok bilong ol i go inap long olgeta ples.” (Rom 10:18) Ol i bin mekim bikpela wok na ol i kisim blesing—wok bilong ol i karim gutpela kaikai, olsem:
Long Meksiko inap olsem 335,965 manmeri bilong lotuim Jehova i mekim wok bilong em na putim ripot. Lain bilong ol i go bikpela moa, klostu olsem 100,000 insait long 3-pela yia tasol! Olsem wanem na lain bilong ol i go bikpela hariap olsem? Dispela stori inap kamapim as bilong dispela, olsem: Wanpela yangpela man, nem bilong em Auralyo, em i holim wok bilong lukautim wanpela haus lotu Katolik long wanpela liklik ples. Taim ol Witnes Bilong Jehova i kam long dispela ples, long olgeta taim em i save paitim belo bilong haus lotu bilong pasim ol man bai ol i no ken harim tok bilong ol Witnes. Bihain em i baim wanpela Baibel Katolik (Jerusalem Bible) na em i kirap long kaunim, tasol em i no save long as bilong ol tok em i kaunim. Bihain em i lukim wanpela poroman bilong em i holim wanpela Baibel New World Translation. Auralyo i krosim em na tokim em, Baibel bilong em i giaman. Auralyo i kisim em i go long haus bilong em yet na soim Baibel “tru” long em. Dispela poroman i tokim Auralyo: “Yu kaunim Kisim Bek sapta 20,” na em i lusim Auralyo na i go.
Orait, Auralyo i kirap kaunim ol tok bilong Kisim Bek long sapta 1 i go inap long sapta 20. Taim em i kaunim sapta 20 ves 4 na 5, em i kirap nogut tru long lukim ol tok Baibel Katolik bilong em i mekim long pasin bilong wokim na lotuim ol piksa. Long Sande em i go long Misa na bihain em i go askim pris long ol dispela tok bilong Kisim Bek sapta 20 ves 4 na 5. Pastaim pris i tok, em yet em i no save lotuim ol piksa, tasol em i tingim ol i samting holi. Em i lukim olsem Auralyo i no amamas long dispela tok bilong em, olsem na em i kirap sutim tok long Auralyo na i tok, ‘Ating yu save stadi wantaim ol Witnes Bilong Jehova.’ Auralyo i bekim tok olsem: ‘Mi no save stadi wantaim ol, tasol nau bai mi mekim!’
Bihain, taim ol Witnes i kam gen long dispela ples, Auralyo i go bungim ol na em i kirap long stadi wantaim ol na lainim ol tok bilong Baibel. Em i lusim wok bilong em long haus lotu na insait long 3-pela mun tasol em i stretim ol pasin samting bilong em bambai em inap autim tok wantaim ol Witnes. Namba wan haus em i go long en, em haus bilong pris. Pris i kirap nogut tru long lukim dispela man bipo i lukautim haus lotu, nau em i autim tok bilong Kingdom. Pris i tok em bai rausim Auralyo long misin, tasol Auralyo i tok, ‘Mi lusim pinis misin.’ Auralyo i no pret, na dispela pasin bilong em i strongim bel bilong ol narapela man bilong dispela ples em ol i save stadi wantaim ol Witnes. Taim kibung distrik i kamap, Auralyo wantaim 21 manmeri moa bilong dispela ples ol i kisim baptais. Wok i kamap bikpela kwiktaim long dispela hap na i gat wanpela elda tasol bilong toktok wantaim ol dispela manmeri long ol askim ol man i laik kisim baptais i mas bekim.
“Ol Manmeri . . . i Harim Pinis Nek Bilong Ol”
I no gat rot bilong abrusim tok bilong Kingdom; ol i autim dispela tok long olgeta hap. Wanpela Katolik bilong Itali i save kros long ol Witnes i kam long haus bilong em. Em i wok long wanpela kampani na taim ol i salim em i go wok long Singapo, em i amamas—em i ting nau bai em i no lukim ol Witnes. Tasol em i kirap nogut, long wanem, em i lukim ol Witnes i stap long Singapo tu. Olsem na em i baim tupela dok nogut bilong kaikaim ol Witnes taim ol i kam long haus bilong em. Orait, tupela Witnes i kam long haus, na tupela dok hia i kalap i kam ausait. Dispela tupela Witnes meri i pret nogut tru na ranawe i go. Ol i kamap long rot bung na bihainim narapela narapela rot. Wanpela dok klostu i laik kaikaim wanpela, olsem na meri i kamautim kwik tupela buklet long paus bilong em na subim i go insait long maus bilong dok. Nau dok i no ranim em moa; em i tanim na i go bek long haus.
Long wik bihain dispela tupela Witnes i go bek long wanpela haus i stap long hapsait bilong rot. Papa bilong tupela dok i stap long gaden bilong haus bilong em na em i lukim tupela. Tupela i kirap nogut, long wanem, em i gude long tupela na singautim ol i kam long haus bilong em. Em i tokim tupela, i no gat wanpela taim em i bin toktok wantaim ol Witnes o kaunim wanpela buk o nius bilong ol. Tasol em i kirap nogut long lukim ol buklet i stap long maus bilong dok, olsem na long apinun em i bin kaunim tok bilong ol dispela buklet na em i laikim. Taim em i liklik yet inap nau em i bin i stap Katolik, tasol em i tok em i laik stadi wantaim ol Witnes.
Bihain kampani i salim dispela man i go bek gen long Itali, na ol Witnes i stretim rot bambai em i ken stadi yet. Em wantaim meri bilong em i kirap long i go long ol miting, na nau pris bilong dispela hap i kam krosim tupela na em i tok long mekim nogut long tupela. Bihain sampela i kam kukim gaden bilong tupela, olsem na tupela i lusim misin olgeta. Nau dispela man i tok: “Mi kirap pinis long autim tok long planti famili bilong mi, long wanem, mi laik bai ol i ken save, Jehova wanpela tasol em i God tru.”
“I Go Inap Long Olgeta Ples”
Narapela stori i kam long wanpela longwe ples i kamapim klia olsem ol man i laikim tok bilong Kingdom na dispela tok i helpim ol long stretim pasin bilong ol. Wanpela Witnes long Ostrelia i gat bel na em i go long ol bung, olsem skul, bilong ol meri i laik karim pikinini. Wanpela meri i kam long ol dispela bung em i gat planti pasin nogut, na em i no laik lusim smok, maski em i gat bel. Witnes i tingting planti long pasin bilong dispela meri. Bihain tupela i karim pikinini long haus sik long wankain taim, na tupela i stap wantaim long wanpela wod, olsem na i gat rot bilong tupela i toktok wantaim. Dispela meri i stori olsem taim em i stap liklik yet planti hevi i bin painim em, na nau em i marit, tasol marit bilong em i laik bagarap. Olsem na taim tupela i lusim haus sik pinis, Witnes i go lukim dispela meri long haus bilong em na em i kirap long stadi wantaim em long ol tok bilong Baibel. Tupela i mekim wok long wanpela buk, nem bilong en Rot Bilong Kamapim Amamas Insait Long Famili.
Man bilong dispela meri i bin beten askim God long helpim em long painim lotu i tru, tasol em i tokim God, “Sapos em ol Witnes Bilong Jehova, maski!” Tasol taim em i save, meri bilong em i stadi wantaim ol Witnes, em i kirap mekim planti askim na ol i singautim em i kam stadi wantaim ol. Em i mekim olsem, na i no longtaim na em i kirap long i go long ol miting bilong kongrigesen. Nau dispela man wantaim meri bilong em i baptais pinis, na i no gat bikpela hevi moa long marit bilong tupela.
Pasin bilong ol Witnes long stadi wantaim ol manmeri long kain buk olsem i bin helpim planti nupela man long i kam bung na lotuim God. Long sampela kantri ol paitman i bin kirap na daunim gavman, o ol lain bilong kantri yet i pait, o gavman i putim sampela tambu long wok bilong ol Witnes. Tasol long ol dispela kantri tu wok bilong mekim ol Baibel-stadi i go bikpela. Long kantri Angola inap planti yia ol lain bilong kantri yet i pait, na ol Witnes i bin karim bikpela hevi long han bilong ol man. Tasol ripot ol i kisim long kirap bilong yia 1991 i makim olsem olgeta wan wan pablisa i mekim inap olsem 3-pela Baibel-stadi, maski ol pablisa i no gat planti buk samting bilong Baibel. Ol wasman bilong raun i save go lukim liklik lain pablisa long olgeta de na stretim rot bilong autim tok wantaim ol long san na mekim miting long apinun. Ol i amamas tru taim pait i pinis na ol brata long Saut Afrika i salim planti buk na nius bilong Baibel long ol, em hevi bilong en inap olsem 42 ton! Yumi save, “pasin bilong laikim tru ol arapela [bai] kamap strong moa long laip” bilong ol dispela brata, na bai ol i gat “planti save, na tingting,” long wanem, nau ol inap tingim ol samting i bikpela samting moa. (Filipai 1:9, 10) Dispela i mas kirapim ol brata sista i gat planti buk na nius bilong Baibel long mekim bikpela wok long ol dispela gutpela samting Jehova i givim long yumi!—1 Timoti 4:15, 16.
Ol dispela man bilong lotuim God, em ol i stap gut long wok, ol i amamas na dispela i kirapim yumi long tingim tok bilong Jisas long maunten, em i tok: “Ol man i save, ol i stap rabis tru long ol samting bilong God, em ol i ken amamas. Ol dispela man bai i kisim ol gutpela samting bilong kingdom bilong heven. . . . Ol man i save bihainim stretpela pasin na long dispela as ol i kisim hevi long ol man, em ol i ken amamas. Kingdom bilong heven em i bilong ol. . . . Yupela i ken belgut na amamas tru, long wanem, bikpela pe i wetim yupela long heven.” (Matyu 5:3-12) Long Angola ol i bungim pinis planti man, olsem man i kamautim kaikai long gaden!
Long sampela hap bilong graun ol gavman i wok long pinisim sampela tambu o olgeta tambu long wok bilong ol Witnes. Jisas i bin tok: “Planti kaikai tumas i mau pinis long gaden, tasol i no gat planti wokman i stap bilong kisim.” (Matyu 9:37) Dispela tok i stret long nau! I gat wok long planti wokman moa. Yumi amamas, long wanem, hap wok lotu bilong yumi em bilong bungim ol man i olsem kaikai i mau pinis long gaden. I no gat wanpela amamas long graun long nau inap winim amamas yumi kisim long mekim dispela wok bilong God Jehova.
Tasol wanem samting i save kirapim ol manmeri i lotuim Jehova na ol i amamas tru na givim bel tru long mekim wok bilong em? Orait, nau yumi ken stori long dispela.