Ol Man i Bihainim Pasin Bilong God na Givim Samting Ol Bai i Stap Amamas Oltaim
“God i laikim tumas olgeta manmeri bilong graun, olsem na em i givim dispela wanpela Pikinini long ol. . . . Bai ol i kisim laip i stap gut oltaim oltaim.”—JON 3:16.
1, 2. (a) Husat i nambawan Man tru bilong givim samting? Wanem nambawan gutpela presen tru em i bin givim long ol man? (b) Taim God i givim, em i kamapim wanem gutpela pasin bilong em?
GOD JEHOVA em i nambawan Man tru bilong givim samting. Em i Man bilong wokim heven na graun, na disaipel Kristen Jems i tok long em olsem: “Olgeta presen i gutpela tru, em olgeta i save kam long heven. Papa i bin mekim kamap olgeta lait bilong skai, em i save salim dispela ol samting i kam daun long yumi.” (Jems 1:17) Na Jehova em i Man bilong givim nambawan gutpela presen tru long yumi. Wanpela man i stori long dispela presen olsem: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.”—Jon 3:16.
2 Man bilong mekim dispela tok em dispela wanpela Pikinini tasol em God yet i bin kamapim. Kain papa olsem, em pikinini bai amamas long em na laikim tru em, long wanem, em i bin givim laip na olgeta gutpela samting long em bambai em i ken stap amamas. God i gat wanpela Pikinini tasol na em i laikim em tumas, tasol em i laikim ol arapela tu, olsem na em i givim dispela nambawan gutpela presen tru bilong helpim ol. Dispela i kamapim klia bikpela sori tru bilong God. (Lukim Rom 5:8-10.) Na bikpela sori bilong em i kamap klia moa yet taim yumi save long insait bilong dispela tok “givim” long dispela ves.
God i Givim “Dispela Pikinini Em i Laikim Tru”
3. Papa long heven “i laikim tru” dispela wanpela Pikinini na husat moa?
3 Inap longpela taim tru, Baibel i no tok hamas yia, God i bin poroman wantaim dispela wanpela Pikinini bilong em long heven, em “dispela Pikinini em i save laikim tru.” (Kolosi 1:13) Insait long dispela bikpela hap taim, laik i stap namel long Papa na Pikinini i bin kamap strong moa na narapela i laikim tru narapela. I no gat wanpela pasin bilong laikim tru narapela i strong olsem dispela laik i stap namel long tupela. Tasol God Jehova i laikim tu ol narapela ensel na ol man em i bin wokim long rot bilong dispela Pikinini. Olsem na pasin bilong laikim tru ol arapela, dispela pasin i bosim olgeta ensel na olgeta man ol i olsem famili bilong God. Baibel i tok stret olsem: “God yet em i as bilong dispela pasin bilong laikim ol arapela.” (1 Jon 4:8) Olgeta dispela ensel na man em Papa, God Jehova, i laikim ol, ol i kamap olsem famili bilong Em.
4. Taim God i givim Pikinini bilong em, nau Pikinini i no i stap klostu moa long Papa, tasol olsem wanem na Papa i lus moa yet long poroman wantaim Pikinini long dispela taim? God i givim Pikinini bilong helpim husat?
4 Jehova wantaim namba wan Pikinini bilong em, tupela i pas gut tru wantaim, olsem na sapos tupela i no inap i stap wantaim na poroman wantaim, bai ol i pilim olsem ol i lus tru. (Kolosi 1:15) Taim God i “givim” dispela wanpela Pikinini long ol man, nau God i lus long poroman wantaim em long heven, na God i lus moa yet long dispela samting, long wanem, em i larim Pikinini i dai na inap liklik taim Pikinini i no i stap moa long famili bilong Em long heven o long graun. Dispela Pikinini i dai bilong helpim ol man em ol i no bin stap insait long famili bilong God. Dispela samting Jehova i givim bilong helpim ol man em i nambawan bikpela samting; i no gat wanpela samting Jehova inap givim i winim dispela. Em i givim “dispela Pikinini em i laikim tru,” em “[namba wan] bilong olgeta samting God i bin wokim.”—Kamapim Tok Hait 3:14.
5. (a) Ol pikinini bilong Adam i stap nogut olsem wanem? Stretpela kot bilong God i makim olsem wanpela gutpela pikinini bilong Em i mas mekim wanem? (b) God i mas mekim wanem bambai em inap givim dispela nambawan gutpela presen tru long ol man?
5 Namba wan man na meri, em Adam na Iv, tupela i bin stap insait long famili bilong God, tasol tupela i no holimpas dispela gutpela samting. Tupela i mekim rong na God i rausim ol long gaden Iden. Nau tupela i stap nogut—tupela i no insait moa long famili bilong God, na tu, strafe i mas painim tupela—tupela i mas i dai. Olsem na bilong helpim ol pikinini bilong tupela, God i mas helpim ol long kamap wanbel gen wantaim em na kam bek insait long famili bilong em, na em i mas wokim rot bilong tekewe dispela strafe bilong Em i stap long ol, em ol i mas i dai. Stretpela kot bilong God Jehova i makim olsem wanpela gutpela pikinini bilong Em i mas i dai olsem senis bilong ol na baim bek ol. Olsem na i gat bikpela askim: Dispela pikinini God i makim bilong mekim dispela wok, bai em i laik long mekim? Em i laik long i dai olsem senis bilong ol man i gat sin? Na bilong mekim dispela wok, God I Gat Olgeta Strong em i mas wokim wanpela mirakel. Na em i mas mekim bikpela pasin sori moa yet.—Rom 8:32.
6. Olsem wanem Pikinini bilong God em inap tru long helpim ol man i gat sin? Em i tok wanem long dispela samting?
6 Namba wan Pikinini bilong God, em tasol inap tru long mekim ol dispela samting bilong helpim ol man i gat sin. Em i save bihainim tru pasin bilong Papa na laikim tru olgeta narapela long famili bilong God; i no gat narapela pikinini bilong God i wankain olsem dispela Pikinini. Olgeta narapela ensel na ol man ol i bin kamap long rot bilong dispela Pikinini, olsem na yumi save, em i mas laikim ol moa yet. Na dispela pasin bilong laikim tru ol arapela em i olsem pasin tru bilong dispela Pikinini bilong God Jehova, em Krais Jisas, long wanem, “em i wankain tru olsem God yet.” (Hibru 1:3) Em i laik tru long i dai bilong helpim ol man i gat sin, na bai em i kamapim klia dispela pasin bilong em long laikim tru ol arapela. Olsem na em i tokim ol 12-pela aposel bilong em: “Pikinini Bilong Man . . . i no i kam bilong ol man i ken mekim wok bilong helpim em. Nogat. Em i kam bilong helpim ol, na bilong givim laip bilong em yet bilong baim bek planti manmeri.”—Mak 10:45; lukim tu Jon 15:13.
7, 8. (a) Wanem samting i kirapim Jehova long salim Krais Jisas i kam long graun? (b) God i salim Pikinini bilong em i kam bilong mekim wanem wok?
7 Wanpela bikpela samting i kirapim God Jehova long salim Jisas i kam bilong helpim ol man i lus tru, em olsem: Em i laikim ol tumas. Jisas yet i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim. God i no salim Pikinini bilong en i kam long graun bilong skelim pasin bilong ol manmeri bilong graun olsem jas. Nogat. Em i salim em i kam bilong kisim bek ol.”—Jon 3:16, 17.
8 God Jehova i sori long ol man na em i salim Pikinini bilong em i kam bilong kisim bek ol. God i no salim em i kam bilong skelim ol long kot. Nogat. Sapos God i bin salim em i kam bilong mekim wok kot olsem, sori tumas, bai olgeta manmeri i lus long kot. Bai Krais Jisas i tok, olgeta i mas kisim strafe na ol i mas i dai. (Rom 5:12) Olsem na dispela bikpela pasin sori God i mekim em i helpim yumi na kisim bek yumi long strafe bilong i dai, em stretpela kot bai tok i mas painim yumi.
9. Devit i ting olsem wanem long pasin bilong Jehova long givim samting?
9 Long olgeta samting God Jehova i mekim em i kamapim klia dispela nambawan gutpela pasin bilong em, em pasin bilong laikim tru ol arapela. I stret yumi ken tok, em i save laikim tru ol man i stap gut long em na ol i lotu long em, na em i save givim planti gutpela samting long ol, inap tru na moa yet. Devit i pilim tru dispela samting na em i tokim God: “Yu save mekim gutpela wok tru bilong helpim ol man i stap aninit long yu. Yu save lukautim gut ol man i bilip long yu. Yu save helpim ol moa yet long ai bilong olgeta manmeri.” (Buk Song 31:19) Devit em i bilong lain Israel, em dispela lain God i makim bilong Em stret, na taim Devit i stap king—na taim em i no kamap king yet—planti taim God i bin mekim gut long em na Devit i pilim tru na i tok, God i bin helpim em moa yet.
Israel i Lus Long Kisim Wanpela Bikpela Presen Bilong God
10. Olsem wanem na lain Israel long bipo ol i narapela kain long olgeta narapela lain long graun?
10 Jehova i stap God bilong lain Israel bilong bipo na dispela samting i mekim na ol i narapela kain tru long ol narapela lain long graun. Long rot bilong profet Moses, em namelman, Jehova i wokim kontrak wantaim ol dispela manmeri, em Abraham na Aisak na Jekop i tumbuna bilong ol. Em i no bin mekim kain pasin olsem long ol narapela lain. Nogat tru. Olsem na wanpela man bilong raitim song long Baibel i tok: “Em i givim tok bilong em long Jekop. Ol dispela tok na lo em i givim long ol Israel. Em i no save mekim olsem long ol arapela lain. Ol i no save ol lo bilong en. Yumi litimapim nem bilong Bikpela!”—Buk Song 147:19, 20.
11. Ol Israel i stap kontrak wantaim God inap long wanem taim? Jisas i tok wanem na em i makim olsem ol i no stap gutpela moa olsem long ai bilong God?
11 Lain Israel bilong skin i stap kontrak olsem wantaim God i go inap long taim ol i sakim Krais Jisas long yia 33, long wanem, ol i no bilip olsem em i Mesaia, olsem man God i salim bilong baim bek ol. Sori tumas long ol Israel! Jisas i krai na i tok: “Jerusalem, Jerusalem, yu save kilim ol profet i dai, na yu save kisim ol man God i salim i kam long yu na tromoi ston long ol bilong kilim ol i dai. Planti taim moa mi laik bungim ol pikinini bilong yu, olsem kakaruk meri i save bungim ol pikinini bilong en aninit long wing bilong en. Tasol yupela i no laik. Harim. Nau ples bilong yupela bai i bagarap na i stap nating.” (Matyu 23:37, 38) Dispela tok bilong Jisas i makim olsem lain Israel, bipo Jehova i bin mekim gut long ol, nau ol i lus long kisim wanpela bikpela samting em i laik givim long ol, olsem presen. Dispela samting i kamap olsem wanem?
12. Dispela tok ‘ol pikinini bilong Jerusalem’ i makim husat? Bilong bungim ol, Jisas i mas mekim wanem?
12 Dispela tok bilong Jisas olsem “ol pikinini” i makim tasol ol Juda tru i katim skin na ol i stap long Jerusalem na ol i olsem piksa na i makim lain Israel olgeta. Bilong Jisas i ken bungim dispela ‘ol pikinini bilong Jerusalem,’ em i mas i stap olsem Namelman na bringim ol i kam insait long nupela kontrak namel long Jehova na ol dispela Juda bilong skin. (Jeremaia 31:31-34) Long dispela rot bai God inap tekewe sin bilong ol na kamapim klia olsem em i laikim tumas ol. (Lukim Malakai 1:2.) Em bikpela presen tru ol inap kisim.
13. Lain Israel i sakim Pikinini bilong God na ol i lus long kisim wanem samting? Tasol olsem wanem na amamas bilong Jehova i no lus liklik?
13 Jehova i bihainim tok profet bilong em long Baibel na em i no les kwik long ol Juda. Em i wet longtaim liklik na bihain em i singautim ol manmeri i no bilong lain Juda long i kam kisim dispela presen—em i singautim ol i kam insait long nupela kontrak. Ol Israel bilong skin i sakim Pikinini bilong God yet, em dispela man God i bin salim bilong baim bek ol, olsem na ol i lus long kisim dispela gutpela samting God i laik givim long ol olsem presen. Ol i sakim Pikinini bilong em na bilong stretim dispela samting, em i singautim ol manmeri i no bilong lain Juda long i kam kisim dispela presen. Long dispela rot amamas bilong Jehova long givim samting i no lus liklik.
Amamas Bilong Givim Samting
14. I gat wanem as na Krais Jisas i stap amamas tru, winim olgeta narapela em God i bin wokim long heven na long graun?
14 Jehova em i “as bilong pasin tru bilong amamas.” (1 Timoti 1:11) Taim em i givim samting long ol arapela, dispela i save mekim em i amamas. Taim Pikinini bilong em i stap long graun, em i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” (Aposel 20:35) Samting i bin painim Jisas i stret long dispela lo. Jisas i amamas moa yet, winim olgeta narapela em God i bin wokim long heven na long graun. Em i kisim dispela amamas olsem wanem? Long wanem, em i namba tu man long God Jehova long givim nambawan gutpela presen tru—em i bin givim laip bilong em bilong helpim ol man. Olsem na em i ‘King i stap amamas.’ (1 Timoti 6:15) Em i kamapim klia olsem amamas bilong man i givim samting i bikpela moa, olsem em i bin tok.
15. Long olgeta taim Jehova bai stap gutpela piksa bilong wanem pasin? Olsem wanem yumi inap kisim hap amamas bilong em?
15 Long rot bilong Krais Jisas, God Jehova i no ken pinis long givim planti samting long olgeta ensel na olgeta man em i bin wokim, na oltaim bai God i stap olsem gutpela piksa bilong ol long pasin bilong givim samting. God i save amamas long givim ol gutpela presen long ol arapela, olsem na em i putim dispela laik long bel bilong ol man na ol tu i save amamas long givim samting. Taim ol i givim planti samting long ol arapela, ol i bihainim pasin bilong em na ol i kisim hap amamas bilong em. (Stat 1:26; Efesus 5:1) I stret Jisas i bin tokim ol disaipel bilong em: “Yupela mas givim ol samting long ol arapela, na bai God i givim ol samting long yupela. Em bai i skelim gutpela moa long yupela, na em bai i pulapim tru, na sakim i go daun, na pulapim moa yet, inap long ol samting i kapsait, na givim long yupela. Skel yupela i save givim long ol arapela man, long dispela skel tasol God bai i bekim long yupela.”—Luk 6:38.
16. Long Luk 6:38 Jisas i stori long givim wanem samting?
16 Jisas i makim gutpela pasin tru ol disaipel bilong em i ken bihainim, em pasin bilong givim samting. Em i tok, sapos ol i givim samting, ol man i kisim bai bekim gutpela pasin long ol. Long Luk 6:38 Jisas i no tok tasol long givim samting bilong skin. Em i no tok, ol disaipel i mas givim planti samting bilong skin long ol man na bai ol yet i stap rabis. Nogat. Em i laik kirapim ol long givim tu ol samting bilong spirit na bai ol i stap belgut na amamas.
Ol Inap i Stap Amamas Oltaim Oltaim
17. God i bin givim wanem gutpela presen tru long ol Witnes bilong em nau long las taim?
17 God Jehova, em Het bilong olgeta samting em i bin wokim, em i bin givim gutpela samting tru long yumi ol Witnes bilong em nau long las taim! Em i givim gutpela tok bilong Kingdom long yumi. Yumi gat gutpela wok yumi ken mekim—yumi ken autim tok na tokim ol man, Kingdom bilong God long han bilong Krais i kamap pinis long heven. (Matyu 24:14; Mak 13:10) God Antap Tru i givim wok long yumi bilong i stap Witnes bilong em na autim tok bilong em—em gutpela presen moa yet. Sapos yumi laik bihainim pasin bilong God na givim samting, nambawan rot bilong mekim, em olsem: Yumi ken givim gutpela tok bilong Kingdom long ol man nau long taim pasin nogut bilong dispela graun i no pinis yet.
18. Yumi stap Witnes Bilong Jehova na yumi mas givim wanem samting long ol arapela?
18 Aposel Pol i stori long ol hevi em i bin karim long taim em i autim tok bilong Kingdom long ol man. (2 Korin 11:23-27) Ol Witnes Bilong Jehova long nau tu i bin karim planti hevi, na ol i bin lusim sampela samting ol yet i laik mekim, bambai ol i ken wok strong long givim tok bilong Kingdom long ol man na helpim ol long bilip na wetim Kingdom. Ating yumi no gat laik long i go long haus bilong ol man, na sapos yumi man bilong sem, bai i hatwok long yumi mekim. Tasol yumi disaipel bilong Krais na yumi no ken surik long mekim dispela gutpela wok bilong autim “dispela gutnius bilong kingdom”—olsem givim ol samting bilong spirit long ol man. (Matyu 24:14) Yumi mas kisim tingting wankain olsem bilong Jisas. Em i save, dai i laik painim em na em i beten olsem: “Papa bilong mi, . . . yu no ken bihainim laik bilong mi. Nogat. Yu mas bihainim laik bilong yu tasol.” (Matyu 26:39) Ol wokboi bilong Jehova i no ken bihainim laik bilong ol yet—ol i mas bihainim laik bilong God na givim gutpela tok bilong Kingdom long ol man.
19. Husat ol i Papa bilong “ol haus i stap gut oltaim oltaim”? Olsem wanem yumi ken kamap pren bilong tupela?
19 Bilong mekim dispela wok, yumi mas givim taim na strong na mani samting bilong yumi, tasol sapos yumi bihainim pasin bilong God na givim samting, bai yumi bihainim rot tru bilong i stap amamas oltaim oltaim. Long wanem Jisas i tok: “Long mani nogut bilong dispela graun yupela i mas mekim ol . . . i kamap pren bilong yupela. Na bihain, taim dispela taim bilong holim mani em i pinis, orait ol i ken kisim yupela i go long ol haus i stap gut oltaim oltaim.” (Luk 16:9) Yumi mas mekim wok long “mani nogut bilong dispela graun” bilong helpim yumi long kamap pren bilong dispela tupela Man i papa bilong “ol haus i stap gut oltaim oltaim.” God Jehova em i Man bilong wokim olgeta samting, olsem na em i papa bilong en, na em i bin makim namba wan Pikinini bilong em bilong kisim olgeta dispela samting, olsem na ol i bilong Pikinini tu. (Buk Song 50:10-12; Hibru 1:1, 2) Bilong kamap pren bilong tupela, yumi mas mekim wok long ol mani samting bilong yumi long pasin tupela i orait long en, na tu, yumi mas i gat stretpela tingting long mekim wok long ol samting bilong skin bilong helpim ol narapela. (Lukim Matyu 6:3, 4; 2 Korin 9:7.) Yumi ken mekim stretpela wok long mani bambai yumi ken kamap pren tru bilong God Jehova na Krais Jisas. Olsem: Yumi ken amamas long mekim wok long mani bilong yumi bilong helpim ol man i sot tru na bilong helpim ol wok bilong Kingdom bilong God.—Sindaun 19:17; Matyu 6:33.
20. (a) Olsem wanem Jehova tupela Jisas inap kisim yumi i go long “ol haus i stap gut oltaim oltaim”? Dispela “ol haus” i stap long wanem wanem hap? (b) Yumi inap mekim wanem gutpela wok long olgeta taim bihain?
20 God Jehova na Krais Jisas i no inap i dai, olsem na ol inap i stap Pren bilong yumi oltaim oltaim. Na tupela inap kisim yumi i go long “ol haus i stap gut oltaim oltaim.” Ol bai kisim sampela i go long heven, na bai ol i stap oltaim oltaim long heven wantaim olgeta ensel holi, na sampela bai ol i stap oltaim oltaim long Paradais hia long graun. (Luk 23:43) Gutpela presen God i givim long yumi, em Krais Jisas, dispela presen i mekim na ol dispela gutpela samting inap kamap. (Jon 3:16) Na long rot bilong Krais Jisas bai God Jehova i wok yet long givim ol gutpela presen long ol man, na bai em i kisim bikpela amamas bilong em yet. Inap long olgeta taim bihain bai yumi stap aninit long wok king bilong God Jehova na dispela wanpela Pikinini bilong em, Krais Jisas, na bai yumi tu inap wok long givim samting long ol arapela. Dispela samting bai mekim na bai yumi olgeta man i bihainim pasin bilong God na givim samting, yumi ken i stap amamas oltaim oltaim.
Yu Tingim?
◻ God i mas mekim wanem bambai em inap givim nambawan gutpela presen tru long yumi?
◻ God i salim Pikinini bilong em i kam mekim wanem wok?
◻ Husat i amamas moa yet, winim olgeta narapela em God i bin wokim? Bilong wanem i olsem?
◻ Ol man i bihainim pasin bilong God na givim samting, olsem wanem bai ol inap i stap amamas oltaim oltaim?
[Piksa long pes 10]
Yu tenkyu long God long em i givim Pikinini bilong em olsem ofa bilong baim bek yumi?
[Ol Piksa long pes 12]
Yu save painim Kingdom pastaim, olsem autim tok bilong Kingdom na givim samting bilong yu bilong helpim wok bilong Kingdom?