Gutpela Samting Ol i Kisim Long Ples Pipia Long Isip
BAI yu no ting long lukim gutpela olpela rait bilong Baibel long ples pipia, a? Tasol long yia 1880 samting ol i painim pinis gutpela samting olsem long ples wesan bilong Isip.
Kirap long yia 1778-1880 samting, ol i painim pinis long Isip sampela olpela rait long pepa pitpit. Ol i no wok long painim—ol i painim nating. Tasol klostu long taim bilong yumi, inap olsem 100 yia bipo, ol i kirapim wok tru bilong painim ol dispela kain olpela rait. Long dispela taim ol as ples i wok long kisim planti, na dispela i kirapim tingting bilong wanpela lain long Inglan, em ol i save givim mani bilong painim ol samting bilong bipo long Isip, na ol i save, ol i mas kirapim kwik wok bilong painim ol dispela kain rait, nogut ol i pinis. Ol i makim tupela saveman bilong Yunivesiti Oksfot (em Bernard P. Grenfell na Arthur S. Hunt) na tupela i kisim tok orait long i go mekim dispela wok long wanpela hap long distrik Faiyum (lukim piksa antap).
Wanpela bilong dispela tupela saveman (em Grenfell) i tingim olpela nem Grik bilong ples Benese, em Oksirinkus, na em i ting dispela em gutpela ples bilong painim planti bilong ol dispela olpela rait. Namel long yia 1350 na 1450 samting bihain long Krais, ples Oksirinkus em i wanpela as ples bilong lotu Kristen long Isip. Klostu long dispela ples, ol man i painim pinis sampela haus bruder bilong bipo tru ol i bagarap pinis, na planti haus bilong dispela taun em olgeta i bagarap pinis. Dispela saveman i ting em bai inap kisim sampela olpela rait bilong ol Kristen long dispela ples. Ol i painim painim long ples matmat na insait long ol brukpela haus, tasol nogat. Wanpela hap tasol bilong taun ol i no go long en bilong painim ol dispela rait, em ples pipia i gat ol hip pipia long en, em sampela i go antap inap 9 mita. Ol i ting ol i no inap kisim ol olpela rait long dispela hap, tasol ol i traim painim.
Planti Gutpela Samting i Stap
Long Janueri 1897 ol i kirap long digim wanpela baret long dispela hap na sampela aua tasol bihain ol i painim pinis sampela olpela rait long pepa pitpit. Ol dispela olpela rait em sampela pas, na kontrak, na pepa bilong gavman. Win i bin tromoi wesan i karamapim ol dispela pas samting, na ples i drai, olsem na ol dispela olpela rait i bin i stap gut inap olsem 2,000 yia.
Insait long 3-pela mun samting ol i kisim planti planti rait long Oksirinkus, hevi bilong ol long skel em inap olsem 2 ton. Ol i pulimapim long 25 bikpela bokis na putim long sip na salim i go long Inglan. Na bihain, inap 10-pela yia olgeta, long taim bilong kol, dispela tupela saveman i go bek long Isip bilong painim sampela moa.
Wanpela taim ol i digim graun long wanpela ples matmat long Teptunis na ol i no kisim sampela olpela rait; ol i kisim tasol ol pukpuk bilong bipo em ol man i bin putim marasin long en na karamapim bambai i no sting. Olsem na wanpela wokman i les na em i brukbrukim wanpela pukpuk. Em i kirap nogut, long wanem, em i lukim olsem ol i bin karamapim long ol hap pepa pitpit. Sampela pukpuk moa ol i kisim, ol tu i wankain, na sampela, em ol man i bin subim ol dispela kain pepa i go insait long maus bilong pukpuk. I gat sampela liklik hap rait bilong ol man i bin raitim buk long bipo, na sampela rait i kolim ol lo bilong king, na sampela kontrak na akaun bilong ol bisnis, na sampela pas ol man i bin raitim long pren o famili bilong ol.
Olgeta dispela rait i gutpela olsem wanem? Ol i gutpela tru, long wanem, ol man nating i bin raitim planti long tok Grik bilong ol man nating bilong dispela taim bipo (tok Koine). Olsem na ol dispela rait i helpim yumi long save, tok Grik ol i raitim Nupela Testamen long en i no narapela kain tok Grik, olsem sampela saveman i bin tok. Ol i bin raitim long tok Grik bilong ol man nating. Olsem na taim ol saveman i skelim ol dispela rait i stori long ol wok samting ol man i save mekim long olgeta de, ol inap kisim gut insait bilong ol hap tok Grik i stap long rait bilong Nupela Testamen.
Ol Rait Bilong Baibel
Ol i kisim tu sampela liklik hap hap rait bilong Baibel, em rait bilong en i no olsem rait bilong ol saveman na i no gat bilas, na pepa i no gutpela. Olsem na ol man i save, ol dispela rait i bilong Baibel bilong ol man nating. Orait, nau yumi ken skelim sampela.
Saveman Hunt i painim pinis wanpela olpela rait i gat ol tok bilong Matyu sapta 1 ves 1-9, na ves 12, na ves 14-20 long en. Dispela rait em bilong yia 250 samting bihain long Krais (C.E.), na man i raitim em i bin raitim long ol bikpela rait. Ol i kolim dispela rait olsem P1, em namba wan long lista bilong ol rait long pepa pitpit ol i bin kisim long narapela narapela hap. Ol i gat klostu 100 rait olsem, em hap tok o olgeta tok bilong Nupela Testamen i stap long en. Dispela liklik hap rait em Hunt i kisim em inap helpim yumi olsem wanem? Ol i skelim rait bilong en na ol i save, em bilong yia 250 samting (C.E.). Ol i skelim wantaim tumbuna rait bilong Nupela Testamen em Wescott na Hort i redim paslain long taim Hunt i kisim dispela rait, na tok bilong en i wankain tasol. Nau dispela olpela rait i stap long wanpela haus tumbuna (University Museum) long Filadelfia, Pensilvenia, long Amerika.
Wanpela lip pepa pitpit bilong wanpela buk, long hap bilong han kais i gat sampela tok bilong Jon sapta 1, na long han sut i gat sampela tok bilong Jon sapta 20. Ol i skruim ol narapela hap tok bilong Jon long dispela na ol i ting, pastaim i gat 25 lip bilong olgeta tok bilong Gutnius Jon i raitim, na long pastaim tru i gat sapta 21 tu. Ol i kolim dispela rait olsem P5, na ol i tok em bilong yia 250 samting (C.E.), na nau em i stap long wanpela haus buk (British Library) long Landon, long Inglan.
I gat wanpela liklik hap rait em ol tok bilong Rom 1:1-7 i stap long en. Ol saveman i skelim rait bilong en, i bikpela na i go nabaut, na sampela i ting wanpela skulmanki i bin raitim, olsem bilong lainim em long raitim tok. Ol i kolim P10, na ol i tok em bilong yia 350 samting (C.E.).
Narapela rait ol i bin kisim i bikpela liklik na i gat planti tok bilong pas Pol i raitim long ol Hibru. Man i bin raitim long baksait bilong wanpela longpela pepa i gat sampela rait bilong Livi long en, em wanpela man bilong bipo i bin raitim stori bilong ol Rom. Bilong wanem i gat dispela narapela narapela kain rait long tupela hapsait bilong wanpela pepa? Long wanem, long dispela taim bipo ol man i sot long pepa na pepa i gat bikpela pe bilong en. Olsem na ol i no save tromoi nating—ol i save raitim ol tok long baksait tu. Dispela rait bilong pas bilong ol Hibru ol i kolim P13, na em bilong yia 250-350 (C.E.).
Ol i painim pinis wanpela liklik buk tru (em i longpela inap 11 na hap sentimita na braitpela inap 5 sentimita). Wanpela lip bilong en i gat sampela tok bilong Rom sapta 8 na 9 long en long liklik rait tru. I olsem ol man bilong bipo, olsem bilong yia 250 samting (C.E.), ol tu i gat liklik Baibel inap long putim long poket. Ol i kolim dispela rait P27, na planti tok bilong en i stret wantaim wanpela olpela rait ol i kolim Codex Vaticanus.
Ol i kisim pinis sampela hap bilong 4-pela pes bilong wanpela buk i gat ol tok bilong wanpela Baibel Grik (Septuagint). I gat sampela tok long en bilong 6-pela sapta bilong hap bilong Stat long Baibel. Dispela ol liklik hap olpela rait i bikpela samting, long wanem, ol i bilong yia 150-250 (C.E.), na ol dispela sapta i no stap long olpela rait bilong Baibel, em Codex Vaticanus, na i bagarap liklik long olpela rait Codex Sinaiticus. Ol i kolim ol dispela liklik hap olpela rait olsem P656 na ol i stap long bikpela haus buk (Bodleian Library) long Oksfot, long Inglan.
Olgeta dispela liklik hap olpela rait i wankain olsem ol olpela rait yumi holim pinis, wan wan liklik tok tasol i narapela kain, olsem na ol i helpim yumi long save olsem long dispela taim bilong bipo tru, ol man nating long wanpela longwe hap bilong Isip ol i gat ol rait bilong Baibel. Yumi bilip olsem ol tok bilong Baibel, em tok bilong God, i stret, na ol dispela olpela rait i strongim dispela bilip bilong yumi.
[Piksa long pes 27]
Olpela rait ol i kisim long Faiyum, em i gat sampela tok bilong Jon, sapta 1
[Kredit Lain]
By permission of the British Library
[Piksa Kredit Lain long pes 26]
Pictorial Archive (Near Eastern History) Est.