Bikpela De Tru Bilong Tingim
“Long taim yupela i stap long dispela graun, ol hevi bai i kamap long yupela, tasol bel bilong yupela i ken i stap strong. Mi winim pinis strong bilong dispela graun.”—JON 16:33.
1, 2. Wanem wanpela de bilong bipo em i bikpela de tru, winim olgeta narapela de? Olsem wanem em i bikpela de?
OL MAN bilong dispela graun long nau ol i mekim bikpela toktok long gutaim. Long pinis bilong Namba 2 Pait Bilong Olgeta Hap, i gat tupela de i kirapim ol man long tingim gutaim, em V-E De na V-J De.a Long olgeta yia long taim bilong Krismas ol man i save tingim tok olsem: “Long graun ol manmeri i ken i stap bel isi.” (Luk 2:14) Tasol i gat wanpela de i bikpela de moa yet, winim olgeta narapela bikpela de bilong ol man. Long dispela de, Jisas i bin mekim tok i stap antap. Long olgeta 2 milion samting de ol manmeri i bin i stap long graun, dispela wanpela de i bikpela de tru—ol samting i bin kamap long dispela de i senisim tru ol samting i mas painim ol man na i helpim ol long kisim gutpela samting bilong oltaim.
2 Dispela bikpela de em de namba 14 bilong mun Nisan long kalenda bilong ol Juda. Long yia 33 (C.E.), Nisan 14 i kirap long taim san i go daun long Epril 1. Orait, nau yumi ken stori long sampela samting i bin kamap long dispela bikpela de tru.
Nisan 14!
3. Jisas i bin mekim wanem wok long ol laspela aua bilong em i stap laip?
3 San i go daun pinis na nau ples i tudak, tasol ai bilong mun i bikpela na ating mun i lait gut, em i olsem mak bilong kirapim tingting bilong ol man olsem Jehova yet i save makim ol taim na ol de. (Aposel 1:7) Orait, wanem samting i kamap long rum antap, em ples Jisas wantaim ol 12-pela aposel i bung long en bilong mekim kaikai bilong bikpela de bilong lotu ol i kolim Pasova? Em Bikpela De Bilong Tingim De God I Larim Ol Israel I Stap Gut na ol Juda i save mekim dispela kaikai wanpela taim long olgeta yia. Jisas i wok long redi na bai em i ‘lusim dispela graun na i go long Papa, na em i wok yet long kamapim klia olsem em i laikim tumas ol manmeri bilong em i go inap long taim em i dai.’ (Jon 13:1) Em i mekim olsem wanem? Long rot bilong ol tok na ol pasin em i mekim, em i wok yet long lainim ol disaipel bambai ol inap kisim ol gutpela pasin bilong helpim ol long winim pait na daunim strong bilong dispela graun.
Kisim Pasin Daun na Pasin Sori
4. (a) Olsem wanem Jisas i lainim ol disaipel long wanpela pasin i mas i stap pasin tru bilong ol? (b) Olsem wanem yumi save Pita i bin lain gut olsem pasin daun i bikpela samting?
4 Ol aposel i gat liklik hap pasin antap, na ol i resis wantaim ol narapela long kisim biknem, na ol i mas lusim ol dispela kain pasin. Olsem na Jisas i pasim wanpela taul long bel bilong em na em i kirap wasim lek bilong ol. Jisas i no giaman long mekim pasin daun na em i mekim dispela samting long ol aposel, olsem pop i save mekim long Rom long olgeta yia. Nogat tru! Man i gat pasin daun tru, ‘em i ting pasin bilong ol arapela i winim pasin bilong em,’ olsem na em i redi long givim em yet bilong helpim ol. (Filipai 2:2-5) Pastaim Pita i no kisim gut as bilong dispela samting Jisas i mekim na em i no laik bai Jisas i wasim lek bilong em. Tasol taim Jisas i stretim tingting bilong Pita, nau Pita i tokim Jisas long wasim skin olgeta bilong em. (Jon 13:1-10) Yumi save, Pita i bin kisim gut dispela samting Jisas i laik lainim em long en, long wanem, sampela yia bihain Pita i givim stretpela tok long ol narapela long dispela samting. (1 Pita 3:8, 9; 5:5) Long nau em bikpela samting long yumi olgeta i mas bihainim pasin daun na i stap wokboi bilong Krais!—Lukim tu Sindaun 22:4; Matyu 23:8-12.
5. Wanem lo bilong Jisas i kamapim narapela pasin i mas i stap olsem pasin tru bilong ol?
5 Tasol ol tok Jisas i givim long ol 12-pela long dispela taim i no helpim wanpela bilong ol. Em Judas Iskariot. Ol i wok long mekim kaikai bilong Pasova na nau bel bilong Jisas i pilim hevi, na em i makim klia olsem Judas em i man bilong kamapim em long ol birua, na em i salim Judas i go. Judas i go pinis na nau Jisas i tokim ol 11-pela gutpela aposel: “Nau mi givim nupela lo long yupela olsem, yupela wan wan i mas laikim tru ol arapela. Mi bin laikim yupela tru, na olsem tasol yupela wan wan i mas laikim tru ol arapela. Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:34, 35) Em nupela lo tru, na Jisas yet em i gutpela piksa tru bilong dispela kain pasin bilong sori! Taim bilong em bilong i dai olsem ofa i kam klostu na em i mekim gutpela pasin sori—long olgeta minit bilong ol dispela laspela aua bilong em i stap laip long graun, em i wok yet long lainim na strongim ol disaipel. Bihain, em i kamapim klia olsem pasin sori em i bikpela samting, em i tok: “Lo bilong mi em i olsem: Yupela wan wan i mas laikim tru ol arapela, long wankain pasin olsem mi bin laikim yupela. Sapos wanpela man i laikim tumas ol pren bilong en na i lusim laip bilong em yet bilong helpim ol, orait dispela pasin bilong laikim ol arapela i winim tru ol arapela pasin bilong laikim ol arapela manmeri.”—Jon 15:12, 13.
‘Mi Rot na As Bilong Tok i Tru na Laip’
6. Ol disaipel i stap pren tru bilong Jisas, em i tokim ol, ol inap kisim wanem samting?
6 Jisas i tokim ol 11-pela aposel i stap gut long em: “Yupela i no ken bel hevi na tingting planti. Yupela i bilip long God. Yupela i mas bilip long mi tu. Long haus bilong Papa bilong mi i gat planti rum i stap, na mi go bilong redim ples bilong yupela.” (Jon 14:1, 2) Em i go redim ples bilong ol long “kingdom bilong heven.” (Matyu 7:21) Em i kolim rot bilong ol dispela disaipel i pren tru bilong em ol i ken kisim dispela samting. Em i tok: “Mi yet mi rot, na mi as bilong tok tru, na mi as bilong laip. I no gat wanpela man inap i kam long Papa long narapela rot.” (Jon 14:6) Ol manmeri ol bai kisim laip i stap oltaim long graun, ol tu bai kisim long dispela rot.—Kamapim Tok Hait 7:9, 10; 21:1-4.
7-9. Bilong wanem Jisas i tok em i ‘rot na as bilong tok i tru na laip’?
7 Jisas em i “rot.” I gat wanpela rot tasol bilong i go klostu long God long beten, em Krais Jisas. Jisas yet i tok promis olsem olgeta samting ol disaipel i beten askim God long en, sapos ol i beten long nem bilong Jisas, bai God i givim long ol. (Jon 15:16) Ol beten ol man i mekim long ol piksa bilong lotu o long “ol santu,” o sapos ol i kolim planti beten bilong litimapim nem bilong Maria o ol i kolim kolim nating planti tok—Papa i no save harim ol dispela kain beten. (Matyu 6:5-8) Na long Aposel 4:12, Baibel i tok long Jisas olsem: “I no gat narapela man i inap kisim bek yumi. Nogat. Long nem bilong Jisas wanpela tasol yumi olgeta manmeri bilong graun inap i stap gut.”
8 Jisas em i “as bilong tok tru.” Aposel Jon i tok long Jisas olsem: “Tok em i bin kamap man, na em i kam i stap namel long mipela. Mipela lukim pinis bikpela namba na strong bilong em. Em i namba bilong dispela wanpela Pikinini tasol, Papa i salim em i kam. Marimari na pasin i tru i pulap long em.” (Jon 1:14) Jisas i truim planti handet tok profet i stap long hap bilong Olpela Testamen long Baibel, na long dispela rot em i kamap olsem as bilong tok i tru. (2 Korin 1:20; Kamapim Tok Hait 19:10) Em i autim tok i tru taim em i toktok wantaim ol disaipel bilong em, na taim em i autim tok long ol bikpela lain manmeri i kam bung na harim tok bilong em, na long taim em i bekim tok long ol hetman bilong lotu i tok pait wantaim em, na long pasin na wokabaut bilong em.
9 Jisas em i “as bilong laip.” Em i Pikinini bilong God na em i tok: “Man i bilip long Pikinini, em i gat laip i stap gut oltaim oltaim. Tasol man i no bihainim tok bilong Pikinini em bai i no inap kisim laip. Nogat. Belhat bilong God i stap long em.” (Jon 3:36) Sapos man i bilip long ofa bilong Jisas na em i kamapim dispela bilip bilong em, dispela inap bringim em i go bilong kisim laip—laip oltaim long heven bilong “liklik lain” Kristen em God i makim ol na ol i no inap i dai moa, na laip oltaim long paradais long graun bilong bikpela lain “arapela sipsip.”—Luk 12:32; 23:43; Jon 10:16.
Sanap Strong Long Taim Ol Man i Birua Long Yu
10. Bilong wanem yumi mas ‘winim strong bilong dispela graun’? Jisas i bin mekim wanem tok em inap strongim yumi long mekim olsem?
10 Ol man i laik i stap long nupela taim Jehova bai kamapim, nau ol i gat hatwok, long wanem, ol i stap namel long ol manmeri “i stap aninit long strong bilong Satan.” (1 Jon 5:19) Olsem na tok bilong Jisas long Jon 15:17-19 inap strongim tru bel bilong ol! Jisas i tok: “Mi givim lo long yupela olsem: Yupela wan wan i mas laikim tru ol arapela. . . . Sapos ol manmeri bilong graun i birua long yupela, orait yupela i no ken lusim tingting, pastaim ol i bin birua long mi tu. Sapos yupela i stap olsem ol man bilong dispela graun, orait ol manmeri bilong graun ol inap laikim yupela olsem ol lain bilong ol yet. Tasol yupela i no man bilong dispela graun. Nogat. Mi makim yupela pinis bai yupela i lusim pasin bilong dispela graun. Olsem na ol manmeri bilong graun i save birua long yupela.” Long bipo na i kam inap long nau, olsem long yia 1992, ol man i bin birua long ol Kristen tru, na yumi amamas long gutpela pasin bilong ol Kristen i sanap strong yet, em ol i bihainim pasin daun na stap aninit long strongpela han bilong God na long dispela rot ol i kisim strong bilong mekim! (1 Pita 5:6-10) Yumi olgeta yumi inap karim hevi na sanap strong sapos yumi bilip long Jisas, em i mekim gutpela tok olsem: “Long taim yupela i stap long dispela graun, ol hevi bai i kamap long yupela, tasol bel bilong yupela i ken i stap strong. Mi winim pinis strong bilong dispela graun.”—Jon 16:33.
Em i Tokaut Long Nupela Kontrak
11. Jeremaia i bin mekim wanem tok profet long wanpela nupela kontrak?
11 Long dispela apinun, taim ol i mekim pinis kaikai bilong Pasova, nau Jisas i tokaut long wanpela nupela kontrak. Profet Jeremaia i bin tok profet long en planti handet yia bipo, olsem: “Bikpela i tok moa olsem, ‘Harim. Mi makim pinis wanpela taim na bai mi mekim nupela kontrak wantaim ol lain bilong Israel na ol lain bilong Juda. . . . Bai mi putim lo bilong mi long tingting bilong ol na bai mi raitim tok bilong lo long bel bilong ol. Na bai mi stap God bilong ol na bai ol i stap lain manmeri bilong mi. . . . Long wanem, bai mi lusim sin bilong ol na mi no ken tingim moa.’ ” (Jeremaia 31:31-34) Long de namba 14 bilong mun Nisan long yia 33, bai i gat wanpela ofa bilong strongim dispela nupela kontrak!
12. Olsem wanem Jisas i bin kamapim nupela kontrak? Nupela kontrak i mekim wanem wok?
12 Jisas i tokim ol 11-pela i stap gut long em, em i laikim tumas long kaikai dispela Pasova wantaim ol. Tok pinis, orait nau em i kisim wanpela bret, na i tenkyu long God, na i brukim, na i givim long ol. Em i tok: “Dispela em i [olsem] bodi bilong mi, mi givim bilong helpim yupela. Yupela i mas mekim olsem bilong tingim mi.” Bihain em i mekim wankain pasin na em i givim wanpela kap i gat retpela wain long en long ol, na em i tok: “Dispela kap wain em i nupela kontrak mi mekim long blut bilong mi, em mi kapsaitim bilong helpim yupela.” (Luk 22:15, 19, 20) Nupela kontrak i kisim strong bilong mekim wok long rot bilong blut bilong Jisas “i dia tumas,” em dispela blut i gat bikpela strong tru, winim blut bilong ol animal ol i kapsaitim bilong strongim kontrak bilong Lo em God i bin mekim wantaim ol Israel. (1 Pita 1:19; Hibru 9:13, 14) Ol manmeri em God i mekim nupela kontrak wantaim ol, sin bilong ol i tekewe olgeta. Olsem na ol inap insait long lain 144,000, em ol i kamap ol Israel bilong spirit na ol bai kisim laip i stap gut oltaim oltaim.—Galesia 6:16; Hibru 9:15-18; 13:20; Kamapim Tok Hait 14:1.
“Bilong Tingim Mi”
13. (a) Yumi mas tingim wanem samting long taim bilong Memorial? (b) Husat tasol ol i ken kisim bret na wain? Olsem wanem i stret ol tasol i ken kisim?
13 Namba 1,960 taim bilong mekim bung bilong tingim i dai bilong Jisas, olsem Memorial, bai kamap long Epril 17, 1992. Dispela de i wok long i kam klostu nau na gutpela sapos yumi tingim olgeta wok gutpela ofa bilong Jisas i kamapim. Dispela ofa i litimapim bikpela save bilong Jehova na pasin bilong em long laikim tru ol manmeri. Jisas i stap gut olgeta long Jehova i go inap long em i kisim bikpela pen na em i dai, na dispela samting i stretim bek nem bilong Jehova, em Satan i bin sutim tok bilas long Jehova na i tok, ol manmeri Jehova i bin wokim ol i no inap i stap stret na sanap strong long traim. (Jop 1:8-11; Sindaun 27:11) Long rot bilong blut Jisas i givim olsem ofa, Jisas i kamapim nupela kontrak. Na long rot bilong dispela kontrak bai Jehova i makim ‘ol manmeri ol bai stap lain bilong em stret, na ol bai stap ol pris bilong lain bilong king, na lain holi.’ Taim ol i stap yet long graun ol i “tokaut long olgeta gutpela pasin” bilong God bilong ol, em Jehova, em i bin ‘singautim ol long lusim tudak, na em i bringim ol i kam insait long lait bilong em i gutpela moa yet.’ (1 Pita 2:9; skelim wantaim Kisim Bek 19:5, 6.) I stret ol tasol i ken kisim bret na wain bilong Memorial long olgeta yia.
14. Ol planti milion manmeri i bung bilong lukluk tasol, dispela bung i helpim ol olsem wanem?
14 Long yia i go pinis, long olgeta hap, inap olsem 10,650,158 ol i bin bung bilong tingim i dai bilong Jisas, na 8,850 tasol ol i bin kisim bret na wain (em liklik hap lain tru, i no winim .1 bilong 1 pesen). Orait, olsem wanem dispela bung i helpim ol narapela planti milion manmeri ol i go long en? Em i helpim ol tru! Ol i no kisim dispela bret o dring dispela wain, tasol taim ol i bung olsem wantaim ol bikpela lain brata bilong olgeta hap na ol i harim tok long olgeta gutpela samting Jehova i kamapim long rot bilong ofa bilong Pikinini bilong em, dispela i strongim ol tru long spirit.
15. Ofa bilong Jisas i helpim ol manmeri God i bin makim ol, na olsem wanem dispela ofa i helpim ol narapela tu?
15 Na tu, long 1 Jon 2:1, 2, aposel i tokim yumi: “Yumi gat Helpim bilong yumi, em i stap wantaim Papa. Em Jisas Krais, dispela man bilong mekim stretpela pasin olgeta. Em yet i bin mekim wok bilong tekewe sin bilong yumi. Na em i no mekim dispela wok bilong helpim yumi tasol. Nogat. Em i mekim bilong helpim olgeta manmeri i stap long graun.” Tru tumas, ofa bilong Jisas i helpim liklik lain pastaim, em Jon i piksa bilong ol na ol i insait long nupela kontrak, tasol em i helpim tu “olgeta manmeri i stap long graun”—em i tekewe sin bilong ol. Ofa bilong Jisas i tekewe sin bilong olgeta narapela manmeri i bilip long blut bilong Jisas, em dispela ofa i opim rot long ol bilong kisim gutpela samting tru—em laip i stap oltaim long paradais long graun.—Matyu 20:28.
“Long Kingdom Bilong Papa Bilong Mi”
16. (a) Ol manmeri i bilong mekim wok king wantaim Jisas, long nau i olsem ol i mekim wanem wantaim em? (b) Lain remnan na bikpela lain tu ol i mas mekim wanem long nau?
16 Jisas i mekim sampela tok moa bilong strongim ol aposel na em i stori long taim bihain, taim ol i stap long Kingdom bilong Papa bilong em, na long tok piksa bai i olsem em i dring nupela wain wantaim ol. (Matyu 26:29) Em i tokim ol: “Taim ol samting i kamap bilong traim mi, yupela i bin i stap wantaim mi, na yupela i no lusim mi. Papa bilong mi em i givim kingdom long mi, olsem tasol mi givim kingdom long yupela. Na long kingdom bilong mi yupela bai i sindaun long tebol bilong mi na kaikai na dring. Na yupela bai i sindaun long ol gutpela sia [king] na yupela bai i bosim ol 12-pela lain bilong Israel.” (Luk 22:28-30) Inap planti handet yia Jisas i wok long bungim ol man i bilong mekim wok king wantaim em, orait taim em i kisim pinis strong bilong bosim Kingdom long yia 1914, i stret yumi ken ting olsem bikpela hap lain bilong ol dispela manmeri, nau ol i kirap bek pinis na ol i ‘sindaun long ol sia king’ wantaim em. (1 Tesalonaika 4:15, 16) Taim bilong ol ensel i lusim “4-pela win” bilong “bikpela hevi tru” i wok long i kam klostu hariap nau! Long dispela taim bai God i putim mak pinis long ol 144,000 Israel bilong spirit, na bai em i bungim pinis ol planti milion manmeri bilong bikpela lain. Olgeta manmeri bilong liklik lain na bikpela lain wantaim ol i mas holimpas lo bilong God na stap gut long Em, olsem Jisas i bin mekim, bambai ol inap kisim prais, em laip i stap oltaim.—Kamapim Tok Hait 2:10; 7:1-4, 9.
17 na blok tu. (a) Sapos wanpela bilong lain God i makim em i no stap gut long God na God i rausim em, i stret yumi ken ting God bai kisim senis bilong em namel long wanem ol manmeri? (b) Tupela Wastaua (tok Inglis) bilong 1938 i givim wanem gutpela save long yumi long oganaisesen i wok olsem wanem, na i go bikpela?
17 Tasol olsem wanem sapos sampela long dispela liklik lain God i bin makim, ol i no stap gut long God? Taim i laik pinis nau na ating wan wan tasol bai mekim olsem. Sapos wanpela i mekim olsem, i stret yumi ken ting God i no ken kisim senis bilong em namel long ol nupela baptais; bai God i kisim senis bilong em namel long ol manmeri i no bin lusim Jisas na inap planti yia ol i bin stap gut long wok. Bikpela lait o save long ol samting bilong spirit i bin kamap long rot bilong ol Wastaua namel long yia 1920 na yia 1939 samting, na dispela i makim olsem wok bilong bungim laspela hap lain bilong ol manmeri God i bin makim, olsem lain remnan, dispela wok klostu em inap pinis long dispela taim bipo. Ol manmeri em bihain long dispela taim ol i bin ‘wasim klos bilong ol long blut bilong Pikinini Sipsip na klos i kamap waitpela,’ ol i wetim narapela gutpela samting. Long rot bilong Krais, spirit bilong Jehova i stiaim ol i go long “ol hul i gat wara i kamap, em wara bilong givim laip” long ol long Paradais long graun.—Kamapim Tok Hait 7:10, 14, 17.
Em i Beten Strong
18. Beten bilong Jisas long Jon sapta 17 i lainim yumi gut long wanem ol samting?
18 Bilong pinisim bung bilong Memorial wantaim ol disaipel, Jisas i beten strong na mekim ol tok i stap long Jon 17:1-26. Pastaim em i beten askim God long givim biknem long em taim em i stap gut long God i go inap long pinis. Long dispela rot bai God Jehova tu i kisim biknem. Bai nem bilong em i kamap holi. Jisas em i gutpela man olgeta na ol samting em i mekim i kamapim klia olsem ol manmeri God i bin wokim, ol inap i stap stret, maski bikpela traim tru i painim ol. (Lo 32:4, 5; Hibru 4:15) Na tu, taim Jisas i dai olsem ofa, dispela i opim gutpela rot long ol lain bilong Adam. Jisas i tok: “Laip bilong i stap gut oltaim, em i olsem: Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.” Em bikpela samting long yumi mas kisim stretpela save long God Jehova na long Pikinini bilong em, em Pikinini Sipsip bilong God na em i bin lusim laip bilong em bilong stretim bek nem bilong Jehova na bilong helpim ol manmeri long kisim laip i stap oltaim! (Jon 1:29; 1 Pita 2:22-25) Yu pilim tru dispela ofa em bikpela pasin sori i as bilong en? Dispela i kirapim yu long givim skin bilong yu olgeta long Jehova bilong mekim wok bilong em?
19. Olsem wanem lain remnan na bikpela lain inap i stap wanbel?
19 Na Jisas i beten askim Papa Holi bilong em long lukautim ol disaipel taim ol i kamapim klia olsem ol i no bilong dispela graun, na ol i bihainim gut ol tok bilong Baibel em ol i kisim olsem tok tru bilong God, na ol i holimpas pasin bilong i stap wanbel wantaim Papa na Pikinini. God i harim dispela beten na inap long nau em i bin lukautim gut ol, olsem na liklik lain remnan wantaim bikpela lain ol i stap wanbel long pasin sori na ol i wok gut wantaim, na ol i klia long ol wok politik na ol pait na ol pasin nogut bilong dispela graun. Bilong pinisim dispela beten, Jisas i mekim gutpela tok tru long Papa bilong em Jehova, em i tok: “Mi bin kamapim nem bilong yu long ol. Na bai mi kamapim moa yet, bai ol i ken kisim pasin bilong laikim ol arapela man, olsem yu save laikim mi. Na mi tu mi ken i stap long ol.”—Jon 17:14, 16, 26.
20. Bilong wanem de namba 14 bilong mun Nisan long yia 33 em bikpela de tru yumi mas tingim?
20 Jisas i lusim haus i go ausait na em i go long gaden Getsemani, na em i bung liklik taim moa wantaim ol disaipel na wok long strongim ol. Na nau ol birua i kam holim em! I no gat sampela tok yumi ken mekim bilong stori long bikpela pen tru long skin Jisas i bin kisim, na bikpela bel hevi bilong em long ol samting ol man i mekim na i bagarapim nem bilong God, o bilong stori long gutpela pasin tru bilong em—em i sanap strong long olgeta dispela traim na i stap gut long God. Jisas i sanap strong long dispela nait na i go inap planti aua long san long dispela de—em i sanap strong i go inap long pinis. Em i kamapim klia tru olsem Kingdom bilong em i no bilong dispela graun. Jisas i laik i dai na em i save, olgeta wok bilong em i pinis nau, olsem na las tru em i tok: “Em i pinis nau”! (Jon 18:36, 37; 19:30) Em i winim pinis strong bilong dispela graun. Tru tumas, de namba 14 bilong mun Nisan long yia 33, em bikpela de tru yumi mas tingim!
[Ol Futnot]
a De ol i winim pait long Yurop, na De ol i winim pait na daunim Japan.
Bai Yu Bekim Wanem Tok?
◻ Jisas i lainim ol disaipel na em i tok wanem long pasin daun na pasin sori?
◻ Olsem wanem Jisas i bin kamap olsem ‘rot na as bilong tok i tru na laip’?
◻ Nupela kontrak i gat wanem wok?
◻ Wanem gutpela pasin wanbel na pasin sori i stap namel long lain remnan na bikpela lain?
[Blok long pes 20]
Save Bilong Bikpela Solomon
Wastaua tok Inglis bilong Jun 1 na Jun 15, 1938, i kolim ol lo Jehova i putim bilong bosim oganaisesen bilong em long graun, na lain bilong Jehova i bihainim dispela pasin i kam inap long nau. Kirap long yia 1919 sampela bikpela senis i bin kamap long lain bilong Jehova long bilip bilong ol na long oganaisesen i wok olsem wanem. (Aisaia 60:17) Dispela tupela Wastaua i skelim dispela 20 yia namel long 1919 na 1938 wantaim 20 yia Solomon i bin wok long sanapim haus lotu bilong Jehova na haus bilong king long Jerusalem, na Wastaua i tok: ‘Baibel i tok Solomon i wok inap 20 yia bilong sanapim haus bilong God na haus bilong king, na nau em i wokim planti samting moa long ol narapela hap em i bosim. (1 Ki 9:10, 17-23; 2 Sto 8:1-10) Nau kwin bilong kantri Siba, em i stap long arere tru bilong graun, “em i kam bilong harim Solomon i autim gutpela save bilong em.” (Mt 12:42; 1 Ki 10:1-10; 2 Sto 9:1-9, 12) Nau wanpela askim i kamap, olsem: Wanem samting bai painim lain bilong Jehova long graun long nau? Bai yumi bilip na wet, na bihain yumi inap save long ol samting bai kamap.’ Bilip bilong ol i no lus nating. Lain bilong Jehova i bosim gut wok, na wok bilong helpim ol manmeri long samting bilong spirit i go bikpela, olsem na 4 milion manmeri bilong bikpela lain i kam bung. Dispela lain ol i kain olsem kwin bilong kantri Siba, long wanem ol i bilong ol longwe hap bilong graun tasol ol i kam bilong harim Bikpela Solomon, em Krais Jisas, i autim gutpela save bilong em. Jisas i givim dispela save long ol long rot bilong ‘gutpela wokboi.’—Matyu 24:45-47.