Naisan 14-Wanpela De Bilong Tingim

“Yupela i mas mekim olsem bilong tingting long mi.”—1 KORIN 11:24.

1. Olsem wanem Jisas i winim pasin bilong dispela graun?

“BEL bilong yupela i ken i stap strong. Mi winim pinis pasin bilong dispela graun.” Jisas i mekim dispela tok bilong strongim 11-pela gutpela aposel bilong em long nait paslain long em i dai. Yes, Jisas i winim pinis pasin bilong dispela graun! Em i sanap strong na sakim olgeta samting birua bilong em, Seten, i bin mekim bilong pundaunim em. Em i stap gut long Jehova. Liklik taim bihain em i karim bikpela pen long diwai na em i dai, tasol em i save em bai stap gut long Jehova i go inap long taim em i dai.—Jon 16:33; Hibru 12:2.

2. Bilong wanem Jisas i kirapim “kaikai bilong Bikpela”?

² Dispela bikpela samting i bin kamap 1,952 yia bipo long de namba 14 bilong mun Naisan (em namba wan mun long kalenda holi bilong ol Juda). Dispela de em i wanpela de ol disaipel bilong Jisas i mas tingim. Bilong helpim ol long tingim ol bikpela samting i kamap long dispela de, Jisas i kirapim wanpela kaikai, em aposel Pol i kolim “kaikai bilong Bikpela.” Spirit bilong God i givim tingting long Pol na Pol i stori long tok Jisas i givim long ol disaipel bilong em, em ol i stap wantaim em long dispela taim. Em i tokim ol: “Yupela i mas mekim olsem bilong tingting long mi.” (1 Korin 11:20, 24) Sapos yu laik i stap wanpela disaipel bilong Krais, yu mas save long as bilong dispela tok, na long ol samting yu mas mekim, na yu mas save dispela samting inap helpim yu olsem wanem long bihain.

Wanpela De Ol Man i Mas Tingim

3. Wanem namba wan taim God i makim Naisan 14 olsem wanpela de bilong tingim? Bilong wanem ol i mas tingim dispela de?

³ Namba wan taim God i makim Naisan 14 i olsem wanpela de ol man i mas tingim em long 1513 B.C.E. Long maus bilong Moses, Jehova i tokim ol Isrel: “Yupela mas makim dispela de [Naisan 14] bai em i stap bikpela de bilong lotu, bilong tingim dispela samting mi Bikpela mi bin mekim. Na olgeta lain bilong yupela i kamap bihain bihain ol tu i mas mekim dispela kaikai bilong God I Abrusim yupela.” Wanem as bilong dispela kaikai? Jehova i tok, ol Isrel i mas tokim pikinini bilong ol, olsem: “Mipela mekim dispela ofa long Bikpela bilong makim de em i abrusim mipela. Mipela tingting long taim em i bin kilim i dai ol namba wan pikinini man bilong Isip. Tasol em i abrusim ol haus bilong yumi Isrel, na larim ol pikinini bilong mipela i stap gut.”—Eksodas 12:14, 27.

4. God i laik mekim wanem na em i helpim ol Isrel long lusim Isip?

⁴ God i kilim i dai olgeta namba wan pikinini man bilong ol Isip, tasol em i lukautim ol namba wan pikinini bilong ol Isrel, bilong man na animal, na ol i stap gut. Em namba ten samting nogut God i mekim long ol god giaman bilong ol Isip, na i kamapim laik bilong God. God i bin tokim bikhet King bilong ol Isip, olsem: “Mi bin larim yupela i stap olsem bai mi ken soim bikpela strong bilong mi long yupela, na bai ol manmeri i ken autim biknem bilong mi long olgeta hap bilong graun.” Sampela de bihain, Jehova i kamapim gen nem bilong em na bikpela strong bilong em. Em i bagarapim ami bilong Isip long solwara Retsi, tasol em i lukautim ol Isrel na ol planti narapela lain manmeri i go wantaim ol. Moses na ol Isrel i lukim dispela samting na ol i singim wanpela song long Jehova na litimapim nem bilong Em. Ol i tok: “Singim song long Bikpela, long wanem em i winim bikpela pait tru.”—Eksodas 9:16; 15:1.

5. I gat wanem as na ol i mekim kaikai bilong Pasova?

⁵ Taim lain Isrel i sindaun pinis long dispela graun God i bin tok promis long givim long tumbuna bilong ol, em Ebraham, long olgeta yia ol i save go long Jerusalem long de bilong God I Abrusim ol, em de bilong Pasova. Ol i bihainim tok bilong Diuteronomi 16:1-8. Olsem na Jehova i stretim rot bambai lain bilong em ol i no ken lusim tingting long dispela de. Tasol bilong wanem ol i mas tingim dispela de na mekim kaikai bilong Pasova? Em i de bilong litimapim nem bilong Jehova, na de bilong tingim ol bikpela wok em i mekim bilong kisim bek ol. Olsem na bihain bihain, taim Jisas i stap long graun, papamama bilong em i tingim dispela de. Baibel i tok: “Tupela i save go long Jerusalem olgeta yia bilong lukim bikpela de holi ol i kolim Pasova.” Ol Juda i save kisim pikinini bilong ol i go wantaim ol, olsem na Jisas i go wantaim papamama bilong em.—Luk 2:41, 42.

6. Long 33 C.E. bilong wanem Jisas i laik mekim Pasova wantaim ol gutpela aposel bilong em?

⁶ Jisas i baptais long Wara Jodan na kirapim wok bilong em, na ating em i mekim yet Pasova wantaim mama bilong em, Maria, na ol pikinini man bilong Maria, em ol brata bilong em. Tasol long Naisan 14 long yia 33 C.E., Jisas i stretim rot bambai em i ken mekim dispela kaikai wantaim ol 12-pela aposel bilong em. Stori bilong Luk long dispela samting i kamapim tingting bilong Jisas long dispela taim, Jisas i tok: “Mi laikim tumas long kaikai dispela Pasova wantaim yupela pastaim, na bihain mi karim pen.” (Luk 22:15) Bilong wanem Jisas i gat bikpela laik olsem? Long wanem, em i save ol samting bai kamap long dispela de, kirap long taim san i go daun, ol dispela samting i bikpela samting. Na Jisas i save, ol dispela samting i winim tru ol samting i bin kamap long 1513 B.C.E. Ol dispela samting bai litimapim moa yet nem bilong Jehova, na bai i kamap olsem as bilong olgeta lain man i ken kisim blesing. Na i gat planti samting em i laik tokim ol disaipel long en paslain long em i dai, bambai em i ken strongim ol. Gutnius Matyu na Mak na Luk na Jon i raitim i stori long ol samting Jisas i bin mekim na ol tok em i mekim long dispela taim.—Jon 12:31; 17:26.

Wanem Samting i Bin Kamap? Wanem As Bilong En?

7. (a) Taim Jisas i mekim laspela kaikai bilong Pasova, wanem ol samting i kamap pastaim na bihain Jisas i kirapim kaikai bilong tingim i dai bilong em? (Jon 13:1-30) (b) Stori long ol samting Jisas i mekim taim em i kirapim kaikai bilong Bikpela.

⁷ Ol i kaikai i stap na Jisas i kirap wasim lek bilong ol disaipel bilong em. Em i makim gutpela pasin daun yumi olgeta i ken bihainim. Bihain Jisas i tok: “Wanpela namel long yupela bai em i givim mi long ol man i birua long mi.” Bihain liklik Jisas i tokim Judas: “Samting yu laik mekim, em yu mekim kwik.” Jon i stori na em i tok: “Kwiktaim em i go ausait. Na ples i tudak pinis.” (Jon 13:21, 27, 30) Nau Jisas i kirapim dispela Kaikai Bilong Bikpela o Memorial bilong tingim i dai bilong em. Matyu i lukim ol samting i bin kamap na em i stori olsem: “Ol i kaikai i stap, na Jisas i kisim bret, na i tenkyu long God, na i brukim, na i givim long ol disaipel. Na em i tok, ‘Yupela kisim na kaikai. Dispela em i bodi bilong mi.’ Na em i kisim wanpela kap wain, na em i tenkyu long God, na i givim long ol, na i tok, ‘Yupela olgeta dring long dispela. Dispela em i blut bilong mi bilong wokim kontrak. Mi kapsaitim bilong tekewe sin bilong planti manmeri. Mi tokim yupela: Mi no ken dring long pikinini bilong wain gen, inap long taim mi dringim nupela wantaim yupela insait long kingdom bilong Papa bilong mi.’ Ol i mekim wanpela song pinis, na ol i go ausait na ol i go long maunten Oliv.”—Matyu 26:26-30; lukim tu Mak 14:22-26, na Luk 22:19, 20, na 1 Korin 11:23-26.

8. Bilong wanem i bikpela samting yumi mas save long as bilong ol tok na ol samting Jisas i mekim taim em i kirapim Memorial?

⁸ Wanem as tru bilong ol tok na ol samting Jisas i bin mekim long dispela taim? Lain bilong heven ol i mas save gut long as bilong en, olsem na Pol i tok: “Olsem na sapos wanpela man i no tingting gut pastaim na i kaikai nating dispela bret bilong Bikpela, na i dring nating long dispela kap bilong Bikpela, em i olsem i mekim nogut bodi na blut bilong Bikpela, na em i gat asua long dispela.” Ol lain bilong heven ol i no laik bai ol i “gat asua” long ai bilong Jehova. Na ol poroman bilong dispela lain, em ol manmeri bilong ‘bikpela lain,’ ol tu i no laik bai ol i gat asua long ai bilong Jehova. Olsem na nau, long taim bilong Memorial, i gutpela yumi olgeta yumi ken skelim ol samting bilong Memorial. Long 1985, Memorial i kamap long Fonde, Epril 4.—1 Korin 11:27.

9. (a) Bilong wanem i stret yumi mas tanim tok bilong Jisas olsem: “Dispela em i olsem bodi bilong mi”? (Lukim tok i stap daunbilo long pes.) (b) Bret i makim wanem samting, olsem Jisas i tok? (c) Wain i makim wanem samting?

⁹ Jisas i kisim bret na em i tok: “Dispela em i olsem bodi bilong mi.” (Matyu 26:26, NW)a Em i tok olsem, long wanem dispela bret i no bodi tru bilong em. Dispela bret i makim tasol bodi bilong em i no gat sin na em i givim “bai ol manmeri long graun ol i ken kisim laip.” (Jon 6:51) Na wain i makim blut bilong em, em i “kapsaitim bilong tekewe sin.” Dispela blut i as bilong kirapim “nupela kontrak.” Blut bilong em i kapsait o “kam daun,” dispela em i rot bilong “tekewe sin.”—Matyu 26:28; Jeremaia 31:31-33, NW; Hibru 9:22.

10. Ol manmeri i kaikai dispela bret na dring dispela wain long taim bilong Memorial, ol i soim wanem samting?

¹⁰ Orait, long taim bilong Memorial, ol manmeri i kaikai dispela bret na dring dispela wain, ol i soim wanem samting? Dispela i soim ol yet, na ol manmeri i lukluk tu, olsem ofa bilong Krais i helpim pinis ol, tasol long narapela kain pasin na bilong mekim narapela kain wok. Dispela samting i kamap olsem wanem? Ol dispela manmeri bilong lain bilong heven, ol i bilip long ofa bilong Krais na ol i dediket long God Jehova, olsem na Jehova i tingim ofa bilong Krais i helpim ol pinis, na long ai bilong em ol i stap olsem man i gutpela olgeta, na em i kolim ol stretpela man. Jehova i givim spirit bilong em long ol na mekim ol i kamap pikinini spirit bilong em. Nau ol inap lusim laip bilong ol long graun na kisim laip long heven. Olgeta dispela samting i kamap paslain long taim ol i kaikai bret na dring wain long Kaikai Bilong Bikpela.—Rom 5:1, 2, 8; 8:15-17; Jems 1:18.

11, 12. (a) Taim ol i dring dispela wain, dispela i soim wanem tupela samting moa? (b) Stori long dispela kontrak Jisas i mekim wantaim ol manmeri i kisim bret na wain.

¹¹ Na taim ol i dring dispela wain, dispela i soim wanem samting moa? Tru Jehova i kolim ol stretpela man na em i kisim ol olsem ol pikinini spirit bilong em, tasol ol i stap man yet long graun na ol i gat sin. Ol i save ol i sinman. Olsem na taim ol i dring dispela wain, dispela i soim olsem ol i save blut bilong Krais, em i “kapsaitim bilong tekewe sin bilong planti manmeri,” dispela blut i mas helpim ol long olgeta de.—1 Jon 1:9, 10; 2:1.

¹² Na taim ol i dring dispela wain, dispela i soim narapela samting tu, olsem: Ol i insait long “nupela kontrak,” em God i wokim wantaim ol olsem Jeremaia i bin tok profet long en longtaim bipo. Blut bilong Jisas i as bilong kirapim dispela kontrak. God Jehova na ol pikinini spirit bilong em, olsem ol Isrel bilong spirit, ol i insait long dispela kontrak. God yet i makim olgeta manmeri wan wan ol i insait long en. Jisas em i Namelman bilong en na long dispela rot em inap helpim dispela 144,000 manmeri long kamap pikinini bilong Ebraham. (Jeremaia 31:31-34; 2 Tesalonaika 2:13; Hibru 8:10, 12; 12:22-24; Galesia 3:29) Jisas i mekim ‘kontrak bilong kingdom’ wantaim ol dispela manmeri. Bai ol i mekim wok king wantaim King bilong ol, Krais Jisas. God i givim dispela wok long ol na long rot bilong ol bai olgeta lain long graun i kisim laip na blesing bilong Jehova.—Luk 22:28-30; Jon 6:53; Revelesen 5:9, 10; Jenesis 22:15-18.

13. Nau yumi mas tingim wanem ol samting long Naisan 14?

¹³ Tru tumas, taim yumi skelim as tru bilong ol tok Jisas i mekim long dispela bikpela de, yumi tingim pasin sori bilong Jehova, em i givim Pikinini bilong em bilong helpim yumi. Na yumi tingim bikpela pasin sori Jisas i mekim, em i dai bilong baim bek olgeta manmeri i bilip. (Jon 3:16; Rom 5:8; 1 Timoti 2:5, 6) Tasol Jisas i bin toktok wantaim ol disaipel bilong em long sampela narapela gutpela tok i tru tu. Aposel Jon tasol i stori long ol dispela tok Jisas i bin mekim wantaim ol dispela poroman tru bilong em.

Biknem, Sori, Wanbel

14. (a) Olgeta taim yumi mekim Memorial, olsem wanem dispela i givim biknem long Jehova? (b) Taim yumi tingim Jisas, i gat wanem wok long pasin bilong sori? Yumi mas skelim yumi yet olsem wanem?

¹⁴ Jisas i tok: “Nau Pikinini Bilong Man em i kisim biknem. Na God i kisim biknem long Pikinini Bilong Man.” (Jon 13:31) Kirap long taim God i kisim bek ol Isrel long Isip, de Naisan 14 i litimapim nem bilong God na wok king bilong em na strong bilong em. Jisas i stap gut long God i go inap long taim em i dai, na taim strong bilong God i kirapim bek em, em i kisim biknem, na dispela samting i givim biknem moa yet long God. (Lukim Provep 27:11.) Jisas i tokim ol disaipel bilong em, sapos ol i bihainim “nupela lo” bilong em na ol i laikim tru ol brata olsem em i bin laikim ol, bai olgeta man i save ol i disaipel tru bilong em. (Jon 13:34, 35) Sapos yumi laikim tru ol brata, yumi kamapim bel bilong yumi, yumi pilim tru bikpela pasin sori krais bin mekim taim em i dai.—1 Jon 4:19.

15. (a) Olgeta manmeri i kaikai bret na dring wain long Memorial na i stret ol i mekim, ol i bilong kisim laip we? (b) Sapos yumi laikim tru Jisas bai yumi mekim wanem?

¹⁵ Ol manmeri God i makim ol bilong mekim wok king wantaim Krais, ol i ken amamas, long wanem ol i bilong kisim laip long heven. (Revelesen 20:6) Jisas i stori long dispela samting, olsem: “Mi go bilong redim ples bilong yupela. ․․․ bai mi kam bek na kisim yupela i go i stap wantaim mi.” (Jon 14:2-4) Taim ol i stap wantaim Krais long. heven, ol i ken amamas tru! Olsem na Jisas i tok: “Sapos yupela i laikim mi tru, orait bai yupela i bihainim gut lo bilong mi.” Ol i mas bihainim olgeta lo bilong em, lo bilong lainim ol man na kamapim ol disaipel tu.—Jon 14:15, 21; Matyu 28, 19, 20.

16. (a) Jisas i tok wanem long ol disaipel bilong em i mas i stap wanbel? Bilong wanem dispela pasin bilong i stap wanbel i bikpela samting? (b) Wanem samting i save painim olgeta disaipel bilong Jisas? Wanem samting i helpim ol long karim dispela hevi na sanap strong?

¹⁶ Ol disaipel bilong Jisas ol i mas i stap wanbel wantaim na ol i mas i stap wanbel wantaim ol brata. Em bikpela samting. Jisas i tok piksa long wanpela diwai wain na ol han bilong en. Sapos yumi stap wanbel na wok gut wantaim, bai yumi karim planti kaikai, na long dispela pasin Papa i save kisim biknem. (1 Korin 1:10; Jon 15:1, 5, 8) Ol manmeri bai birua long olgeta disaipel bilong Krais na mekim nogut long ol. Tasol yumi save, Jisas i bin sanap strong i go inap long taim em i dai. Em i sakim olgeta samting Seten i mekim na em i holimpas lo bilong God. Em i winim pinis pasin bilong dispela graun. Dispela samting i strongim yumi!—Jon 15:18-20;16:2, 33.

17. Stori long sampela samting Jisas i toktok long en long dispela beten bilong em long Jon sapta 17.

¹⁷ Dispela apinun i laik pinis na Jisas i beten long Papa bilong em. Pastaim em i givim biknem long Papa bilong em. Na em i beten bilong helpim ol disaipel bambai ol i klia long pasin bilong dispela graun na Papa i ken lukautim ol na man nogut, em Seten, em i no ken bagarapim ol. Na em i beten bilong ol disaipel i ken i stap wanbel olsem em wantaim Papa i stap wanbel.—Jon sapta 17.

18. Bikpela lain tru ol i go long Memorial long 1984, bilong wanem liklik lain tasol ol i kaikai bret na dring wain?

¹⁸ Yumi bin skelim sampela tok i tru na sampela tingting tasol, em Jisas i bin toktok wantaim ol disaipel bilong em long en long dispela nait 1,952 yia bipo. Tasol ol dispela tok i helpim yumi long save, Naisan 14 em i wanpela de yumi mas tingim. Olsem na long 1984 inap 7,416,974 Witnes Bilong Jehova wantaim ol pren bilong ol, ol i bung wantaim na mekim Kaikai Bilong Bikpela. Tasol long dispela bikpela lain, 9,081 tasol ol i kaikai bret na dring wain. Olsem wanem na liklik lain tasol ol i kisim? Long wanem planti Witnes Bilong Jehova long nau ol i tingim ol yet ol i bilong ‘bikpela lain’ i sanap “long pes bilong sia king na long ai bilong Pikinini Sipsip.” Ol i wet long kisim laip i stap oltaim hia long dispela graun, ol i no gat tingting long kisim laip long heven wantaim ol 144,000, em ol i bilong i stap long heven na “stap king wantaim Krais long dispela 1,000 yia.”—Revelesen 7:9; 20:6; Sam 37:11.

19. Long wik antap, long Stadi “Wastaua” bai yumi stori long wanem samting? Bilong wanem i bikpela samting olgeta i mas i kam harim ol dispela tok?

¹⁹ Tasol i gat sampela askim long dispela ‘bikpela lain’ “arapela sipsip” na Kaikai Bilong Bikpela. (Jon 10:16) Olsem na gutpela yumi ken stori long dispela long tok i kamap bihain long dispela, na bai olgeta i ken save gut na ol i no ken tingting planti long taim bilong Memorial long dispela yia.—1 Tesalonaika 5:21.

[Futnot]

Yu Inap Tingim—

◻ Husat i kaikai bret na dring wain long Memorial?

◻ Taim yumi mekim Memorial, yumi mas tingim wanem ol bikpela samting?

◻ Sapos yumi tingim Jisas long olgeta de bai yumi mekim wanem?

◻ Taim yumi tingim Naisan 14, yumi tingim wanem narapela bikpela samting tu?