Ripot long Wok Bilong Kingdom
Wok Bilong Kingdom i Go Bikpela Long Olgeta Hap
AISAIA i tok profet long wok bilong Kingdom bai i go bikpela long taim bilong yumi. Em i tok: “Gavman bilong em [Krais] bai go bikpela, na gutaim i no ken pinis.” (Aisaia 9:7, Baibel King James Version) Ol Witnes Bilong Jehova i autim tok long 200 samting kantri long nau na ol ripot i tok, Jehova i blesim wok bilong ol na wok bilong autim dispela gutpela tok bilong Kingdom i go bikpela long ol dispela kantri. Em hia sampela ripot ol i bin salim i kam:
◻ Afrika: Brens-ofis long Senegal i tok: “Jehova i blesim tru wok bilong mipela long dispela sevis-yia.” Long ailan Morisis ol i kirap long autim tok long 1951 na long 1964 i gat 100 Witnes i stap. Tasol long 1984 i gat 679 Witnes ol i stap. Ripot i kam long Gana i tok, long 1938 i gat 30 Witnes tasol long dispela kantri, tasol long 1984 i gat 25,755! Wok painia tu i kamap gutpela long hap bilong Afrika. Wanpela painia long Siera Lion i stori long ol samting i kirapim em long mekim wok painia, em i tok: “Mi inap i go long bikpela skul, olsem koles o yunivesiti, tasol mi kirap mekim wok painia. Nogut mi lusim bikpela hap taim long winim skul. Pinis i klostu, olsem na gutpela sapos mi mekim wok long dispela hap taim bilong helpim ol gutpela manmeri bambai ol i ken kisim save long Jehova na Pikinini bilong em Krais Jisas.” Ol kibung i bin kamap long Saut Afrika long dispela taim i makim ol brata i stap wanbel. Brens-ofis bilong Sosaiti Was Taua long dispela kantri i tok: “Long dispela yia, long namba wan taim, ol brata bilong ol narapela narapela skin ol i bung wantaim ․․․ Na 343 bilong ol narapela narapela lain na skin ol i kisim baptais. Dispela samting i soim ol man, ol sipsip bilong Jehova long dispela kantri ol i stap wanlain tru na ol i stap wanbel“ Long Simbabwe wanpela man bilong politik i kisim save long tok i tru na em i lusim wok politik. Ol manmeri long dispela hap ol i kirap nogut long dispela samting, na taim wanpela bikman bilong gavman i kam ol i bung na toktok long dispela samting. Ol i askim dispela bikman: “Mipela mas mekim wanem long dispela man?” Bikman i bekim tok olsem: “Yupela i no ken mekim wanpela samting. I stret em i mas lusim wok politik. Em lo bilong ol Witnes long olgeta hap. Sapos dispela man i stap insait yet long wok politik bilong dispela graun, em i no wanpela Witnes tru.”
◻ Esia na Pasifik: Ol brata long Japan i givim bel long mekim wok painia. Inap 40 pesen bilong ol pablisa ol i mekim wok painia long mun Me. Brens-ofis bilong Filapin i tok, ol i makim 200 nupela painia long olgeta mun. Brens-ofis bilong Australia i tok: “Long dispela yia ol brata i tingim tru wok painia.” Long India i gat nupela brens ofis na lain pablisa i go bikpela. Long namba wan taim i gat 6,506 pablisa long India. Ol i mekim 14 kibung na ol i mekim 7-pela moa long ol narapela narapela tok ples bilong India. Em namba wan taim ol i mekim olsem. Inap 9,000 ol i bung na 246 i kisim baptais. Mipela i amamas long lukim wok i go bikpela olsem long dispela bikpela kantri. Wok i go bikpela long hap bilong Korea tu. Ol i dediketim nupela brens ofis bilong ol long 1982, tasol nau dispela ofis i liklik tumas na ol i mas wokim narapela ofis gen i bikpela moa. Long dispela kantri lain painia regula i go bikpela inap 56 pesen. Long Westen Samoa ol i putim brens-ofis bilong helpim wok bilong ol brata long Samoa. Olsem na ol brata i wok strong long kisim “kaikai” long “gaden” bilong Jehova long hap bilong Esia na Pasifik tu.
◻ Yurop: Wok bilong Kingdom i go bikpela long hap bilong Yurop. Brens-ofis bilong Potyugal i tok: “Long olgeta hap planti man i laik harim tok. Lain pablisa i go bikpela na long mun bihain i go bikpela moa, mekim mekim olsem.” Beljam tu i tok: “Long olgeta hap, wok i go bikpela.” Ol i wokim nupela brens long hap bilong Selters long Jemani. Em bikpela brens tru na olgeta brata bilong Lain Bilong Bosim Ol Witnes ol i go long Jemani long taim bilong dediketim dispela nupela haus brens (wanpela tasol em i no i go). Wanpela brata i amamas tru na em i tok: “Inap 60 yia mipela i bin mekim wok bilong Jehova. Inap 20 yia mipela i stap kalabus, long wanem tupela taim ol man i mekim nogut tru long mipela. Olsem na mipela i amamas tru mipela inap i stap long dispela taim na kisim ol dispela gutpela kaikai bilong spirit long paradais bilong spirit.”
◻ Amerika: Wok i go bikpela tru long hap bilong Kanada na i gat 80,939 ol i save autim tok. Brens-ofis bilong Kanada i tok: “I gat planti hevi na samting bilong pulim man long dispela graun, tasol maski, ․․․ lain bilong mipela i go bikpela. I wankain olsem long ‘las taim’ bilong ol Rom. Long dispela taim nogut tu wok bilong ol Kristen i bin i go bikpela. (2 Timoti 3:1-5)” Brens-ofis long Belis, long Saut Amerika i tok wanpela gutpela wok ol i bin mekim long dispela yia em olsem Ol i bin i go autim tok long ol Maya long hap bilong saut. Ol dispela liklik ples (12-pela ples) i stap longwe tru na ol brata i mas wokabaut long lek inap 180 kilomita long ol liklik rot bilong bus bilong kamap long ol dispela ples.” Twelpela brata i pulimapim samting bilong ol long ruksak na ol i karim paus bilong autim tok na ol i go long ol dispela liklik ples. Ol i kisim wanpela masin bilong soim piksa i go wantaim ol na ol i putim sampela piksa olsem slaid bilong wok bilong Jehova long olgeta hap. Wanpela man i no bin lukim kain piksa olsem bipo na em i kolim olsem “bikpela piksa i kamap long banis na i lait.” Long 1931 i gat 30 pablisa tasol long Meksiko, tasol long 1984 i gat 151,807 pablisa (long 1984 wok i go bikpela inap 16 pesen). Na 695,769 ol i bung long taim bilong Memorial. Long Amerika (Yunaitet Stets) lain pablisa i go bikpela na long namba wan taim i gat 690,830 pablisa.
Tru tumas wok bilong Kingdom i go bikpela long olgeta hap bilong graun.