Helpim Ol Pikinini Bilong Yu Long i Stap Klostu Long God

BA1BEL i no mekim bikpela toktok long ol samting Jisas i mekim kirap long taim mama i karim em na i go inap long taim em i gat 30 krismas. Tasol Baibel i mekim bikpela toktok tru long ol samting em i mekim long dispela 3 yia hap em i autim tok, long wanem em bikpela tok bilong Gutnius Matyu na Mak na Luk na Jon i raitim. Tasol liklik tok bilong Baibel long ol samting Jisas i mekim taim em i stap pikinini yet, dispela tok i soim yumi ol pikinini tu inap i stap klostu long God.

Luk sapta 2 i stori long Jisas taim em i gat 12-pela krismas. Em i stap “insait long tempel. Em i sindaun i stap namel long ol tisa” bilong lo bilong God. Em i “wok long harim tok bilong ol, na long askim ol tu.” Ol man i kirap nogut “long save bilong en na long tok em i bekim long ol.” (Luk 2:46, 47) Taim em i go bikpela, save bilong em i kamap gutpela tru.—Luk 2:40, 52.

Olsem wanem Jisas i kisim dispela gutpela save long ol samting bilong God? Sampela wok papamama i mekim i bin helpim em. Ol i Juda na ol i mas bihainim lo bilong God na lainim ol pikinini. Moses, em wanpela profet bilong God, em i tok: “Dispela tok nau mi givim long yu em i mas i stap long bel bilong yu; na yu mas skulim skulim pikinini man bilong yu long en, na toktok wantaim em long en taim yu sindaun long haus, na taim yu wokabaut long rot, na taim yu laik slip, na taim yu kirap.” (Diuteronomi 6:6, 7, NW) Olsem na God i putim pikinini bilong em i stap long wanpela famili ol i save bihainim dispela lo bilong Em. Ol papamama long nau tu ol i mas tingim gut pikinini bilong ol na lainim ol long tok bilong God. Olsem wanem? Yu helpim ol pikinini bilong yu bambai ol i ken save long Jehova na ol i laik mekim wok bilong Em?

Taim Ol i “Liklik Pikinini Yet”

Yumi no ken wet inap long taim ol pikinini i bikpela pinis. Nogat. Taim ol i liklik pikinini yet yumi mas lainim ol. Yangpela man Timoti i kamap gutpela Kristen, long wanem taim em i “stap liklik pikinini yet” ol i bin lainim em long Baibel. (2 Timoti 3:15) Sampela mama long nau tu, taim pikinini bilong ol i bebi yet na ol i laik givim susu long em, ol i beten na tok tenkyu long God pastaim. Olsem na taim pikinini i liklik yet em i lain, na kwiktaim bai em i kirap na tok ‘Amen’ long pinis bilong beten! Em wanpela liklik samting papamama i ken mekim bilong helpim pikinini long pilim ol gutpela samting bilong skin na spirit God i givim long ol.

Papamama bilong Maikel (7-pela krismas) na Sefora (8-pela krismas) i lainim gut tupela long samting bilong spirit. Wanpela taim famili i laik raun, tasol pastaim tupela pikinini hia i kirap na beten askim God long lukautim ol long rot. Na taim ol i kamap pinis, tupela i tenkyu long Jehova.

Tupela liklik manki, em Kristian na Erik (3-pela krismas na 6-pela krismas), tupela i raun long wanpela gaden bilas o pak na tupela i lus. Orait, tupela i mekim wanem? Tupela i beten askim Jehova long helpim ol! Tupela i beten i stap na papamama i painim ol pinis.

I gat kain kain rot bilong lainim pikinini taim ol i liklik yet. Long wanpela bikpela kibung Kristen long Beljam ol i kisim wanpela liklik manki i kam antap long pletfom. Em i gat 3-pela krismas na nem bilong em Jino. Ol i sindaunim em long wanpela sia i antap liklik. Nau brata i tokim em long kolim nem bilong olgeta 66 liklik hap bilong Baibel. Yu inap kolim? Jino inap mekim! Papamama i lainim em gut na taim em i bikpela pinis em i kamap wanpela wasman sekit. Tru, sampela pikinini ol i no inap lain olsem, tasol yumi save, sapos yumi lainim ol pikinini long ol samting bilong God, em i gutpela.

Maski pikinini i liklik yet, em inap lain na kisim save long ol bikpela as tok bilong Baibel. Long wanpela skul bilong ol liklik pikinini, long Laksembeg, wanpela liklik manki i gat 4-pela krismas, nem bilong em Kai, em i no laik beten wantaim ol narapela pikinini. Taim ol i askim em bilong wanem em i no beten wantaim ol, em i tok: “Mipela no save bilip long wanpela god i gat 3-pela kona!” Em i no save tumas long bilip bilong ol Katolik long god triwan, tasol em i save em i no ken beten long dispela god bilong ol!—Mak 12:29.

Helpim Ol long Tingim God long Olgeta Taim

Sampela taim ol pikinini i gat hevi. Ol i no ken haitim dispela. Gutpela sapos ol i kamapim long papamama. Na ol i mas lain long kamapim long God Jehova tu. Ol i mas lain long putim olgeta hevi bilong ol i go long Jehova. (Sam 55:22) Yumi mas helpim ol long save, God i no ken sakim ol. Em bai harim beten bilong ol, long wanem Pikinini bilong Em, Krais Jisas, em i tok: “Yupela larim ol liklik pikinini ol i kam long mi. Yupela i no ken pasim ol.” (Mak 10:14) Yumi mas lainim ol pikinini long beten long God long rot bilong Krais Jisas.—Jon 14:6.

Taim ol pikinini i lain long givim bel long Jehova na wetim em i helpim ol na ol i lukim Jehova i helpim ol, dispela samting inap strongim tru bilip bilong ol. Wanpela yangpela man, nem bilong em Jake, nau em i wok long wanpela brens-ofis bilong Sosaiti, em i stori long wanpela samting i bin painim em taim em i gat 14 krismas. Em i tok: “Long dispela yia ol i putim kibung sekit long Sarere Sande paslain long wik bilong laspela tes long skul. Na tisa i no tokim mipela kwik long ol tok mipela mas skelim bilong redi long tes. Em i tokim mipela long Fraide tasol. Mi toktok wantaim papamama na mipela i pilim olsem mi no ken lusim kibung, maski mi no gat bikpela hap taim bilong redi gut long tes. [Hibru 10:24, 25] Mi beten askim Jehova long blesim liklik wok mi inap mekim bilong redi long tes.

“Long Mande long moningtaim, olgeta sumatin i tingting planti, long wanem, long namba wan taim mipela i no ken raitim bekim bilong ol askim, mipela mas bekim tok long maus. Mi beten askim Jehova long sambai long mi. Orait, wanem samting i bin kamap? Mi winim olgeta narapela sumatin na kisim bikpela mak. Wanpela tisa i tok: ‘Yumi givim sampela askim moa long em na traim tru save bilong em.’ Em i givim sampela askim moa long mi, tasol mi inap bekim.”

Gutpela samting i kamap i lainim Jake long wanem samting? Em i tok: “Jehova i helpim mi na mi pilim olsem mi stap klostu moa long em. Na mi save, yumi no ken tingting planti long wanpela samting. Long olgeta samting yumi mas beten askim Jehova long helpim yumi.”—Filipai 4:6, 7.

Yes, yumi mas helpim ol pikinini bilong yumi bambai ol i ken “save” long Jehova na tingim em long olgeta taim. Taim ol i pilim olsem Jehova i save sambai long ol long olgeta samting ol i mekim, ol i laik i stap gut long em. Sapos ol i kaunim o harim tasol sampela tok long Em, dispela i no inap kirapim ol long laikim tumas Em olsem long taim ol yet i pilim ol samting em i mekim bilong helpim ol. I hatwok liklik long lainim gut ol pikinini olsem. Tasol sapos papamama i wok strong long lainim ol pikinini long Jehova na givim bel long mekim, ol yangpela i no ken lusim tingting kwiktaim long dispela samting. Na Jehova i no ken lusim tingting long gutpela wok papamama i mekim. (Hibru 6:10-12) Yumi ol papamama, yumi mas helpim ol pikinini bilong yumi bambai ol inap kisim gutpela pe Papa bilong yumi long heven i tok long givim long ol man i save long em na em i save long ol. Dispela gutpela pe em “laip i stap gut oltaim.”—Jon 17:3.

[Blok long pes 7]

Ol Tok i Mekim Gut Bel

PAPA i tokim Debora (8-pela krismas): “Yu save beten long Jehova?” Debora i tok: “Planti taim.” “Long wanem taim?” “Taim mi stap wanpela tasol.” “Bilong wanem yu save beten long kain taim olsem?” “Bambai narapela man i no ken katim beten bilong mi.”

Mama i tokim Lorent (6-pela krismas): “Yu laik bai mi opim lait long rum slip bilong yu nau long taim bilong tudak?” (Lorent i save pret long tudak na papamama i bin tokim em long beten askim Jehova long helpim em bambai em i no ken pret.) Lorent i tok: “Yu no ken opim lait. Mi no pret moa, long wanem mi save Jehova i stap wantaim mi.”

Wanpela pikinini meri em i gat 6-pela krismas, em i beten na em i tok: “Jehova, tenkyu long tok promis bilong yu long ol man i dai pinis bai ol i kirap bek. Em gutpela tingting!” Na narapela taim em i beten na em i tok: “O Jehova, taim Paradais i kamap bek long graun bai yu hatwok long kantri bilong mipela, long wanem bikpela ren i save kam daun long hap bilong mipela.”

Liklik Udo i gat tripela krismas na em i beten na tok: “Jehova, plis, kirapim papa bilong mi long kaunim Baibel bambai em i no ken i dai long Amagedon!” Dua bilong rum slip bilong pikinini i op na papa i harim dispela beten. Dispela i kirapim tingting bilong em na em i no sakim moa tok i tru. Em i stap gutpela wokboi bilong Jehova inap long nau.