Sanap Strong Long Pasin Bilong i Stap Fri God i Givim Long Yumi!
“Krais i bin mekim yumi i kamap fri . . . Olsem na yupela i mas sanap strong. Yupela i no ken larim ol man i mekim yupela i kamap olsem ol wokboi nating gen.”—GALESIA 5:1.
1, 2. Pasin bilong i stap fri em God i givim, olsem wanem dispela i bin lus?
LAIN bilong God Jehova ol i stap fri. Tasol ol i stap aninit long Em na ol i no laik i stap fri long dispela, long wanem, sapos ol i lusim Jehova, bai ol i kalabus aninit long Satan. Ol i stap pren bilong Jehova na ol i laikim tru dispela pasin, na ol i amamas long em i mekim ol i kamap fri.
2 God i mekim na namba wan tumbuna bilong yumi, em Adam tupela Iv, i stap fri. Tasol tupela i mekim sin na i kamap wokboi bilong sin na dai na Satan, na long dispela rot dispela pasin bilong i stap fri em i lus. (Stat 3:1-19; Rom 5:12) Satan i bringim olgeta manmeri bilong graun i go long rot bilong sin na i dai! Tasol ol manmeri i sanap strong long pasin bilong i stap fri em God i givim long ol, ol dispela manmeri i wokabaut long rot bilong kisim laip i stap oltaim.—Matyu 7:13, 14; 1 Jon 5:19.
Lusim Kalabus
3. God i mekim wanem tok profet long Iden na yumi ken wetim gutpela samting i kamap?
3 Ol man i litimapim nem bilong Jehova, Jehova i laik bai ol i ken lusim kalabus bilong Satan na bilong sin na i dai. Em i kamapim dispela laik bilong em long tok profet em i mekim taim em i tokim snek long Iden olsem: “Bai mi mekim ol lain bilong yu i birua long lain bilong meri. Bai [em] i krungutim het bilong yu, na bai yu kaikaim lek bilong [em].” (Stat 3:14, 15) Krais Jisas em Pikinini i kam long lain bilong Jehova long heven, na taim ol birua i nilim em long diwai na kilim em i dai, i olsem Snek i kaikaim lek bilong em. Tasol long rot bilong i dai bilong Jisas, God i kamapim ofa bilong baim bek ol manmeri long kalabus bilong sin na i dai. (Matyu 20:28; Jon 3:16) Bihain bai Jisas i krungutim het bilong Satan, em dispela Snek bilong bipo yet.—Kamapim Tok Hait 12:9.
4. Abraham i stap fri olsem wanem? Jehova i mekim wanem tok promis long em?
4 Inap olsem 2,000 yia bihain long taim Jehova i mekim tok profet long Iden, ‘pren bilong em’ Abraham i bihainim tok bilong em na lusim taun Ur i go long narapela hap. (Jems 2:23; Hibru 11:8) Long dispela rot Abraham i kisim pasin bilong i stap fri em God i givim, na em i no i stap wokboi moa bilong dispela graun bilong Satan, olsem bilong lotu giaman o bilong wok politik nogut o bilong ol bikpela bisnis i mangalim mani. God i skruim sampela tok promis long tok profet em i bin mekim long Iden na em i tok, olgeta lain bilong graun inap kisim blesing long rot bilong Abraham na Pikinini bilong em. (Stat 12:3; 22:17, 18) Abraham i stap fri—em i no gat asua long ai bilong God Jehova, long wanem, ‘em i bilipim tok bilong Jehova, na long dispela as Jehova i kolim em stretpela man.’ (Stat 15:6) Long nau tu, ol man i stap pren bilong God Jehova, em i mekim ol i kamap fri—ol i no gat asua bilong sin long ai bilong Em, na ol i no kalabus moa long ol samting bilong dispela graun i stap aninit long strong bilong Satan.
Wanpela Stori i Olsem Tok Bokis
5. Wanem ol samting i bin kamap na bihain mama i karim Aisak?
5 Meri bilong Abraham, em Sara, em i no karim pikinini, tasol em i laik bai Abraham i gat pikinini, olsem na em i givim wokmeri bilong em, nem bilong em Hagar, long Abraham bilong kamapim pikinini long em. Abraham i kamapim Ismael long em, tasol God i no makim Ismael olsem Pikinini bilong promis. Nogat. Taim Abraham i gat 100 krismas na Sara i gat 90 krismas, Jehova inapim tupela long kamapim wanpela pikinini man, nem bilong em Aisak. Taim Ismael i tok bilas long Aisak, Abraham i rausim Hagar wantaim pikinini bilong em, na nau pikinini bilong Sara, em meri i stap fri, dispela pikinini tasol i stap pikinini bilong Abraham. Aisak i bilipim tok bilong God, olsem Abraham i bin mekim, na God i mekim Aisak i kamap fri.—Stat 16:1-16; 21:1-21; 25:5-11.
6, 7. Sampela tisa giaman i bin paulim tingting bilong ol Kristen long Galesia na ol i kisim wanem tingting? Tasol Pol i tok wanem long ol?
6 Ol dispela samting i bin kamap i olsem piksa na i makim bikpela samting bilong ol man i laikim tumas pasin bilong i stap fri em God i givim long yumi. Aposel Pol i kamapim klia dispela samting long pas em i raitim long kongrigesen long Galesia long yia 50-52 bihain long Krais. Long dispela taim lain bilong bosim ol Kristen bilong pastaim ol i pasim tok pinis olsem ol Kristen i no gat lo i tok ol i mas katim skin. Tasol sampela tisa giaman i bin paulim tingting bilong ol Galesia, olsem na ol Galesia i ting ol Kristen i mas katim skin na dispela i bikpela samting long lotu Kristen.
7 Pol i tokim ol Galesia: Man i mas bilip long Krais na bai God i kolim em stretpela man; pasin bilong bihainim Lo bilong Moses i no inap mekim em i kamap stretpela man. (Galesia 1:1–3:14) Dispela Lo i no pinisim promis God i bin mekim long Abraham long bipo; nogat; dispela Lo i mekim as bilong sin i kamap ples klia, na i mekim wok olsem waspapa bilong bringim ol i go long Krais. (Galesia3:15-25) Jisas i dai na long dispela rot em i helpim ol man i kalabus aninit long Lo bilong Moses na ol i kamap fri, na ol inap kamap ol pikinini bilong God. Olsem na sapos ol i kirap bihainim gen ol lo bilong ol bikpela de bilong lotu na bilong ol nupela mun na bilong bikpela lotu bilong nupela yia, orait bai i olsem ol i kalabus gen. (Galesia4:1-20) Olsem na Pol i tok:
8, 9. (a) Long toktok bilong yu yet, stori liklik long ol tok Pol i bin mekim long Galesia 4:21-26. (b) Long dispela tok bokis, Abraham i makim husat? Sara i makim wanem samting? Husat em i Pikinini bilong promis?
8 “Yupela ol man i laik aninit long lo, yupela tokim mi nau: Ating yupela i no save long tok bilong lo, a? Buk bilong God i tok olsem, Abraham i gat tupela pikinini man. Wokmeri nating, Hagar, em i karim wanpela [Ismael], na meri i stap fri [Sara] em i karim wanpela [Aisak]. Dispela pikinini bilong wokmeri nating, em i bin kamap long rot ol manmeri i save kamapim pikinini long en. Tasol pikinini bilong meri i stap fri, God i mekim promis na em i kamap. I gat tok bokis insait long dispela stori. Dispela tupela meri i makim tupela kontrak. Hagar i makim kontrak bilong maunten Sainai [kontrak bilong Lo em God i mekim wantaim ol Israel], na ol pikinini bilong en i kamap wokboi nating. [Narapela kontrak em kontrak o tok promis God i mekim long Abraham long Pikinini bai kamap long lain bilong em.] Hagar em i makim maunten Sainai, dispela maunten bilong kantri Arebia, na tu em i makim dispela Jerusalem nau i stap. Dispela Jerusalem i stap wokmeri nating wantaim ol pikinini bilong en [ol lain tumbuna pikinini bilong Abraham na Aisak na Jekop]. Tasol narapela Jerusalem i stap long heven, em i stap fri. Em i mama bilong yumi.”—Galesia 4:21-26.
9 Long dispela tok bokis, Abraham i makim Jehova. “Meri i stap fri,” em Sara, em i makim “meri” bilong God, olsem lain holi bilong em long heven. Lain bilong God long heven i bin kamapim Krais, em i Pikinini bilong dispela “meri” na bilong Man I Winim Abraham. (Galesia 3:16) Bilong soim rot long ol manmeri bambai ol inap lusim kalabus bilong lotu giaman na sin na Satan, Jisas i bin lainim ol long tok i tru na kamapim rong bilong ol lotu giaman. Tasol Jerusalem long graun wantaim ol pikinini bilong en, ol i sakim Jisas, olsem na ol i stap kalabus long lotu giaman. (Matyu 23:37, 38) Ol disaipel bilong Jisas i bilong lain Juda ol i lusim kalabus bilong Lo, em dispela lo i kamapim klia olsem ol i stap kalabus long pasin kranki na sin na i dai. Ol man i bilip olsem Jisas em i dispela Man em “meri” bilong God i bin salim em i kam olsem King, na Man bilong kisim bek yumi, na Man bilong ‘tokim ol kalabusman ol i ken lusim kalabus na i go fri,’ olgeta man i bilip olsem, ol i stap fri tru!—Aisaia 61:1, 2; Luk 4:18, 19.
No Ken Kamap Wokboi Nating Gen
10, 11. Krais i mekim ol disaipel bilong em i ‘kamap fri bai ol i no ken i stap aninit’ moa long wanem samting i olsem i kalabusim ol? Long nau i gat wanem samting i kalabusim ol man olsem?
10 Pol i toktok long ol manmeri i pikinini bilong Abraham wankain olsem Krais, em Man I Winim Aisak, na Pol i tok: “Jerusalem i stap long heven, em i stap fri. Em i mama bilong yumi. . . . Ol brata, yupela i wankain olsem Aisak. Long promis bilong God yupela i kamap pikinini bilong em. Tasol dispela pikinini i bin kamap long rot ol manmeri i save kamapim pikinini long en [Ismael], em i bin mekim nogut long dispela arapela pikinini i bin kamap long strong bilong Holi Spirit. Na nau tu wankain pasin tasol i stap. . . . Yumi no pikinini bilong wokmeri nating. Nogat. Yumi pikinini bilong meri i stap fri. Krais i bin mekim yumi i kamap fri, bilong yumi no ken i stap aninit long lo [bilong Moses]. Olsem na yupela i mas sanap strong. Yupela i no ken larim ol man i mekim yupela i kamap olsem ol wokboi nating gen.”—Galesia 4:26–5:1.
11 Sapos wanpela disaipel bilong Jisas i aninit long Lo bilong Moses, bai em i kamap wokboi nating gen—bai em i stap olsem kalabus aninit long Lo. Long nau planti man i stap kalabus olsem long lotu giaman. Ol misin i holim nating nem Kristen ol i wankain olsem Jerusalem bilong bipo wantaim ol pikinini bilong en. Tasol ol manmeri God i makim bilong kisim laip long heven, ol i pikinini bilong Jerusalem i stap long heven, em lain bilong God long heven ol i stap fri. Ol dispela manmeri bilong i go long heven na ol wanbilip bilong ol, em ol i wet long kisim laip oltaim long graun, ol i no bilong dispela graun na ol i no kalabus aninit long strong bilong Satan. (Jon 14:30; 15:19; 17:14, 16) Tok i tru na ofa bilong Jisas i mekim na yumi kamap fri—yumi mas sanap strong long dispela pasin bilong i stap fri em God i givim long yumi.
Sanap Strong Long Pasin Bilong i Stap Fri God i Givim Long Yumi
12. Ol bilipman i save mekim wanem? Nau yumi laik stori long wanem samting?
12 Planti milion manmeri long nau ol i kamap Witnes Bilong Jehova na ol i stap fri tru. Na ol i mekim Baibel-stadi wantaim planti milion manmeri em ol i gat “gutpela bel” inap long ol i kisim laip i stap oltaim. Taim ol dispela manmeri i kamap bilipman na kisim baptais, ol tu i kamapim bel bilong ol olsem ol i laik kisim pasin bilong i stap fri em God i givim long yumi. (Aposel 13:48; 18:8) Tasol ol i mas mekim wanem ol samting pastaim na bai ol i ken kisim baptais Kristen?
13. Olsem wanem save i samting bilong baptais?
13 Bilong kisim baptais, man i mas kisim stretpela save long ol tok bilong Baibel pastaim na em i mas bihainim. (Efesus 4:13) Olsem na Jisas i tokim ol disaipel bilong em: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol long nem bilong Papa na bilong Pikinini na bilong Holi Spirit. Na yupela lainim ol long bihainim olgeta tok mi bin givim long yupela.”—Matyu 28:19, 20.
14. Bilong kisim baptais long nem bilong Papa na Pikinini na spirit holi, man i mas kisim wanem save pastaim?
14 Kisim baptais long nem bilong Papa i makim olsem yumi daun long Jehova, long wanem, yumi save em i gat bikpela namba na bikpela strong—em i God, na Man bilong wokim olgeta samting, na em i King bilong heven na graun. (Stat 17:1; 2 King 19:15; Kamapim Tok Hait 4:11) Kisim baptais long nem bilong Pikinini i makim olsem yumi daun long Krais, long wanem, yumi save em i gat bikpela namba na em i stap spirit long heven na em i kisim bikpela nem tru. Em i King bilong Kingdom, na long rot bilong em bai God i “baim bek” olgeta manmeri. (1 Timoti 2:5, 6; Daniel 7:13, 14; Filipai 2:9-11) Man i kisim baptais long nem bilong spirit holi em i save, spirit holi em i strong bilong God Jehova na God i bin mekim wok long en bilong wokim olgeta samting na bilong givim tingting long ol man i bin raitim Baibel, na bilong mekim ol narapela wok tu. (Stat 1:2; 2 Pita 1:21) Tasol i gat planti samting moa bilong God na Krais na spirit holi em yumi mas kisim save long en.
15. Bilong kisim baptais, bilong wanem man i mas bilip na mekim ol wok bilong kamapim bilip pastaim?
15 Bilong kisim baptais, pastaim stretpela save man i kisim i mas kirapim em long bilip na long mekim ol wok i kamapim bilip. Baibel i tok: “Man i no bilip long God, em i no inap bihainim laik bilong God.” (Hibru 11:6) Man i bilip long God na long Krais na long ol samting God i tok promis long mekim, em bai laik long kamap wanpela Witnes Bilong Jehova. Em bai laik long bihainim ol tok bilong Baibel, em Tok bilong God, na em bai laik long insait tru long wok bilong autim gutpela tok bilong Kingdom. Bai em i tokaut long biknem bilong God, em i bosim olgeta ples.—Buk Song 145:10-13; Matyu 24:14.
16. Pasin bilong tanim bel i wanem kain pasin? Olsem wanem dispela pasin i samting bilong baptais Kristen?
16 Na man i mas tanim bel pastaim na bai em i ken kisim baptais. Pasin bilong tanim bel i olsem man i “senisim tingting bilong em na hevi long ol pasin bipo em i bin mekim (o em i bin tingting long mekim),” o em i “tingim ol rong em i bin mekim o ol gutpela pasin em i no bin mekim, na em i bel hevi long dispela.” Ol Juda long taim bilong ol aposel i mas hevi long ol rong ol i bin mekim long Jisas na tanim bel. (Aposel 3:11-26) Sampela Kristen long Korin, bipo ol i bin mekim pasin pamuk, o lotuim god giaman, o bagarapim marit, o mekim pasin sem, o stil, o mangal, o spak, o toknogutim man, o pulim samting bilong narapela man, tasol ol i tanim bel na kamap bilipman. Long dispela rot i olsem “God i wasim” ol long blut bilong Jisas na ol i kamap klin, na God i makim ol i “kamap lain manmeri bilong em stret” bilong ol i ken mekim wok bilong em. Na long nem bilong Krais Jisas na long strong bilong spirit holi, “God i mekim [ol] i kamap stretpela manmeri long ai bilong en.” (1 Korin 6:9-11) Tanim bel em wanpela samting man i mas mekim bambai bel bilong em i ken kamap klin long ai bilong God, na God i ken mekim em i kamap fri—na bai asua bilong sin i no bagarapim moa bel bilong em.—1 Pita 3:21.
17. Man i baut em i mekim wanem? Man i laik kisim baptais em i mas mekim wanem na bai em i baut?
17 Na man i mas baut pastaim bambai em i ken kisim baptais na kamap wanpela Witnes Bilong Jehova. Man i tanim bel, em i sakim pasin nogut bipo em i bihainim na em i pasim tok long bel long mekim pasin i stret. Em i tanim bel pinis na nau em i mas baut—em i mas lusim ol pasin nogut bipo em i bihainim, na em i mas tanim i go long God. (1 King 8:33, 34) Man i baut, “pasin bilong [em] i mas soim olsem [em] i tanim bel pinis.” Em i mas mekim ol samting God i tok em i mas mekim, na em i mas lusim lotu giaman, na em i mas givim bel olgeta long Jehova na lotu long em wanpela tasol. (Aposel 26:20; Lo 30:2, 8, 10; 1 Samuel 7:3) Em i mas senisim tru tingting na pasin na laik bilong em—olsem kisim “nupela bel na nupela spirit.” (Esekiel 18:31) Em i lusim ol pasin nogut na kirap bihainim ol gutpela pasin bilong God—em i kamap olsem nupela man. (Kolosi 3:5-14) Tru tumas, sapos man i tanim bel tru, dispela bai kirapim em long ‘baut.’—Aposel 3:19.
18. Bilong wanem yumi mas dediket long God long rot bilong beten? Dispela i bikpela samting olsem wanem?
18 Pastaim man i mas dediket long God long rot bilong beten na bai em i ken kisim baptais. (Lukim Luk 3:21, 22.) Dediket i olsem man i givim em yet bilong mekim wok bilong God. Dispela em i bikpela samting tru, olsem na taim yumi tingting pinis long lotuim God Jehova wanpela tasol na mekim wok bilong em oltaim oltaim, yumi mas beten tokim em long dispela. (Lo 5:8, 9; 1 Stori 29:10-13) Tasol yumi no dediket long wanpela wok. Nogat. Yumi dediket long God yet. Wanpela brata i kamapim klia dispela samting taim namba wan presiden bilong Sosaiti Was Taua, em Charles Taze Russell, i dai na ol i mekim bung bilong planim em. Long dispela taim long yia 1916, Brata W. E. Van Amburgh, em seketeri na man bilong lukautim mani bilong Sosaiti, em i tok: “Dispela bikpela wok bilong olgeta hap bilong graun em i no wok bilong wanpela man tasol. Nogat. Em bikpela wok tumas bilong wanpela man tasol. Em wok bilong God yet na i no save senis. Long bipo God i bin givim wok long planti wokboi, na long bihain tu bai Em i mekim olsem. Yumi no [dediket] long wanpela man, o long mekim wok bilong wanpela man. Nogat. Yumi dediket long God bilong mekim laik bilong Em, olsem Em bai kamapim long yumi long rot bilong Baibel na long ol samting em i mekim bilong soim rot long yumi. God i stap bos yet bilong dispela wok.” Tasol taim yumi dediket long God, i gat wanem samting moa yumi mas mekim long dispela?
19. (a) Man i mas mekim wanem na bai em i kamapim klia long ai bilong ol man olsem em i dediket pinis long God? (b) Baptais long wara i makim wanem samting?
19 Taim man i kisim baptais, dispela i kamapim klia long ai bilong ol man olsem em i dediket pinis long God. Baptais i olsem mak na i kamapim klia olsem man i kisim baptais long wara em i dediket pinis long God Jehova long rot bilong Krais Jisas—em i givim em yet olgeta bilong mekim wok bilong God. (Lukim Matyu 16:24.) Taim man i kisim baptais, ol i putim em i go insait olgeta long wara na apim em i kam antap gen. I olsem ol i planim em insait long wara na em i kirap bek gen. Dispela i makim olsem em i lusim pasin bilong em bilong bipo, olsem em i dai, na nau em i kirap bek bilong bihainim nupela pasin—bilong givim bel olgeta long bihainim laik bilong God. (Lukim Rom 6:4-6.) Taim Jisas i kisim baptais, em i givim em yet olgeta long Papa bilong em i stap long heven. (Matyu 3:13-17) Na planti taim Baibel i makim olsem ol bilipman ol inapim pinis ol mak bilong kisim baptais, ol i mas kisim baptais. (Aposel 8:13; 16:27-34; 18:8) Olsem na long nau sapos wanpela man i laik kamap Witnes Bilong Jehova, em i mas bilip, na mekim ol wok i kamapim tru bilip bilong em, na em i mas kisim baptais.—Lukim Aposel 8:26-39.
Sanap Strong!
20. Baibel i stori long wanem ol man na meri na yumi ken save, sapos yumi sanap strong long pasin bilong i stap fri em God i givim long yumi, olsem yumi kisim baptais na kamap Witnes Bilong Jehova, bai yumi kisim blesing?
20 Olsem wanem? Yu sanap strong long pasin bilong i stap fri em God i givim long yumi, olsem na yu bin kisim baptais na kamap wanpela Witnes Bilong Jehova? Sapos yu bin mekim olsem, orait bai Jehova i givim blesing long yu olsem em i bin mekim long ol wokboi bilong em long bipo. Olsem: God Jehova i bin mekim gut long lapun Abraham wantaim Sara na tupela i kamapim wanpela pikinini i stap aninit long God, em Aisak. Moses i bilip na em i ting, mobeta em i kisim hevi wantaim lain bilong God. “Em i no laik bihainim pasin bilong sin na kisim amamas bilong sotpela taim tasol. Em i ting, sapos em i kisim sem [olsem piksa bilong Krais, em Man God I Makim], dispela bai i winim tru olgeta mani na bilas samting bilong Isip.” (Hibru 11:24-26) Jehova i givim bikpela blesing long Moses—em i helpim ol Israel long lusim wok kalabus long Isip. Na Moses i bin stap gut long wok bilong God, olsem na God bai kirapim bek em na bai em i mekim wok olsem wanpela ‘hetman’ long graun aninit long Man I Winim Moses, em Krais Jisas.—Buk Song 45:16; Lo 18:17-19.
21. Stori long sampela meri bilong bipo i bilip long God na ol samting i bin painim ol na dispela inap strongim bel bilong yumi.
21 Ol Kristen long nau i dediket pinis ol i ken tingim tu ol meri bilong bipo, em ol i bin kamap fri tru na i stap amamas, na dispela inap strongim bel bilong ol dispela Kristen. Wanpela meri olsem em Rut bilong kantri Moap. Bikpela hevi i bin painim Rut—man bilong em i dai pinis—tasol God i helpim em long lusim kalabus bilong lotu giaman na em i kisim bikpela amamas tru long dispela. Rut i lusim lain bilong em na ol god giaman bilong em, na em i pas gut long tambu mama bilong em Naomi, em man bilong em tu i dai pinis. Rut i tokim Naomi: “Olgeta ples yu go long en, mi tu bai mi go long en. Olgeta ples yu stap long en, mi tu bai mi stap long en. Lain bilong yu bai i kamap lain bilong mi. Na God bilong yu bai i kamap God bilong mi.” (Rut 1:16) Bihain Rut i maritim Boas na em i karim Obet, em tumbuna papa bilong Devit. (Rut 4:13-17) God Jehova i givim “gutpela pe” tru long dispela meri nating em i no bilong lain Israel—em i kamap wanpela tumbuna mama bilong Jisas, em man God i makim bilong kisim bek ol manmeri! (Rut 2:12) Taim Rut i kirap bek, bai em i amamas tru long kisim save long dispela samting! Rehap, bipo em i meri pamuk na God i helpim em long lusim kalabus bilong pasin pamuk na lotu giaman na kamap fri, em tu bai kisim dispela amamas taim em i kirap bek; na Batseba tu, em i bin mekim rong, tasol em i tanim bel. Taim tupela i kirap bek bai tupela tu i kisim save olsem ol i tumbuna mama bilong Krais Jisas.—Matyu 1:1-6, 16.
22. Stori i kamap bihain long dispela bai stori long wanem samting?
22 Yumi inap stori long planti manmeri moa em God i bin givim pasin bilong i stap fri long ol, olsem ol man na meri i bilip na Hibru sapta 11 i stori long ol. Ol i bin karim hevi na ol man i bin mekim nogut long ol, na “pasin bilong ol arapela manmeri bilong graun i no inap tru long pasin bilong ol dispela manmeri i stap namel long ol.” I gat ol dispela bilipman bilong bipo, na i gat ol gutpela disaipel bilong Krais ol i bin stap long taim bilong ol aposel, na ol narapela man na meri i bin stap gut long God bihain long dispela taim, na ol milion milion manmeri long nau ol i mekim wok bilong Jehova, olsem ol Witnes bilong em. Stori i kamap bihain long dispela bai stori olsem sapos yu sanap strong wantaim ol long pasin bilong i stap fri em God i givim long yumi, orait i gat planti samting yu ken amamas long en.
Bai Yu Bekim Wanem Tok?
◻ Pasin bilong i stap fri em God i givim, taim dispela i lus, God i mekim tok profet long wanem gutpela samting yumi ken wetim i kamap?
◻ Krais i mekim ol disaipel bilong em i ‘kamap fri bai ol i no ken i stap kalabus moa aninit’ long wanem samting?
◻ Bilong kisim baptais na kamap Witnes Bilong Jehova, man i mas mekim wanem pastaim?
◻ Stori bilong wanem ol man na meri long Baibel i makim olsem, sapos yumi sanap strong long pasin bilong i stap fri em God i givim, bai yumi kisim blesing?
[Piksa long pes 16]
Yu save long ol samting yu mas mekim pastaim na bai yu ken kisim baptais na kamap wanpela Witnes Bilong Jehova?