Ripot Long Wok Bilong Kingdom
Wok Long Longwe Teritori i Kamap Gutpela Long Paragwei
BRENS-OFIS bilong Sosaiti Was Taua long Paragwei i save gut ol i mas autim tok bilong Kingdom long olgeta hap longwe teritori bilong ol. (Aposel 1:8) Nau em i taim bilong olgeta man i mas kisim save long Kingdom na mekim wok bilong Jehova, long wanem, klostu nau bai pasin nogut bilong dispela graun i pinis long taim bilong “bikpela hevi tru.” (Matyu 24:21, 22) Ol stori hia i helpim yumi long save long bikpela wok ol brata long Paragwei i mekim bilong autim tok long longwe teritori, em ol hap teritori brens-ofis i no bin makim bilong wanpela kongrigesen. Brens-ofis i ripot olsem:
Ol i stretim rot bambai sampela brata sista i ken mekim wok painia salim inap liklik taim na i go autim tok long olgeta hap longwe teritori. Kirap long Novemba 1990 i go inap Janueri 1991, inap olsem 39 brata sista i bin i go long wan handet bikpela na liklik taun i no gat man bilong autim tok bilong Kingdom long en. Ol i bin tilim 6,119 buk, na 4,262 buklet, na 5,144 magasin. Wok bilong ol i kamap gutpela na nau i gat sampela nupela pablisa na ol nupela grup i wok long kamap.
◻ Wanpela meri i kisim buk Yu Inap i Stap Oltaim Long Paradais Long Graun long wanpela sista painia i autim tok long longwe teritori. Painia i tokim em long stadi na em i orait long dispela. Taim painia i go bek bilong kirapim stadi wantaim dispela meri, em i lukim dispela meri wantaim man bilong em na ol 10-pela pikinini bilong tupela i wetim em i kam. Namba 2 taim em i go bilong mekim stadi wantaim ol, dispela famili wantaim sampela pren bilong ol na sampela manmeri i stap klostu, ol i bung i stap na i laik stadi! Dispela meri i bin singautim ol i kam. Em i tokim ol, dispela stadi i gutpela, na olgeta samting Jehova i tok long wetim i kamap na ol blesing bilong Jehova i gutpela tru. Bipo em i no bin save long ol dispela samting, olsem na em i laik tru bai ol pren bilong em na ol manmeri i stap klostu ol tu i ken harim dispela gutpela tok.
Taim painia i go mekim stadi, long olgeta taim i gat planti ol i bung na ol i olsem wanpela liklik kongrigesen. Ol i save givim planti askim long painia na olgeta i save mekim sampela tok long stadi. Taim painia i tokaut olsem em wantaim ol poroman bilong em bai lusim ol na i go long narapela hap long taim ol i autim tok pinis long dispela hap, dispela meri i tingting planti na i tok, “Tasol husat bai helpim mipela?” Painia i stretim tok wantaim sampela brata long kongrigesen i stap klostu liklik na ol i go stadi wantaim ol dispela manmeri. Na nau Sosaiti i makim sampela painia salim bilong helpim dispela lain ol i olsem sipsip.
◻ Wanpela sista painia i autim tok long narapela hap longwe teritori na long wanpela haus em i bungim wanpela man, em 10-pela yia bipo em i bin kisim buk Tok i Tru i Bringim Man i Go Long Laip Oltaim. Em i kisim pinis na bihain em i no bin bungim gen ol Witnes. Tasol em i save olsem Jehova em i God tru na em i mas lotu long God Jehova wanpela tasol. Long laik bilong em yet em i bin kirap autim tok long olgeta man em i save long ol na tokim ol long Jehova. Long olgeta wik em i save wokabaut long lek inap 3-pela kilomita bilong i go lukim tupela marit na toktok wantaim tupela long God. Em i tok, “Sapos mi no i go lukim ol, bai ol i lusim tingting long Jehova.” Dispela man i bin autim tok, olsem na dispela tupela marit na inap olsem 10-pela moa ol i laik stadi.
Sampela de paslain long taim painia i kam lukim dispela man, pris long dispela hap i laik bai ol man i ken karim piksa bilong Maria i kam insait long haus bilong dispela man, tasol em i no laik na em i tokim pris, em i no save lotuim ol piksa na god giaman samting, na pris i kros nogut tru. Olsem na long dispela nait, dispela man i beten askim Jehova long helpim em. Na taim dispela painia i kam liklik taim bihain, dispela man i pilim tru na em i amamas tru! Kwiktaim painia i stretim rot bambai dispela man i ken stadi long olgeta taim, na dispela man i wok long kamap strong na em i bung wantaim lain bilong Jehova.
Tru tumas, ol brata i wok strong long autim tok long longwe teritori long Paragwei na Jehova i blesim dispela wok bilong bringim ol manmeri i kam insait long lain bilong Em.—Matyu 24:14.