Yu Bin Tingting Long Mekim Wok Bilong Jehova Olsem Painia?

¹ Yumi amamas tru long lukim ol gutpela wok ol painia i mekim. Aposel Pol i stori long sampela brata long taim bilong em, ol i “wok strong long mekim olgeta kain gutpela pasin.” (Ta. 2:14) Olsem wanem long nau? Wanpela brata husat i bin kirap mekim wok painia tupela wik bihain long em i winim 65 krismas, em i tok: “Long i stap bilong mi, i no gat wanpela taim we mi kisim planti blesing tru olsem mi bin kisim insait long dispela 10-pela yia mi mekim wok painia.” Olsem wanem? Yu tu inap kisim kain tingting olsem long wok bilong God yu mekim?

² Kisim Tingting Olsem Bilong Painia: Namba wan samting bilong helpim yu long mekim wok painia em long kisim tingting olsem bilong painia. Em i wanem kain tingting? Em stretpela tingting long wok bilong autim tok. Pasin bilong tingim gut ol man i insait long dispela. Na em i makim tu amamas long mekim laik bilong God long dispela taim bilong las de. Sampela man ol i givim bel long mekim sindaun bilong ol i kamap gutpela, tasol ol man i gat tingting olsem bilong painia ol i redi long lusim sampela samting bambai ol inap lusim bikpela taim moa long helpim ol man. (Mt. 13:​45, 46) Olsem wanem? Ol painia tasol i gat dispela kain tingting? Nogat. Planti ol i gat dispela tingting maski sindaun bilong ol i pasim ol long mekim wok painia.

³ Olsem wanem yu ken save olsem yu inap mekim wok painia o nogat? Ating i gat sampela long kongrigesen bilong yu ol i mekim wok painia long nau o bipo ol i bin mekim. Na wasman sekit bilong yu bai amamas tu long helpim yu. Yu ken toktok wantaim ol long dispela samting. Ol bai amamas long helpim yu long stretim gut ol wok bilong yu na bai yu inap winim aua bilong painia. (Ef. 5:16) Yumi mas lainim pasin bilong skelim gut taim bilong mekim stadi bilong yumi yet, ol wok yumi mas mekim insait long famili, na wok autim tok. Yumi mas lusim hap taim long kisim ol samting bilong skin, olsem na ating yu mas mekim liklik wok mani. Olsem na yumi no ken tromoi nating mani. Sapos yu no tingting long kisim planti samting bilong skin na yu putim ol wok bilong kingdom bilong God i stap namba wan, yu bihainim pasin bilong Jisas Krais na bai yu kisim bikpela amamas long wok painia.

⁴ Daunim Ol Samting i Laik Pasim Yu: Olsem wanem sapos yu gat liklik mani inap long mekim wok painia, tasol yu tingting planti long helt bilong yu bai pasim yu o sediul bilong yu i orait long yu inapim ol aua bilong wok painia o nogat? Sapos olsem, orait mekim wok painia haptaim inap sampela mun na bai yu ken save yu inap mekim wok painia o nogat. Sapos samting i wok gut, orait tingting long painia oltaim inap wanpela yia. Dispela bai givim bikpela hap taim long yu long save olsem helt bilong yu, sediul, na ol narapela samting i orait long yu inap mekim wok painia o nogat. Taim yu kirap mekim wok painia na pilim amamas bilong en, bai yu no laik long lusim dispela wok. Tasol sapos yu mas lusim dispela wok, oltaim bai yu amamas long tingim dispela yia yu bin mekim bikpela wok na ol gutpela blesing yu bin kisim.

⁵ Olsem wanem? Yu gat hevi long kisim wanpela long wok autim tok wantaim yu? Yu inap painim wanpela poroman bilong mekim wok painia sapos yu kirapim ol narapela long insait long wok painia haptaim o painia oltaim. Sapos yu tokim ol narapela olsem yu bai amamas long wok wantaim ol, dispela inap kirapim ol long traim mekim dispela wok. Liklik tok yu mekim bilong strongim ol, dispela tasol inap kirapim ol long mekim wok painia.

⁶ Stretpela Tingting: Yumi olgeta inap kamap strong long ol samting bilong spirit na bai yumi gat laik long mekim wok painia. Yes, yumi olgeta inap kisim tingting olsem bilong ol painia maski sindaun i mekim na planti bai i no inap insait long dispela wok. Ating i no longtaim i go pinis yu bin pinisim skul o klostu nau bai yu pinisim skul. Bai yu mekim wanem long laip bilong yu? Sapos yu wanpela yangpela na yu bin dediket na baptais pinis, yu mas tingting strong long insait long wok painia.

⁷ Wanpela brata husat i bin mekim wok painia oltaim inap 25 yia pinis, em i tok: “Mi tingim ol wok mi bin mekim, na mi amamas. Mi pilim olsem sampela wok mi bin mekim i kamap gutpela, na mi bin stretim sampela pasin bilong mi, na mi bin lusim sampela samting bambai mi inap mekim dispela wok. Tasol ol samting yumi kisim i winim tru ol samting yumi bin lusim.​—⁠Mak 10:​29, 30.” Sevenpela mun bihain, taim dispela brata i mekim yet wok painia, em i dai. Dispela brata i stap gutpela piksa tru long pasin bilong amamas long wok painia. Olsem wanem? Yu inap kisim wankain amamas olsem em? Maski yu inap mekim wok painia oltaim o painia haptaim, o sindaun bilong yu i pasim yu long mekim olsem, sapos yu “wok strong long mekim olgeta kain gutpela pasin,” yu tu inap amamas long ol wok yu bin mekim na ol gutpela samting i kamap long en.