Husat i Tok Stret Long Kirap Bek—Pol o Pleto?
LONG 1 Korin 15:35-58 na 2 Korin 5:1-10 aposel Pol i stori long kirap bek. Taim em i mekim olsem, yu ting em i bihainim tingting bilong Pleto na bilong ol saveman bilong ol Grik, em ol i bilip olsem man i gat tewel i no inap i dai? O yu ting tok bilong Pol i stret wantaim tok bilong Jisas na bilong ol narapela hap bilong Baibel?
I gat wanpela liklik buk bilong 1974 (Immortality of the Soul or Resurrection of the Individual: St. Paul’s View with Special Reference to Plato), em bikman bilong lotu Grik Otodoks bilong Not na Saut Amerika i orait long en, na dispela liklik buk i bekim dispela askim. Pastaim buk i stori long kirap bek olsem Pol i bin stori long en long 1 Korin 15 na 2 Korin 5, na long tingting bilong ol Grik ol i stap long taim bilong Pol, na bihain long dispela, buk i tok olsem:
‘Pleto i skulim ol man olsem tewel i save lusim bodi na i no inap i dai. Pleto i ting olsem, bilong en yet tewel i gat strong bilong i stap oltaim oltaim. Tasol Santu Pol i no skulim ol man long kain tingting olsem, na em i no tok liklik long em i mekim olsem . . .
‘Aposel Pol i no stori long tewel o spirit i no inap i dai na i narapela long bodi; nogat; Pol i stori long man i kirap bek wantaim bodi na olgeta tingting samting bilong em, na kirap bek bilong Krais yet i opim rot bilong dispela. Taim Pol i tok long bodi i kirap bek, em i no ting bodi bilong ol man i dai pinis na i stap long matmat ol dispela bodi bai kisim laip gen. Nogat.
‘Tingting bilong Pol long bodi i kirap bek i olsem: Bodi i senis na i kamap nupela long strong bilong God, olsem God i wokim nupela bodi na bekim bek olgeta pasin na tingting na save bilong man yet long dispela bodi na dispela man i kirap bek. Strong bilong kirap bek i no stap insait long skin bilong yumi na dispela bai mekim na bai yumi kirap bek long bihain. Nogat. Dispela samting em presen bilong God.’
Tru tumas i no gat wanpela man i no inap i dai; dispela strong i no stap long skin bilong ol man. Dispela em gutpela prais liklik lain Kristen bilong i go long heven i kisim long God long rot bilong Bikpela bilong yumi, Krais Jisas.—1 Korin 15:20, 57; Filipai 3:14.
[Piksa long pes 9]
Pleto, saveman bilong ol Grik
[Kredit Lain]
Vatican Museum photograph