Pleto

BIHAIN long Pleto i bin raun long ol kantri i stap klostu long Mediterenian na insait long wok politik bilong Sirakyus, em i go bek long Atens we em i kamapim wanpela bikskul (Academy). Ol man i tok dispela skul em fes yunivesiti long Yurop, na i kamap nambawan skul bilong matematiks na filosofi.

BILONG WANEM YU MAS TINGIM DISPELA?

Ol tok bilong Pleto i bin stiaim tru bilip bilong planti milion manmeri, na tu, bilong ol man i tok ol i Kristen em planti bilong ol i popaia na ting ol tok bilong Pleto i kam long Baibel. Wanpela nambawan bikpela tok bilong Pleto em dispela tingting olsem ol man i gat wanpela spirit i no save dai.

Pleto i gat bikpela laik long save long wanem samting i painim man bihain long em i dai. Buk Body and Soul in Ancient Philosophy i tok: “Wanpela feiveret tok bilong Pleto em olsem ol man i gat wanpela spirit i no save dai.” Em i bilip tru olsem “taim man i dai, spirit bilong em i no save dai, na dispela spirit bai kisim blesing o strafe” long bihain. Ol samting man i bin mekim taim em i stap laip long graun bai makim olsem spirit bilong dispela man bai kisim blesing o kisim strafe.a

OLSEM WANEM BILIP BILONG PLETO I GO BIKPELA?

Inap 900 yia, kirap long 387 B.C.E. i go 529 C.E., skul Academy bilong Pleto i bin mekim wok na i bin stiaim tru tingting bilong ol man. Planti man long ol kantri em kantri Grik na Rom i bosim, i kirap bilip long tingting bilong Pleto. Filo bilong Aleksandria, em wanpela saveman Juda, i bilip long tok bilong Pleto, na planti bikman bilong ol lotu Kristendom tu i bilip. Dispela i mekim na ol tingting haiden, olsem man i gat wanpela spirit i no save dai, i go insait long lotu Juda na ol lotu Kristen.

Buk The Anchor Bible Dictionary i tok: “Olgeta bilip Kristen i kisim sapot long tok bilong ol Grik, em ol tok bilong Pleto i as bilong en, tasol sampela Kristen . . . i bilip na bihainim tru ol tok bilong Pleto.” Skelim tok ol i stap daunbilo.

Tok Pleto i mekim: “[Taim bodi bilong yumi dai,] spirit i no save dai na dispela spirit i lusim bodi na i go stap wantaim ol narapela god, em i go . . . bilong tokaut long as bilong ol samting man i bin mekim—dispela em samting ol gutpela man i no pret long en, tasol ol man nogut i pret nogut tru.”—Plato—Laws, Book XII.

Tok Baibel i mekim: Taim ol man i dai, ol i no save long wanpela samting. Baibel i tok, ol man i dai pinis i olsem ol i slip, na ol i wet long God bai kirapim bek ol. Tingim ol dispela skripsa:

• “Ol man i dai pinis, ol i no inap save long wanpela samting.”—Saveman 9:4, 5, 10.

• “Olgeta manmeri i stap long matmat ol bai i harim maus bilong Pikinini, na ol bai i lusim matmat na i kam ausait.”—Jon 5:28, 29.

• “Taim ol i dai ol i tanim i kamap graun gen. Na long dispela taim ol i no inap mekim olgeta samting ol i bin tok long mekim.”—Song 146:4.

Tru tumas, Baibel i no tok olsem man i gat wanpela spirit i no save dai. Olsem na askim yu yet, ‘Tok bilong Baibel o tok bilong Pleto i as bilong bilip bilong mi?’