Tingim Gut Laip Em Gutpela Presen Tru

LAIP BILONG YUMI​—⁠em wanpela gutpela presen tru! Sapos yumi no i stap laip, yumi no inap mekim wanpela samting. Taim laip bilong man i lus, ol man i no inap mekim wanpela samting bilong kisim bek. Sapos yumi laik i dai, yumi wok strong long painim rot bambai yumi no ken i dai, na sampela i save beten askim God long helpim ol!

Dispela samting i kirapim yumi long tingim wanpela stori long Baibel long bikpela si i kamap na i sakim sip na sip i laik bagarap. Taim dispela samting i kamap, “Ol boskru i pret nogut tru, na olgeta wan wan i singaut long ol god bilong ol yet.” Bihain, olgeta i singaut long God tru, olsem: “[Jehova], . . . yu no ken larim mipela i dai.” Baibel i tok moa olsem: “Ol i no laik bai sip i hevi tumas, olsem na ol i kisim ol kago na tromoi i go long solwara.”​—⁠Jona 1:​4-6, 14; skelim wantaim Aposel 27:​18, 19.

Ol boskru i redi long tromoi ol samting bilong ol bambai ol inap i stap laip. Yumi inap kisim gen ol samting bilong skin, tasol sapos laip bilong yumi i lus, yumi no inap kisim bek long strong bilong wanpela man bilong graun. Yumi laik lukautim laip bilong yumi, olsem na yumi save was gut, nogut bagarap i painim yumi. Yumi save kisim kaikai na pasim klos na lukautim skin bilong yumi, na sapos sik i painim yumi, yumi go kisim marasin.

Tasol Man bilong givim laip long yumi, em i laik bai yumi mekim sampela samting moa. Laip em i wanpela gutpela presen, em wanpela Man i winim olgeta narapela man long graun em i bin givim long yumi. Sapos yumi pilim tru gutpela pasin bilong Man bilong givim laip, na yumi amamas long dispela presen, em laip bilong yumi, bai yumi wok long lukautim laip bilong yumi, a? Na bai yumi tingim laip bilong ol narapela man tu i bikpela samting.

Olsem na yumi no ken kirap nogut long save, long Lo God Jehova i bin givim long lain Israel i gat sampela lo bilong lukautim laip na skin bilong narapela man. (Kisim Bek 21:29; Lo 22:⁠8) Ol Kristen long nau tu i mas tingim laip bilong narapela man. Olsem: Sapos sampela pikinini i stap long haus bilong yu, yu save larim ol bis o pin o samting i sap i stap nabaut, em ol inap pilai long en o putim long maus na daunim na bagarapim skin bilong ol? Yu save putim ol strongpela marasin samting i stap long ples ol pikinini i no inap kisim? Sapos wara i pundaun long plua, yu save hariap klinim, nogut wanpela i pundaun? Sapos waia bilong paua i bagarap, yu save stretim hariap? Sapos yu gat ka, yu save stretim gut long olgeta taim? Yu save draiv gut? Sapos yu pilim tru olsem laip em i gutpela presen, bai yu stretim ol samting bambai narapela i no ken kisim bagarap long haus o long ka samting bilong yu.

Tasol sori tru, sampela i no tingim laip bilong ol yet. Olsem: Olgeta man long nau ol i save pasin bilong smok inap bagarapim skin bilong ol. Tasol planti milion i kalabus long pasin bilong smok, na taim ol i kisim smok, ol i wok long bagarapim skin bilong ol. Sampela i save mekim wok nogut long drak, na sampela i dring planti, na long dispela rot ol i bagarapim skin bilong ol. Sik AIDS em i narapela samting i wok long bagarapim skin bilong ol man, na ol dokta i no save long rot bilong pinisim dispela sik. Tasol sapos ol man i bin sakim ol kain pasin i gat sem, na ol i no bin mekim wok nogut long drak, o kisim blut, bai ol inap abrusim dispela sik AIDS. Tru tumas, ol dispela man i no pilim tru laip bilong ol, olsem na ol i kisim bagarap!​—⁠Rom 1:​26, 27; 2 Korin 7:⁠1.

Ol Inap Senisim Pasin Bilong Ol!

Ol man i laikim tru Man bilong wokim ol, ol i save laip em i gutpela presen God i givim long yumi. Olsem na ol i redi long senisim pasin bilong ol bambai ol inap lukautim dispela gutpela presen i kam long God. Tingim Kwaku, em wanpela tisa long Gana. Em i save dring long olgeta taim, na em i no lukautim laip bilong em.

Kwaku i tok: “Mi wok long subim meri bilong mi long daun long mi, olsem na planti taim mitupela i kros pait, na dispela samting i kamap moa yet taim mi spak. Mi dring planti, olsem na planti taim mi no gat mani bilong lukautim famili bilong mi. Dispela samting i bagarapim bel bilong meri bilong mi. Taim mani bilong mi i pinis (na dispela samting i save kamap planti taim), mi save painim rot bilong kisim liklik mani bilong baim dring. Ol skulmanki i bin givim mani long mi bambai mi inap rejistaim ol long mekim wanpela bikpela eksem, tasol mi mekim wok long dispela mani bilong baim dring. Mi dring spak, na mi baim dring bilong ol man i dring wantaim mi. I no longtaim na skul i save long samting mi bin mekim. Sapos het-tisa i no bin helpim mi, skul bai rausim mi long wok.

“Sindaun bilong mi i nogut stret. Pastaim mi sem, tasol bihain mi no sem moa. Mi laik kilim i dai skin bilong mi, long wanem mi pilim olsem mi no mekim gutpela wok long laip bilong mi. Tasol pasin bilong dring i kalabusim mi i stap. Wanpela taim, mi go insait long ba na mi insait long pait na wanpela man i bin sutim mi long naip. Nau mi pilim pen na mi save, mi wok long dring oltaim, na dispela samting bai mekim na bihain bai mi dai.

“Long dispela taim, ol Witnes Bilong Jehova i wok long i kam lukim mipela na traim kirapim mipela long lukim tok bilong Baibel. Mitupela meri bilong mi i save ranawe, long wanem mipela i les long ol i kam long olgeta taim. Tasol long wanpela taim, mi harim tok bilong ol. Mi kirap stadi long tok bilong Baibel, na i no longtaim na mi kisim save olsem mi inap kisim laip oltaim long nupela taim God i laik kamapim. Mi wok long stadi, na mi pilim moa yet gutpela pasin bilong Jehova, em Man bilong givim laip long yumi, na mi pilim tru gutpela presen em i givim mipela. Taim mi stadi, mi pilim olsem tok bilong Baibel i gutpela tru bilong helpim man. Dispela samting i kirapim mi long senisim pasin bilong mi. Em i hatwok, long wanem olgeta taim mi mas wok long sakim laik bilong mi long dring, na mi mas sakim tu ol man mi bin dring wantaim ol long bipo. Jehova em i save mi laik tru long senisim pasin bilong mi, olsem na em i helpim mi.

“Meri bilong mi em i no wanpela Witnes, tasol em i lukim pasin bilong mi i senis, na marit bilong mipela i wok gut, olsem na em i amamas long mi na long lotu bilong mi. I no gat wok moa long ol man i kam pasim pait bilong mitupela meri bilong mi. Nau bel bilong mi i stap isi, na mi amamas long dispela samting. Tru tumas, taim yumi tingim Jehova, em Man bilong givim laip long yumi, na yumi kisim tingting bilong em long laip i samting holi, na bihainim ol lo bilong em long pasin bilong sindaun gut, nau yumi inap i stap amamas​—⁠i no gat narapela rot.”

God i Tok Long Givim Laip Oltaim Long Yumi

Ol Witnes Bilong Jehova i bin helpim planti manmeri kain olsem Kwaku, na ol i bin “kamap ol nupela manmeri, . . . long wanem, pasin bilong ol i stretpela olgeta na i holi tru.” (Efesus 4:⁠24) Ol i tingim tru laip bilong ol long nau, tasol ol i tingim tu laip oltaim ol inap kisim taim graun i kamap ples paradais. Baibel i tok, long dispela Paradais God bai kamapim, i no gat wanpela man bai hangre, long wanem, “Bikpela I Gat Olgeta Strong bai i redim bikpela kaikai tru.”​—⁠Aisaia 25:⁠6.

Laip bilong yumi long nau em i gutpela presen, tasol em i bilong liklik taim tasol. Olgeta man i save dai, na dispela samting i givim bikpela hevi long ol man! Taim wanpela man yu laikim tumas em, em i dai, bai yu bel hevi stret. Tasol taim Kingdom bilong God i bosim graun, tok promis bilong God bai kamap tru, olsem: “Ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—⁠Kamapim Tok Hait 21:⁠4.

Long dispela taim, bai yumi stap laip inap longtaim moa. Bai rot i op na ol man i winim taim bilong bikpela hevi tru ol bai kisim gutpela laip. Na bihain, long rot bilong kirap bek, Jehova bai givim laip gen long ol manmeri i slip long matmat. (Jon 5:​24, 28, 29) Ol man yumi laikim tumas ol na ol i dai pinis, wantaim ol gutpela man i bin i stap long bipo, olgeta bai kirap bek gen! Ating yu pilim olsem dispela samting i no inap kamap, a? Tasol “i no gat wanpela samting God i no inap mekim.”​—⁠Luk 1:37; lukim Jop 42:⁠2.

Jehova i bin mekim wanpela samting na bai yumi inap save tru olsem ol dispela samting bai kamap tru. Em i bin mekim wanem? God i bin givim dispela Pikinini em i laikim tru, em Jisas, olsem ofa bilong baim bek yumi olgeta long sin na i dai. Rom 8:32 i tok: “[Jehova] i no bin pasim Pikinini bilong em yet. Nogat. Em i bin salim em i kam bilong helpim yumi olgeta. Na sapos em i givim yumi Pikinini bilong em yet, orait ating em bai i givim yumi olgeta arapela samting tu.” Baibel i tok em bai pinisim olgeta pasin doti na pasin nogut na pasin bilong bagarapim man. (Aisaia 11:⁠9) Bihain ol man bai no ken tingting moa olsem laip em i samting nating.

Long nau tu, maski yumi gat sin, yumi inap i stap amamas. Taim yumi harim smel bilong gutpela kaikai, na pilim win i meknaisim skin bilong yumi, na lukim traipela maunten, na lukim ol kala taim san i go daun, na naispela wara i ron, na harim gutpela musik o krai bilong pisin, yumi save amamas long dispela, a? Tasol tingim dispela samting: Olsem wanem sapos yu inap amamas long ol dispela samting i go inap long olgeta taim bihain?

Yu ting yumi bihainim gutpela tingting sapos yumi lusim ol samting inap helpim yumi long kisim laip oltaim bambai yumi inap kisim amamas bilong liklik taim long nau? (Lukim Hibru 11:25.) Baibel i tok yumi no ken “bihainim moa ol laik bilong olpela bel,” yumi mas “bihainim laik bilong God tasol.” (1 Pita 4:⁠2) Mipela laik kirapim yupela olgeta long bihainim dispela tok. Mipela laik bai yupela i kisim save long ol tok bilong Baibel, na wok long bihainim. (Jon 13:17) Sapos yu mekim olsem, bai yu go klostu long Jehova, na em inap givim laip oltaim long yu!

[Piksa long pes 5]

Ol samting yu mekim i makim olsem yu tingim laip em i bikpela samting?

[Piksa long pes 7]

Long nupela taim God i kamapim, bai yumi amamas long laip bilong yumi inap oltaim oltaim!