‘Sapos Yupela i Kam Bek Long Mi, Bai Mi Kisim Bek Yupela’

WANPELA famili i amamas long raun long bus. Yangpela pikinini bilong ol, em Pita, em i lusim ol na bihainim wanpela liklik animal i go daun long maunten. Wantu tasol klaut i kamap blakpela na ren i kam daun bikpela. Pastaim ren i liklik, tasol isi isi ren i kam daun. Famili hia i hariap bungim ol samting bilong ol na ran hariap i go long ka bilong ol. Olgeta i laik save, Pita i stap we.

Tasol Pita i traim traim long kam bek long famili bilong em. Em i no inap lukluk gut long wanem i gat bikpela ren, na rot i go antap long maunten i wel, olsem na Pita i pundaun long wanpela hul i daun moa. Em i traim kam ausait, tasol arere bilong hul i wel.

Ren i kam daun na graun malumalum i wok long pulap long dispela hul. Klostu Pita i dring wara na i dai. Tasol papa bilong em i painim em na givim rop long em na Pita inap holim rop na kam ausait. Bihain papamama i krosim Pita, long wanem em i bin lusim ol i go. Tasol mama i pasim blanket long em na holim em gut, olsem na i no hatwok long em i kisim dispela tok bilong stretim em.

Dispela samting i helpim yumi long save long samting i painim ol man em pastaim ol i bin i stap long lain bilong God. Ol i pundaun na nau pasin bilong dispela graun i kalabusim ol​—⁠i olsem ol i stap long wanpela hul i daun moa, na ol i laik tru long lusim dispela ‘hul’ na kam bek long lain bilong Jehova. Yumi amamas tru, long wanem Jehova i marimari long ol, na em i laik givim ‘rop’ long ol, na helpim ol long kam bek long gutpela ples!

Gutpela Pasin Sori Bilong Jehova

Long taim bilong ol Israel, taim ol i wokim pinis tempel, Solomon i beten long Jehova na askim em long harim beten bilong ol man i kam klostu long dispela haus na ol i beten. Bihain Solomon i tok: “Olgeta manmeri i save mekim sin. Olsem na sapos mipela [lain Israel] i mekim sin long yu na yu kros long mipela na yu larim ol birua i kam pait na winim mipela na kalabusim mipela . . . na bihain mipela i stap long dispela kantri bilong ol birua na mipela i tingting planti long pasin nogut bilong mipela na mipela i tanim bel, . . . yu ken harim beten bilong mipela na yu ken marimari long mipela na helpim mipela.”​—⁠1 King 8:​46-49.

Planti taim Jehova i bin harim beten bilong ol Israel olsem Solomon i bin askim em long mekim. Planti taim lain bilong God i bin lusim em. Tasol bihain ol i tingim rong bilong ol, na ol i tanim bel na kam bek long Jehova na wok long painim em. Na Jehova i bin marimari long ol. (Lo 4:31; Aisaia 44:​21, 22; 2 Korin 1:3; Jems 5:11) Long rot bilong Malakai, Jehova i stori long ol samting lain bilong em i bin mekim insait long 1,000 yia, na em i tok: “Yupela i wankain tasol olsem ol tumbuna bilong yupela bipo. Yupela i givim baksait long ol lo bilong mi, na yupela i no bihainim. Tasol sapos yupela i lusim pasin nogut na kam bek long mi, mi tu bai mi lusim belhat na kisim bek yupela.”​—⁠Malakai 3:⁠7.

Samting Bilong Pundaunim Man

Sampela long lain bilong Jehova long nau ol i kain olsem ol dispela Israel, na ol i no bung moa wantaim lain bilong Jehova. Sampela i mekim wanpela samting i olsem i no gat rong long en​—⁠olsem Pita i bihainim dispela liklik animal bilong bus​—⁠tasol hevi inap painim ol long dispela rot. Dispela samting i bin painim Ada. Em i tok: “Long olgeta belo, mi go kaikai wantaim ol wanwok bilong mi. Olsem na taim ol i singautim mi i go dring kopi wantaim ol taim mipela pinis wok, mi ting i no gat rong long dispela. Mi pilim olsem mi no pulim taim bilong ol miting na autim tok. Tasol mi lusim tingting olsem, sapos mi raun wantaim ol wanwok, mi sakim tok bilong 1 Korin 15:⁠33.

“I no longtaim na long olgeta Sarere mi save raun long hos wantaim ol. Bihain liklik mi go wantaim ol long lukim piksa wokabaut na sampela pilai. Nau mi lusim sampela miting. Bihain, mi lusim olgeta miting na mi no autim tok moa. Nau mi no poroman moa wantaim oganaisesen bilong Jehova.”

O ating wanpela man i mekim rong na em i haitim rong bilong em, na dispela samting i mekim na em i pilim olsem em i no inap mekim wok bilong God moa. (Buk Song 32:​3-5) O ating wanpela wanbilip i mekim wanpela tok o wanpela samting long em, na dispela samting i pundaunim em. Ating ol i no pilim tru tok bilong Solomon, em i tok: “Olgeta manmeri i save mekim sin.”​—⁠1 King 8:46; Jems 3:⁠2.

Na sampela i bel hevi taim wanpela man i givim tok long ol bilong stretim ol. (Hibru 12:​7, 11) Sampela i lukim ol samting bilong dispela graun na ol i laikim tru, na dispela samting i pulim ol na ol i no mekim moa wok bilong God. Planti ol i tingting long kisim nem long wok bilong ol, na ol i givim bel long mekim wok mani, na nau ol i no gat taim bilong mekim wok bilong God. (Matyu 13:​4-9; 1 Timoti 6:​9, 10) Olsem wanem? I gat wanpela samting bilong helpim kain man olsem?

Bai Yu Harim Tok Bilong Jehova na Kam Bek Long Em?

Long wanpela taim, Jisas i mekim wanpela tok i hatwok long lain bilong em i save long en, na sampela i lusim Jisas. Baibel i tok: “Planti disaipel bilong en i lusim em, na ol i go bek [long ol samting ol i mekim long bipo], na ol i no wokabaut moa wantaim em.” Tasol sampela i no lusim em. Baibel i tok moa olsem: “Jisas i askim 12-pela disaipel olsem: ‘Ating yupela tu i laik lusim mi na i go?’ Saimon Pita i bekim tok olsem, ‘Bikpela, bai mipela i go long husat? Tok bilong yu tasol i save givim laip i stap gut oltaim oltaim.’ ” (Jon 6:​66-68) Ol aposel bilong Jisas i save, sapos ol i lusim Jisas, dispela samting bai nogutim ol.

Sampela i lusim lain bilong Jehova, tasol bihain ol i kisim tingting wankain olsem ol aposel. Ol i save, ol i lusim lain bilong Jehova na nau ol i stap nogut, long wanem tok bilong Jehova na Jisas tasol inap helpim ol long kisim laip. Taim ol i kisim dispela kain tingting, ol i mas save rot i op i stap long ol i ken stretim pasin bilong ol na askim Jehova long marimari long ol na lusim tingting long rong bilong ol, na ol i mas kam bek long Jehova. Jehova yet i givim dispela tok long Malakai, olsem: “Sapos yupela i lusim pasin nogut na kam bek long mi, mi tu bai mi lusim belhat na kisim bek yupela.”​—⁠Malakai 3:⁠7.

Sapos wanpela Kristen tru i no mekim wok bilong Jehova, yu ting em inap i stap amamas? Sapos wanpela i bin i stap long lain bilong Jehova inap longpela taim, na nau isi isi em i lusim lain bilong Jehova, wanem samting bai painim em? Kwiktaim em bai save olsem em i insait long pasin bilong dispela graun i wok long i go nogut nogut. Em bai poroman wantaim ol man bilong tupela maus na mekim tok giaman na stil na mekim pasin pamuk​—⁠em bai stap long wanpela ples nogut olsem dispela hul Pita i bin i stap long en. Taim dispela man i kisim bek tingting bilong em na em i save em i no stap moa long rot bilong kisim laip oltaim, em i no ken lusim taim long askim wanpela man long helpim em long lusim dispela rot nogut em i stap long en. Tasol taim man i laik i kam bek long lain bilong Jehova, em bai i gat hatwok.

Olsem wanem? Yu bin traim kam bek long Jehova, tasol yu pilim olsem i hatwok tumas? Yu mas save olsem i mas i gat man bilong helpim yu. Na yu mas bilip tru olsem ol brata sista bilong yu long lain bilong God ol i laik tru long helpim yu. Tasol yu mas mekim wanpela samting na bai Jehova i save long laik bilong yu. Yu mas kisim ‘stretpela tingting’ na ‘kam bek’ long Jehova.​—⁠1 King 8:⁠47.

Sampela i Helpim Ol Long Kam Bek

Ada i stori long ol samting i bin helpim em long kam bek long Jehova, na em i tok: “Long taim stret, dispela sista i bin stadi wantaim mi long pastaim, em i singautim mi long i go wantaim em long wanpela kibung sekit. Em i mekim gutpela pasin tru long mi! Em i no krosim mi liklik! Inap wanpela yia pinis mi no bin i go long miting, na mi wok long tingting olsem i stap bilong ol manmeri bilong graun i no gat as bilong en, na maski yu ting olsem ol manmeri i stap amamas, tasol ol i bel hevi na les na mekim pasin pamuk. Olsem na mi go long dispela kibung. Taim mi kamap long ples bilong kibung, mi go sindaun long baksait tru na hait i stap. Mi no laik bai ol brata i lukim mi na givim askim long mi.

“Ol tok i kamap long dispela kibung em i gutpela tru bilong helpim mi. Taim kibung i pinis, mi tingting pinis long mi mas i kam bek long Jehova, na mi mas givim bel olgeta long mekim wok bilong em. Ol brata i amamas tru long lukim mi.” (Luk 15:​11-14) Dispela samting i bin kamap planti yia i go pinis, na kam inap nau Ada i bin mekim wok painia inap 25 yia pinis.

Narapela man i bin lusim Jehova, na wankain samting i painim em. Sampela elda i bin givim strongpela tok long Hose, tasol ol i no kamapim gut tok bilong Baibel, ol i kamapim tingting bilong ol yet. Hose i bel hevi na em i kros, olsem na em i no mekim moa wok bilong Jehova. Inap 8-pela yia em i no bung wantaim lain bilong God, na insait long dispela hap taim, em i maritim wanpela meri i no Witnes, na em i kamap papa bilong sampela pikinini, na em i larim meri bilong em i baptaisim wanpela pikinini bilong ol long Misin Katolik.

Bihain wanpela wasman sekit i go lukim em inap sampela taim na em i kirapim ol narapela elda long i go lukim em. Em i kam bek long lain bilong Jehova, na em i amamas long lukim meri bilong em i wok long kisim save long tok i tru. Nau Hose i mekim wok olsem elda long kongrigesen. Dispela tupela ekspiriens i helpim yumi long save, taim man i kam bek long Jehova, Jehova i save marimari long em na givim sampela blesing long em.

Tasol sapos man i laik kisim dispela blesing, em i mas pilim tru ol samting narapela man i mekim bilong helpim em, na em i mas mekim sampela samting. Long planti kongrigesen, ol brata i save long ol dispela man i bin lusim Jehova, na long sampela sampela taim ol i save go lukim ol na traim helpim ol. Sapos yu pilim tru tok man i givim long yu bilong helpim yu, dispela samting i makim olsem yu pilim tru marimari bilong Jehova.​—⁠Jems 5:​19, 20.

Tru tumas, nau em taim bilong harim tok bilong Jehova, na ‘kam bek long em.’ (Malakai 3:7; Aisaia 1:18) Yu no ken wet moa. Ol samting i wok long kamap long graun wankain olsem Baibel i tok. Gutpela ples tru bilong i stap long en nau long dispela taim nogut, em insait long lain bilong Jehova, long ples Jehova inap lukautim yu. Ol man i wetim Jehova, ol tasol i no ken bagarap taim Jehova i kamapim belhat bilong em.​—⁠Sefanaia 2:​2, 3.

[Piksa long pes 30]

Bai yu harim tok bilong Jehova na kam bek long em?