Bipo Yu Bung Wantaim Oganaisesen Bilong Jehova?
YANGPELA man i sem na em i bel hevi tru. Klos bilong em bipo i gutpela, tasol nau ol i bruk na bagarap. Tru tumas, bipo em i stap gutpela, tasol nau em i stap nogut. Em i tingting bek long ples bilong em i stap longwe, na em i hevi tru long ol hambak pasin em i bin mekim, em i bin kisim kwik hap mani bilong em long papa na tromoi nabaut olgeta dispela mani. Em i hangre nogut tru, na em i tingim ples bilong em. Em i tingim ol wokboi bilong papa i stap gutpela, tasol em i stap nogut! Gutpela sapos em tu i kamap wanpela wokboi bilong papa!
Tasol sapos nau em i go bek long papa, bai papa i amamas o nogat? Papa i bin mekim gut tru long em, tasol em i no pilim na em i lusim papa na mekim nabaut, olsem na ating papa i no ken amamas long em na larim em i stap gen wantaim em long haus. Tasol em i gat bikpela tingting na strongpela laik long i go bek long papa.
Dispela yangpela man i no save liklik long bikpela sori bilong papa bilong em! Papa i sori tumas long pikinini bilong em! Pikinini i go bek na taim em i kam klostu liklik long haus, em i kirap nogut long pasin papa i mekim! “Em i stap longwe yet, na papa i lukim em. Na bel bilong papa i sori tumas long em. Em i ran i go, na i holimpas pikinini na i givim kis long em.”−Luk 15:20.
Olsem wanem? Yu bin mekim pasin wankain olsem bilong dispela yangpela man? Yu bin lusim ples bilong yu? Yu bin lusim Papa bilong yu, Jehova, na oganaisesen bilong em? Tasol nau yu laik kam bek?
Long ol manmeri i bin lusim oganaisesen bilong Jehova, sampela tasol i bin mekim ol hambak pasin wankain olsem dispela yangpela man i bin mekim. Planti, isi isi tasol ol i lusim, olsem wanpela liklik bot i no gat anka na isi isi em i drip i go. Sampela ol i gat hevi long mani o long famili, o ol i gat sik, o ol i wok strong long kisim nem long dispela graun, na ol i no gat taim moa bilong mekim ol wok bilong God. Na sampela ol i kros long wanpela man o meri i stap long kongrigesen Kristen na ol i larim dispela samting i pundaunim ol, o ol i no wanbel wantaim oganaisesen bilong Jehova long tingting bilong ol long sampela tok bilong Baibel na ol i lusim oganaisesen. Na sampela i bel hevi, long wanem pasin bilong nau i no pinis long taim ol i ting em i mas pinis, na ol i lusim lain bilong Jehova.
Sapos nau yu no bung moa wantaim lain bilong Jehova, ating wanpela bilong ol dispela samting mipela i kolim pinis em i bin mekim na yu lusim Jehova. Tasol maski wanem wanem samting i bin mekim, gutpela sapos nau yu tingting long kam bek, a?−Matyu 18:12-14.
Wanpela Man i Bin Pundaunim Yu?
Yumi no gutpela man olgeta; yumi olgeta yumi gat sin, olsem na sampela taim pasin bilong narapela i skrapim bel bilong narapela, na kros i kamap. Dispela samting i bin pundaunim sampela. Na sampela i pundaun, long wanem wanpela man ol i ting em i gutpela man tru wantu em i kirap mekim longlong pasin, o em i mekim pasin i no Kristen, o em i mekim wanpela rong.
Olsem wanem? Kain samting olsem i bin pundaunim yu? Maski wanem wanem samting i bin pundaunim yu, tasol Jehova i no bin mekim dispela samting. (Lukim Galesia 5:7, 8.) Jehova i no gat asua, olsem na yu ting i stret sapos yumi lusim em? Gutpela sapos yumi wok strong yet long wok bilong em, na yumi ken save, em i lukim ol samting i kamap na em bai mekim pasin sori long yumi.−Kolosi 3:23-25.
Sampela taim wanpela samting i pundaunim wanpela man na em i lusim Jehova, tasol bihain bihain em i pilim olsem dispela samting i no bikpela samting moa, o dispela samting i no i stap moa. O taim bel bilong em i kol na em i skelim gut samting i bin kamap, em i save em yet i gat asua. Planti taim kain samting olsem i kamap sapos man i no wanbel long sampela tok ol i bin givim long em bilong stretim em. Ating em i kros long tok ol i givim long em na em i lusim lain bilong Jehova, tasol bihain em i save, ol brata i sori long em na ol i givim dispela tok long em bilong helpim em. (Hibru 12:5-11) Sapos samting olsem i bin kamap, orait i stret dispela man i mas bihainim tok bilong aposel Pol, em i tok: “Sapos han bilong yupela i no gat strong na i olsem i hangamap nating, maski, yupela i mas taitim rop bilong en na yupela i wok. Na sapos skru bilong lek i olsem i dai pinis, maski, yupela i mas sanap strong. Yupela i mas wokabaut stret long lek bilong yupela. Na sapos wanpela lek i nogut, bai skru bilong en i no lus olgeta. Nogat. Em bai i kamap gutpela gen.”−Hibru 12:12, 13.
Ating Yu No Wanbel long Wanpela Tok?
Ating yu bin lusim oganaisesen bilong Jehova, long wanem, yu gat narapela tingting long wanpela tok bilong Baibel. Long bipo God i helpim ol Isrel na ol i lusim Isip, tasol “kwiktaim ol i lusim tingting long ol samting Bikpela i bin mekim bilong helpim ol. “Ol i no kisim tok bilong God pastaim. Ol i mekim ol samting long tingting bilong ol yet.” Ating yu tu yu kirap kwik na ting olsem sapos oganaisesen i no bihainim tingting yu yet yu ting em i stret, orait bai yu lusim oganaisesen. (Sam 106:13) Tasol ating bihain dispela tok i kamap klia; ating ol i senisim tingting bilong ol long en, o ol i skelim gen ol tok bilong Baibel na spirit holi i stiaim tingting bilong ol na ol i save, tingting bilong ol long dispela tok em i stret. Olsem na gutpela sapos yu no lusim kwik oganaisesen; gutpela sapos yu wet pastaim na larim Jehova i mekim dispela tok i kamap klia, a?
Jehova i save mekim wok long wanpela lain o oganaisesen tasol. Yumi no ken lusim tingting long dispela samting. Nau long taim bilong yumi “wokboi i gat gutpela tingting, na i save lukaut gut long wok bilong en” i givim kaikai bilong spirit long yumi “long taim bilong en.” Baibel i tok, taim “bikpela man bilong en i kam bek” bai em i lukim dispela wokboi i mekim olsem. (Matyu 24:45. 47) Orait, husat long nau ol i save Bikpela i kam bek pinis? Husat ol i wok strong long mekim dispela wok olsem Bikpela i tok pinis? Em ol manmeri i bung wantaim oganaisesen bilong Jehova, olsem ol witnes Kristen bilong Jehova!
Taim ol narapela i lusim Jisas, aposel Pita i tok: “Bikpela, bai mipela i go long husat? Tok bilong yu i givim laip i stap gut oltaim oltaim.” Pita i save tru Jisas em i Krais. Olsem na taim planti disaipel i kirap nogut long sampela tok bilong Jisas na ol i no laik harim, Pita i no laik lusim Jisas, long wanem em i save, tok bilong Jisas “i givim laip i stap gut oltaim oltaim.” Sapos nau ol i no save gut long as bilong ol dispela tok em i mekim, maski, bihain bai ol i save. (Jon 6:51-68; lukim tu Luk 24:27, 32.) Na i wankain long nau tu. Isi isi Jehova i stiaim ol wokboi bilong em long rot bilong tok i tru.−Provep 4:18.
Kam Bek Nau
Profet Jeremaia i krai na em i tok: “Yumi mas wok long skelim pasin bilong yumi; yes, yumi mas skelim gut, na yumi mas tanim bel i go bek olgeta long Jehova.” (Krai Bilong Jeremaia 3:40, NW ) Tasol sampela i tingting planti long i kam bek; ol i pret, nogut ol brata sista long kongrigesen i no amamas long ol. Tasol taim dispela yangpela man i go bek long papa bilong em, wanem samting i bin kamap? Papa bilong em i tok: “Yumi mas amamas, . . . Dispela brata bilong yu em i dai pinis, tasol nau em i kamap laip gen. Em i lus pinis, tasol nau yumi painim bek.” (Luk 15:32) Na ol brata bai amamas tu long ol manmeri i laik tru long bihainim laik bilong Jehova na ol i kam bek long em.−Lukim Luk 15:7.
Tasol kongrigesen Kristen i no sindaun nating na wet tasol na sapos kain man olsem i kam bek ol i amamas. Nogat. Long tok piksa bilong Jisas, taim pikinini “i stap longwe yet” papa i ran i go bungim em. Na olsem tasol ol Witnes Bilong Jehova i pilim olsem ol yet i mas i go painim ol manmeri bipo ol i save bung wantaim oganaisesen bilong Jehova, na ol i mas helpim ol long kam bek.
Tasol taim man i stap longwe long oganaisesen bilong Jehova, olsem wanem sapos em i bin mekim sampela rong? Na olsem wanem sapos wanpela man i bin mekim bikpela rong na ol i bin rausim em long kongrigesen, tasol nau em i stretim pinis pasin bilong em na em i lusim pinis pasin nogut bipo em i mekim? Ol elda i save long gutpela pasin sori ol i mas mekim bilong helpim kain man olsem long stretim tok wantaim Jehova. Olsem na man i laik kam bek na bihainim laik bilong Jehova, em i mas tokim ol elda long dispela laik bilong em. Jehova i tok: “Yupela kam. Yumi mas stretim tok wantaim. Maski rong bilong yupela i nogut tru, olsem samting i retpela tru, tasol bai ol i mekim i kamap waitpela, olsem ais.”−Aisaia 1:18, NW.
Papa bilong yumi long heven em i man bilong pasin sori na pasin marimari! Em i no save les kwik long yumi; em i laik helpim yumi olgeta wan wan! Em i no laik bai yumi bagarap taim dispela pasin nogut bilong nau i pinis. (2 Pita 3:9) Jehova yet i tokim lain bilong em long bipo, olsem: “Yupela mas kam bek long mi, na bai mi kam bek long yupela.” Long nau tu, Jehova i singautim ol man i kam bek long em.−Malakai 3:7, NW.
No gat bikpela hap taim moa, olsem na yu no ken lusim taim. Kam bung wantaim lain bilong Jehova na ‘stap gut tru wantaim ol man i laikim tumas lo bilong God.’ Man bilong raitim sam i tok: “I no gat wanpela samting inap mekim ol i pundaun.” (Sam 119:165) Olsem wanem? Insait tru long bel bilong yu, yu laikim tumas lo bilong Jehova? Sapos yu dediket pinis long God, dispela samting i bin kirapim yu long dediket long em, a? Olsem na bikpela samting tru i winim olgeta narapela samting, em olsem: Yu mas wok long i stap wanbel gen wantaim Jehova. No ken givim baksait long Em. Tingting gut na beten. Sapos yu laik bung gen wantaim lain bilong Jehova na amamas gen long gutpela pasin sori na pasin wanbel i stap namel long ol, orait i gat taim yet bilong mekim. Tasol yu mas hariap long mekim.