Sapta 21
Amamas Long Ol Man i Kam Bek
I GAT planti manmeri ol i bin lainim sampela tok i tru bilong Baibel na ol i save, Jehova em i God tru, na ol i save liklik long ol samting em i laik mekim. Ol i no Witnes Bilong Jehova, tasol ating ol i bin stadi wantaim ol Witnes na lainim tok bilong Baibel. O ating papamama bilong ol i Witnes. Planti ol i bin i go long sampela miting long Haus Kingdom. Na ating ol i bin mekim sampela wok bilong autim tok bilong Kingdom. Tasol ol i no givim skin bilong ol bilong mekim laik bilong God. Bilong wanem ol i no mekim?
2 Ol samting bilong dispela graun i pulim ol; ol i ting ol dispela samting bai helpim ol long i stap amamas. Ol i laik tumas long kisim ol dispela samting na ol i lusim oganaisesen bilong Jehova. Tasol bihain sampela i tingting gen na ol i save ol i no bin painim amamas tru olsem ol i ting bai ol i painim. Ol i pilim dispela samting na ol i save, sapos ol i stap olsem tasol bai ol i kisim bagarap wantaim ol manmeri bilong dispela graun. Ol i tingting gen long ol i bin i stap gutpela na kisim planti kaikai bilong spirit taim ol i bin stap insait long “haus” bilong Jehova na ol i laik kam bek. Tasol yu ting Jehova i laik kisim bek ol?
YANGPELA MAN I KAM BEK LONG PAPA
3 Bilong save long bekim bilong dispela askim yumi ken tingim wanpela tok piksa bilong Jisas em planti man i save long en. Jisas i stori long wanpela man i gat tupela pikinini man. Namba tu pikinini i tokim papa, ‘Olgeta samting yu laik tilim long mitupela brata, orait hap bilong mi, yu givim long mi nau.’ Em i kisim pinis dispela samting na em i go i stap long wanpela longwe ples. Em i stap long dispela ples na em i tromoi nabaut olgeta mani bilong em long ol hambak pasin bilong em na long ol pamukmeri. Em i lusim tru papa bilong em. Bihain bikpela hangre i kamap long dispela ples; nau yangpela man hia i no gat kaikai na em i stap rabis nogut tru. Em i kisim wok bilong lukautim banis pik bilong wanpela man. Em i hangre nogut na em i laik kisim kaikai bilong pik, tasol papa bilong pik i no larim em i kisim. Orait, nau em i tingting planti long em i stap nogut na em i tingting gen long em i bin i stap gutpela na kisim planti kaikai taim em i stap wantaim papa, na em i tingim ol wokboi bilong papa tu ol i stap gutpela. Olsem na em i laik kam bek. Em i tingting olsem: ‘Bai mi go bek long papa na tokim papa, “Mi bin mekim rong. Nau mi no gutpela man moa inap long yu kolim mi pikinini bilong yu. Yu putim mi olsem wanpela wokboi bilong yu.” ’ (Luk 15:11-19) Tasol em i bin mekim planti hambak pasin nogut, orait yu ting papa i laik kisim bek em? Dispela papa i olsem piksa na i makim Jehova. Orait yu ting Jehova i laik kisim bek kain man olsem?
4 Long dispela tok piksa Jisas i kamapim klia tingting bilong Jehova long dispela samting. Jisas i stori olsem: “Tasol [yangpela man] i stap longwe yet, na papa i lukim em. Na bel bilong papa i sori tumas long em. Em i ran i go, na i holimpas pikinini na i givim kis long em. Na pikinini i tokim em, i spik, ‘Papa, mi bin mekim sin long God na long yu. Mi no gutpela moa inap long yu kolim mi pikinini bilong yu.’ Tasol papa i tokim ol wokboi bilong en, ‘Yupela kisim namba wan longpela klos bilong mi na bringim i kam kwiktaim na pasim long em, na putim wanpela ring long pinga bilong em. Na putim su long lek bilong em. Na kisim patpela pikinini bulmakau i kam na kilim. Bai yumi kaikai na amamas. Long wanem dispela pikinini bilong mi em i dai pinis, tasol nau em i kamap laip gen. Em i lus pinis, tasol yumi painim bek.’ Na ol i mekim wanpela pati.”—Luk 15:20-24.
DISPELA TOK PIKSA I MAKIM WANEM SAMTING LONG NAU?
5 Long dispela tok piksa namba wan pikinini i makim “[kongrigesen] bilong ol namba wan pikinini bilong God. God i raitim pinis nem bilong ol, na dispela rait i stap long heven.” (Hibru 12:23) Orait, namba tu pikinini i makim husat? Em i makim narapela lain ol i no “liklik lain sipsip” bilong kisim laip long heven. Tasol namba tu pikinini i no makim olgeta “arapela sipsip” bilong Bikpela; em i makim sampela tasol. Wok bilong bungim ol “arapela sipsip” i kamap ples klia kirap long yia 1935, tasol paslain long dispela taim i gat sampela manmeri ol i save Jehova tasol em i God tru. Ol i save sampela bai kisim laip long graun aninit long Kingdom bilong God, na ol i no tingting olsem ol yet i bilong dispela ‘kongrigesen bilong ol namba wan pikinini’ em ol bai kisim laip long heven. Tasol ol dispela manmeri i no kirap givim bel long mekim wok bilong Jehova; nogat; ol i givim bel long bihainim pasin bilong dispela graun. Ol i kisim ‘ol samting papa i laik givim long ol,’ olsem taim na laip God i givim long ol, na ol i mekim wok long dispela bilong amamasim skin bilong ol yet. Tasol kirap long yia 1935 ol wokboi bilong Jehova i save gut olsem ‘bikpela lain’ ol i bilong kisim laip long graun. Long dispela taim, planti bilong dispela lain ol i olsem “namba tu pikinini” ol i kirap na givim bel long mekim wok long “haus” bilong Papa. Em taim bilong amamas tru olsem Jisas i stori long tok piksa bilong em.
6 Tru, taim dispela lain olsem namba tu pikinini i wok long i kam, sampela long lain bilong Kingdom ol i no amamas. Tok piksa bilong Jisas i makim olsem. Tasol sampela long lain bilong Kingdom ol i amamas, na long dispela tok piksa Jisas i makim olsem ol man pastaim ol i no amamas, ol inap senisim tingting na bai ol i amamas wantaim Jehova long ol kain man olsem ol i tanim bel tru.—Luk 15:7, 10, 25-32.
7 Ol dispela samting i bin kamap long yia 1935 samting, tasol bihain long dispela taim sampela i kisim tingting na ol i save, ol tu i wankain liklik olsem dispela namba tu pikinini. Ol i save long “haus” bilong Jehova, em oganaisesen bilong em long graun, tasol pasin ol i bihainim, dispela i mekim na ol i lusim oganaisesen bilong Jehova na i olsem ol i go i stap long wanpela “longwe ples.” Ol i no kirap long biruaim ol wokboi bilong Jehova, tasol pasin ol i bihainim i no stret wantaim ol lo bilong God i stap long Baibel. Ol i givim bel olgeta long mekim wok mani bilong ol na long bihainim laik bilong ol yet; ol i no tingim wok bilong God ol i mas mekim na dispela taim nau em i “las taim.” Sampela i bel hevi long pasin kranki bilong sampela ol i bin i stap wantaim ol insait long kongrigesen na ol i no wetim Jehova i stretim dispela. Ol i lusim lain bilong Jehova na ol i stap olsem wanem?
8 Bihain sampela i kisim tingting na ol i save, ol i stap nogut long ol samting bilong spirit. Ol i bin kisim sampela amamas, tasol nau ol i save ol i no bin i stap amamas tru. Na ating pasin bilong ol i bin nogutim skin bilong ol na tingting bilong ol, na i nogutim ol long spirit. Bel bilong ol i no i stap gutpela; ol i stap nogut wankain olsem olgeta man i stap longwe long God na i no gat wanpela gutpela samting ol i wetim i kamap bihain. (Efesas 2:12) Nau ol i save, taim ol i stap long “haus” bilong Jehova, long dispela taim tasol ol i bin i stap amamas tru. Olsem na ol i laik kam bek. Tasol yu ting i gutpela sapos ol i kam bek? Sapos ol i no kam bek na ol i stap nogut olsem, dispela bai helpim ol olsem wanem? Sapos ol i no kam bek kwik, orait bagarap inap painim ol. Sapos ol i wok yet long holim strong ol samting bilong dispela graun, orait taim God i pinisim pasin bilong dispela graun, bai ol i lus.
9 Tasol ol kain man olsem, ol inap kam bek? Jehova i laik bai ol i kam bek, na oganaisesen bilong em i save helpim gut ol man i kam bek. (Sekaraia 1:3, 4) Tasol ol i mas mekim wanem? Olsem tok piksa bilong Jisas i makim, ol i mas kisim bek gutpela tingting; ol yet i mas kirap long i kam bek na ol i mas tokaut olsem ol i bin mekim rong long God. Sapos ol i bin mekim pasin nogut tru, orait ol i mas mekim wok i stret long pasin bilong tanim bel bambai ol elda i ken save ol i tanim bel tru. Nau ol i mas laik tru long kam bek insait long oganaisesen bilong Jehova na mekim wok bilong Jehova. (Luk 15:18-21; Provep 28:13) Sapos kain laik olsem i stap tru long bel bilong ol, orait ol i ken save, taim ol i lusim ol pasin nogut na tingting kranki bilong ol na ol i kam bek long Jehova, bai i gat bikpela amamas. (Aisaia 55:7) Taim ol i kam bek bai ol i amamas long ol brata i mekim gut long ol long Haus Kingdom, tasol ol i mas wok long kamap strong gen long spirit bambai dispela amamas bilong ol i ken i stap yet.
I MAS I GAT GUTPELA AS BILONG EN
10 Ol man i kam bek insait long lain bilong Jehova, ol i mas wok long kisim save long ol kain kain gutpela pasin bilong Jehova na wok long kamap wanbel wantaim em. Dispela em i bikpela samting. Ol i mas save, olgeta lo bilong Jehova em i bilong helpim yumi. Ol lo bilong em i no pasim yumi long i stap amamas; nogat; ol i bilong lukautim yumi bambai yumi no ken mekim sampela pasin bilong kisim amamas bilong liklik taim tasol na bihain bai yumi karim bikpela hevi long dispela. (Aisaia 48:17; Galesia 6:7, 8) Jehova i save laikim tumas yumi na em i save stretim yumi. (Provep 3:11, 12) Yumi yet yumi mas stadi na tingim gut long bel ol tok yumi lainim, na beten strong na go oltaim long ol miting bambai yumi bilip strong long Jehova, na long olgeta samting yumi mekim bai yumi larim Jehova i stiaim tingting bilong yumi na soim yumi stretpela rot yumi mas bihainim.—Provep 3:5, 6.
11 Ol man i bin lusim lain bilong Jehova, ating ol i save wanem pasin i stret na wanem pasin i no stret. Tasol taim ol i kam bek, nau ol i mas lainim bel bilong ol bambai bel bilong ol i nolaik tru long pasin nogut, na ol i mas mekim olsem long olgeta taim inap long taim pasin nogut i pinis. (Sam 97:10) Bilong helpim ol long mekim olsem, ol i mas wok long kisim save na ol i mas kisim gutpela tingting tu, olsem ol i mas kisim save long insait bilong ol tok ol i lainim. Bilong kisim gutpela tingting, pastaim yumi mas save gut long God. Yumi mas bilip long ol rot em i putim bilong lainim yumi, na yumi mas save, sapos yumi bihainim ol tok em i givim long yumi, dispela i helpim yumi long i stap gutpela long ai bilong em. (Provep 4:7; 9:10) Yumi mas pilim tru olsem yumi mas bihainim ol lo bilong Jehova long olgeta taim, na long olgeta samting yumi mekim. (Taitas 2:11, 12; 1 Tesalonaika 4:7) Taim yumi laik mekim wanpela samting, yumi mas was gut, nogut yumi tingting long kisim amamas bilong nau tasol na yumi no tingim ol samting dispela inap mekim long yumi long bihain. (Skelim wantaim Provep 20:21; 23:17, 18; Hibru 11:24-26.) Yumi mas tingim gut ol narapela man na was gut long ol tok na pasin yumi mekim.—Rom 15:1, 2.
12 Bilong strongim yumi ol Kristen yumi mas save yumi gat pait bilong spirit. Nambawan birua bilong yumi, em Seten wantaim lain ensel nogut bilong em. Long kain kain rot em i wok long pulim tingting bilong yumi bambai yumi lusim nambawan bikpela wok Jehova i bin givim long yumi. Em i laik pulim yumi bambai yumi lusim ol lo bilong Jehova na yumi go insait long pasin bilong dispela graun em yet i bosim. God i bin putim sampela gutpela laik long skin bilong yumi (olsem yumi laik i stap amamas, na kisim gutpela sindaun, na yumi laik bai ol narapela man i ken laikim yumi). Tasol Seten i mekim wok long ol dispela gutpela laik bilong kirapim yumi long tingting tumas long inapim ol dispela laik o long mekim pasin i no stret bilong inapim. Bilong winim dispela pait, yumi mas pasim olgeta klos pait God i givim long yumi. Olsem bai yumi inap sanap strong na sakim Seten na yumi no ken bagarap long dispela pait bilong spirit.—Efesas 6:11-18.
13 Jisas i tok, ‘yupela kam long mi.’ Em i tok, sapos yumi mekim olsem na yumi ‘karim dispela diwai em i givim long yumi,’ orait bai ‘bel bilong yumi i painim malolo.’ (Matyu 11:29, 30) Dispela tok ‘karim dispela diwai’ i makim olsem yumi mas mekim wok. Tasol taim yumi mekim wok bilong Jehova olsem Pikinini bilong em i bin mekim, bel bilong yumi i painim malolo tru. Long wanem, dispela i helpim yumi long i stap gutpela, olsem kamap fri. Bipo yumi save mekim sin; yumi save mekim ol pasin yumi save i no stret na ating yumi no laik mekim. Tasol nau yumi no kalabus moa olsem; yumi no mekim moa ol dispela pasin. (Jon 8:32, 34-36) Sapos yumi bihainim pasin Kristen, em Krais Jisas i as bilong en, orait bai yumi pilim tru bikpela wok Jehova i givim long em, na bai yumi harim tok bilong em, na bihainim pasin bilong em. Em i amamas long bihainim laik bilong Papa bilong em. Na yumi tu bai lain long mekim olsem. (Jon 4:34; Sam 40:8) Yumi bihainim ol lo bilong God, olsem na bel bilong yumi i no gat tok. Yumi no bihainim laik bilong yumi yet na yumi wokabaut; bai yumi tingim ol narapela man na yumi kisim amamas bilong man i givim samting long narapela man. (Aposel 20:35) Bai i stap bilong yumi i gat as bilong en. Na bikpela samting em olsem: Yumi save Jehova i orait long yumi, em i Papa bilong olgeta man i kamap pikinini bilong em.—Provep 10:22.
[Askim Bilong Stadi]
1. Long dispela sapta yumi stori long wanem ol manmeri?
2. (a) Bilong wanem ol i lusim oganaisesen bilong Jehova? (b) Bilong wanem ol i tingting gen na ol i laik kam bek?
3. (a) Tok piksa bilong Jisas long yangpela man i kam bek long papa, dispela i makim wanem samting long nau? (b) Dispela papa i olsem piksa na i makim husat?
4. Taim yangpela man i kam bek long papa, orait papa i mekim wanem?
5. (a) Namba wan pikinini long tok piksa bilong Jisas, em i makim husat? (b) Orait, namba tu pikinini i makim husat?
6. Long truim bilong dispela tok piksa, sampela man i mekim wanem na yumi save ol i gat wankain tingting olsem namba wan pikinini? Tasol olgeta manmeri long hap lain bilong Kingdom ol i gat dispela tingting o olsem wanem?
7, 8. (a) Nau long dispela taim wanem samting i mekim na sampela man i lusim lain bilong Jehova? (b) Sampela i kisim wanem tingting wankain olsem bilong yangpela man i lusim papa? (c) Bilong wanem i gutpela ol i kam bek?
9. (a) Bilong wanem Jehova i laik bai ol kain man olsem i kam bek? (Esikiel 18:23) (b) Tasol ol yet i mas mekim wanem?
10. (a) Ol man i tanim bel pinis ol i mas kisim wanem kain tingting long ol lo bilong Jehova? (b) Ol i mas mekim wanem bilong kamap wanbel wantaim Jehova?
11. Ol man i bin lusim Jehova na ol i kam bek, olsem wanem ol dispela 5-pela samting hia inap helpim ol, olsem (a) lainim bel long nolaik tru long pasin nogut? (b) kisim gutpela tingting? (c) bihainim ol lo bilong God long olgeta taim? (d) Taim ol i laik mekim wanpela samting, ol i mas tingim ol samting dispela inap mekim long ol long bihain? (e) tingim gut ol narapela man?
12. (a) Bilong helpim yumi bambai yumi no ken pundaun, yumi mas save long wanem ol rot bilong Seten long pulim man? (b) Bilong winim dispela pait, yumi mas mekim wanem?
13. (a) Yumi mas mekim wanem na bai bel bilong yumi i painim malolo? (b) Sapos yumi mekim wok bilong Jehova olsem Krais i bin mekim, bilong wanem yumi bai stap amamas tru?