Ol i Mekim Laik Bilong Jehova

Wanpela Papa i Redi Long Lusim Rong

TOK piksa bilong Jisas long wanpela papa i laikim tru pikinini bilong em i bin lus, ol i tok em i nambawan gutpela stori, winim ol narapela sotpela stori ol man i bin raitim, na i gat as tru na ol i tok olsem. Na dispela stori i olsem windo yumi lukluk long en na yumi inap lukim gutpela pasin tru bilong God long sori long ol man i bin mekim rong na i tanim bel.

Em i Lus na Ol i Kisim Em Bek

Wanpela man i gat tupela pikinini man. Namba 2 pikinini i tokim papa olsem: ‘Mi laik bai yu skelim ol samting yu laik tilim long mi wantaim brata bilong mi. Hap bilong mi, mi laik bai yu givim long mi nau, na maski long wet inap long taim yu dai.’ Orait papa i tilim ol samting, na em i givim wanpela hap bilong olgeta samting bilong em long pikinini​—⁠long mak stret em lo i tok namba 2 pikinini inap kisim. (Lo 21:17) Dispela yangpela man i hariap bungim olgeta samting bilong em na i go i stap long wanpela longwe ples na em i mekim ol kain kain pasin hambak, na olgeta mani bilong em i pinis.​—⁠Luk 15:​11-​13.

Bihain, taim bilong bikpela hangre i kamap. Em i no gat tru wanpela samting, olsem na em i go kisim wok long lukautim ol pik​—⁠em wanpela wok nogut tru long ai bilong ol Juda. (Wok Pris 11:​7, 8) Em i hangre nogut, olsem na em i gat bikpela laik tru long kisim skin bilong bin em ol pik i save kaikai! Bihain em i kisim stretpela tingting. Em i tok long em yet olsem: ‘Ol wokboi bilong papa bilong mi i gat planti kaikai, winim mi! Bai mi go bek long papa bilong mi na autim sin bilong mi na tokim em olsem mi laik stap olsem wanpela wokboi bilong em.’a​—⁠Luk 15:​14-​19.

Orait yangpela man i kirap i go bek long haus bilong papa. Skin bilong em i bagarap tru. Tasol papa bilong em i luksave long em “taim em i stap longwe yet.” Bel bilong papa i sori tru long em, na em i ran i go long pikinini, na holimpas em na “givim kis long em.”​—⁠Luk 15:⁠20.

Papa i laikim tumas pikinini na amamas long em i kam olsem na pikinini i no hatwok long kamapim bel hevi bilong em. Em i tok: “Papa, mi bin mekim sin long God na long yu. Nau mi no gutpela man moa inap long yu kolim mi pikinini bilong yu.” Papa i singautim ol wokboi bilong em i kam na i tokim ol olsem, “Yupela kisim namba wan longpela klos bilong mi na bringim i kam kwiktaim na pasim long em. Na putim wanpela ring long pinga bilong em. Na putim su long lek bilong em. Na yupela go kisim dispela patpela pikinini bulmakau i kam na kilim. Bai yumi kaikai na amamas. Long wanem, dispela pikinini bilong mi em i dai pinis, tasol nau em i kisim laip gen. Em i lus pinis, tasol yumi kisim bek.”​—⁠Luk 15:​21-​24.

Ol i wokim bikpela kaikai na ol i amamas, na ol i wokim musik na danis tu. Namba wan pikinini i harim pairap bilong ol taim em i lusim gaden na i kam bek. Em i harim olsem brata bilong em i kam bek long haus, olsem na ol i wokim bikpela kaikai. Em i harim olsem na em i belhat na i tokim papa bilong em olsem: “Planti yia mi hatwok tru long mekim wok bilong yu, olsem wanpela wokboi nating. Na mi no save sakim tok bilong yu. Na i no gat wanpela taim yu bin givim mi wanpela liklik pikinini meme tasol, bai mi ken amamas wantaim ol pren bilong mi. Nogat tru. Tasol dispela pikinini bilong yu, em i pinisim pinis olgeta samting bilong yu long ol pamukmeri. Na nau em i kam bek, na yu laik amamasim em na yu kilim patpela pikinini bulmakau.” Orait papa i tokim em olsem: “Pikinini, oltaim yu save stap wantaim mi. Na olgeta samting bilong mi em i bilong yu. Tasol nau yumi mas amamas, na bel bilong yumi i mas gutpela, long wanem, brata bilong yu i dai pinis, tasol nau em i kisim laip gen. Em i lus pinis, tasol nau yumi kisim em bek.”​—⁠Luk 15:​25-​32.

Sampela Save Yumi Kisim Long En

Dispela papa long tok piksa bilong Jisas i makim God bilong marimari, em Jehova. Olsem dispela pikinini i bin lus, sampela manmeri ol i lusim lain bilong God inap sampela yia samting, tasol bihain ol i tanim bel na ol i kam bek. Jehova i gat wanem tingting long ol kain man olsem? Ol man i tanim bel tru tru na i kam bek long Jehova ol i mas save olsem “em i no save kros nating long yumi. Na belhat bilong en i no save stap longpela taim.” (Song 103:⁠9) Long tok piksa, papa i ran i go bilong amamas long pikinini bilong em i kam bek. Olsem tasol, Jehova i orait long lusim rong bilong ol man i tanim bel, na em i gat laik tru long mekim olsem. Em i redi long “rausim sin” bilong yumi na em i “marimari moa yet” long yumi.​—⁠Song 86:5; Aisaia 55:7; Sekaraia 1:⁠3.

Long tok piksa bilong Jisas, pasin bilong papa long laikim tru pikinini, dispela i strongim em na i no hatwok tumas long em i go bek. Tasol tingim: Wanem samting inap kamap sapos papa i bin sakim pikinini o em i belhat na tokim pikinini long em i no ken kam bek moa? Kain pasin olsem em inap daunim tru dispela pikinini na em i no inap kam bek moa long papa.​—⁠Skelim wantaim 2 Korin 2:​6, 7.

Papa i laikim tru pikinini taim em i stap yet wantaim em na dispela i opim rot long pikinini i ken kam bek. Sampela taim ol elda Kristen i mas rausim ol man long kongrigesen em ol i mekim rong na ol i no tanim bel. (1 Korin 5:​11, 13) Taim ol elda i mekim olsem, long pasin sori ol i ken tokim sinman long ol samting em i ken mekim na bai kongrigesen i ken kisim bek em. Planti man i bin lus long ol samting bilong spirit, bihain ol i tingim gutpela pasin sori ol dispela elda i bin mekim na dispela i kirapim ol long tanim bel na kam bek long lain bilong God.​—⁠2 Timoti 4:⁠2.

Na papa i mekim gut long pikinini bilong em taim em i kam bek. Kwiktaim em i luksave olsem pikinini i tanim bel tru. Na em i no strong long pikinini i mas tokaut long olgeta wan wan pasin nogut em i bin mekim, nogat. Em i kirap mekim ol samting bilong amamas long pikinini i kam bek, na em i amamas long mekim olsem. Ol Kristen i ken bihainim dispela pasin. Ol i mas amamas taim wanpela man i bin lus em i kam bek gen.​—⁠Luk 15:⁠10.

Pasin papa i mekim i kamapim klia olsem em i bin wet long bikhet pikinini bilong em bai kam bek. Pasin bilong papa long wet i makim pasin bilong Jehova long laikim tumas bai ol man i bin lusim lain bilong em ol i mas kam bek. “Em i no laik bai wanpela man i lus em i laik bai olgeta man i mas tanim bel.” (2 Pita 3:⁠9) Ol man i bin mekim rong na ol i tanim bel, ol i mas save olsem Jehova bai ‘rausim sin bilong ol’ na ‘em bai i givim nupela strong long ol.’​—⁠Aposel 3:​19, 20.

[Futnot]