Sapta 86

Stori Bilong Yangpela Man i Lusim Papa

JISAS i givim dispela tupela tok piksa long ol Farisi long sipsip i lus na mani i lus, na bihain em i mekim wanpela tok piksa i stori long wanpela gutpela papa na tupela pikinini man bilong em, em tupela wantaim i gat bikpela asua.

Dispela tok piksa i gat bikpela stori long namba 2 pikinini man. Em i laik kisim kwik hap bilong em bilong ol samting papa i laik tilim long em wantaim brata bilong em. Papa i givim long em na em i lusim papa i go na i kirap mekim ol kain kain pasin i no stret. Orait, dispela papa na tupela pikinini i makim husat?

Jisas i tok: “Wanpela man i gat tupela pikinini man. Na namba 2 pikinini i tokim papa olsem, ‘Papa, mi ting long olgeta samting yu laik tilim long mi wantaim brata bilong mi. Hap bilong mi, mi laik bai yu givim long mi nau.’ Orait papa i tilim olgeta samting bilong en i go long tupela.” Orait namba 2 pikinini i mekim wanem?

Jisas i tok, “Dispela namba 2 pikinini . . . i go i stap long wanpela longwe ples . . . em i mekim ol kain kain hambak pasin, na olgeta mani bilong en i pinis” long ol pamukmeri. Bihain taim nogut i kamap. Jisas i stori olsem:

“Taim bilong bikpela hangre i kamap long dispela ples. Na em i no gat wanpela samting. Olsem na em i go kisim wok . . . bilong lukautim ol pik. Em i lukim ol pik i kaikai ol skin bilong bin, na em i gat bikpela laik tru long kisim sampela na pulapim bel bilong en. Tasol i no gat wanpela man i givim kaikai long em.”

Ating em i sem long lukautim ol pik, long wanem Lo i tok, ol pik i no klin long ai bilong God! Tasol ating em i sem moa yet long em i laik kisim kaikai bilong ol pik bilong pinisim hangre bilong em. Em i stap nogut tru na “nau em i kisim stretpela tingting.”

Jisas i stori moa, olsem: “Em i tok [long bel bilong em], ‘Olgeta wokboi bilong papa bilong mi ol i gat planti kaikai tru. Tasol mi stap hia na mi bagarap tru long hangre. Maski, bai mi kirap na mi go bek long papa bilong mi. Na bai mi tokim em olsem, “Papa, mi bin mekim sin long God na long yu. Nau mi no gutpela man moa inap long yu kolim mi pikinini bilong yu. Yu larim mi i stap olsem wanpela wokboi bilong yu.” ’ Orait em i kirap na i go.”

Taim em i lusim papa, sapos papa i bin belhat na bikmaus long em, nau em i no ken kisim strongpela tingting long i go bek long papa, a? Ating bai em i tingting long i go bek long ples, tasol em bai abrusim papa na painim wanpela wok i stap longwe long papa. Tasol nogat​—em i tingting tasol long i go bek long papa!

Dispela papa i makim gutpela Papa bilong yumi long heven, em God Jehova. Em i save sori na marimari long yumi. Na dispela namba 2 pikinini i lusim papa em i makim ol man bilong mekim sin. Ol Farisi em Jisas i givim dispela tok piksa long ol, ol i bin tok kros long Jisas, long wanem, em i save kaikai wantaim ol dispela kain man. Orait, namba wan pikinini i makim husat?

Pikinini i Kam Bek long Papa

Long tok piksa bilong Jisas, taim dispela pikinini i kam bek long papa, papa i mekim wanem? Jisas i stori olsem:

“Em i stap longwe yet, na papa i lukim em i wokabaut i kam. Na bel bilong papa i sori tumas long em. Na papa i ran i go, na i holimpas pikinini na i givim kis long em.” Em gutpela papa tru i gat pasin sori. Em i makim gut Papa long heven, em God Jehova!

Ating papa i harim tok pinis long ol pasin nogut pikinini i bin mekim. Tasol em i amamas long pikinini i kam bek na em i no askim pikinini long ol samting em i bin mekim. Jisas tu i gat gutpela pasin olsem​—em i kirap i go long ol man bilong mekim sin na ol man bilong kisim takis bilong helpim ol long tanim bel. Olsem na yangpela man i kam bek long papa em i makim ol dispela man.

Papa i lukim pes bilong pikinini na em inap pilim olsem pikinini i hevi long ol rong em i bin mekim na em i tanim bel pinis. Tasol papa i mekim gutpela pasin sori​—em yet i kirap na ran i go holimpas pikinini​—olsem na i no hatwok long pikinini i kamapim ol rong bilong em long papa. Jisas i stori olsem: “Na pikinini i tokim em olsem, ‘Papa, mi bin mekim sin long God na long yu. Nau mi no gutpela man moa inap long yu kolim mi pikinini bilong yu. Yu larim mi i stap olsem wanpela wokboi bilong yu.’ ”

Tasol papa i singautim ol wokboi i kam na i tokim ol: “Kisim namba wan longpela klos bilong mi na bringim i kam kwiktaim na pasim long em. Na putim wanpela ring long pinga bilong em. . . . Na yupela go kisim dispela patpela pikinini bulmakau i kam na kilim. Bai yumi kaikai na amamas. Long wanem, dispela pikinini bilong mi em i dai pinis, tasol nau em i kisim laip gen. Em i lus pinis, tasol yumi kisim bek.” Na ol i kirap long “kaikai na amamas.”

Long dispela taim “namba wan pikinini em i stap long gaden.” Orait, dispela namba wan pikinini i makim husat? Jisas i stori long em na i tok: “Bihain em i kam bek, na i kamap klostu long haus, na em i harim musik na em i harim ol manmeri i wok long danis. Orait em i singautim wanpela wokboi, na i askim em olsem, ‘Ol i mekim wanem?’ Na wokboi i tokim em, ‘Brata bilong yu i kam bek pinis, na papa bilong yu i kilim patpela pikinini bulmakau, long wanem, papa em i amamas long lukim pikinini i stap gut na i kam bek pinis.’ ” Namba wan pikinini i belhat na i no laik go insait long haus. Orait papa i kam ausait na givim gutpela tok long em bilong mekim kol bel bilong em. Tasol em i tok: “Planti yia mi hatwok tru long mekim wok bilong yu, olsem wanpela wokboi nating. Na mi no save sakim tok bilong yu. Na i no gat wanpela taim yu bin givim mi wanpela liklik pikinini meme tasol, bai mi ken amamas wantaim ol pren bilong mi. Nogat tru. Tasol dispela pikinini bilong yu, em i pinisim pinis olgeta samting bilong yu long ol pamukmeri. Na nau em i kam bek, na yu laik amamasim em na yu kilim patpela pikinini bulmakau.”

Husat ol i bin mekim pasin olsem dispela namba wan pikinini na ol i kros long gutpela pasin marimari Jisas i mekim long ol man i bin mekim sin? Em ol Farisi na ol saveman bilong lo, a? Ol i bin tok kros long Jisas, long wanem em i save amamas long ol dispela man i kam long em, na long dispela as tasol Jisas i bin mekim dispela tok piksa. Olsem na dispela namba wan pikinini i makim ol dispela Farisi na saveman bilong lo.

Bilong pinisim dispela stori, Jisas i kolim gutpela tok papa i mekim long namba wan pikinini, em i tok: “Pikinini, oltaim yu save stap wantaim mi. Na olgeta samting bilong mi em i bilong yu. Tasol nau yumi mas amamas, na bel bilong yumi i mas gutpela, long wanem, brata bilong yu i dai pinis, tasol nau em i kisim laip gen. Em i lus pinis, tasol nau yumi kisim em bek.”

Jisas i no stori long ol samting namba wan pikinini i mekim bihain. Tasol taim Jisas i dai na kirap bek pinis, bihain “planti pris tu ol i bihainim tok bilong God na ol i bilip.” Ating sampela i bilong dispela lain olsem “namba wan pikinini,” em Jisas i bin givim dispela tok piksa long ol.

Tasol dispela tupela pikinini man i makim husat long nau? Tupela i makim ol manmeri ol i bin kisim save long laik bilong Jehova na ol i kamap olsem pikinini bilong em. Namba wan pikinini i makim sampela bilong “liklik lain sipsip,” o “ol namba wan pikinini bilong God, em ol lain God i raitim nem bilong ol long buk bilong en long heven.” Ol i bin kisim tingting wankain olsem bilong dispela namba wan pikinini. Ol i no amamas long wanpela lain bilong kisim laip long graun ol i kam bung wantaim ol, em lain “arapela sipsip.” Ol i pilim olsem nau bai God i amamas long dispela lain na em i no tingim ol.

Namba 2 pikinini i makim sampela manmeri long lain bilong God, em ol i lusim em na i laik kisim ol amamas bilong dispela graun. Tasol bihain, ol i tanim bel na ol i kam bek na kirap gen long mekim wok bilong God. Papa long heven i save marimari long ol man i save ol i mas tanim bel i go long God bambai em i ken lusim sin bilong ol! Luk 15:​11-32; Wok Pris 11:​7, 8; Aposel 6:7; Luk 12:32; Hibru 12:23; Jon 10:16.

▪ Jisas i givim dispela tok piksa o stori long wanem lain? I gat wanem as na em i mekim dispela stori?

▪ Long dispela tok piksa i gat bikpela stori long husat? Wanem samting i painim em?

▪ Dispela papa long tok piksa i makim husat long taim bilong Jisas? Namba 2 pikinini i makim husat?

▪ Jisas i mekim wanem pasin marimari wankain olsem papa long dispela tok piksa?

▪ Namba wan pikinini i ting olsem wanem long ol samting ol i mekim bilong amamas long namba 2 pikinini i kam bek? Ol Farisi i mekim wanem pasin wankain olsem dispela namba wan pikinini i mekim?

▪ Tok piksa bilong Jisas i makim wanem samting long taim bilong yumi?