Sampela Ples Long Graun Bilong Promis

Kisim Kaikai—Kaikai Bret

WANPELA taim, Jisas na ol disaipel bilong em i stap long wanpela haus, na bikpela lain manmeri i kam bung, olsem na “ol i no gat taim bilong kaikai.” (Mak 3:20) Narapela taim, Jisas i “go kaikai” long haus bilong wanpela Farisi. (Luk 14:⁠1) Taim Baibel i stori long kaikai, yu tingim wanem kain kaikai?

Ating ol Israel bilong bipo bai tingim bret, long wanem insait bilong dispela tok “kaikai” long tok Grik na tok Hibru em “kaikai bret.” Yumi ken save dispela samting i stret, long wanem bret ol i wokim long wit o bali em i namba wan kaikai bilong ol.

Planti man long nau i ting ol tumbuna bilong lain Israel ol i man bilong lukautim sipsip, na ol disaipel bilong Jisas ol i man bilong kisim pis. Na tru, sampela i bin mekim dispela wok. Wit em i namba wan kaikai bilong ol man long dispela taim bipo. Na wit i stap olsem namba wan kaikai bilong Aisak na Jekop, olsem Stat 26:12; 27:37; na 37:7 i makim. Na long hap bilong Galili long taim bilong Jisas, planti man i save mekim wok gaden, olsem na ating sampela aposel bilong Jisas i wokim gaden wit.

Ating dispela tok i stret, long wanem ol man long hap bilong Graun Bilong Promis ol i save wokim gaden wit, na Baibel i stori long ol kain gaden wit olsem. (Lo 8:​7-9; 1 Samuel 6:13) Ol i mas wok olsem wanem long lukautim dispela kain gaden?

Long mun Oktoba na Novemba em i taim bilong ren i kam daun na i mekim graun i malumalum liklik, na nau man bilong wokim gaden wit em i save brukim graun na planim pikinini bilong wit. Ol ren i kam bihain long dispela i save helpim wit long kamap bikpela, na long mun Epril na Me, paslain long taim bilong san, wit i redi long katim. Olgeta man i save long taim bilong katim wit, olsem na Baibel i stori long dispela taim. (Stat 30:14; Hetman 15:⁠1) Dispela piksa yu lukim long han kais, em ol i bin kisim long wanem taim bilong yia?a Yu save? Na taim ol disaipel bilong Jisas i bin kisim ol pikinini bilong wit, em wanem taim bilong yia?​—⁠Matyu 12:⁠1.

Long taim bilong katim wit, ol fama i mas wok strong. Ol i holim naip na katim het bilong wit na bungim long mekpas, olsem yu lukim long piksa daunbilo. Ating sampela wit bai pundaun long graun, olsem na i no hatwok long Rut i kisim dispela wit. (Rut 2:​2, 7, 23; Mak 4:​28, 29) Bihain ol i kisim dispela mekpas wit i go long ples bilong rausim ol pipia bilong wit. Wanem samting i kamap long dispela hap? Baibel i stori long “ol plang bilong rausim ol lip samting bilong wit na bilong pasim bulmakau.” (2 Samuel 24:​18-22; 1 Stori 21:23) Ol i save putim wit long wanpela ples stret, na wanpela bulmakau o narapela animal i save wokabaut antap long en. Ating ol bulmakau bai pulim plang bilong krungutim wit bambai wit i no ken pas moa long stik bilong en, na lek bilong bulmakau bai brukim strongpela skin bilong wit.​—⁠Aisaia 41:⁠15.

Nau ol i redi long rausim ol liklik pipia i stap yet long wit. Ol i save mekim wok long savol o fok olsem yu lukim long antap, na tromoi wit i go antap na win i karim pipia i go. (Matyu 3:12) Ating fama bai mekim dispela samting long apinun taim i gat liklik win, na bai win inap karim ol pipia i go na ol bikpela hap pipia bilong wit bai pundaun long arere. Taim ol i bungim pinis wit na rausim ol liklik ston i stap long en, nau wit i redi long bungim long haus​—⁠o em i redi bilong wokim dispela namba wan kaikai bilong ol, em bret.​—⁠Matyu 6:⁠11.

Sapos yu bin i stap long dispela taim bipo na yu gat wok long wokim bret, bai yu mekim wok long tupela ston bilong brukim dispela wit inap em i kamap plaua bilong wokim bret. Sampela taim ating bai yu paitim dispela wit i go inap long em i kamap gutpela plaua i kain olsem paura. Sara i bin mekim wok long kain gutpela plaua olsem bilong wokim “bret” bilong givim long tupela ensel i kam lukim ol, na ol Israel i bin mekim wok long dispela kain gutpela plaua bilong wokim ofa long Jehova. (Stat 18:6; Kisim Bek 29:2; Wok Pris 2:​1-5; Namba 28:12) Sara i tanim wara wantaim plaua bilong wit na bai em inap wokim i kamap bret.

Long daunbilo yu ken lukim dispela plaua ol i bin tanim wantaim wara, na wanpela bret ol i wokim pinis long han na i redi long kukim. Ol i save kukim dispela plaua long ston ol i hatim pinis long paia, olsem meri i mekim long han sut. Olsem wanem? Dispela stori i helpim yu long save long ol samting Sara i bin mekim bilong givim kaikai long tupela ensel, na famili bilong Lot i bin mekim sampela yia bihain? Baibel i tok: “Lot i tokim ol wokman bilong en na ol i kukim bret i no gat yis na redim gutpela kaikai bilong tupela. Na tupela i kaikai.”​—⁠Stat 19:⁠3.

[Ol Futnot]

[Piksa Kredit Lain long pes 24]

Pictorial Archive (Near Eastern History) Est.

[Piksa Kredit Lain long pes 24]

Pictorial Archive (Near Eastern History) Est.

[Piksa Kredit Lain long pes 25]

Pictorial Archive (Near Eastern History) Est.

[Piksa Kredit Lain long pes 25]

Garo Nalbandian