Mesaia i Stap na Mekim Wok King
“Dispela Jisas, nau God i kisim em na em i lusim yupela na i go antap long heven, em bai i kam bek gen long wankain pasin olsem nau yupela i lukim em i go long heven.”—APOSEL 1:11.
1, 2. (a) Taim ol aposel i bel hevi long Jisas i lusim ol, olsem wanem tupela ensel i mekim gut bel bilong ol? (b) Yumi laik save long wanem ol askim?
ELEVENPELA man i sanap long arere bilong maunten Oliv na ol i lukluk i go antap. Nau tasol Krais Jisas i bin lusim ol i go antap na klaut i haitim em. Ol i bin stap wantaim em inap sampela yia, na ol i bin luksave olsem em i Mesaia tru. Ol i bin lukim ol man i kilim em i dai, na ol i bin kisim bikpela amamas long taim em i kirap bek. Tasol nau em i go pinis, olsem na ol i bel hevi i stap.
2 Wantu tupela ensel i kamap na tokim ol: “Yupela man bilong Galili, bilong wanem yupela i sanap nating na lukluk i go long skai? Dispela Jisas, nau God i kisim em na em i lusim yupela na i go antap long heven, em bai i kam bek gen long wankain pasin olsem nau yupela i lukim em i go long heven.” (Aposel 1:11) Dispela tok i mekim gut bel bilong ol. Nau ol i save, Jisas i no givim baksait long ol samting long graun. Em bai kam bek gen, olsem na ol i amamas. Long nau tu planti milion man i gat bikpela tingting long tok promis bilong Krais bai kam bek, tasol planti ol i no klia long dispela samting. Em bai kam bek olsem wanem? Wanem taim em bai i kam? Yumi yet i mas mekim wanem?
Pasin Bilong Krais Long Kam Bek
3. Planti man i ting olsem wanem long Krais i kam bek?
3 Wanpela buk (An Evangelical Christology) i tok, taim Krais i kam namba tu taim (parousia) em bai kirapim kingdom bilong God bilong i stap long olgeta taim bihain. Na planti man i ting, taim Krais i kam bek, ol man bai lukim em long ai bilong ol. Ol i tingim wanpela tok long Kamapim Tok Hait 1:7 i tok: “Lukim. Em i stap namel long ol klaut na i kam, na olgeta man bai i lukim em long ai bilong ol yet. Olgeta man i bin sutim em long spia samting, ol tu bai i lukim em.” Dispela tok em i tok piksa, o olsem wanem?
4, 5. (a) Olsem wanem yumi save Kamapim Tok Hait 1:7 em i tok piksa tasol? (b) Jisas yet i tok wanem na yumi save Kamapim Tok Hait 1:7 em i tok piksa tasol?
4 Ol tok bilong Kamapim Tok Hait i olsem “tok i stap hait.” (KTH 1:1) Olsem na dispela tok long “olgeta man bai i lukim” Krais i kam bek, em i tok piksa tasol. Long wanem, “olgeta man i bin sutim em long spia,” yu ting ol inap lukim Krais i kam bek? Ol i no inap, a? Bipo yet ol i dai pinis! Na ol ensel i tok, Krais “bai i kam bek gen long wankain pasin olsem” ol i lukim em i go. Na taim “em i go,” hamas man i lukim? I no planti, a? Liklik lain bilong em yet tasol. Na ol i no bin lukim em i go antap olgeta long heven, nogat. Klaut i pasim ai bilong ol. Na taim em i kamap pinis long heven na i go insait, em i wanpela spirit na ai bilong man i no inap lukim em. (1 Korin 15:50) Ol aposel i lukim Jisas i lusim graun, na ol i no lukim em i kisim pinis heven na bungim Papa bilong em Jehova. Ol i lukim dispela samting long tingting bilong ol tasol—ol i bilip tru long en na i olsem ol i lukim.—Jon 20:17.
5 Baibel i tok, taim Jisas i kam bek em bai kam long wankain pasin olsem long taim em i bin i go long heven. Na klostu long taim em i laik i dai, em yet i tok: “Liklik taim na bai ol manmeri bilong graun i no lukim mi moa.” (Jon 14:19) Na em i bin tok: “Taim kingdom bilong God i kam, bai i no inap ol samting i kamap . . . na ol manmeri i lukim long ai.” (Luk 17:20) Orait, olsem wanem long dispela tok, “olgeta man bai i lukim em long ai bilong ol”? Pastaim yumi mas save long wanpela hap tok Grik Jisas i kolim long taim em i toktok long em bai i “kam bek gen.”
6. (a) Bilong wanem dispela tok “kam bek” em i no insait tru bilong tok Grik pa·rou·siʹa? (b) Olsem wanem yumi ken save pa·rou·siʹa i makim wanpela hap taim inap planti yia?
6 Krais i no “kam bek” tasol. Ol i bin tanim dispela tok Grik pa·rou·siʹa olsem “kam bek” o “kamap,” tasol insait tru bilong en i olsem “i kam i stap” o “i stap wantaim.” Planti saveman i ting dispela tok i makim Jisas i kam na em i stap. I olsem long taim wanpela bikman i kam long ol man: Em i no kam na wantu i go pinis; nogat; em i kam na i stap inap long wanpela hap taim na em i mekim sampela wok samting. Long Matyu 24:37-39 Jisas i tok, “taim Pikinini Bilong Man i kamap” [pa·rou·siʹa] ol samting bai stap olsem long “taim bilong Noa,” em taim nogut na Tait Wara i pinisim ol pasin nogut long graun. Inap planti yia Noa i bin wokim bot na em i toksave long ol man long bikpela Tait Wara bai kam na pinisim pasin nogut bilong ol. Na i olsem tasol long taim Krais i kam bek na i stap. Em wanpela hap taim inap planti yia, na bihain bikpela bagarap bai painim ol man bilong dispela graun.
7. (a) Olsem wanem yumi save ol man i no inap lukim Jisas i kam bek? (b) Long wanem taim ol man bai i “lukim em long ai bilong ol”?
7 Ol man i no inap lukim Jisas i kam bek [pa·rou·siʹa], olsem na em i mas kolim planti samting olsem mak bilong makim taim em bai kam bek na i stap, na bai lain bilong em i ken lukim ol dispela mak na ol i ken save em i kam bek pinis na i stap.a Tasol taim em i kirap bagarapim olgeta wok Satan i bin kamapim, “olgeta man bai i lukim em long ai bilong ol yet,” na ol birua bilong em bai save, tru tumas Krais i stap king.—Lukim Matyu 24:30; 2 Tesalonaika 2:8; KTH 1:5, 6.
Em Bai Kirap Long Wanem Taim?
8. Taim Krais i kam bek, wanem samting i mas kamap pastaim? Dispela samting i bin kamap we?
8 Long taim bilong Mesaia i mas kam bek, long heven Jehova i mas givim wok king long em pastaim, na dispela bai truim planti tok profet. (2 Samuel 7:12-16; Aisaia 9:6, 7; Esekiel 21:26, 27) Jisas i bin tok, taim em i kam i stap em bai mekim wok king. Em i mekim sampela tok piksa na i tok, em i olsem wanpela bikman i lusim lain wokboi bilong em na i go long wanpela “longwe ples” na em i kisim wok “king.” Em i bin givim dispela tok piksa long ol aposel bilong em, long wanem, “ol i ting nau tasol kingdom bilong God bai i kamap ples klia.” (Luk 19:11, 12, 15; Matyu 24:3; 25:14, 19) Wok king bilong em i no bilong dispela taim em i bin i stap long graun, nogat. Em i mas i go long heven pastaim, em dispela “longwe ples.” Orait, wanem taim em bai kisim wok king?
9, 10. Wanem ol samting i bin kamap na i makim Krais i stap king? Wanem taim em i bin kamap King?
9 Ol disaipel i askim Jisas: “Wanem taim ol dispela samting bai i kamap? Wanem mak bai i kamap pastaim, na mipela i ken save, yu laik i kam bek na dispela graun i laik pinis?” Jisas i kolim ol samting bai kamap bihain na i bilong makim taim em i kam bek. (Matyu sapta 24; Mak sapta 13; Luk sapta 21; 2 Timoti 3:1-5; KTH sapta 6) Ol dispela samting i makim taim bilong hevi, em taim bilong pait, na pasin nogut, na ol famili i bruk, na i gat planti sik na hangre na guria. Ol dispela samting i bin kamap long olgeta hap, na i truim ol tok profet Jisas i bin kolim bilong makim taim bilong em bai kam bek na i stap king.
10 Ol saveman i tok, long yia 1914 planti senis i kamap long graun, na bihain long dispela yia ol samting i wok long i go nogut long olgeta hap. Ol dispela samting i bin kamap long graun em i truim tok profet bilong Baibel na i makim yia 1914 em taim bilong Jisas i kamap King long heven. Na wanpela tok profet long Daniel sapta 4 i makim yia 1914 em taim bilong Jehova i givim wok King long Jisas.
Olsem Wanem i Gat Taim Bilong Planti Hevi?
11, 12. (a) Olsem wanem i hatwok long sampela man i bilip long Mesaia i bosim ol samting? (b) Yumi ken tok piksa long wanem samting na i makim taim bihain long taim Jisas i kamap King?
11 Tasol sampela i ting, ‘Sapos Mesaia i kirap long bosim ol samting, olsem wanem i gat planti hevi i stap? Ating em i no gat strong, a?’ Orait, yumi ken mekim liklik tok piksa: Wanpela bikman i bosim kantri, na em i paulim ol lo, na bihain i gat eleksen na ol i makim wanpela gutpela man bilong senisim em. Tasol nupela bos i no inap kirap wantu na bosim kantri. Sampela mun i mas lus pastaim na bai em i ken stretim sampela samting na nau em i ken kirap long mekim wok bilong em. Olsem na insait long ol dispela mun, nupela bos i no ken stretim wantu olgeta hevi em olpela bos i bin kamapim. Pastaim em bai stretim ol samting long nambawan ofis bilong gavman na putim long kot olpela bos wantaim ol man nogut i bin helpim em long mekim ol wok nogut. Olsem na taim em i kirap tru long bosim kantri em inap mekim gutpela wok. Tasol long ol dispela mun hia em taim olpela bos i gat hap strong yet, em bai givim bel long pulim ol samting na bai em yet i ken kisim.
12 Na i olsem tasol long taim Krais i kam i stap, em taim bilong pa·rou·siʹa bilong em. Kamapim Tok Hait 12:7-12 i tok, taim Krais i kamap King long heven, namba wan wok bilong em i bilong rausim Satan wantaim ol spirit nogut na tromoi ol i kam daun long graun, olsem klinim heven, em as ples bilong Gavman bilong Em. Krais i winim pinis Satan, tasol i gat “sotpela taim” i stap yet na Krais i mas wet pastaim bambai em i ken bosim olgeta samting hia long graun. Na Satan i olsem dispela olpela bos nogut em i wok strong long pulim ol samting i go long em yet, olsem pulim ol man i bihainim em na bai ol i lusim Jehova na dispela King Em i bin makim.
13. Baibel i tok wanem long hevi i mas kamap long graun long taim Krais i kamap King?
13 Baibel i stori long taim Mesaia i kamap King na i tok: “Yu graun, . . . yupela lukaut. Bikpela hevi i laik kamap long yupela.” (KTH 12:12) Na Song 110:1, 2, 6 tu i toktok long Mesaia bai ‘bosim ol birua bilong em,’ na “bekim rong,” na “daunim ol king long olgeta hap bilong graun.” Em bai pinisim olgeta wok nogut Satan i bin kamapim.
Taim Mesaia i Bosim Graun
14. Taim Mesaia i pinisim ol pasin nogut Satan i bin kamapim, Mesaia bai mekim wanem?
14 Krais Jisas bai stap King na Mesaia, na taim em i pinisim ol wok nogut bilong Satan na ol man i helpim dispela wok nogut, em bai truim ol tok profet i toktok long taim em i stap King inap 1,000 yia. Aisaia 11:1-10 i stori long gutpela wok em bai i mekim. Ves 2 i tok: “Spirit bilong Bikpela bai i kam i stap long em na givim em gutpela save na tingting, na bai em i stap strongpela king na i gat gutpela tingting na save bilong bosim ol manmeri.”
15. Taim Mesaia i stap King, em bai mekim wanem long bikpela strong bilong em?
15 Taim em i bin i stap long graun, Jehova i bin givim strong long em na bai em i ken wokim ol mirakel, tasol taim em i stap King em bai holim bikpela strong moa, na olsem bilong pastaim, em bai i gat bikpela laik long helpim ol man. (Matyu 8:3) Ol mirakel em i wokim bipo i makim samting em bai mekim long bihain. Em bai oraitim olgeta sikman na aipas na yaupas na man em skin bilong em i bagarap na ol lek nogut na baksait i bruk, na bai sik bilong ol i pinis olgeta. (Aisaia 35:5, 6) Bai i gat planti kaikai, na i no inap man i ken hangre. (Song 72:16) Na Jehova i tingim yet planti milion man i dai pinis, olsem na Jisas bai mekim wok long bikpela strong bilong em na em bai kirapim bek ol dispela man na ol inap i stap oltaim long Paradais! (Jon 5:28, 29) Tasol maski dispela bikpela King Mesaia i gat bikpela strong, em bai bihainim pasin daun na “stap aninit long [Jehova], na dispela pasin bai i mekim em i amamas.”—Aisaia 11:2, 3.
16. Mesaia bai mekim wanem kain wok jas? Olsem wanem wok jas bilong em i narapela kain long wok jas bilong ol man bilong graun?
16 Na dispela King em i nambawan gutpela Jas tu. “Long taim em i harim kot em i no inap skelim man long ol toktok em i harim na long ol samting em i lukim long ai tasol. Nogat.” Ol man bilong graun i no save mekim olsem, a? Ol samting ai bilong ol i lukim na yau bilong ol i harim na ol save ol i bin kisim, taim ol i stap jas ol i skelim man long dispela tasol. Olsem na man inap grisim o giamanim jas na majistret o paulim tingting bilong ol, na kot ol i mekim i no stret. Maniman inap baim loya bilong helpim em long winim kot, tasol rabisman nogat. Tasol kot bilong Mesaia i no ken olsem! Em i save long tingting i stap long bel bilong ol man, na em bai skelim ol long dispela. I no inap wanpela samting i stap hait long ai bilong em. Long olgeta taim em bai bihainim ol pasin i stret wantaim pasin sori na marimari.—Aisaia 11:3-5.
Mesaia Bai Helpim Yu Gut
17, 18. (a) Aisaia 11:6-9 i makim wanem ol gutpela pasin bai kamap bihain? (b) Tasol dispela tok i makim husat? Bilong wanem em i makim olsem? (c) Wanem narapela samting bai kamap bilong truim dispela tok profet?
17 Olsem Aisaia 11:6-9 i tok, taim Mesaia i stap King em bai senisim planti samting na mekim bikpela samting bilong helpim ol man. Long nau i gat ol animal nogut i save kaikai man, olsem bea, na wel dok, na lepat, na laion, na snek, tasol bihain ol wantaim ol animal bilong ples na ol pikinini bilong ol man bai stap gut wantaim. Long wanem, “long olgeta ples antap long maunten bilong Bikpela, olgeta samting bai i stap gut wantaim. Bai i no gat wanpela i mekim nogut long narapela, long wanem, olgeta samting long graun bai i save tru long Bikpela. Dispela save bai inapim olgeta hap graun olsem solwara i inapim mak bilong en olgeta.”
18 Tasol ol animal i no inap “save tru long Bikpela,” olsem na dispela tok i makim ol man. Taim Mesaia i stap king, ol man bai skul na kisim save long Jehova na long pasin bilong em na long i stap gut wantaim na mekim pasin sori na givim gutnem long ol narapela narapela. Taim Paradais i stap, Mesaia bai helpim ol man long kamap gutpela olgeta long skin na long pasin bilong ol, na ol bai lusim ol pasin nogut olsem bilong ol dispela animal nogut yumi bin kolim. Na long Paradais ol man na animal bai stap gut wantaim na i no ken birua moa.—Lukim Stat 1:28.
19. Long nau wok king bilong Mesaia i mekim wanem long ol man?
19 Na yumi mas save, Mesaia i stap king long nau. Long nau lain bilong em i skul long pasin bilong i stap gut wantaim, na ol i truim dispela tok profet bilong Aisaia 11:6-9. Inap 80 yia pinis Jisas i bin truim tok bilong Aisaia 11:10, i tok: “Long dispela taim Bikpela i makim, nupela king bilong lain bilong Jesi bai i stap olsem mak bilong bungim olgeta lain manmeri. Ol bai i kam long em, na taun bilong en bai i gat biknem.” Long nau planti man i tanim bel na ol i bilip long Mesaia, long wanem, nau em “i stap olsem mak” na bai ol i ken kam long em. Em i gat lain bilong tokaut long ol man na bai ol i ken save long em. Bipo em i bin tok long dispela wok bai kamap bilong autim tok bilong Kingdom long olgeta hap, taim pasin nogut bilong graun i no pinis yet.—Matyu 24:14.
20. Lain bilong Mesaia i no ken mekim wanem? Bilong wanem ol i no ken mekim olsem?
20 Olsem na dispela tok long Krais i kam pinis na i stap na em i holim bikpela strong bilong King, dispela tok i no tok nating, nogat. Em i samting tru. Wok King bilong em i senisim pasin bilong planti milion man, olsem Aisaia i tok, na ol i lusim pasin nogut bilong graun na ol i kamap lain bilong Kingdom. Olsem wanem long yu? Yu insait long dispela lain? Sapos olsem, orait, givim bel long mekim wok bilong dispela King! No ken les long wetim Mesaia na no ken bihainim ol man bilong graun i tok: “Em i bin tok olsem em bai i kam bek gen, a? Orait em i stap we?” (2 Pita 3:4) No ken mekim olsem, long wanem, Jisas i tok: “Ol manmeri i stap strong inap long las de, God bai i kisim bek ol.”—Matyu 24:13.
21. Yumi ken mekim wanem na bai yumi no les long wetim Mesaia i stretim ol samting?
21 Long olgeta de yumi wok long i kam klostu klostu long taim bilong Jehova bai tokim Pikinini bilong em long kirap mekim save long ol man bilong graun na bai ol i ken pilim tru olsem em i kam pinis na i stap. Yu no ken les long wetim dispela samting. Yu mas tingting long wok Mesaia bilong Jisas na gutpela wok King bilong em. Tingting tu long God Jehova, em i As bilong dispela bikpela wok Mesaia em Baibel i stori long en. Sapos yu mekim olsem, bai yu kisim wankain tingting olsem bilong aposel Pol, em i tok: “Olaman! Ol gutpela pasin bilong God na tingting na save bilong en i pulap tru, na i daun tumas olsem solwara!”—Rom 11:33.
[Ol Futnot]
a Long 1864, R. Govet i tok: ‘Taim bilong Jisas i kam bek, dispela samting i stap hait, olsem na em i mas kolim ol mak na bai ol man i ken save. Sapos yumi inap lukim long ai, i no gat wok long ol mak.’
Bai Yu Bekim Olsem Wanem?
◻ Krais i kam bek long wanem kain pasin?
◻ Olsem wanem yumi save ol man i no inap lukim pa·rou·siʹa bilong Krais long ai bilong ol? Olsem wanem yumi save pa·rou·siʹa i longpela taim liklik?
◻ Wanem taim Krais i bin kam bek? Yumi save olsem wanem?
◻ Mesaia i wanem kain King?
◻ Olsem wanem long ol man long taim Krais i stap King?
[Piksa long pes 15]
Ol aposel i tingim Jisas bai kam bek, na dispela i bikpela samting bilong ol
[Piksa long pes 17]
Taim Jisas i stap King long heven em bai wokim ol bikpela mirakel long olgeta hap
[Kredit Lain]
Earth: Based on NASA photo