Mekim Wok Wasman Wantaim Bikpela Man i Bin Wokim Yumi
“Bikpela em i wasman bilong mi. Olsem na mi no inap sot long wanpela samting. Em i givim mi nupela strong. Na em i save bringim mi long ol gutpela rot, olsem em i tok bipo long mekim.”—SONG 23:1, 3.
SONG 23 em wanpela singsing bilong Devit, na i mekim gut bel bilong planti man em ol i bel hevi na i les long ol pasin nogut. Ves 6 i tok: “Bikpela, bai yu lukautim mi gut, na olgeta de mi stap laip bai yu marimari long mi. Na bai mi stap oltaim oltaim long haus bilong yu.” Yu laik i stap olsem? Yu laik i stap oltaim long haus bilong Jehova na lotu long em na stap wantaim lain bilong em? Jehova em i “dispela Wasman Bilong Sipsip i save lukautim gut” yumi na bai yumi inap mekim dispela samting.—1 Pita 2:25.
2 Jehova em i Man bilong wokim dispela “nupela skai na nupela graun,” na em i Nambawan Wasman bilong lain Kristen, olsem “lain bilong God.” (2 Pita 3:13; 1 Timoti 3:15) Em i gat bikpela laik long lukautim gut lain bilong em, olsem Aisaia 40:10, 11 i tok: “Lukim. God, Bikpela i kam wantaim bikpela strong bilong en. Em i daunim pinis ol birua na em i bringim ol manmeri bilong en i kam olsem ol gutpela samting em i bin winim long pait. Em i save was gut long ol lain manmeri bilong en, olsem wasman bilong sipsip i save lukautim ol sipsip bilong en. Wasman i save putim ol pikinini sipsip long bros na karim wokabaut. Na em i save wokabaut isi na soim rot long ol sipsip i gat liklik pikinini.”
3 Dispela “ol lain manmeri” i makim tu ol Kristen bilong longtaim na “ol pikinini sipsip” nau ol i kam insait long tok i tru, olsem dispela bikpela lain i bin kisim baptais long Afrika na Isten Yurop. Jehova i kisim ol i kam long em na em i lukautim gut ol. Bipo ol i bin stap olsem ol sipsip i lus, tasol nau ol i stap pinis wantaim gutpela God na Wasman bilong ol, na em i lukautim ol.
Wasman Helpim
4 Krais Jisas em i “gutpela wasman bilong ol sipsip” na em i helpim bilong Papa bilong em long heven, na em i save mekim pasin sori long “ol sipsip.” Em i bin givim laip bilong em bilong helpim “liklik lain sipsip” em God i bin makim ol, na bilong helpim “ol arapela sipsip” tu, em bikpela lain manmeri bilong nau. (Luk 12:32; Jon 10:14, 16) Bikpela Wasman God Jehova i tokim ol dispela sipsip olsem: “Mi God, Bikpela mi tok, bai mi skelim . . . pasin bilong ol sipsip bilong mi na tilim ol gutpela sipsip i go long hap na tilim ol sipsip nogut long hap. Na bai mi makim wanpela man bilong lain bilong wokman bilong mi Devit, na bai mi putim em i stap wasman bilong ol sipsip bilong mi na bai em i ken lukautim ol gut. Na mi Bikpela yet, bai mi stap God bilong ol. Na dispela man bilong lain bilong Devit bai i stap king bilong ol. Dispela em i tok bilong mi God, Bikpela.”—Esekiel 34:20-24.
5 Dispela tok, “wanpela man bilong lain bilong wokman bilong mi Devit,” dispela i makim Krais Jisas, em “tumbuna” pikinini bilong Devit na em i bilong kisim wok king bilong Devit. (Song 89:35, 36) Nau em taim bilong skelim ol man, na dispela Wasman helpim na King, em Jisas, em i bosim dispela wok bilong brukim ol man i go tupela lain, olsem lain “sipsip” na lain “meme.” (Matyu 25:31-33) Jisas em i dispela wasman i save givim kaikai long ol sipsip bilong em. Nau yumi lukim truim bilong dispela tok profet i kamap. Ol gavman i toktok long kamapim gutaim na bungim gut olgeta lain na bai ol i stap wanbel, tasol Wasman Jisas i mekim pinis dispela samting. Long rot bilong bikpela wok bilong autim tok long ol man bilong kain kain tok ples, oganaisesen bilong God i bungim gut ol man bilong olgeta lain ol i olsem sipsip na ol i kamap wanbel na pas gut wantaim. I no gat narapela lain inap mekim dispela wok.
6 Wok bilong autim tok bilong Kingdom i wok long i go kamap long ol nupela hap, na “wokboi i gat gutpela tingting,” em lain remnan, ol i mekim wok olsem Wasman Jisas i makim bilong ol long givim “kaikai long ol” sipsip “long taim” stret bilong givim. (Matyu 24:45) Sosaiti i gat 33 brens long ol narapela narapela hap em ol i save wokim ol buk na nius samting, na long nau ol i mas wokim moa yet, long wanem, ol man i singaut long planti ol buk na nius i kamapim tok bilong Baibel.
7 Lain Bilong Bosim Ol Witnes Bilong Jehova ol i wok strong long stiaim wok bilong tanim gut tok bilong ol buk na nius bilong Baibel i go long 200 tok ples, na sapos ol dispela buk samting i no stap long tok ples bilong sampela lain, ol Witnes bai wok strong long wokim long tok ples bilong ol. Dispela wok ol Witnes i mekim i stret wantaim tok Jisas i givim long lain bilong em, olsem: “Bihain Holi Spirit bai i kam i stap long yupela, na yupela bai i kisim strong. Na yupela bai i autim tok bilong mi . . . i go inap long olgeta hap bilong graun.” (Aposel 1:8) Na ol i tanim pinis wanpela gutpela Baibel (The New World Translation of the Holy Scriptures) i go long 14 tok ples, na ol i wok long tanim i go long 16 tok ples moa bilong ol Yurop na Afrika na ol hap bilong Saina.
‘God i Mekim Ol i Stap Bel Isi’
8 Krais i rot bilong Jehova long wokim “kontrak” wantaim lain sipsip bilong em na bai ol i ken i stap gut wantaim na i stap bel isi. (Aisaia 54:10) Ol i bilip long blut bilong Jisas bai helpim ol, olsem na ol inap wokabaut long lait. (1 Jon 1:7) ‘God i mekim ol i stap bel isi, na ol i pas gut wantaim Krais Jisas, na bel na tingting bilong ol i stap gut.’ (Filipai 4:7) Esekiel 34:25-28 i stori long Jehova i bringim ol sipsip bilong em i kam insait long paradais bilong spirit, na ol i stap gutpela tru na kamapim gutpela wok. Dispela gutpela Wasman bilong ol i tok: “Bai mi kisim bek ol manmeri bilong mi na bai ol i lusim ples ol birua i bin kalabusim ol long en, na bai mi bringim ol i kam bek. Na bai ol i stap gut long graun bilong ol yet. Na bai ol i save gut olsem, mi yet mi Bikpela. Na ol haiden man bilong ol arapela kantri, ol bai i no inap mekim nogut long ol gen. . . . Bai ol manmeri i stap gut na i no gat man bai i mekim ol i pret.”
9 Long nau planti Witnes Bilong Jehova i “lusim ples ol birua i bin kalabusim ol long en,” na nau ol i stap fri na ol i ken mekim bikpela wok bilong autim tok. Jehova i lukautim gut yumi, na rot i op long yumi na bai yumi ken mekim dispela wok bilong autim tok. Olsem na maski yumi stap long wanem hap bilong graun, yumi mas givim bel long inapim dispela wok Jehova i givim long yumi. Na Jehova bai lukautim yet yumi long taim bilong bikpela hevi tru em klostu bai kamap!—Daniel 12:1; Matyu 24:21, 22.
10 Jehova i makim sampela ol nambatu wasman bilong helpim Gutpela Wasman Jisas long lukautim lain bilong Jehova long taim bilong dispela bikpela hevi bai kamap, em taim bilong Jehova i bagarapim ol man nogut. Baibel i tok, ol dispela nambatu wasman i olsem “7-pela sta long han sut bilong” Krais Jisas em i bosim ol wantaim wok wasman ol i mekim. (KTH 1:16) Pol i bin tokim sampela olsem: “Yupela i mas was gut long yupela yet, na long olgeta manmeri bilong [kongrigesen] bilong God, em ol dispela manmeri em i bin baim long blut bilong Pikinini bilong em yet. Na Holi Spirit i makim yupela i stap wasman bilong ol dispela sipsip bilong God.” (Aposel 20:28) Long nau long olgeta hap bilong graun i gat planti tausen wasman em ol i stap long 69,557 kongrigesen!
Wasman i Mas Go Pas!
11 Ol dispela wasman i mas go pas long autim tok long ol hap em ol Witnes i autim tok planti taim long en. Ol wasman i mekim gutpela wok long strongim ol pablisa na bai ol i no les. Wanpela rot bilong ol long mekim olsem, em ol i kirapim ol pablisa long mekim wok painia haptaim o painia oltaim, na planti wasman tu i save mekim dispela wok. Na sampela pablisa i no inap mekim wok painia, tasol ol i amamas long autim tok, maski ol man i no harim tumas, na dispela i strongim ol narapela pablisa long mekim olsem. (Song 100:2; 104:33, 34; Filipai 4:4, 5) Pasin nogut na pait i go bikpela, tasol ol man i gat gutpela bel na ol i olsem sipsip, ol i harim gutpela tok bilong Kingdom na nau ol i wetim Kingdom i stretim ol samting.—Matyu 12:18, 21; Rom 15:12.
12 Sampela kongrigesen i sot long wasman bilong lukautim ol. Long Isten Yurop na sampela hap moa, planti nupela kongrigesen i kamap na ol i no gat wasman, na sampela ol narapela brata i lukautim ol kongrigesen, tasol ol i no save tumas long mekim dispela wok, na ol i mas lain long lukautim ol nupela man ol i kapsait i kam insait long ol kongrigesen. Long Brasil, na Meksiko, na Saier, na sampela kantri moa, lain Witnes i go bikpela hariap, na ol Witnes i olsem nupela yet ol i bosim wok bilong autim tok na lainim ol narapela nupela Witnes long autim tok. Ol painia i mekim gutpela wok, na ol sista i lainim ol nupela sista long pasin bilong autim tok. Jehova i givim spirit bilong em long ol na mekim gut long ol, na gutpela wok i kamap na lain bilong ol i wok long i go bikpela.—Aisaia 54:2, 3.
13 Long ol kantri em ol Witnes i bin i stap longtaim long en, na long ol kantri em gavman i pinisim tambu long ol, na long ol nupela kantri, ol i ken tingim tok bilong Jisas, em i bin tok: “Planti kaikai tumas i mau pinis long gaden, tasol i no gat planti wokman i stap bilong kisim. Olsem na yupela i mas beten long Papa bilong gaden, bai em i salim ol wokman i go bungim kaikai bilong en.” (Matyu 9:37, 38) Na yumi mas beten tu long Jehova long kamapim planti wasman moa. Yumi save em inap mekim olsem, long wanem, bipo em i bin mekim. Long taim bilong Namba 2 Pait, na paslain long en tu, ol gavman nogut i bin daunim lain Witnes Bilong Jehova, tasol ol i beten long em, na em i stretim na mekim gut long oganaisesen bilong em na em i kamapim ol wasman. Baibel i tok profet long dispela olsem: “Taim ol Asiria i kam long graun bilong yumi na i brukim ol banis bilong ol strongpela taun bilong yumi, bai yumi makim ol strongpela lida tru bilong bosim ol soldia na bai yumi salim ol i go pait long ol birua.” Em nau, Jehova i kamapim planti strongpela wasman bilong lukautim ol wok.—Maika 5:5.
14 Ol brata i baptais pinis ol i mas wok long kamap strong na bai ol inap holim sampela wok insait long kongrigesen. (1 Timoti 3:1) I no gat bikpela taim moa i stap. Pinis i klostu. Habakuk 2:3 i tok: “Taim bilong ol dispela samting i mas kamap, em i no yet. . . . Tasol i no longtaim na dispela samting mi laik soim yu long en, em bai i kamap. Yu ting bai em i no inap kamap kwik, tasol yu mas wet liklik na em bai i kamap.” Yupela ol brata, yupela mas wok strong long winim ol mak bilong kamap wasman taim pinis i no yet.—Taitus 1:6-9.
Ol i Mas Aninit Long God
15 Bilong mekim gutpela wok insait long oganaisesen bilong Jehova na bai oganaisesen i kamap strong moa, lain bilong Jehova i mas i stap aninit long em. Ol i mas harim na bihainim tok bilong em na stap daun long em na larim em i bosim ol; olsem bai ol i stap “lain manmeri i holi.” (1 Pita 2:9; Aisaia 33:22) Olgeta Kristen tru ol i mas bihainim ol tok na lo bilong Baibel long olgeta samting ol i mekim.
16 Bilong mekim olsem, ol “i mas kamap ol nupela manmeri, em ol manmeri God i mekim ol i kamap nupela na ol i stap olsem God yet, long wanem, pasin bilong ol i stretpela olgeta na i holi tru.” Ol stretpela lo bilong God long Baibel i mas bosim tingting na pasin bilong Kristen. Em i mas bihainim ol tok na lo bilong Jehova. Pol i tok: “God i save laikim yupela tru, na yupela i stap pikinini bilong em. Olsem na yupela i mas bihainim ol pasin em yet i save mekim.” (Efesus 4:24–5:1) Yumi mas i stap olsem pikinini bilong God na bihainim tok na pasin bilong em. Sapos yumi mekim olsem, dispela bai kamapim klia olsem God i bosim tru yumi!—Lukim tu Kolosi 3:10, 12-14.
17 Wanem namba wan pasin bilong God em yumi mas bihainim? Aposel Jon i kolim long 1 Jon 4:8, em i tok: “God yet em i as bilong dispela pasin bilong laikim ol arapela.” Na long ves 16 em i kolim gen na i tok: “God i laikim yumi tru, na dispela pasin bilong en i stap long laip bilong yumi.” Bikpela Wasman Jehova i As bilong pasin bilong laikim tru ol narapela. Sapos ol wasman i bihainim dispela pasin bilong Jehova ol bai mekim pasin sori long ol sipsip bilong em.—Lukim 1 Jon 3:16, 18; 4:7-11.
18 Bikpela God i laik bai Moses i ken save gut long em, olsem na em i tokim Moses: “Mi Bikpela, mi Bikpela. Mi God na mi as bilong marimari na sori. Na mi no save belhat kwik. Mi save laikim tru olgeta manmeri, na mi save bihainim olgeta tok bilong mi. Mi save laikim tumas planti tausen lain manmeri, olsem mi promis pinis, na mi save lusim ol kain kain sin na bikhet pasin bilong ol. Tasol mi save mekim save long ol man i gat asua. Na bai mi mekim save long ol pikinini bilong ol na ol tumbuna pikinini i kamap bihain inap long namba 3 na namba 4 lain.” (Kisim Bek 34:6, 7) Em nau, Jehova i tokaut strong olsem pasin bilong sori na laikim tru ol man, em namba wan pasin bilong em, tasol em i tokaut tu olsem em bai givim strafe long ol man nogut.
19 Ol brata i holim bikpela wok insait long oganaisesen bilong Jehova ol i mas mekim olsem wanem? Jisas i bin kolim rong bilong ol saveman bilong lo na ol Farisi olsem: “Ol i save pasim karamap i hevi tumas na putim antap long sol bilong ol man, na ol man i hatwok tru long karim. Tasol ol yet i no laik putim pinga tasol bilong helpim ol man long karim.” (Matyu 23:4) Ol dispela pris i no gat pasin sori. Tasol ol wasman i mas bihainim lo bilong God long Baibel na ol i no ken putim planti lo moa long ol sipsip na givim hevi long ol. (Lukim Matyu 15:1-9.) Ol i mas mekim pasin sori long ol man, tasol ol i mas was gut na bai pasin nogut i no ken stap insait long kongrigesen.—Lukim Rom 2:11; 1 Pita 1:17.
20 Ol wasman i save, Jisas i bin putim lain “wokboi i gat gutpela tingting” na givim wok long ol na bai ol i ken bosim olgeta wok samting bilong Jisas hia long graun. Spirit holi i stiaim tingting bilong ol na ol i makim ol elda bilong lukautim ol sipsip long ol kongrigesen. (Matyu 24:3, 47; Aposel 20:28) Olsem na yumi mas daun long dispela “wokboi i gat gutpela tingting,” na daun long oganaisesen bilong Jehova, na daun long ol elda bilong kongrigesen em dispela “wokboi” i bin makim, na yumi mas harim na bihainim tok bilong ol.—Hibru 13:7, 17.
21 Jisas yet i makim gutpela pasin yumi mas bihainim. Long olgeta taim em i daun long Jehova na em i bihainim tok bilong em. Jisas i tok: “Mi no inap mekim wanpela samting long tingting bilong mi yet. Mi save bihainim tok mi kisim long Papa na mi skelim pasin bilong ol manmeri. Na kot bilong mi em i stret, long wanem, mi no save bihainim laik bilong mi yet. Nogat. Mi bihainim laik bilong Papa, em i bin salim mi na mi kam.” (Jon 5:30) Ol wasman i save wok aninit long Bikpela Krais Jisas, olsem na ol i mas i gat wankain tingting na pasin daun olsem bilong em yet. Oltaim ol i mas larim ol tok bilong Baibel i stiaim tingting bilong ol na givim save na gutpela tingting long ol.—Matyu 4:1-11; Jon 6:38.
22 Yupela ol man i baptais pinis, yupela i mas wok long kamap strong long spirit na bai yupela ken lukautim sampela wok insait long kongrigesen. Yupela ol gutpela sipsip, yupela mas daun long ol dispela wasman na bihainim pasin bilong God na bilong Jisas long mekim pasin sori long ol man. Ol wasman na ol narapela sipsip wantaim ol i ken amamas long ol i bin bihainim tok bilong Jisas olsem: “Yupela ol man i save hatwok tru na i karim ol bikpela hevi, yupela olgeta kam long mi na bai mi givim malolo long yupela. Yupela kisim save long mi na aninit long tok bilong mi, olsem yupela i kisim plang ol i save putim long nek bilong ol bulmakau bilong ol i ken pulim ol samting. Yupela kisim save long mi, long wanem, mi save mekim pasin isi long ol man na mi save daunim mi yet. Na bai ol samting i no ken givim hevi long yupela na bai yupela i kisim malolo. Dispela plang mi putim long nek bilong yupela, em i isi long karim, na samting mi givim yupela bilong karim, em i no hevi.”—Matyu 11:28-30.
Yu Inap Bekim?
◻ Husat “ol sipsip” bilong Jehova? Husat sampela bilong ol?
◻ Long bipo, Jisas i mekim wanem olsem “gutpela wasman”? Na long nau em i mekim wanem?
◻ Olsem wanem ol nambatu wasman i ken lukautim gut ol sipsip?
◻ Yumi mas i stap olsem wanem long God?
◻ Ol Kristen i mas mekim wanem long lo na tok bilong God?
[Askim Bilong Stadi]
1. Wanem gutpela samting Jehova i mekim long yumi?
2, 3. (a) Jehova i mekim wanem bilong lukautim lain bilong em? (b) Husat moa i kam insait long “lain bilong God”?
4, 5. (a) Husat dispela “gutpela wasman”? Baibel i bin mekim wanem tok profet long em? (b) Jisas i bosim wanem wok? Wanem gutpela samting i kamap?
6, 7. “Wokboi i gat gutpela tingting” em i mekim wanem na bai ol sipsip i gat kaikai?
8. Jehova i wokim kontrak wantaim lain bilong em, olsem na nau ol i stap olsem wanem?
9. Rot i op long lain bilong God i ken mekim wanem?
10. Jehova i makim husat bilong helpim Krais Jisas long lukautim ol sipsip? Pol i givim wanem tok long sampela?
11. Sampela wasman i bin mekim wanem long hap em ol Witnes i autim tok long en planti taim pinis?
12. Wanem hevi i stap long ol hap em lain Witnes i go bikpela hariap? Olsem na ol i mekim wanem?
13. (a) Lain bilong Jehova i wok long i go bikpela tru, olsem na olgeta Witnes i mas beten long wanem samting? (b) Long taim bilong Namba 2 Pait na paslain long en, God i bin mekim wanem long taim ol i beten long em?
14. Oganaisesen i sot long wanem samting? Ol brata i mas mekim wanem?
15. Lain bilong Jehova i mas mekim wanem?
16. Olsem wanem ol i ken daun long Jehova?
17, 18. (a) Ol Kristen i mas bihainim wanem pasin bilong God? (b) Wanem namba wan pasin bilong Jehova, olsem em i bin tokim Moses long en? Tasol olsem wanem long man nogut?
19. Ol wasman Kristen i mas i gat wanem kain pasin?
20. Ol wasman i mas save long wanem ol samting?
21. Jisas i makim wanem gutpela pasin ol wasman i mas bihainim?
22. (a) Yumi olgeta i mas bihainim wanem pasin? (b) Jisas i tokim ol sipsip long mekim wanem?
[Piksa long pes 20]
Jehova i gutpela wasman, na em i lukautim gut ol sipsip
[Piksa long pes 23]
Sapos yumi bihainim pasin sori bilong God, i olsem yumi stap aninit long em