Askim
Ol Kristen i gat wanem wok long pasim ol samting i wok long bagarapim graun na wara na win?
Yumi ol Witnes Bilong Jehova i tingim tru ol planti samting long nau i wok long bagarapim graun. Yumi save, God i wokim graun bilong i stap klin na gutpela, na bai wanpela lain man i gutpela olgeta ol i ken sindaun long en. (Stat 1:31; 2:15-17; Aisaia 45:18) Yumi save tu olsem God i tok promis long em bai “bagarapim ol man i bin bagarapim graun.” (KTH 11:18) Olsem na i stret yumi mekim sampela wok bilong abrusim pasin bilong bagarapim graun. Tasol yumi mas bihainim gutpela tingting, nogut yumi larim pasin bilong lukautim graun i kamap olsem nambawan bikpela samting long tingting bilong yumi.
Ol samting ol man i mekim long olgeta de i save kamapim pipia. Olsem: Samting man i planim long gaden na redim bilong kaikai, planti taim dispela i kamapim pipia, tasol ating planti bilong ol dispela pipia inap sting na kamap graun gen. (Song 1:4; Luk 3:17) Taim Jisas i kirap bek na em i kukim pis long paia na bai ol disaipel bilong em i ken kaikai, ating dispela i kamapim sampela smok na sit bilong paia, na ol bun bilong pis i stap olsem pipia. (Jon 21:9-13) Tasol God i bin putim sampela samting long graun i gat strong bilong pinisim ol dispela kain pipia.
Yumi ol lain bilong God i no ken ting ol samting bilong graun na wara na win i samting nating tasol. Jehova i tokim lain bilong em bipo, ol i mas karamapim gut pekpek na bai graun i stap klin na sik i no ken kisim ol. (Lo 23:9-14) Yumi save, God bai bagarapim ol man i bagarapim graun, olsem na yumi no ken givim baksait long ol samting yumi yet i mas mekim bilong lukautim graun bilong yumi. Olsem: Yumi ken rausim gut pipia na ol samting i gat marasin nogut long en, na bihainim lo bilong gavman long dispela samting. (Rom 13:1, 5) Na sampela i save mekim wok long ol samting i no bilong bagarapim graun na wara na win.
Sapos gavman i no putim lo olsem, orait, ol samting Kristen i mekim bilong lukautim graun, em samting bilong ol wan wan. Olsem na nogut yumi strong tumas long bihainim wanpela tingting long dispela samting na yumi gat tok long samting ol narapela i mekim. Tingim tok bilong Jisas, em i tok: “Yupela i no ken skelim pasin bilong ol arapela na tok ol i man nogut. Nogut God i mekim wankain pasin long yupela tu. . . . Bilong wanem yu lukim liklik hap pipia i stap long ai bilong brata bilong yu, tasol yu no tingim bikpela plang i stap long ai bilong yu yet?” (Matyu 7:1, 3) Sapos yumi tingim gut dispela tok, orait dispela inap helpim yumi long tingim ol narapela bikpela samting.
Profet Jeremaia i tok: “Bikpela, mi save, mipela man i no inap bosim wokabaut bilong mipela yet na bihainim ol rot mipela i laikim.” (Jeremaia 10:23) Ol man i sakim dispela tok, olsem na long nau i gat “planti hevi nogut tru” i kamap, olsem 2 Timoti 3:1-5 i tok. Na tok God i mekim long Kamapim Tok Hait 11:18 i kamapim klia olsem ol man i no inap stretim olgeta bikpela hevi i laik bagarapim graun. Ating ol inap pasim sampela bagarap long sampela hap, tasol rot tru bilong pinisim pasin bilong bagarapim graun, em i stap long han bilong God.
Long dispela as yumi save mekim wok long strong na mani bilong yumi long helpim wok God yet bai mekim bilong pinisim ol dispela hevi. Taim yumi mekim olsem, yumi bihainim pasin bilong Jisas—taim em i mekim wok bilong em long graun, em i lusim bikpela hap taim long “autim tok tru.” (Jon 18:37) Jisas i no givim kaikai long olgeta man bilong graun na em i no wok long stretim olgeta hevi bilong ol man, na stretim pasin bilong bagarapim graun—em i wok long helpim ol man long save long rot tru bilong stretim ol hevi.—Jon 6:10-15; 18:36.
Tru, yumi laikim tumas ol narapela man na dispela i kirapim yumi long abrusim pasin bilong bagarapim graun na win na wara, tasol yumi wok yet long autim tok i tru. Yumi wok long lainim ol man long bihainim ol tok i tru bilong Baibel, na long dispela rot ol inap abrusim pasin bilong bagarapim bodi bilong ol long smok na dring planti na ol drak nogut. Taim planti milion nupela man i kamap disaipel, ol i kisim save long pasin bilong i stap klin na pasin bilong tingim gut ol narapela. Olsem na wok bilong autim tok i bin helpim planti man long lusim pasin bilong bagarapim graun. Tasol bikpela samting moa em olsem: Ol disaipel Kristen i save wok strong nau long senisim pasin bilong ol na bai God i orait long ol i stap long klinpela Paradais long graun liklik taim em bai kamapim bilong ol man i lotu tru long em.