Rausim Ol Samting Nogut—Long Bel na Tingting

JEHOVA i no bin putim laik long skin bilong man long laikim ol pipia na ol samting i stap nogut. God i wokim dispela graun bilong i stap olsem gutpela klinpela ples paradais na ol samting i stap stret. God i no laik bai dispela graun i stap nogut tru olsem wanpela traipela ples pipia.​—⁠Stat 2:​8, 9.

Tasol bipo ol man i sakim Jehova na ol yet i kirap long tingim rot bilong mekim graun i kamap gutpela ples paradais. Tasol ol i no gat save long dispela wok, na God i no soim rot long ol, olsem na ol i mas mekim nating na popaia nabaut, na long dispela rot tasol ol i mas kisim save. Ol samting i bin kamap long graun i kamapim klia tru olsem ol man i no inap bosim gut graun; inap planti tausen yia pinis, “sampela bikman i wok long daunim ol arapela manmeri na mekim nogut long ol.” (Saveman 8:⁠9; Jeremaia 10:23) Olsem na bikpela hevi i kamap long nau, olsem win na wara na graun i wok long bagarap; as bilong en, em ol man i no bosim gut graun.

Kisim Tingting Bilong God

Ol man i laik mekim ol samting God i laikim, ol i save wok strong long bihainim ol lo bilong em long ol samting i mas i stap klin. Olsem na taim ol Witnes Bilong Jehova i laik mekim wanpela bikpela kibung long Prak long Sekoslovakia long 1991, i gat planti samting ol i mas stretim pastaim.a Ol i ting, inap 75,000 manmeri bai bung, na Haus Stediam Strahov em inap long dispela bikpela lain. Tasol dispela haus i bin i stap nating inap 5-pela yia, na san na ren samting i mekim na ol samting long en i laik bagarap. Olsem na 1,500 Witnes i lusim 65,000 aua long stretim na klinim na penim. Orait, long taim bilong kirapim kibung, olgeta samting long dispela haus i stret na i klin, na em inap tru long ol i ken lotuim trupela God Jehova long en.

Wanem samting i save kirapim ol Witnes na ol i stap narapela kain long ol man bilong graun em ol i no tingting long ol samting i mas i stap klin na stret? Ol Witnes i pilim tru ol tok bilong Baibel long ol Kristen i mas rausim ol tingting kranki, olsem pasin bilong tingim yumi yet tasol, na mangal, na i no gat pasin sori. Baibel i tok, yumi mas ‘rausim olgeta pasin bilong olpela bel,’ na yumi mas ‘kamap nupela man. Oltaim God i save givim planti save long yumi na yumi kamap wankain olsem em yet.’ Taim yumi kamap olsem “nupela man,” yumi laikim ol samting i stap klin na stret na i gutpela bilong lukim, olsem na yumi no ken wok long tromoi nabaut pipia na mekim ol narapela samting i save bagarapim graun.​—⁠Kolosi 3:​9, 10; 2 Korin 7:1; Filipai 4:​8; Taitus 2:⁠14.

Taim Kristen i “kamap nupela man,” em i no ken tromoi nabaut pipia na bagarapim ples, o sakim ol lo bilong gavman i tambu long tromoi ol samting i save bagarapim win o wara samting. Dispela nupela pasin bilong Kristen i helpim em long tingim samting bilong narapela man na lukautim gut ol dispela samting, na em i no rait nabaut o malenim ol piksa long ol banis na diwai samting. Na nupela pasin bilong Kristen i kirapim em long klinim gut haus na ka na klos na skin bilong em.​—⁠Lukim Jems 1:⁠21.

Orait, sapos sampela man i no laik “kamap nupela man,” olsem kisim nupela pasin Kristen, yu ting God i gat asua taim em i tambuim ol long i stap long gutpela ples Paradais em bai kamapim? Nogat, a? Sapos long bel bilong man em i gat hap pasin yet long bagarapim ol samting long graun, orait, taim gutpela Paradais i kamap long graun, ating em bai wok long bagarapim, na dispela bai givim hevi long ol man i laik lukautim gut graun na bai em i ken i stap olsem gutpela Paradais. Olsem na laik bilong God long “bagarapim ol man i bin bagarapim graun,” dispela i stret na i kamapim pasin sori bilong em.​—⁠KTH 11:18; 21:8.

Yumi Mas Insait Long En?

Tasol yu ting ol Kristen i mas kirapim ol man long mekim ol samting bilong klinim graun na pasim ol man long tromoi nabaut pipia o marasin nogut o ol narapela samting i bagarapim graun?

Tru, ol dispela samting nogut i go long win na wara na graun em i save givim sik long man. Jehova i save tingim dispela samting, na dispela i kamap ples klia long ol lo em i bin givim long ol Israel. (Kisim Bek 21:​28-34; Lo 22:⁠8; 23:​12-14) Tasol Jehova i no bin tokim ol long kirapim ol narapela lain long mekim ol samting bilong lukautim graun na bai graun i no ken bagarap. Na Jehova i no bin tokim ol Kristen bilong pastaim long mekim olsem.

Long nau dispela wok bilong pasim sampela lain na bai ol i no ken bagarapim win o wara samting, em inap kamap olsem samting bilong politik. Ol i bin kamapim sampela lain politik bilong stretim hevi i kamap long pasin bilong tromoi ol pipia na marasin nogut samting na bagarapim graun. Sapos Kristen i go insait long dispela kain wok na em i helpim wanpela lain politik, em i insait long pasin bilong graun na em i no bihainim lo Jisas i bin givim long lain bilong em, olsem: “Ol i no bilong dispela graun, olsem mi yet mi no bilong dispela graun.” Sapos Kristen i sakim dispela lo, em i mas lukaut, nogut em i helpim “ol hetman bilong dispela graun, em ol lain i laik lus.”​—⁠Jon 17:16; 1 Korin 2:⁠6.

Jisas i no wok long painim rot bilong stretim olgeta hevi i kamap long taim bilong em, na em i no tokim lain bilong em long mekim olsem. Em i givim wok long ol olsem: “Yupela i mas i go mekim olgeta lain manmeri i kamap disaipel bilong mi. Na yupela baptaisim ol . . . Na yupela lainim ol long bihainim olgeta tok mi bin givim long yupela.” Em i no tokim ol long go insait long wok bilong pasim ol man long bagarapim ol samting long graun.​—⁠Matyu 28:​19, 20.

Jisas i bin tokim ol Kristen long nambawan bikpela samting ol i mas tingim. Em i tok: “Yupela i mas wok pastaim long painim kingdom bilong God wantaim stretpela pasin bilong em.” (Matyu 6:​33, Nupela Testamen bilong 1988) Bihain, long rot bilong Kingdom, Jehova bai strong long olgeta manmeri i mas bihainim ol stretpela lo bilong em, na long dispela taim pasin bilong bagarapim graun bai pinis olgeta, na ol man bai amamas tru long dispela samting.

Olsem na ol Witnes Bilong Jehova i save bihainim stretpela tingting long dispela samting. Olsem Rom 13:​1-7 i makim, ol i mas bihainim ol lo bilong gavman long lukautim win na wara na graun. Na ol Kristen i save laikim tru ol narapela man, olsem na ol i no save bagarapim ol samting bilong ol, olsem rait nabaut long banis bilong ol o tromoi nabaut pipia. Tasol Baibel i no tokim ol long go pas long wok bilong klinim na stretim gen graun. Ol i putim wok bilong autim tok bilong Kingdom i stap olsem nambawan wok bilong ol, long wanem, ol i save, dispela em i rot bilong helpim tru ol man.

Rausim Ol Doti Bilong Spirit

Planti taim Jehova i toksave long ol Israel, sapos ol i kilim i dai man, o bihainim pasin pamuk, o givim baksait long ol samting i holi, long dispela rot bai ol i bagarapim graun. (Namba 35:33; Jeremaia 3:​1, 2; Malakai 1:​7, 8) Jehova i tok long bagarapim ol sapos ol i bagarapim graun long ol doti bilong spirit​—⁠i no long doti bilong skin, olsem tromoi nabaut ol pipia samting.b

Long nau i gat bikpela wok bilong helpim ol man long kamap klin long ol samting bilong spirit. Bihain bai i gat wok long klinim tru olgeta hap bilong graun na rausim ol pipia tru na bai graun i no ken kamap olsem wanpela traipela ples pipia​—⁠em bai kamap gutpela ples tru i no gat pipia o samting nogut long en.​—⁠Saveman 3:⁠1.

[Ol Futnot]