Ples Paradais o Ples Pipia—Yu Laikim Wanem Kain Ples?

OLGETA man inap luksave olsem em i wanpela turis bilong Yurop, em i laik malolo na em i amamas long i stap long wanpela naispela ailan olsem paradais i gat gutpela san. Nambis i gat gutpela wesan, tasol taim man i wokabaut long dispela wesan, em i mas wok long abrusim planti pipia, olsem botol, tin, plastik, karamap bilong pike na loli, pepa samting. Em i kros long ol dispela pipia, long wanem, pastaim em i ting em i kam long wanpela gutpela ples paradais, tasol nau em i tingting​—⁠dispela i no olsem ples paradais.

Ating kain samting olsem i bin painim yu tu, a? Olsem wanem na sampela manmeri ol i gat laik long i go malolo long wanpela gutpela hap olsem paradais, tasol taim ol i kamap pinis ol i bagarapim dispela gutpela ples na mekim i kamap olsem ples pipia?

I No Long Ol Gutpela Hap Tasol

Dispela pasin bilong tromoi nabaut pipia na bagarapim ples, em i no kamap long ol gutpela hap tasol em ol turis i save raun long en. Nogat. Dispela pasin i kamap long planti hap. Ol bikpela haus faktori na ol kampani samting i save bagarapim win na wara samting​—⁠ol i save kamapim planti ton pipia na ol marasin nogut na ol i no tingting gut long wanem hap ol bai tromoi ol dispela pipia na marasin nogut. Olsem na ol dispela samting wantaim bikpela wel i save kapsait long ol sip na i go long solwara, em i wok long bagarapim bikpela hap bilong dispela graun bilong yumi, na i no inap wanpela samting i ken i stap laip long ol dispela hap.

Ol bikpela pait tu i save bagarapim graun. Long 1991 pait i kamap long Irak, dispela i nogutim tru graun. Ol soldia bilong Irak i kirapim paia long 600 bikpela hul ol i save kisim wel long en, na wanpela nius i tok, Kuwet i kamap olsem wanpela bikpela ples paia. Wanpela nius bilong Jemani (Geo) i tok, dispela em i wanpela samting nogut tru bilong bagarapim graun, na bipo ol man i no bin mekim kain samting nogut olsem long graun.

Taim dispela pait i pinis, ol kantri i kirap gen long stretim dispela bikpela bagarap i bin kamap long dispela hap. Ol i wok inap planti mun long mekim dai paia i stap long ol dispela hul i gat wel long en. Wanpela lain (World Health Organization) i tok, ol i ting olsem planti man bai dai long sik ol i kisim long smok nogut em dispela bikpela paia i bin kamapim.

Sampela Pasin Moa i Bagarapim Ples

Yumi bin stori long ol bikpela samting i bin kamap na i bagarapim tru ol samting long graun, tasol i gat planti samting moa ol man i mekim na i nogutim win na wara na graun. Ol i save tromoi nabaut planti pipia, olsem ol tin na botol na plastik samting, na ol i raitim nabaut ol tok na piksa long ol banis o ston samting. Tru dispela i no save bagarapim ol man olsem ol dispela bikpela samting yumi bin tok long en, tasol em i save mekim na ol gutpela gutpela ples i kamap ples nogut.

Long sampela hap ol i save rait nabaut long olgeta samting​—⁠long ples bilong wetim bas, na long ol banis, na long ples bilong telefon. Ol man i lukim dispela samting long olgeta taim na ol i no tingim moa.

Long sampela biktaun bai yu lukim ol pipia haus nogut na sampela i no gat man i stap long en. Na sampela haus ol i no klinim na stretim gut, na arere long haus tu i gat planti pipia. Na long sampela gutpela hap ol i tromoi ol pipia ka na masin na ol narapela pipia olsem, na ol i hip i stap.

Sampela lain ol i no tingting long waswas gut na mekim gut skin na bilas gut. Ol i bihainim stail bilong nau, em ol man na meri i save putim ol klos i no stret liklik na i no klin, na gras bilong ol i stap nogut. Ol i ting ol manmeri i save mekim gut skin na bilas gut ol i bihainim pasin bilong bipo na i no stail bilong nau.

Wanpela Bikpela Wok Tru!

Bilong rausim ol pipia na klinim ol nambis na bus na maunten na mekim i kamap olsem gutpela paradais olsem yumi lukim long nius bilong ol turis, dispela wok bai i bikpela wok tru! Na yumi tingim bikpela wok bilong klinim ol biktaun na ples na long helpim ol man long mekim gut skin bilong ol yet​—⁠em bikpela wok tru, a?

Dispela man pastaim yumi bin stori long em, em i amamas long lukim wanpela lain i raun long apinun na ol i wok long kisim ol pipia. Tasol sori tru, ol i lusim ol liklik liklik pipia olsem brukpela botol na ol tuptup bilong botol na ol liklik hap bilong tin na planti hap smok ol man i bin tromoi. Olsem na maski dispela lain wokman i kisim pinis ol bikpela bikpela pipia, dispela hap i stap yet olsem wanpela ples pipia na em i no olsem ples paradais.

Bilong klinim dispela graun olgeta na bai em i no ken kamap olsem wanpela traipela ples pipia, ol i mas rausim olgeta samting i save bagarapim graun na no ken larim wanpela samting olsem i stap. Tasol yu ting kain samting olsem bai kamap? Sapos olsem, ol bai mekim olsem wanem? Na husat ol bai mekim dispela wok? Na ol bai mekim long wanem taim?