Klostu Nau Bai Graun i Kamap Klinpela!

YUMI ken amamas tru long Jehova bai inapim laik bilong em long kamapim paradais long olgeta hap bilong graun, long wanem, em i Man bilong laikim ol samting i stap stret na klin. (Aisaia 11:​6-9) Em i tok promis olsem: “Tok bilong mi bai i no inap kam bek nating long mi. Nogat. Em bai i mekim ol samting i kamap olsem mi tok. Na em bai i kamapim ol samting mi gat laik long ol i mas kamap.” Na em i tok: “God i no inap tru long giaman.” Olsem na ol dispela tok i no inap lus nating.​—⁠Aisaia 55:11; Hibru 6:⁠18.

Gutpela tru Jehova bai pasim ol man bambai ol i no ken bagarapim graun olgeta na bai i no inap stretim gen!​—⁠KTH 11:18.

Jehova bai rausim ol man i bikhet na ol i wok long mekim ol samting i bagarapim win na wara na ol narapela samting long graun, na ol i sakim ol lo bilong em long ol samting i mas i stap stret na klin. Taim Paradais i kamap gen long graun, Jehova i no ken larim wanpela man i bagarapim dispela Paradais.​—⁠Sindaun 2:​20-22.

Taim Kingdom bilong God i bosim graun, Jisas bai bosim wok bilong rausim ol pipia o marasin nogut i bagarapim graun. Long dispela taim bihain, olgeta wan wan wokman bilong God i mas insait long wok bilong klinim na stretim gen graun.​—⁠Lukim Esekiel 39:​8-16.

Ol man i abrusim bagarap ol bai givim bel long wok bilong klinim na stretim gen graun, olsem ol i save givim bel long helpim ol man long kamap klin long ol samting bilong spirit long nau.​—⁠Song 110:⁠3.

Yumi ken bilip tru olsem graun bai kamap klin gen. Wanpela bikpela wok tru bai kamap bilong klinim graun, em Kingdom bai mekim. Bai i no gat ol rait nogut i stap long ol banis nabaut, na i no gat ol pipia olsem botol na tin na plastik na karamap bilong pike na loli na ol pipia pepa olsem niuspepa samting i slip nabaut long ol gutpela nambis o ol narapela gutpela ples.

Em nau, yumi ken amamas long wanem, klostu nau bai graun i kamap klin gen!

[Piksa long pes 7]

Bai yu insait long wok bilong klinim na stretim graun?