Planti Pipia Tumas—Nogut Em i Karamapim Yumi!
TAIM bilong yumi em i narapela kain. Long nau ol man i bin i go antap long mun na ol i kam bek, na i gat ol samting ol i kolim satelait i gat strongpela kamera long en na i save go antap tru inap planti milion kilomita na ol i save raun na kisim piksa bilong ol bikpela sta ol i kolim planet em ol i stap longwe moa, na ol i salim ol dispela piksa i kam bek. Na ol man i save go daun tru long as bilong bikpela solwara na ol i painim ol sip i bin bagarap long bipo yet, na ol i kamautim ol gutpela gutpela kago olsem gol samting i stap insait long ol dispela sip, em ol i bilong taim bilong bipo, na ol i bringim i kam antap. Na ol saveman i bin kisim save long mekim wok long atom—sampela wok i bilong helpim ol man, tasol sampela wok i nogut na i inap bagarapim ol bikpela taun wantaim olgeta manmeri i stap long en na pinisim ol olgeta. Na ol i kisim save long wokim wanpela liklik samting tru bilong komputa, mak bilong en inap olsem kapa bilong pinga bilong man, na ol inap putim olgeta tok bilong Baibel long en olsem kaset, na ol i ken harim ol tok bilong en. Ol dispela saveman i gat bikpela save moa yet long mekim kain kain samting, tasol olsem wanem na ol i no kisim save long pasin bilong rausim gut pipia na bai em i ken pinis olgeta na i no ken hip i go bikpela tru? Long nau ol man i tingting planti, nogut ol pipia i kisim ples na i karamapim ol tu!
Dispela hevi i go bikpela tru long Amerika na gavman i tingting planti long en. Long olgeta de ol man i save tromoi olsem 360,000 ton pipia—long olgeta yia ol i save tromoi 145 milion ton pipia. Sapos ol i tromoi long graun, em inap karamapim 1,000 ples bilong pilai kikbal na i hip i go antap inap olsem wanpela haus i gat 30 flua. Em wanpela nius (Newsweek) i tok olsem. Klostu olgeta dispela pipia ol i save kisim bilong pulimapim ol bikpela hap graun olsem ol ples baret samting. Long sampela hap olsem, ol pipia i hip i go antap tru.
Long Biktaun Nu Yok i gat wanpela bikpela ples pipia tru, inap olsem 800 hekta. Dispela bikpela ples pipia i stap long Ailan Staten long Nu Yok. Long olgeta de, long san na long nait, ol lain bilong kisim pipia ol i save kisim 22,000 ton pipia, na ol i save putim long planti sip olsem baj, i gat traipela bet long en bilong putim kago samting, na ol i karim ol dispela pipia i go long dispela ailan, na em i hip i go antap tru. Ol i tok, long yia 2000 dispela pipia bai hip i go antap moa yet, na em bai kisim bikpela hap graun moa yet. Na ol i tok, inap 10-pela yia moa dispela pipia bai go antap inap olsem 150 mita. Taim David Dinkins i kamap kaunsil bilong Biktaun Nu Yok, wanpela man bilong gavman i bosim ol dispela wok bilong pipia em i tok: ‘Gude. Mipela laik tok amamas long yu bin kamap kaunsil. Tasol sori tru, bai yu no gat ples bilong putim ol pipia long en!’
Wanpela saveman i tok, ‘Olgeta bikpela taun bilong Amerika ol i gat dispela hevi long painim ples bilong tromoi pipia.’ Wanpela nius bilong Amerika (U.S.News & World Report) i tok, ‘Ol traipela ples pipia long Amerika i wok long i go pulap olgeta, na ol i no wokim sampela nupela ples bilong tromoi pipia.’ Na dispela nius i tok, ‘Inap long 1995 ol i mas pasim planti ples pipia, long wanem ol inap bagarapim graun na ol wara samting.’
Ol i tok, sapos yumi skelim ol pipia ol man long Kalifonia i save tromoi, em i olsem olgeta wan wan man i save tromoi 1,100 kilogram pipia long olgeta wan wan yia. Wanpela saveman i tok, ‘Long hap bilong Los Anjelis yumi save tromoi planti pipia moa yet, inap long pulimapim bikpela haus Stediam Dodja long olgeta nainpela nainpela de samting.’ Ol i tok, inap long 1995 ol ples pipia long Los Anjelis bai pulap olgeta. Orait, ol man bilong dispela hap ol i tok, ‘Sapos olsem, bai mipela mekim wanem bihain?’ Tasol sampela man i ting, ol ples pipia bai pulap paslain long 1995. Wanpela saveman bilong lukautim ol wara na graun na win samting long Kalifonia em i tok, ‘Ol trak bilong kisim pipia ol i save raun raun long olgeta de bilong painim ples bilong tromoi pipia, tasol i no gat.’
Ol i ting, long yia 1995 samting ol i mas pasim olsem 33 ples pipia long biktaun Sikago. Sampela ol narapela bikpela taun bilong Amerika ol i gat wankain hevi, olsem na ol i save kisim ol trak pipia i go brukim boda bilong ples na ol i tromoi long narapela provins samting i gat ples bilong tromoi pipia. Ol dispela narapela provins i kros tru long ol man bilong ol narapela provins i kam tromoi pipia long hap bilong ol. Long hap bilong Amerika long olgeta de, ol trak pipia i save karim 25,000 ton pipia na ol i raun long ol rot bilong painim ples bilong tromoi ol dispela pipia. Ol ripot i tok, Nu Yok na Nu Jesi na Pensilvenia i save salim pipia bilong ol i go long ol narapela kantri, winim 7 milion ton long olgeta wan wan yia, long wanem ol i no gat ples bilong tromoi. Ol i lusim bikpela mani tru bilong mekim olsem. Na wanpela nius (Newsweek) i tok, sampela trak i gat ol frisa long en ol i save karim ol kaikai olsem abus samting i go long hap bilong Is na taim ol i laik i kam bek long hap bilong Wes ol i save pulimapim ol stingpela pipia long ol dispela trak na karim i kam, tasol ol liklik snek i pulap long dispela pipia! Gavman i laik putim lo bilong tambuim dispela kain pasin, long wanem em inap givim sik long ol man.
Sampela ol narapela kantri tu i gat wankain hevi olsem Amerika long painim ples bilong tromoi pipia bilong ol. Japan em wanpela kantri olsem, tasol em i wok strong long painim rot bilong stretim dispela hevi. Ol i tok, inap long yia 2005, Tokyo na 3-pela biktaun klostu long en bai ol i gat olsem 3 milion ton pipia ol i no gat ples bilong tromoi. Olsem na ol i ting ol tu i mas salim pipia bilong ol i go tromoi long ol narapela kantri.
Tru sampela kantri i no gat bikpela hevi yet long painim ples bilong tromoi pipia em ol i save kisim long haus bilong ol man, tasol ol kampani long dispela hap i gat hatwok long rausim pipia bilong ol samting ol i save wokim. Long sampela hap, ol kampani i gat ol traipela samting bilong kukim ol pipia bilong ol, tasol nau ol i gat hevi long painim ples bilong tromoi sit bilong paia, em inap olsem planti tausen ton, na sampela i gat marasin nogut long en inap long bagarapim man. Olsem na ol manmeri i pret na ol i toktok planti long ol kampani i tromoi ol dispela sit bilong paia long hap bilong ol. Em nau, ol kantri i tingting planti long dispela hevi bilong ol. Long nau ol i bin pulimapim pipia long sampela bikpela sip baj na ol i raun raun long solwara bilong painim wanpela kantri ol i ken baim ol bilong kisim dispela pipia em ol marasin nogut i stap long en. Tasol planti kantri i no laik.
Nau long dispela taim ol bikpela kantri i save baim ol kantri i rabis liklik bilong kisim planti tausen ton pipia bilong ol na tromoi long hap bilong ol. Sampela pipia ol i tromoi nating long graun na ol i no karamapim. Wanpela nius i tok, ‘Ol man bilong Yurop na Amerika i tingting strong long lukautim ples bilong ol yet na bai ol pipia nogut i no ken bagarapim ol wara na graun samting bilong ol. Tasol nau ol i save, bilong mekim olsem ol bai bagarapim ol narapela kantri.’—World Press Review.
Wanpela nius (The German Tribune bilong Oktoba 1988) i tok, biktaun bilong Swiselan, em Surik, i baim Frans na i salim sampela pipia i go long en; na Kanada na Amerika na Japan na Ostrelia tu ol i baim sampela kantri long hap bilong Is Yurop bambai ol i ken tromoi sampela pipia bilong ol long ol dispela hap.
Olsem wanpela man bilong gavman long Amerika i tok, ‘Dispela hevi bilong painim ples bilong tromoi pipia em i wanpela bikpela hevi tru—bipo mipela i no gat wanpela bikpela hevi olsem. Long taim bilong bikpela san na i no gat ren, ol man i save skelim gut wara na kisim liklik tasol na bai wara i no ken lus nating. Tasol yumi no save mekim olsem long pipia bilong yumi—yumi wok long tromoi bikpela pipia moa.
[Rait long pes 4]
Planti pipia tumas inap long pulimapim moa moa bikpela trak pipia
[Rait long pes 5]
Pipia em wanpela samting ol kantri i no laik baim long Japan