Narapela Kain Pipia!

LONG Fraide, Mas 24, 1989, bikpela sip Ekson Valdes i bam long wanpela rip long pasis long Alaska, na sip i bruk na 4 milion lita wel i kapsait i go long solwara. Dispela samting i bagarapim wok bisnis bilong ol man bilong kisim pis. Wel i go long ol hap bilong nambis inap planti handet kilomita na kilim i dai planti tausen pisin na animal bilong solwara.

Ol man i toktok yet long dispela samting, tasol i gat wanpela rong i bikpela moa na i save kamap long olgeta de!

Wanpela nius (Consumer Reports) i tok, taim ol man i senisim wel long ka bilong ol, ol i rausim olpela wel na ol i putim nupela wel long ensin bilong ka, na long olgeta yia ol i tromoi inap 750 milion i go inap 1,500 milion lita olpela wel, na liklik hap tasol bilong en ol i mekim wok long en, na ol i tromoi olsem pipia.

Long olgeta yia ol i kapsaitim planti lita olpela wel na i lus na i go insait long graun na long ol wara na long toilet. Em planti tru, winim wel i bin lus long taim sip Ekson Valdes i bin bagarap! I gat kain kain wel bilong ka, na taim ol man i senisim olpela wel bilong ka na putim nupela wel long en, olpela wel i olsem pipia​—tasol em i narapela kain pipia na em i nogut moa.

Dispela nius (Consumer Reports) i tok, dispela olpela wel inap bagarapim planti planti wara na bai ol man i no inap dring long en, na sapos ol i tromoi liklik hap wel i go long solwara, em bai go i go na karamapim bikpela hap bilong solwara.