Ol Witnes Bilong Jehova i Sanap Long Kot

TAIM lotu Kristen i kamap nupela, na i kam inap nau, ol man i bin birua long en. Jisas i tok: “Yupela lukaut long ol man. Ol bai i kotim yupela long ol kaunsil bilong ol . . . Ol bai i ting long daunim mi, na pulim yupela i go long ol gavman . . . na bai yupela i ken autim gutnius long ol dispela bikman.” (Matyu 10:​17, 18) Bihain long taim ol i kilim i dai Jisas ol i wok long mekim olsem long lain bilong em tu, tasol long nau ol i mekim pasin birua long narapela kain pasin. Tru ol i birua yet long wok bilong autim gutpela tok bilong Kingdom, tasol ol i birua tu long ol narapela samting bilong Kingdom.

Bilong Kisim Pikinini

Ol i bin putim sampela Witnes Bilong Jehova long kot long ol samting bilong lukautim pikinini. Ol i bin mekim olsem long Ostria, Beljam, Kanada, Frans, Nowe, Amerika, na sampela kantri moa. Taim poroman bilong wanpela marit i no insait long tok i tru na em i katim marit bilong tupela, kot i kamap long husat bai i kisim pikinini bilong tupela, na Witnes i lus long kot, na kot i givim pikinini long poroman i no Witnes.

Wanpela Witnes i lus long kot, na ol i tambuim em long toktok wantaim liklik pikinini bilong em long ol samting bilong lotu long taim em i go lukim pikinini. Sosaiti Wastaua i apil long dispela samting, tasol ol i lus long kot, olsem na long Epril 15, 1992, Sosaiti i apil long bikpela Sprim-Kot bilong Ohaio, na dispela kot i senisim tok bilong narapela kot bilong pastaim, na nau dispela Witnes i kisim pikinini bilong em. Sprim-Kot i daunim tok bilong wanpela man i bin sutim tok giaman long dispela Witnes long namba wan kot. Dispela man em i wanpela rauspela man i bin lusim tok i tru. Em i bin tok, ol Witnes i gat sik longlong, tasol bikpela jas bilong Sprim-Kot i tok, ‘dispela man i giaman, na em i mekim tok nogut long lain olgeta bilong wanpela lotu.’

Jas i tok: “Sapos papa o mama i no laik bai pikinini bilong em i salut long plak o insait long sampela kain pati o sampela pilai long skul, dispela i no as na bai kot i mas tambuim dispela papa o mama long lukautim dispela pikinini, nogat. Maski wanem lotu bilong papa o mama, kot i no ken tingim dispela na tekewe pikinini long wanpela. Olsem na dispela kot i senisim tok bilong kot bilong pastaim.” Nau dispela Witnes i amamas, na long Epril 17 em i kisim pikinini bilong em na tupela i kam long Haus Kingdom long bung bilong tingim dai bilong Krais, olsem Memorial.

Long Kanada, tupela hevi olsem i kamap, na Sprim-Kot bilong Kanada i mas stretim. Na long Ostria ol Witnes Bilong Jehova i bin winim bikpela kot. Wanpela lain (European Commission of Human Rights) i bin insait long dispela kot. Na long ol kantri Beljam na Frans na Nowe tu ol Witnes Bilong Jehova i bin kot long ol samting bilong lotu na ol i winim kot na kisim bek pikinini bilong ol. Na olsem Jisas i bin tok, long ol dispela kot ol Witnes i gat rot long kamapim tok i tru long ples klia na bai kot na loya i ken harim, na ol man i putim stori bilong en long ol nius na planti lain i harim.

Kot Long Blut

Taim ol Witnes i no laik kisim blut na ol i putim ol long kot, ol Witnes i bin winim sampela kot olsem. Ol i bin i go long Sprim-Kot bilong Florida, na Ilinoi, na Masasusets, na Nu Yok, na ol i winim kot. Tasol ol man i laik subim yet ol Witnes long kisim blut, olsem na planti kot i wok long kamap yet, na Dipatmen Bilong Givim Toksave Long Ol Haus Sik i wok strong long helpim ol sikman Witnes long ol samting bilong blut. Olsem na ol wokman bilong haus sik na ol dokta i kisim save long lo bilong ol Witnes long dispela samting, na nau ol haus sik i laik save hariap long husat ol sikman ol i bilong lain Witnes.

Wanpela Witnes meri Japan long Kalifonia i bin winim kot long San Diego. Bikpela sik i kamap long kru bilong het na tingting bilong em i dai. Taim em i no sik yet em i bin stretim ol tok long wanpela kat (Medical Directive), na em i bin bungim dokta long taim em i raun autim tok, na dokta i bin givim planti askim long em long bilip bilong em long ol samting bilong blut, na long kot ol i lukim dispela kat, na dokta tu i tokaut long bilip bilong dispela meri, olsem na jas i tok ol i no ken givim blut long em, long wanem, jas i save, dispela meri i no ken orait liklik long kisim blut, maski wanem samting i kamap. Em i winim kot.

Long Amerika ol i bin pasim han samting bilong wanpela Witnes meri na subim em long kisim blut, na taim man bilong em i laik helpim em ol i putim hankap long em na pulim em i go. Sosaiti i kamapim dispela rong long bikpela kot long Nu Yok, na kot i tok, dispela samting dokta na haus sik i mekim i no stret, olsem na nau i gat narapela kot gen long dispela samting. Na long narapela haus sik ol i bin holimpas wanpela yangpela Witnes na putim blut i go insait long em, na mama bilong em i bringim dispela rong i go long kot na liklik taim bai dispela kot i kamap. Yangpela i gat 16 krismas, na taim em i sakim blut ol i kisim tok orait long kot na ol i mekim dispela samting long em. Ol Witnes i apil long ol dispela samting, na i gat sampela ol narapela rong tu na ol Witnes i apil long ol dispela tu. Ol bai strong yet na bai stretpela pasin i ken kamap. Ol Witnes i save bihain God Jehova bai mekim na bai ol man i mas bihainim lo bilong em long olgeta samting.

Long Amerika, bihain long 1943 gavman i no kisim planti Witnes i go long kot long wok bilong ol long autim tok bilong Baibel. Tasol sampela ol man i gat tok long ol Witnes i mekim wok autim tok, na Sosaiti i mas mekim sampela samting bilong helpim ol dispela Witnes. Sampela Witnes i bin raun long ka na autim tok, na ol i go insait long banis bilong wanpela man na autim tok long em, tasol em i kros na em i lokim dua bilong banis na bai ol i no ken go ausait, na em i singautim polis i kam. Em i bikmaus long ol Witnes i sindaun i stap insait long ka bilong ol. Ol polis i kam, na ol i no holim ol Witnes​—ol i tok tenkyu long ol Witnes, long wanem, ol i ting dispela man em i olsem raskol na longtaim ol i laik holim em, tasol ol i no inap kam insait long banis bilong em. Tasol nau ol inap kam insait, long wanem, em yet i bin singautim ol! Olsem na ol i holim dispela man wantaim meri i stap wantaim em na ol i kalabusim tupela, na nau ol Witnes i kirap gen long autim tok long ol narapela man.

Ating sampela kot moa bai kamap bilong helpim wok bilong autim tok bilong Kingdom. Sosaiti i tenkyu long planti Witnes long olgeta hap ol i beten askim Jehova long helpim Sosaiti long winim ol dispela kot na bai ol i ken mekim yet wok bilong Jehova long autim gutpela tok bilong Kingdom long ol man. Taim ol Israel i laik kisim Graun Bilong Promis, Jehova i tokim ol, ol “bai i wok isi isi long” kisim. (Lo 7:22) Na i olsem tasol long ol Witnes long nau: “Isi isi” ol i wok long win. Tasol sapos ol i winim kot o nogat, taim ol i sanap long kot ol i gat gutpela rot long autim tok long ol bikman na long ol jas samting long haus kot na long gavman.

Bihain liklik Jehova bai litimapim olgeta lo bilong em na bihainim laik bilong em na bai i no gat sampela man i sakim lo bilong em long blut, o long husat i mas lukautim pikinini, o ol narapela samting, o husat bai stap king bilong olgeta hap. Em yet bai stap King, na lain bilong em bai stap bel isi, na bai i no gat man i ken putim hevi long ol. Ol bai sindaun gut na i stap amamas, na gavman bilong God, olsem Kingdom, em bai bosim ol​—long wanem, Jehova i Man bilong mekim stretpela pasin tasol.​—Song 37:28.

[Rait long pes 12]

Ol i pasim pikinini long rop samting na subim blut i go insait long em inap 8-pela aua